ಅಧ್ಯಯನ ವರದಿ: ತಂದೆಯೇ ಮಗುವಿಗೆ ರೋಲ್‌ ಮಾಡೆಲ್

ಮಕ್ಕಳು ಮಾತನಾಡಲು ನಡೆದಾಡಲು ತೊಡಗುತ್ತಿದ್ದಂತೆ ತನ್ನ ತಂದೆ ತಾಯಿಯರಿಂದ ಕಲಿತುಕೊಳ್ಳುವ ಪ್ರತಿಯೊಂದು ವಿಷಯವೂ ಮುಂದಿನ ಜೀವನಕ್ಕೆ ಭದ್ರ ಬುನಾದಿಯಾಗುತ್ತದೆ. ಸಾಮಾನ್ಯವಾಗಿ ಕಿರಿಯ ಪ್ರಾಥಮಿಕ ತರಗತಿಯವರೆಗೂ ತಾಯಿಯಿಂದ ಕಲಿತುಕೊಳ್ಳುವ ವಿಷಯಗಳಿಗೆ ಹೆಚ್ಚು ಮಹತ್ವವಿದ್ದರೆ ಐದನೆಯ ತರಗತಿಯ ಬಳಿಕ ತಂದೆಯಿಂದ ಕಲಿತುಕೊಳ್ಳುವ ವಿಷಯಗಳೇ ಮುಂದೆ ಆ ಮಗುವಿನ ಸಾಮಾಜಿಕ ಬೆಳವಣಿಗೆಗೆ ಭದ್ರ ಬುನಾದಿಯಾಗುತ್ತದೆ ಎಂದು ಇತ್ತೀಚಿನ ಒಂದು ಸಂಶೋಧನೆ ತಿಳಿಸಿದೆ.

ಈ ವಿಷಯವನ್ನು ಖ್ಯಾತ ನಿಯತಕಾಲಿಕೆಗಳಾದ Early Childhood Research Quarterly ಮತ್ತು Infant and Child Development ಎಂಬ ಪತ್ರಿಕೆಗಳು ಪ್ರಕಟಿಸಿದ್ದು ಇದಕ್ಕೆ ಆಧಾರವಾಗಿ ಹಲವು ಮಾಹಿತಿಗಳನ್ನೂ ಒದಗಿಸಿದೆ. ಈ ಮಾಹಿತಿಗಳ ಪ್ರಕಾರ ಮಗುವಿನ ಬೌದ್ಧಿಕ ಮತ್ತು ಸಾಮಾಜಿಕ ಬೆಳವಣಿಗೆಗೆ ಇಡಿಯ ಕುಟುಂಬವೇ ಕಾರಣವಾಗಿದ್ದು ತಂದೆಯ ಮತ್ತು ತಾಯಿಯ ಪಾತ್ರ ಮಹತ್ತರವಾಗಿದೆ ಎಂದು ತಿಳಿಸಿದೆ. ಮುದ್ದಿನ ಮಗಳಿಗೆ ತಂದೆ ಹೇಳುವ 5 ಕಿವಿಮಾತುಗಳೇನು?

ಒಂದು ವೇಳೆ ಮಕ್ಕಳ ಬೆಳವಣಿಗೆಯ ಕುರಿತು ತಂದೆಯಾದವರು ತಮಗೆ ಮಕ್ಕಳಿಂದ ಒದಗುತ್ತಿರುವ ತೊಂದರೆ ಅಥವಾ ಒತ್ತಡ ಎಂಬ ರೀತಿಯಲ್ಲಿ ವರ್ತಿಸಿದರೆ ಇದು ಮಕ್ಕಳ ಮನಸ್ಸಿನ ಮೇಲೆ ಅಪಾರವಾದ ಋಣಾತ್ಮಕ ಭಾವನೆ ಮೂಡಿಸುತ್ತದೆ, ಇದರಿಂದ ಮಗುವಿನ ಕಲಿಕಾ ಸಾಮರ್ಥ್ಯ, ಭಾಷಾ ಸಾಮರ್ಥ್ಯಗಳು ಬಾಧೆಗೊಳಗಾಗುತ್ತವೆ ಎಂದು ಸಂಶೋಧನೆಯಲ್ಲಿ ಕಂಡುಕೊಳ್ಳಲಾಗಿದೆ. ವಿಶೇಷವಾಗಿ ಮಕ್ಕಳು ಎರಡರಿಂದ ಮೂರು ವರ್ಷದ ವಯಸ್ಸಿನವರಾಗಿರುವಾಗ ತಂದೆ ತಾಯಿಯರ ಪ್ರತಿಕ್ರಿಯೆಗಳು ಅಪಾರ ಪ್ರಭಾವ ಬೀರುತ್ತವೆ.

ವಿಶೇಷವಾಗಿ ಗಂಡು ಮಕ್ಕಳಲ್ಲಿ ಭಾಷಾ ಕಲಿಕೆಯಲ್ಲಿ ತಂದೆಯ ಪ್ರಭಾವ ಹೆಣ್ಣು ಮಕ್ಕಳಿಗಿಂತಲೂ ಹೆಚ್ಚಾಗಿರುತ್ತದೆ. ತದ್ವಿರುದ್ಧವಾಗಿ ಹೆಣ್ಣು ಮಕ್ಕಳಲ್ಲಿ ತಾಯಿಯ ಪ್ರಭಾವ ಹೆಚ್ಚಾಗಿರುತ್ತದೆ. ಮಕ್ಕಳ ಬೆಳವಣಿಗೆಯಲ್ಲಿ ತಂದೆ ತಾಯಿಯರು ಹೇಗೆ ನಡೆದುಕೊಳ್ಳುತ್ತಾರೆ ಎಂಬುದು ಮಕ್ಕಳ ಬಾಲ್ಯವನ್ನು ನಿರ್ಧರಿಸುತ್ತದೆ ಎಂದು ಸಂಶೋಧನೆ ತಿಳಿಸಿದೆ.

ಇದಕ್ಕೂ ಹಿಂದೆ ಮಕ್ಕಳ ಬೆಳವಣಿಗೆಯಲ್ಲಿ ತಂದೆಯ ಪಾತ್ರ ಹೆಚ್ಚಾಗಿರುವುದಿಲ್ಲ ಎಂದು ನಂಬಲಾಗಿತ್ತು. ಆದರೆ ಈ ಸಂಶೋಧನೆಯ ಮೂಲಕ ಇದುವರೆಗೆ ನಂಬಿಕೊಂಡು ಬಂದಿದ್ದ ಗ್ರಹಗತಿಗಳೆಲ್ಲಾ ಬದಲಾಗಲಿವೆ. ಮಕ್ಕಳ ಬಾಲ್ಯದ ತಾತ್ಕಾಲಿಕ ಬದಲಾವಣೆ ಮತ್ತು ಪ್ರಬುದ್ಧತೆಯ ಹಂತದಲ್ಲಿ ಕಾಣಬರುವ ಶಾಶ್ವತ ಬದಲಾವಣೆಗಳಿಗೆ ತಂದೆಯ ಪಾತ್ರ ಮಹತ್ತರವಾಗಿದೆ ಎಂದು ಮಿಶಿಗನ್ ಸ್ಟೇಟ್ ವಿಶ್ವವಿದ್ಯಾಲಯದ ಅಸೋಸಿಯೇಟ್ ಪ್ರೊಫೆಸರ್ ಕ್ಲೇರ್ ವ್ಯಾಲೋಟನ್‌ರವರು ತಿಳಿಸುತ್ತಾರೆ.

ಮಕ್ಕಳ ಸಾಮಾಜಿಕ ಬೆಳವಣಿಗೆಯಲ್ಲಿ ತಂದೆಯ ಮಾನಸಿಕ ಆರೋಗ್ಯ ದೀರ್ಘಕಾಲದ ಅಥವಾ ಶಾಶ್ವತವಾದ ಪ್ರಭಾವ ಬೀರುತ್ತದೆ. ಉದಾಹರಣೆಗೆ ಪರಿಸ್ಥಿತಿಗೆ ಅನುಗುಣವಾಗಿ ವರ್ತಿಸುವುದು, ಇತರರೊಂದಿಗೆ ಸಹಕರಿಸುವುದು, ತನ್ನ ಮೇಲೆ ನಿಯಂತ್ರಣವಿರಿಸಿ ಕೊಳ್ಳುವುದು ಇತ್ಯಾದಿ. ತಂದೆಯ ಪ್ರೀತಿ ಮಗುವಿಗೆ ಶ್ರೀರಕ್ಷೆಯಾಗಲು ಸಲಹೆಗಳು

ಈ ಪ್ರಭಾವ ಮಗು ಸುಮಾರು ಐದನೆಯ ತರಗತಿಯ ಹಂತದಲ್ಲಿದ್ದಾಗ ಗರಿಷ್ಠ ಮಟ್ಟದಲ್ಲಿರುತ್ತದೆ. ವ್ಯತಿರಿಕ್ತವಾಗಿ ತಂದೆಯ ಖಿನ್ನತೆ, ಒತ್ತಡ, ಸಿಡುಕುವಿಕೆ, ಕೋಪ ಮೊದಲಾದವು ಮಗು ಅಂಬೆಗಾಲಿಡುವ ಹಂತದಲ್ಲಿ ಹೆಚ್ಚು ಪ್ರಭಾವ ಬೀರುತ್ತಿದ್ದು ಕ್ರಮೇಣ ಕಡಿಮೆಯಾಗುತ್ತಾ ಬರುತ್ತದೆ. ಸಾಮಾಜಿಕ ಬೆಳವಣಿಗೆಗೆ ತಾಯಿಗಿಂತಲೂ ತಂದೆಯ ಪ್ರಭಾವವೇ ಹೆಚ್ಚು ಪರಿಣಾಮಕಾರಿಯಾಗಿದೆ ಎಂದು ಈ ಸಂಶೋಧನೆ ತಿಳಿಸುತ್ತದೆ.