ಫೆ.27ಕ್ಕೆ ಮಾಘ ಪೂರ್ಣಿಮೆ: ತುಂಬಾ ಶ್ರೇಷ್ಠ ಎಂದು ಹೇಳುವ ಈ ದಿನ ಮಾಘ ಸ್ನಾನದ ಮಹತ್ವವೇನು?

ಮಾಘ ಮಾಸದ ಪೂರ್ಣಿಮೆ

ಅದರಲ್ಲೂ ಮಾಘ ಮಾಸದ ಪೂರ್ಣಿಮೆ ತುಂಬಾ ವಿಶೇಷವಾದ ದಿನವಾಗಿದೆ, ಇದನ್ನು ಮಾಘಿ ಪೂರ್ಣಿಮೆ ಎಂದು ಕೂಡ ಕರೆಯಲಾಗುವುದು. ಇದು ಮಾಘ ಮಾಸದ ಕೊನೆಯ ದಿನವೂ ಹೌದು. ಈ ದಿನ ಪುಣ್ಯ ಸ್ನಾನ, ವಿಶೇಷ ಪೂಜೆ, ಧಾರ್ಮಿಕ ಕಾರ್ಯಗಳನ್ನು ಮಾಡಲಾಗುವುದು.

ಮಾಘ ಪೂರ್ಣಿಮೆ ಬೌದ್ಧ ಧರ್ಮದವರಿಗೂ ವಿಶೇಷವಾದ ದಿನವಾಗಿದ್ದು, ಈ ದಿನ ಗೌತಮ ಬುದ್ಧ ತಮ್ಮ ಸಾವಿನ ಬಗ್ಗೆ ಹೇಳಿದರು. ಮಾಘ ಪೂರ್ಣಿಮೆಯನ್ನು ಫೆಬ್ರವರಿ ತಿಂಗಳ 27ನೇ ತಾರೀಕಿನಲ್ಲಿ ಆಚರಿಸಲಾಗುವುದು.

ನಾವಿಲ್ಲಿ ಮಾಘ ಪೂರ್ಣಿಮೆಯ ಮಹತ್ವದ ಬಗ್ಗೆ ಹೇಳಿದ್ದೇವೆ ನೋಡಿ:

* ಈ ದಿನ ಭಕ್ತರು ಬೆಳಗ್ಗೆ ಬೇಗನೆ ಎದ್ದು ನದಿಯಲ್ಲಿ, ಸಂಗಮದಲ್ಲಿ ಮುಳುಗಿ ಏಳುತ್ತಾರೆ. ಯಾರಿಗೆ ನದಿಯಲ್ಲಿ ಸ್ನಾನ ಮಾಡಲು ಸಾಧ್ಯವಿಲ್ಲವೂ ಅವರು ಮನೆಯಲ್ಲಿ ತಾವು ಸ್ನಾನ ಮಾಡುವ ನೀರಿಗೆ ಗಂಗಾ ಜಲ ಹಾಕಿ ಸ್ನಾನ ಮಾಡುತ್ತಾರೆ.

* ಪುಣ್ಯ ಸ್ನಾನದ ಬಳಿಕ ಭಕ್ತರು ಪೂಜೆಗೆ ಅಣಿಯಾಗುತ್ತಾರೆ. ಈ ದಿನ ವಿಷ್ಣು ಹಾಗೂ ಹನುಮಾನ್‌ಗೆ ಪೂಜೆ ಸಲ್ಲಿಸಲಾಗುವುದು ಜೊತೆಗೆ ಇಷ್ಟ ದೇವರುಗಳಿಗೆ ಪೂಜೆ ಸಲ್ಲಿಸಲಾಗುವುದು. ಈ ದಿನ ಪಾರ್ವತಿ, ಬೃಹಸ್ಪತಿಯನ್ನು ಪೂಜಿಸಬೇಕು.

* ಈ ದಿನ ಸತ್ಯನಾರಾಯಣ ಪೂಜೆ ಮಾಡಲಾಗುವುದು. ವಿಷ್ಣು ದೇವಾಲಯಗಳಲ್ಲಿ ಬಾಳೆ ಎಲೆಯಲ್ಲಿ ಗಂಧ, ಎಳ್ಳು, ವೀಳ್ಯೆ, ಹಣ್ಣುಗಳನ್ನು ಇಟ್ಟು ಪೂಜಿಸಲಾಗುವುದು. ಭಾರತದಲ್ಲಿ ಎಲ್ಲಾ ವಿಷ್ಣು ದೇವಾಲಯಗಳಲ್ಲಿ ವಿಶೇಷ ಪೂಜಿಸಲಾಗುವುದು.

* ಈ ದಿನ ಉಪವಾಸ ವ್ರತ ಮಾಡುವುದರಿಂದ ಒಳಿತಾಗುತ್ತದೆ. ಚಂದ್ರನ ನೋಡಿದ ಬಳಿಕ ಒಂದು ಹೊತ್ತು ಊಟ ಸಲ್ಲಿಸಲಾಗುವುದು.

* ಈ ದಿನ ಬಟ್ಟೆ, ಆಹಾರ, ಧಾನ್ಯಗಳು, ತುಪ್ಪ, ಬೆಲ್ಲ, ಹಣ್ಣುಗಳು ಇವುಗಳನ್ನು ದಾನ ಮಾಡುವುದರಿಂದ ಒಳಿತಾಗುತ್ತದೆ. ಅಗ್ಯತವಿರುವ ಬ್ರಾಹ್ಮಣರಿಗೆ ದಾನ ಮಾಡಿ. ಈ ಮಾಘ ಮಾಸದಲ್ಲಿ ಪ್ರತಿದಿನ ಎಳ್ಳು ದಾನ ಮಾಡುವುದು ತುಂಬಾ ಶ್ರೇಷ್ಠವೆಂದು ಪರಿಗಣಿಸಲಾಗಿದೆ.

* ಕೆಲವು ಕಡೆ ಈ ದಿನ ಹಿರಿಯರಿಗೆ ತರ್ಪಣ ನೀಡಲಾಗುವುದು.

2021ರ ಮಾಘ ಪೂರ್ಣಿಮೆಯ ಮಹತ್ವದ ಸಮಯ

ಸೂರ್ಯೋದಯ: ಫೆಬ್ರವರಿ 27, 6:53ಕ್ಕೆ

ಸೂರ್ಯಾಸ್ತ:ಫ್ರಬ್ರವರಿ 27, 6:25ಕ್ಕೆ

ಪೂರ್ಣಿಮೆ ತಿಥಿ ಪ್ರಾರಂಭ: ಫೆಬ್ರವರಿ 26, ಸಂಜೆ 3:50ಕ್ಕೆ

ಪೂರ್ಣಿಮೆ ತಿಥಿ ಮುಕ್ತಾಯ: ಫೆಬ್ರವರಿ 27, ಮಧ್ಯಾಹ್ನ 1:47ಕ್ಕೆ

ಮಾಘ ಪೂರ್ಣಿಮೆಯಂದು ಪುಣ್ಯಸ್ನಾನದ ಮಹತ್ವ

ಈ ದಿನ ಜ್ಯೋತಿಷ್ಯ ಪ್ರಕರವೂ ತುಂಬಾ ಮಹತ್ವವಾದ ದಿನವಾಗಿದೆ. ಈ ದಿನ ಸೂರ್ಯ ಮಕರಕ್ಕೆ ಸಂಚಾರ ಮಾಡುತ್ತಾನೆ, ಚಂದ್ರ ಕರ್ಕ ರಾಶಿಗೆ ಚಲಿಸುತ್ತಾನೆ. ಆದ್ದರಿಂದ ಈ ದಿನ ಪುಣ್ಯ ಸ್ನಾನ ಮಾಡಿದರೆ ಎಲ್ಲಾ ಪಾಪಕರ್ಮಗಳು ದೂರವಾಗುವುದು, ಪುಣ್ಯ ಲಭಿಸುವುದು.

ಅಲ್ಲದೆ ಈ ಪುಣ್ಯ ಸ್ನಾನ ವೈಜ್ಞಾನಿಕ ದೃಷ್ಟಿಯಿಂದಲೂ ಒಳ್ಳೆಯದೇ ಆಗಿದೆ. ಮಾಘ ಪೂರ್ಣಿಮೆಯಂದು ಸ್ನಾನ ಮಾಡುವುದರಿಂದ ದೇಹಕ್ಕೆ ಶಕ್ತಿ ದೊರೆಯುತ್ತದೆ.