ಬೆಳ್ಳುಳ್ಳಿ ಬಳಸಿ ತ್ವಚೆಯ ಮೇಲಿನ ಮಚ್ಚೆ ನಿವಾರಿಸಲು ಮನೆಮದ್ದುಗಳು

ಬೆಳ್ಳುಳ್ಳಿ

ಮಚ್ಚೆ ನಿವಾರಣೆ ಮಾಡಲು ಇದು ತುಂಬಾ ಮೂಲ ವಿಧಾನವಾಗಿದೆ. ಬೆಳ್ಳುಳ್ಳಿ ಸಿಪ್ಪೆ ತೆಗೆದು ಅದನ್ನು ಸಣ್ಣ ತುಂಡುಗಳನ್ನಾಗಿ ಮಾಡಿ. ಇದನ್ನು ಮಚ್ಚೆ ಇರುವ ಜಾಗದಲ್ಲಿ ಇಟ್ಟುಕೊಂಡು ಅದಕ್ಕೆ ಬ್ಯಾಂಡೇಜ್ ಕಟ್ಟಿಕೊಳ್ಳಿ. 4-5 ಗಂಟೆಗಳ ಕಾಲ ಹಾಗೆ ಇರಲಿ. ಇದರ ಬಳಿಕ ಬ್ಯಾಂಡೇಜ್ ತೆಗೆದು ನೀರಿನಿಂದ ತೊಳೆಯಿರಿ. ದಿನದಲ್ಲಿ ಮೂರು ಸಲ ನೀವು ಈ ವಿಧಾನ ಅನುಸರಿಸಿ.

ಬೆಳ್ಳುಳ್ಳಿ ಮತ್ತು ಪೆಟ್ರೋಲಿಯಂ ಜೆಲ್

ಸಿಪ್ಪೆ ತೆಗೆದಿರುವಂತಹ 3-4 ಎಸಲು ಬೆಳ್ಳುಳ್ಳಿಯನ್ನು ಜಜ್ಜಿಕೊಂಡು ಅದರ ರಸ ತೆಗೆಯಿರಿ. ಮೊದಲು ಮಚ್ಚೆಗೆ ಸ್ವಲ್ಪ ಪೆಟ್ರೋಲಿಯಂ ಜೆಲ್ಲಿ ಹೆಚ್ಚಿಕೊಳ್ಳಿ. ಇದರಿಂದ ಬೆಳ್ಳುಳ್ಳಿ ಉಂಟುಮಾಡುವ ಉರಿಯನ್ನು ನಿವಾರಿಸಬಹುದು. ಕ್ಯೂಟಿಪ್ ಬಳಸಿಕೊಂಡು ಬೆಳ್ಳುಳ್ಳಿ ರಸವನ್ನು ಮಚ್ಚೆ ಇರುವಂತಹ ಜಾಗಕ್ಕೆ ಹಚ್ಚಿಕೊಳ್ಳಿ. ರಾತ್ರಿಯಿಡಿ ಹಾಗೆ ಬಿಡಿ. ಬೆಳಗ್ಗೆ ಎದ್ದ ಬಳಿಕ ತೊಳೆಯರಿ. ನಿಮಗೆ ಫಲಿತಾಂಶ ಸಿಗುವ ತನಕ ನೀವು ಇದನ್ನು ಪ್ರತಿನಿತ್ಯ ಬಳಸಿ.

ಬೆಳ್ಳುಳ್ಳಿ ಮತ್ತು ಹರಳೆಣ್ಣೆ

2-3 ಬೆಳ್ಳುಳ್ಳಿ ಎಸಲುಗಳು ಮತ್ತು ಕೆಲವು ಹನಿ ಹರಳೆಣ್ಣೆ ಇದಕ್ಕೆ ಬೇಕು. ಜಜ್ಜಿಕೊಂಡು ಅಥವಾ ರುಬ್ಬಿ ಬೆಳ್ಳುಳ್ಳಿ ಪೇಸ್ಟ್ ಮಾಡಿ. ಈ ಪೇಸ್ಟ್ ಗೆ ಕೆಲವು ಹನಿ ಹರಳೆಣ್ಣೆ ಹಾಕಿಕೊಂಡು ಸರಿಯಾಗಿ ಮಿಶ್ರಣ ಮಾಡಿ. ಇದನ್ನು ಮಚ್ಚೆ ಇರುವ ಜಾಗಕ್ಕೆ ಹಚ್ಚಿಕೊಳ್ಳಿ ಮತ್ತು ರಾತ್ರಿಯಿಡಿ ಹಾಗೆ ಬಿಡಿ. ಬೆಳಗ್ಗೆ ಇದನ್ನು ತೊಳೆದು, ಒರೆಸಿಕೊಳ್ಳಿ. ನಿಮಗೆ ವೇಗದ ಫಲಿತಾಂಶ ಬೇಕಿದ್ದರೆ ಆಗ ನೀವು ದಿನದಲ್ಲಿ ಎರಡು ಸಲ ಇದನ್ನು ಬಳಸಿಕೊಳ್ಳಿ. ಪೇಸ್ಟ್ ಹಚ್ಚಿಕೊಂಡ ಬಳಿಕ ಬ್ಯಾಂಡೇಜ್ ಸುತ್ತಿದರೆ ಒಳ್ಳೆಯದು.

ಬೆಳ್ಳುಳ್ಳಿ ಮತ್ತು ವಿನೇಗರ್

ಈ ಮನೆಮದ್ದಿಗೆ ನೀವು ಆ್ಯಪಲ್ ಸೀಡರ್ ವಿನೇಗರ್ ಅಥವಾ ಸಾಮಾನ್ಯ ಬಿಳಿ ವಿನೇಗರ್ ಬಳಸಬಹುದು. ಬೆಳ್ಳುಳ್ಳಿ ಎಸಲುಗಳನ್ನು ತೆಗೆದುಕೊಂಡು ರುಬ್ಬಿ ಪೇಸ್ಟ್ ಮಾಡಿ. ವಿನೇಗರ್ ಹಾಕಿಕೊಂಡು ಪೇಸ್ಟ್ ನ್ನು ತೆಳು ಮಾಡಿ. ಇದನ್ನು ಮಚ್ಚೆ ಇರುವಂತಹ ಜಾಗಕ್ಕೆ ಹಚ್ಚಿಕೊಳ್ಳಿ. 30 ನಿಮಿಷ ಕಾಲ ಹಾಗೆ ಇಡಿ. 30 ನಿಮಿಷ ಬಿಟ್ಟು ಸಾಮಾನ್ಯ ನೀರಿನಿಂದ ತೊಳೆದು, ಒರೆಸಿಕೊಳ್ಳಿ. ಪ್ರತಿನಿತ್ಯ ಇದನ್ನು ಬಳಸಿ.

ಬೆಳ್ಳುಳ್ಳಿ ಮತ್ತು ಈರುಳ್ಳಿ

ಬೆಳ್ಳುಳ್ಳಿ ಮತ್ತು ಈರುಳ್ಳಿಯನ್ನು ಜಜ್ಜಿಕೊಂಡು ರಸ ತೆಗೆಯಿರಿ. ಈ ಎರಡರ ರಸವನ್ನು ಮಿಶ್ರಣ ಮಾಡಿಕೊಂಡು ಹತ್ತಿ ಉಂಡೆಯಿಂದ ಮಚ್ಚೆಗಳು ಇರುವ ಜಾಗಕ್ಕೆ ಹಚ್ಚಿಕೊಳ್ಳಿ. 15 ನಿಮಿಷ ಕಾಲ ಹಾಗೆ ಬಿಡಿ. ನೀರಿನಿಂದ ತೊಳೆದು, ಒರೆಸಿಕೊಳ್ಳಿ. ದಿನದಲ್ಲಿ ಎರಡು ಸಲ ಇದನ್ನು ನೀವು ಬಳಸಿ. ಬೆಳ್ಳುಳ್ಳಿ ಜತೆಗೆ ಈರುಳ್ಳಿ ಬಳಸಿಕೊಂಡಾಗ ಕಪ್ಪ/ಕಂದು ಕಲೆಗಳು ಮಾಯವಾಗುವುದು.

ಕೆಲವು ಸಲಹೆಗಳು

1. ಬೆಳ್ಳುಳ್ಳಿ ಬಳಸುತ್ತಿರುವ ಕಾರಣದಿಂದಾಗಿ ಉರಿ ಕಂಡುಬರಬಹುದು. ಇದನ್ನು ತಪ್ಪಿಸಲು ನೀವು ಬೆಳ್ಳುಳ್ಳಿ ಪೇಸ್ಟ್ ನ್ನು ನೀರಿಗೆ ಹಾಕಿ, ಬಳಿಕ ಹಚ್ಚಿಕೊಳ್ಳಿ.

2. ಬೆಳ್ಳುಳ್ಳಿ ಹಚ್ಚಿದ ಬಳಿಕ ಮುಖವು ತುಂಬಾ ಒಣಗಿದ್ದರೆ ಆಗ ಸ್ವಲ್ಪ ಮಾಯಿಶ್ಚರೈಸರ್ ಹಚ್ಚಿಕೊಳ್ಳಿ.

3. ಬೆಳ್ಳುಳ್ಳಿ ಹಚ್ಚಿಕೊಂಡ ಬಳಿಕ ಮಚ್ಚೆಗಳನ್ನು ಉಜ್ಜಬೇಡಿ.

4. ಬಿಸಿಲಿಗೆ ಅತಿಯಾಗಿ ಮೈಯೊಡ್ಡಬೇಡಿ. ಬಿಸಿಲಿನಿಂದಾಗಿ ಕಲೆಗಳು ಚರ್ಮದಲ್ಲಿ ಮೂಡುವುದು.