ಹೆಜ್ಜೆಗೆ ಜೊತೆಯಾದವನಿಗೆ ಹೆಚ್ಚೇನು ಹೇಳಲಿ..!?

ಪ್ರೇಮ ಬರಹ

ಮಂದ ಬೆಳಕಲ್ಲಿ ನಿನ್ನ ಕಣ್ತುಂಬಿಕೊಂಡ ಮೊದಲ ಭೇಟಿ, ಗಂಟೆಗಟ್ಟಲೆ ಆಡಿದ ಮಾತು, ಮಳೆಯಲಿ ಕೈ ಕೈ ಹಿಡಿದು ಓಡಿದ ಆ ರಾತ್ರಿ, ಮತ್ತೆ ಹೋಗಬೇಕನ್ನೋ ನೆನಪೇ ಇಲ್ಲದೆ ಹರಟಿದ ಹಿತವಾದ ಘಳಿಗೆಗಳು, ಕುಗ್ಗಿ ಹೋದಾಗ ಬೆಚ್ಚಗೆಯ ಅಪ್ಪುಗೆಯಲ್ಲಿ ನೀ ಹೇಳಿದ ಸಾಂತ್ವನ, ಆಗೊಮ್ಮೆ ಈಗೊಮ್ಮೆ ಮುನಿಸು, ಮತ್ತೆ ವಿರಹ, ಮಗದೊಮ್ಮೆ ಪ್ರೇಮ ಬರಹ, ದೂರಾಗೋ ಮಾತಾಡಿ ಮತ್ತೆ ಪ್ರೇಮಖೈದಿ ಆಗಿಬಿಡುತ್ತಿದ್ದೆ.

ಪ್ರೇಮ ಬರಹ

ನೆನಪು ಮಾಡಿಕೊಂಡಷ್ಟೂ ಮತ್ತೂ ಬೇಕೆನಿಸುವ ನಿನ್ನ ಸನಿಹ, ತಪ್ಪು-ಸರಿಗಳ ಪರಾಮರ್ಶೆ, ಜೊತೆಗೊಂದಿಷ್ಟು ಹು‍ಚ್ಚು ಸಾಹಸ..ಕಳೆದೇ ಹೋಗಿ ಬಿಡೋಣ ಅಂತಾ ಜೊತೆಗೇ ಸುತ್ತಿದ ಸ್ಥಳಗಳು..ವಾಹ್..Life is beautiful. ಎರಡು ವರ್ಷ ಕ್ಷಣಗಳ ರೀತಿ ಕಳೆದು ಹೋಯ್ತಲ್ಲಾ. ನಿನ್ನ ಜೊತೆ ಇಟ್ಟ ಪ್ರತಿಯೊಂದು ಹೆಜ್ಜೆಯನ್ನೂ ಕಣ್ ಮು‍ಚ್ಚಿ ಇಟ್ಟಿದ್ದೀನಿ.

ಪ್ರೇಮ ಬರಹ

ಇಷ್ಟ-ಕಷ್ಟ, ನೋವು-ನಲಿವು, ಸಂಕಟ-ಸಂತಸಗಳನ್ನ ಸಾಧ್ಯವಾದಷ್ಟು ಅರಿಯೋ ಪ್ರಾಮಾಣಿಕ ಪ್ರಯತ್ನ ಮಾಡಿದ್ದೇನೆ. ಯಾವತ್ತೂ ನಿನ್ನ ಜೊತೆಯಾಗಿರ್ತೀನಿ ಅನ್ನೋ ಪ್ರಮಾಣ ಮಾಡ್ತಿದ್ದೀನಿ ಗೆಳೆಯಾ. ನಿನ್ನ ತ್ಯಾಗ, ತಾಳ್ಮೆ, ಮಗುವಿನಂತೆ ನನ್ನ ನೋಡಿಕೊಂಡ ರೀತಿ, ಭರಪೂರ ಬೆಂಬಲ,ಯಾವುದರ ಋಣವನ್ನೂ ತೀರಿಸೋಕೆ ಸಾಧ್ಯಾನೇ ಇಲ್ಲ ಬಿಡು. ನಿನ್ನ ನಿಷ್ಕಲ್ಮಶ ಪ್ರೀತಿಯಲ್ಲಿ ಜೀವನಪೂರ್ತಿ ಬಂಧಿಯಾಗಿರ್ಬೇಕು ಅನ್ನೋದು ನನ್ನಾಸೆ.

ಶಾಶ್ವತ ಪ್ರೇಮ ಖೈದಿ..!!

ನಮ್ಮ ಪ್ರೀತಿಗೆ ಸಾಕ್ಷಿಯಾಗಿ ದೇವತೆ ಮಡಿಲಲ್ಲಿ‌ ಬಂದು ಕೂತಿದ್ದಾಳೆ. ನಮ್ಮಿಬ್ಬರ ಪಿಸುಮಾತಿಗೆ ದನಿಯಾಗಿದ್ದ ಕನಸಿನ ಗೂಡಿನ ತುಂಬಾ ಈಗ ಅವಳದ್ದೇ ಕಲರವ. ನಮ್ಮಿಬ್ಬರ ಹೆಜ್ಜೆಯ ನಡುವೆ ಅವಳಿಡೋ ಪುಟಾಣಿ ಪಾದ ಪದಗಳಲ್ಲಿ ವರ್ಣಿಸಲಾಗದ ಖುಶಿ ಕೊಟ್ಟಿದೆ. ಜೀವನಪೂರ್ತಿ ಈ ಸಂಭ್ರಮವನ್ನು ಜತನದಿಂದ ಕಟ್ಟಿಕೊಟ್ಟ ನೀನು ನನ್ನ ಪಾಲಿಗೆ ನಿಜವಾದ ದೇವತಾ ಮನುಷ್ಯ..

ಇಂತಿ

ಶಾಶ್ವತ ಪ್ರೇಮ ಖೈದಿ..!!