ಮಕ್ಕಳಲ್ಲಿ ಸ್ಥೂಲಕಾಯಕ್ಕೂ ಹಾರ್ಮೋನುಗಳಿಗೂ ಸಂಬಂಧವಿದೆಯೇ?

ಮಕ್ಕಳಲ್ಲಿ ಇಂದಿನ ದಿನಗಳಲ್ಲಿ ಹೆಚ್ಚುತ್ತಿರುವ ಸ್ಥೂಲಕಾಯ ಕಳವಳಕಾರಿಯಾಗಿದೆ. ಅದರಲ್ಲೂ ಹದಿಹರೆಯ ದಾಟುತ್ತಿದ್ದಂತೆಯೇ ಕೆಲವು ಹಾರ್ಮೋನುಗಳ ಕೊರತೆಯಿಂದ ಸ್ಥೂಲಕಾಯ ಆವರಿಸುತ್ತದೆ ಎಂದು ಕೆಲವು ಸಂಶೋಧನೆಗಳು ತಿಳಿಸುತ್ತವೆ. ಸಂಶೋಧನೆಗಳ ಮೂಲಕ ಈ ತೊಂದರೆಗೆ ಸ್ಪೆಕ್ಸಿನ್ (spexin) ಎಂಬ ಹಾರ್ಮೋನಿನ ಉತ್ಪಾದನೆಯ ಕೊರತೆ ಎಂದು ಕಂಡುಬಂದಿದೆ.

ಈ ಹಾರ್ಮೋನಿನ ಕೊರತೆಯಿಂದ ಸ್ಥೂಲಕಾಯ ಆವರಿಸುತ್ತದೆ ಎಂಬುದೇನೋ ಸರಿ. ಆದರೆ ಇದೇ ಹಾರ್ಮೋನು ರಕ್ತದ ಒತ್ತಡ ಮತ್ತು ದೇಹದಲ್ಲಿ ಉಪ್ಪಿನ ಪ್ರಮಾಣವನ್ನು ನಿಯಂತ್ರಿಸುವ ಹಾರ್ಮೋನು ಸಹಾ ಆಗಿದೆ. ಹೆಚ್ಚಿನ ಹದಿಹರೆಯದವರಲ್ಲಿ ಮತ್ತು ಕೆಲವು ಹಿರಿಯರಲ್ಲಿಯೂ ಈ ಹಾರ್ಮೋನಿನ ಪ್ರಮಾಣ ಕಡಿಮೆಯಾಗಿದ್ದು ಸ್ಥೂಲಕಾಯಕ್ಕೆ ಕಾರಣವಾಗಿರಬಹುದು. ಮಕ್ಕಳಿಗೆ ಕಾಡುವ ಸ್ಥೂಲಕಾಯ, ಎಂದಿಗೂ ನಿರ್ಲಕ್ಷಿಸದಿರಿ

ಈ ನಿಟ್ಟಿನಲ್ಲಿ ನಡೆಸಿದ ಸಂಶೋಧನೆಯಲ್ಲಿ ತಜ್ಞರು ಐವತ್ತಕ್ಕೂ ಹೆಚ್ಚು ಸ್ಥೂಲಕಾಯದ ಮತ್ತು ಇಪ್ಪತ್ತು ಸಾಮಾನ್ಯ ಮೈಕಟ್ಟಿನ ಹದಿಹರೆಯದ ಯುವಕ ಮತ್ತು ಯುವತಿಯರ ಆರೋಗ್ಯದ ಮಾಹಿತಿಯನ್ನು ಕೂಲಂಕಶವಾಗಿ ವಿಶ್ಲೇಷಿಸಿ ಈ ತೀರ್ಮಾನಕ್ಕೆ ಬಂದಿದ್ದಾರೆ.

ಇವರ ರಕ್ತದ ಮಾದರಿಗಳನ್ನು ಪರೀಕ್ಷಿಸಿದಾಗ ಇದರಲ್ಲಿರುವ ಸ್ಪೆಕ್ಸಿನ್ ಅಂಶವನ್ನೂ ಪ್ರಮುಖವಾಗಿ ಪರಿಗಣಿಸಲಾಗಿತ್ತು. ಸಂಪೂರ್ಣ ಸಮೀಕ್ಷೆಯ ಬಳಿಕ ಸ್ಥೂಲಕಾಯಕ್ಕೂ ಈ ಹಾರ್ಮೋನಿಗೂ ನಿಕಟ ಸಂಬಂಧವಿರುವುದನ್ನು ಕಂಡುಕೊಳ್ಳಲಾಯ್ತು. ಸ್ಥೂಲಕಾಯದವರಲ್ಲಿ ಇದು ಗಣನೀಯವಾಗಿ ಕಡಿಮೆ ಇದ್ದು ಸಾಮಾನ್ಯ ಮೈಕಟ್ಟಿನವರಲ್ಲಿ ಸಮರ್ಪಕ ಪ್ರಮಾಣದಲ್ಲಿತ್ತು.

ಆದರೆ ಇದು ಈ ಸಂಶೋಧನೆಯ ಪ್ರಾಥಮಿಕ ಹಂತ ಮಾತ್ರವಾಗಿದ್ದು ಈ ಹಾರ್ಮೋನಿನ ಪ್ರಭಾವ ಮತ್ತು ಸ್ಥೂಲಕಾಯದ ಹಾಗೂ ಆರೋಗ್ಯದ ಮೇಲೆ ಇದರ ಪ್ರಮಾಣದ ಕೃತಕ ಏರುಪೇರು ಯಾವ ರೀತಿಯಲ್ಲಿ ಪರಿಣಾಮ ಬೀರುತ್ತದೆ ಎಂಬುದನ್ನು ಕಂಡುಕೊಳ್ಳಲು ಇನ್ನೂ ಸಂಶೋಧನೆಗಳಾಗಬೇಕಿದೆ. ಅಲ್ಲಿಯವರೆಗೆ ಈ ಹಾರ್ಮೋನಿನ ಬಳಕೆಯಿಂದ ಸ್ಥೂಲಕಾಯವನ್ನು ತಡೆಗಟ್ಟುವ ಯಾವುದೇ ವಿಧಾನಕ್ಕೆ ತಜ್ಞರು ತಮ್ಮ ಅನುಮೋದನೆಯನ್ನು ನೀಡಿಲ್ಲ.