ನೈಸರ್ಗಿಕ ಹೇರ್ ಸ್ಟ್ರೈಟ್ನಿಂಗ್‌ಗೆ ಕೆಲ ವಿಧಾನಗಳು

ಹಾಲು:

ಒಂದು ಸ್ಪ್ರೇ ಬಾಟಲ್‍ನಲ್ಲಿ 1/3 ಕಪ್‍ನಷ್ಟು ನೀರು ಮತ್ತು ಅಷ್ಟೇ ಪ್ರಮಾಣದಲ್ಲಿ ಹಾಲನ್ನು ಮಿಶ್ರ ಮಾಡಿಕೊಳ್ಳಿ. ಬಳಿಕ ಈ ಮಿಶ್ರಣವನ್ನು ಕೂದಲಿಗೆ ಸ್ಪ್ರೇ ಮಾಡಿಕೊಳ್ಳಿ. ಅಗಲವಾದ ಬಾಚಣಿಗೆಯಿಂದ ಕೂದಲನ್ನು ಬಾಚಿ, ಗಂಟುಗಳನ್ನು ತೊಲಗಿಸಿ, ಕೂದಲಿನ ಪ್ರತಿಯೊಂದು ಎಳೆಗೂ ಮಿಶ್ರಣ ಸರಿಯಾಗಿ ಕೋಟ್ ಆಗುವಂತೆ ನೋಡಿಕೊಳ್ಳಿ. ಸ್ನಾನಕ್ಕಿಂತ ಸುಮಾರು 1 ಗಂಟೆ ಮುಂಚೆ ಈ ರೀತಿ ಮಾಡೋದು ಉತ್ತಮ. ಬಳಿಕ ಸ್ನಾನದ ವೇಳೆ ಕೂದಲನ್ನು ಶಾಂಪೂ ಹಾಗೂ ಕಂಡೀಷನರ್‍ನಿಂದ ತೊಳೆಯಿರಿ ಅಷ್ಟೇ, ಮಿರಿಮಿರಿ ಮಿಂಚುವ ಸ್ಟ್ರೈಟ್ ಹೇರ್ ನಿಮ್ಮದಾಗುತ್ತದೆ. ಕೂದಲನ್ನು ಮತ್ತೊಮ್ಮೆ ತೊಳೆಯುವವರೆಗೆ ಕೂದಲು ಇದೇ ರೀತಿ ಇರುತ್ತದೆ.

ಹಾಲು ಮತ್ತು ಜೇನು:

ಕೇವಲ ಹಾಲು ಮಾತ್ರ ಉಪಯೋಗಿಸಿದರೂ ಕೂದಲನ್ನು ಸ್ಟ್ರೈಟ್ ಮಾಡಬಹುದು, ಆದ್ರೆ ಹಾಲಿನ ಜೊತೆಗೆ ಜೇನುತುಪ್ಪವನ್ನೂ ಸೇರಿಸಿದ್ರೆ ಕೂದಲಿಗೆ ಇನ್ನಷ್ಟು ಪೋಷಣೆ ದೊರಕುತ್ತದೆ. ಗುಂಗುರು ಕೂದಲನ್ನು ಈ ಮೂಲಕ ನೇರವಾಗಿಸಿ, ಮ್ಯಾನೇಜ್ ಮಾಡ್ಬಹುದು.

ಮುಲ್ತಾನಿ ಮಿಟ್ಟಿ:

ಒಂದು ಕಪ್‍ನ ತುಂಬಾ ಮುಲ್ತಾನಿ ಮಿಟ್ಟಿಯನ್ನು ತೆಗೆದುಕೊಳ್ಳಿ. ಅದಕ್ಕೆ ಒಂದು ಮೊಟ್ಟೆ ಮತ್ತು 5 ಚಮಚದಷ್ಟು ಅಕ್ಕಿ ಹುಡಿಯನ್ನು ಸೇರಿಸಿ, ಚೆನ್ನಾಗಿ ಮಿಶ್ರ ಮಾಡಿ. ಈಗ ನಿಮ್ಮ ಕೂದಲನ್ನು ಅಗಲವಾದ ಚಾಚಣಿಗೆಯಿಂದ 2-3 ಬಾರಿ ಬಾಚಿಕೊಂಡು, ಈ ಮಿಶ್ರಣವನ್ನು ತಲೆಗೆ ಹಚ್ಚಿಕೊಳ್ಳಿ. ಸುಮಾರು 40 ನಿಮಿಷಗಳ ಕಾಲ ಕೂದಲನ್ನು ಒಣಗಲು ಬಿಟ್ಟು, ಬಳಿಕ ಶುದ್ಧವಾದ ನೀರಿನಿಂದ ತೊಳೆಯಿರಿ. ಪ್ರತಿರಾತ್ರಿ ಮಲಗೋ ಮುಂಚೆ ಈ ಮಿಶ್ರಣವನ್ನು ಹಚ್ಚಿಕೊಳ್ಳೋದ್ರಿಂದ ಸದಾ ಸ್ಟ್ರೈಟ್ ಹೇರ್ ನಿಮ್ಮದಾಗುತ್ತೆ.

ಆಲಿವ್ ಆಯಿಲ್ ಮತ್ತು ಮೊಟ್ಟೆ:

2 ಮೊಟ್ಟೆಗಳನ್ನು ಒಡೆದು, ಸರಿಯಾಗಿ ಮಿಶ್ರ ಮಾಡಿಕೊಳ್ಳಿ. ಇದಕ್ಕೆ 1-2 ಚಮಚ ಆಲಿವ್ ಆಯಿಲ್ ಸೇರಿಸಿ, ಮತ್ತಷ್ಟು ಮಿಶ್ರ ಮಾಡಿ. ಒಂದು ಬ್ರಶ್‍ನ ಸಹಾಯದಿಂದ ಈ ಮಿಶ್ರಣವನ್ನು ತಲೆಗೆ ಹಚ್ಚಿಕೊಳ್ಳಿ. ಕೆಲ ಗಂಟೆಗಳ ಕಾಲ ಕೂದಲನ್ನು ಒಣಗಲು ಬಿಟ್ಟು, ಬಳಿಕ ಶಾಂಪೂವಿನ ಮೂಲಕ ತೊಳೆಯಿರಿ. ಇದರಿಂದ ಕೂದಲು ನೇರವಾಗುವುದರ ಜೊತೆಗೆ ಕೂದಲಿಗೆ ಉತ್ತಮ ಪೋಷಣೆಯೂ ಲಭಿಸುತ್ತದೆ.

ನಿಂಬೆ ರಸ ಮತ್ತು ತೆಂಗಿನ ಹಾಲು:

ತೆಂಗಿನಕಾಯಿಯನ್ನು ತುರಿದು, ಅದರ ಹಾಲನ್ನು ತೆಗೆದು ಒಂದು ಬಟ್ಟಲಿಗೆ ಹಾಕಿಕೊಳ್ಳಿ. ಈ ಹಾಲಿಗೆ ಸ್ವಲ್ಪ ಲಿಂಬೆರಸವನ್ನು ಸೇರಿಸಿ. ಈ ಮಿಶ್ರಣವು ಸ್ವಲ್ಪ ದಪ್ಪವಾಗುವವರೆಗೆ ಚೆನ್ನಾಗಿ ಮಿಶ್ರ ಮಾಡಿ. ಒಂದು ದಿನಗಳ ಕಾಲ ಈ ಮಿಶ್ರಣವನ್ನು ಫ್ರಿಡ್ಜ್‍ನಲ್ಲಿಟ್ಟು ತಂಪು ಮಾಡಿ. ಮರುದಿನ ಇದನ್ನು ತಲೆಗೆ ಹಚ್ಚಿಕೊಳ್ಳಿ, ಮತ್ತು ಬಿಸಿ ಟವೆಲ್‍ನ ಮೂಲಕ ಮಸಾಜ್ ಮಾಡಿ. ಒಂದು ಗಂಟೆ ಕಳೆದ ಬಳಿಕ ಕೂದಲನ್ನು ತೊಳೆಯಿರಿ. ವಾರದಲ್ಲಿ ಮೂರು ಬಾರಿ ಈ ರೀತಿ ಮಾಡೋದ್ರಿಂದ ಬಹಳ ಬೇಗ ಕೂದಲನ್ನು ಸ್ಟ್ರೈಟ್ ಮಾಡಿಸಿಕೊಳ್ಳಬಹುದು.

ಬಿಸಿ ತೆಂಗಿನೆಣ್ಣೆ:

ಸ್ವಲ್ಪ ತೆಂಗಿನೆಣ್ಣೆಯನ್ನು ತೆಗೆದುಕೊಂಡು, ಬಿಸಿ ಮಾಡಿ ನೆತ್ತಿಗೆ ಹಚ್ಚಿಕೊಳ್ಳಿ. ತಲೆಗೆ ಒಣಗಿದ ಟವೆಲ್ ಕಟ್ಟಿಕೊಂಡು ಸುಮಾರು 20-30 ನಿಮಿಷಗಳ ಕಾಲ ತಲೆಯನ್ನು ಒಣಗಲು ಬಿಡಿ. ಬಳಿಕ ಶ್ಯಾಂಪೂ ಹಾಕಿ ಕೂದಲನ್ನು ತೊಳೆಯಿರಿ. ಬಳಿಕ ಮತ್ತೆ ಸುಮಾರು 5 ನಿಮಿಷಗಳ ಕಾಲ ಮತ್ತೆ ಟವೆಲ್‍ನಿಂದ ಮುಚ್ಚಿ. ಡ್ರೈಯರ್ ಅಥವಾ ನೈಸರ್ಗಿಕವಾಗಿ ಕೂದಲನ್ನು ಒಣಗಿಸಿ. ಹೀಗೆ ಮಾಡೋದ್ರಿಂದ ಹೊಳಪಿನ ಸ್ಟ್ರೈಟ್ ಹೇರ್ ನಿಮ್ಮದಾಗುತ್ತೆ.