ಕೂದಲಿನ ಸಮೃದ್ಧ ಪೋಷಣೆಗೆ ಆಲೂಗಡ್ಡೆ ಜ್ಯೂಸ್

ಕೂದಲ ಬೆಳವಣಿಗೆಗೆ

ನಿಮ್ಮ ಕೂದಲು ಕೊತ್ತಂಬರಿ ಸೊಪ್ಪಿನ ಕಟ್ಟಿಗಿಂತಲೂ ಚಿಕ್ಕದಾಗಿದ್ದರೆ ನಿಮಗೆ ಆಲುಗಡ್ಡೆಯ ರಸ ಅತ್ಯಗತ್ಯವಾಗಿದೆ. ಏಕೆಂದರೆ ಇದರ ಪೋಷಣೆ ಕೂದಲ ಉದ್ದ ಹೆಚ್ಚಿಸುವಲ್ಲಿ ಪ್ರಮುಖವಾಗಿದ್ದು ಅತಿ ಶೀಘ್ರಸಮಯದಲ್ಲಿ ಕೂದಲು ದಟ್ಟವಾಗಿ ಬೆಳೆಯುತ್ತದೆ. ಆಲುಗಡ್ಡೆಯನ್ನು ಮಿಕ್ಸಿಯಲ್ಲಿ ಕಡೆದು ಹಿಂಡಿ ತೆಗೆದ ರಸವನ್ನು ತಲೆಗೆ ಹಚ್ಚುವ ಎಣ್ಣೆಯಂತೆಯೇ ಹಚ್ಚಿಕೊಂಡು ಕೊಂಚ ಸಮಯದ ಬಳಿಕ ಉಗುರುಬೆಚ್ಚನೆಯ ನೀರಿನಲ್ಲಿ ಸ್ನಾನ ಮಾಡಿಕೊಂಡರೆ ಉತ್ತಮ ಪರಿಣಾಮ ಪಡೆಯಬಹುದು. ಅತ್ಯುತ್ತಮ ಫಲಿತಾಂಶವನ್ನು ಪಡೆಯಲು ಈ ವಿಧಾನವನ್ನು ತಿಂಗಳಿಗೆ ಎರಡು ಬಾರಿ ಅನುಸರಿಸಿ.

ಕೂದಲಿಗೆ ಬಣ್ಣ ನೀಡಲು

ಕೂದಲ ಬಣ್ಣ ಬದಲಿಸಲು ಸಹಾ ಆಲೂಗಡ್ಡೆ ಉತ್ತಮವಾಗಿದೆ. ಇದಕ್ಕಾಗಿ ನೂರು ಮಿ.ಲೀ ಆಲೂಗಡ್ಡೆ ರಸಕ್ಕೆ ಐವತ್ತು ಮಿ.ಲೀ ಟೊಮೇಟೊ ರಸವನ್ನು ಸೇರಿಸಿ (ಸಿಪ್ಪೆ ಮತ್ತು ಬೀಜವನ್ನು ನಿವಾರಿಸಿ ಕೇವಲ ತಿರುಳನ್ನು ಅರೆದು ಹಿಂಡಿ ತೆಗೆದ ರಸ) ಮಿಶ್ರಣ ತಯಾರಿಸಿ. ಈ ಮಿಶ್ರಣವನ್ನು ಈಗ ತಾನೇ ತೊಳೆದು ಒಣಗಿಸಿದ ಕೂದಲಿಗೆ ದಪ್ಪನಾಗಿ ಹಚ್ಚಿ. ಎಲ್ಲಾ ಪ್ರಮಾಣವನ್ನು ಕೂದಲ ಎಲ್ಲಾ ಭಾಗಗಳಿಗೆ ಬರುವಂತೆ ಆವರಿಸಿ. ಸುಮಾರು ಹತ್ತು ನಿಮಿಷಗಳ ಬಳಿಕ ತೊಳೆದುಕೊಳ್ಳಿ. ಒಂದು ವೇಳೆ ಹೆಚ್ಚು ಬಿಳಿಚಿಸಬೇಕಿದ್ದರೆ ಹೆಚ್ಚು ಸಮಯ ಬಿಡಿ. ಬಳಿಕ ಗುಲಾಬಿ ನೀರು ಬಳಸಿ ತೊಳೆದುಕೊಳ್ಳಿ.

ಕೂದಲು ಉದುರುವುದನ್ನು ತಡೆಯಲು

ಕೂದಲುದುರುವಿಕೆಗೂ ಆಲೂಗಡ್ಡೆ ಫಲಪ್ರದವಾಗಿದೆ. ಇದಕ್ಕಾಗಿ ಐವತ್ತು ಮಿ.ಲೀ ಆಲುಗಡ್ಡೆ ರಸಕ್ಕೆ ಹತ್ತು ಮಿ.ಲೀ. ಕೊಬ್ಬರಿ ಎಣ್ಣೆ ಮತ್ತು ಐದು ಮಿ.ಲೀ ಆಲಿವ್ ಎಣ್ಣೆಯನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಇದನ್ನು ತಲೆಗೂದಲ ಬುಡಕ್ಕೆ ನಯವಾಗಿ ಮಸಾಜ್ ಮಾಡುತ್ತಾ ಹಚ್ಚಿ. ಬಳಿಕ ತಲೆಗೆ ಬಿಸಿಯಾಗಿರುವ ಟವೆಲೊಂದನ್ನು ಸುತ್ತಿ ಸುಮಾರು ಹದಿನೈದು ನಿಮಿಷ ಬಿಟ್ಟು ಉಗುರುಬೆಚ್ಚನೆಯ ನೀರಿನಿಂದ ತೊಳೆದುಕೊಳ್ಳಿ.

ಬಿಳಿಗೂದಲನ್ನು ಮರೆಮಾಚಲು

ತಲೆಗೂದಲಲ್ಲಿ ಅಲ್ಲಲ್ಲಿ ಬಿಳಿಗೂದಲು ಕಾಣಿಸಿಕೊಳ್ಳಲು ತೊಡಗಿದರೆ ಆಲೂಗಡ್ಡೆ ಜ್ಯೂಸ್ ಬಳಸಿ. ನಿತ್ಯದ ಶಾಂಪೂ ಬದಲಿಗೆ ಆಲುಗಡ್ಡೆ ರಸ ಹಚ್ಚಿ ಸ್ನಾನ ಮಾಡಿ. ಮೂರು ವಾರದಲ್ಲಿ ಬೆಳ್ಳಗಾಗಿದ್ದ ಕೂದಲುಗಳು ಸರಿಸುಮಾರು ಕಪ್ಪುವರ್ಣಕ್ಕೆ ತಿರುಗಿರುವುದನ್ನು ಗಮನಿಸಬಹುದು. ಇದರಿಂದ ಕೂದಲು ನಯವೂ, ಕಾಂತಿಯುತವೂ ಆಗುತ್ತದೆ.

ಒಣಗೂದಲಿಗೆ ಪೋಷಣೆ ನೀಡುತ್ತದೆ

ಐವತ್ತು ಮಿ.ಲೀ ಆಲೂಗಡ್ಡೆ ರಸ ಮತ್ತು ಒಂಬತ್ತು ಮಿ.ಲೀ ಲೋಳೆಸರದ ಲೇಪನ ಸೇರಿಸಿ ಮಿಶ್ರಣ ತಯಾರಿಸಿ. ಇದನ್ನು ಕೂದಲ ಬುಡದಿಂದ ತುದಿಯವರೆಗೆ ನಯವಾಗಿ ಬೆರಳುಗಳಿಂದ ಹಚ್ಚುತ್ತಾ ಹೋಗಿ. ಹದಿನೈದು ನಿಮಿಷ ಬಿಟ್ಟು ತಣ್ಣೀರು ಅಥವಾ ಉಗುರುಬೆಚ್ಚನೆಯ ನೀರಿನಿಂದ ತೊಳೆದುಕೊಳ್ಳಿ.

ತಲೆಬುರುಡೆಯಲ್ಲಿ ಎಣ್ಣೆಯಂಶ ಹೆಚ್ಚಾಗಿದ್ದರೆ ನಿವಾರಿಸುತ್ತದೆ

ಕೆಲವೊಮ್ಮೆ ಚರ್ಮದ ಗ್ರಂಥಿಗಳು ಒಸರುವ ದ್ರವಗಳು ತಲೆಬುರುಡೆಯನ್ನು ಎಣ್ಣೆಯಾಗಿಸುತ್ತವೆ. ಈ ತೊಂದರೆಯನ್ನು ನಿವಾರಿಸಲು ಸಮಪ್ರಮಾಣದಲ್ಲಿ ಅನ್ನದ ಗಂಜಿ ಮತ್ತು ಆಲೂಗಡ್ಡೆ ರಸವನ್ನು ಸೇರಿಸಿ ಮಿಶ್ರಣ ಮಾಡಿ.ಆಲೂಗಡ್ಡೆ ರಸದಲ್ಲಿರುವ ಪಿಷ್ಟ ಹೆಚ್ಚಿನ ಮತ್ತು ಅನಗತ್ಯ ಎಣ್ಣೆಯಂಶವನ್ನು ನಿವಾರಿಸಿ ಕೂದಲ ಆರೋಗ್ಯ ವೃದ್ಧಿಸುತ್ತದೆ.

ಹೇರ್ ಜೆಲ್ ತಹರ ಬಳಸಬಹುದು

ಇತ್ತೀಚೆಗೆ ಕೂದಲು ದೃಢವಾಗಿ ಒಂದೆಡೆ ಕೂರಲು ಅಥವಾ ನೆಚ್ಚಿನ ಕೇಶಶೃಂಗಾರ ರೂಪಿಸಲು ಹೇರ್ ಜೆಲ್ ಬಳಕೆಯಾಗುತ್ತಿದೆ. ಒಂದು ವೇಳೆ ಈ ಜೆಲ್ ಖಾಲಿಯಾದರೆ ಚಿಂತೆ ಬೇಡ ಒಂದು ದೊಡ್ಡ ಚಮಚ ಆಲೂಗಡ್ಡೆ ರಸ, ಎರಡು ದೊಡ್ಡ ಚಮಚ ಲೋಳೆಸರದ ದ್ರಾವಣ ಸೇರಿಸಿ ಮಿಶ್ರಣ ಮಾಡಿ. ಗಾಢವಾಗಿರುವ ಈ ಜೆಲ್ ಕೂದಲು ನೈಸರ್ಗಿಕ ಬಣ್ಣ ಪಡೆಯುವುದರ ಜೊತೆಗೇ ನೆಚ್ಚಿನ ಕೇಶಶೃಂಗಾರ ರೂಪಿಸಿಕೊಳ್ಳಲೂ ನೆರವಾಗುತ್ತದೆ.