ವಾಹ್ ಅಪ್ಸರೆಯಂತಹ ಬೆಳ್ಳಗಿನ ತ್ವಚೆಗಾಗಿ ನೈಸರ್ಗಿಕ ಪರಿಹಾರಗಳು

ಟೊಮೇಟೊ ಹಣ್ಣು, ಜೇನು ಮತ್ತು ಮೊಸರು

ಮೂರು ಚೆನ್ನಾಗಿ ಹಣ್ಣಾದ ಮಧ್ಯಮಗಾತ್ರದ ಟೊಮೇಟೊ ಹಣ್ಣುಗಳ ಬೀಜಗಳನ್ನೆಲ್ಲಾ ತೆಗೆದು ಸಿಪ್ಪೆ ನಿವಾರಿಸಿ ಕೇವಲ ತಿರುಳನ್ನು ಸಂಗ್ರಹಿಸಿ ಮಿಕ್ಸಿಯಲ್ಲಿ ಅರೆಯಿರಿ. ಇದಕ್ಕೆ ಒಂದು ಚಮಚ ಜೇನು ಮತ್ತು ಎರಡು ಚಮಚ ಮೊಸರು ಸೇರಿಸಿ, ಮುಖದ ಮೇಲೆ ದಪ್ಪನಾಗಿ ಹಚ್ಚಿ, ವ್ಯತ್ಯಾಸ ನೋಡಿ!

ಕಿತ್ತಳೆ ಸಿಪ್ಪೆಯನ್ನು ಬಿಸಿಲಿನಲ್ಲಿ ಒಣಗಿಸಿದ ಪುಡಿ ಮತ್ತು ಮೊಸರು

ಕಿತ್ತಳೆ ಹಣ್ಣಿನ ಸಿಪ್ಪೆಗಳನ್ನು ಬಿಸಿಲಿನಲ್ಲಿ ಚೆನ್ನಾಗಿ ಒಣಗಿಸಿ ಬಳಿಕ ನುಣ್ಣಗೆ ಪುಡಿಮಾಡೆ. ಒಂದು ಬಟ್ಟಲು ಮೊಸರಿಗೆ ಸುಮಾರು ಎರಡು ಚಮಚ ಈ ಪುಡಿ ಸೇರಿಸಿ ಲೇಪನ ತಯಾರಿಸಿ. ಮುಖದ ಮೇಲೆ ದಪ್ಪನಾಗಿ ಹಚ್ಚಿ ಹದಿನೈದು ನಿಮಿಷಗಳೊಳಗೇ ತೊಳೆದುಕೊಳ್ಳಿ.

ಲಿಂಬೆಹಣ್ಣಿನ ಸಿಪ್ಪೆ ಮತ್ತು ಮೊಸರು

ಲಿಂಬೆಹಣ್ಣನ್ನು ಕಿವುಚಿ ರಸ ತೆಗೆದ ಬಳಿಕ ಒಳಭಾಗ ಹೊರಬರುವಂತೆ ಮಡಚಿ. ಹಣ್ಣಿನ ತಿರುಳು ಮತ್ತು ಒಳಭಾಗವನ್ನೆಲ್ಲಾ ನಿವಾರಿಸಿ ಕೇವಲ ಸಿಪ್ಪೆಯನ್ನು ಸಂಗ್ರಹಿಸಿ (ಇದಕ್ಕೆ ಪೂರ್ಣ ಹಣ್ಣಾಗಿ ಹಳದಿಯಾಗಿರುವ ಸಿಪ್ಪೆ ಉತ್ತಮ, ಹಸಿರು ಸಿಪ್ಪೆ ಹೆಚ್ಚು ಪರಿಣಾಮಕಾರಿಯಲ್ಲ) ಕಿತ್ತಳೆ ಸಿಪ್ಪೆಯ ವಿಧಾನವನ್ನೇ ಇಲ್ಲೂ ಅನುಸರಿಸಿ.

ಅರಿಶಿನ ಮತ್ತು ಮೊಸರು

ಎರಡು ಕಪ್ ಮೊಸರಿಗೆ ಒಂದು ದೊಡ್ಡಚಮಚ ಅರಿಶಿನ ಪುಡಿ ಸೇರಿಸಿ ಮಿಶ್ರಣ ಮಾಡಿ ಲೇಪನ ತಯಾರಿಸಿ. ಈ ಲೇಪನವನ್ನು ಕೆಳಭಾಗದಿಂದ ಮೇಲ್ಭಾಗಕ್ಕೆ ಒರೆಸುವಂತೆ ನಯವಾಗಿ ಮಸಾಜ್ ಮಾಡುತ್ತಾ ಲೇಪಿಸಿ. ಆದರೆ ಇದನ್ನು ವಾರಕ್ಕೆರಡು ಅಥವಾ ಮೂರು ಬಾರಿ ಮಾತ್ರ ಪ್ರಯೋಗಿಸಿ.

ಓಟ್ಸ್ ಮತ್ತು ಮೊಸರು

ಒಂದು ಕಪ್ ಮೊಸರಿಗೆ ಮೂರು ಚಮಚ ಓಟ್ಸ್ ಕಾಳುಗಳನ್ನು ಹಾಕಿ ಕೊಂಚ ಕಾಲ ನೆನೆಯಲು ಬಿಡಿ. ಬಳಿಕ ಮಿಕ್ಸಿಯಲ್ಲಿ ಅತಿ ನಯವಾಗದಷ್ಟು ಮಿಕ್ಸ್ ಮಾಡಿಕೊಳ್ಳಿ

ಸೇಬುಹಣ್ಣು ಮತ್ತು ಮೊಸರು

ಒಂದು ಸೇಬುಹಣ್ಣಿನ ಸಿಪ್ಪೆ, ತೊಟ್ಟು, ಬೀಜ ಮತ್ತು ಬೀಜಗಳನ್ನು ಆವರಿಸಿರುವ ಚೀಲಗಳನ್ನು ನಿವಾರಿಸಿ ಚಿಕ್ಕ ಚಿಕ್ಕ ತುಂಡುಗಳನ್ನಾಗಿ ಮಾಡಿ. ಒಂದು ಕಪ್ ಮೊಸರಿಗೆ ಸುಮಾರು ಒಂದು ಮಧ್ಯಮ ಗಾತ್ರದ ಸೇಬಿನಿಂದ ಸಂಗ್ರಹವಾದ ತುಂಡುಗಳನ್ನು ಸೇರಿಸಿ ಮಿಕ್ಸಿಯಲ್ಲಿ ಅರೆಯಿಸಿ. ಈ ವಿಧಾನವನ್ನು ಪ್ರಾತಃಕಾಲ ಪ್ರಥಮ ವಿಧಿಯಾಗಿ ಅನುಸರಿಸಿದರೆ ಉತ್ತಮ ಪರಿಣಾಮ ದೊರಕುತ್ತದೆ.

ಪಪ್ಪಾಯಿ ಮತ್ತು ಮೊಸರು

ಒಂದು ಚಿಕ್ಕ ತುಂಡು ಪಪ್ಪಾಯಿಯನ್ನು ತುರಿದು ಒಂದು ಕಪ್ ಮೊಸರಿಗೆ ಸೇರಿಸಿ ಮಿಕ್ಸಿಯಲ್ಲಿ ಅತಿ ನಯವಾಗದಷ್ಟು ಗೊಟಾಯಿಸಿ. ಈ ಮಿಶ್ರಣವನ್ನು ಮುಖಕ್ಕೆ ಹಚ್ಚುವ ಮೊದಲು ಮುಖಕ್ಕೆ ತೆಳುವಾಗಿ ಕೊಬ್ಬರಿ ಎಣ್ಣೆಯನ್ನು ಹಚ್ಚಿಕೊಳ್ಳಿ. ಇದರಿಂದ ಪಪ್ಪಾಯಿಯಲ್ಲಿರುವ ಆಮ್ಲೀಯ ಅಂಶ ಚರ್ಮವನ್ನು ಸುಡದಂತೆ ರಕ್ಷಿಸುತ್ತದೆ.

ಸ್ಟ್ರಾಬೆರಿ ಮತ್ತು ಮೊಸರು

ಒಂದು ಚಮಚದಷ್ಟು ಸ್ಟ್ರಾಬೆರಿ ಹಣ್ಣಿನ ತಿರುಳಿಗೆ ನಾಲ್ಕು ಚಮಚ ಮೊಸರು ಮತ್ತು ಒಂದು ಚಿಕ್ಕ ಚಮಚ ಲಿಂಬೆರಸವನ್ನು ಸೇರಿಸಿ ಮಿಶ್ರಣ ತಯಾರಿಸಿ. ಇದನ್ನು ಕಣ್ಣಿನ ಭಾಗಕ್ಕೆ ಹೆಚ್ಚು ಹೊತ್ತು ಹಚ್ಚಿಕೊಳ್ಳಬಾರದು. ಉಳಿದ ಭಾಗಗಳಿಗೆ ಸಾಮಾನ್ಯ ವಿಧಾನ ಅನುಸರಿಸಿ.

ಕಿವಿ ಹಣ್ಣು, ಮೊಸರು ಮತ್ತು ಟೊಮೇಟೊ ಸಾಸ್

ಸಮಪ್ರಮಾಣದಲ್ಲಿ ಮೊಸರು, ಕಿವಿ ಹಣ್ಣಿನ ತಿರುಳು, ಟೊಮ್ಯಾಟೋ ಸಾಸ್ ಸೇರಿಸಿ ಮಿಕ್ಸಿಯಲ್ಲಿ ಗೊಟಾಯಿಸಿ ಮಿಶ್ರಣ ತಯಾರಿಸಿ. ಕೊಂಚ ಹೆಚ್ಚಿನ ಪರಿಣಾಮಕ್ಕಾಗಿ ಕೆಲವು ಹನಿ ಲಿಂಬೆರಸವನ್ನೂ ಸೇರಿಸಬಹುದು. ಆದರೆ ಕಣ್ಣಿಗೆ ಹಚ್ಚುವಾಗ ಜಾಗ್ರತೆ ವಹಿಸಿ.

ಅಡುಗೆ ಸೋಡಾ ಮತ್ತು ಮೊಸರು

ಒಂದು ಕಪ್ ಮೊಸರಿಗೆ ಎರಡು ಚಿಟಿಕೆ ಅಡುಗೆ ಸೋಡಾ ಸೇರಿಸಿ ಮಿಶ್ರಣ ತಯಾರಿಸಿಕೊಳ್ಳಿ. ಇದು ಮೇಲಿನ ಎಲ್ಲಾ ವಿಧಾನಗಳಿಗಿಂತಲೂ ಪ್ರಬಲವಾದುದರಿಂದ ಹಿಂದಿನ ವಿಧಾನಗಳು ವಿಫಲವಾದರೆ ಮಾತ್ರ ಉಪಯೋಗಿಸಿ.