ಕೊರೊನಾ ವೈರಸ್ ಲಾಕ್‌ಡೌನ್‌: ಈ ಬಾರಿ ಗುಡ್‌ ಫ್ರೈಡೇ ಆಚರಣೆ ಹೇಗಿರಲಿದೆ?

ಗುಡ್‌ ಫ್ರೈಡೇ ಹಿಂದಿರುವ ಕತೆ

ಹಿಂದಿನಿಂದಲೂ ಪಾಪ ಪ್ರಾಯಶ್ಚಿತ್ತಕ್ಕಾಗಿ ಒಂದು ಪ್ರಾಣಿಯನ್ನು ಬಲಿ ಕೊಡುವ ಪದ್ಧತಿ ಇಸ್ರೇಲ್ ಜನಾಂಗದಲ್ಲಿತ್ತು. ಆದರೆ ಮಾನವನಿಗೆ ಪಾಪಗಳಿಗೆ ಕೇವಲ ಒಂದು ಪ್ರಾಣಿಯ ರಕ್ತ ಸಾಲದು, ಪರಿಶುದ್ಧವಾದ ರಕ್ತ ಬೇಕಿತ್ತು. ಅದೇ ತಂದೆಯಾದ ದೇವರ ಚಿತ್ತವಾಗಿತ್ತು. ಆಗ ತಂದೆಯ ಚಿತ್ತವನ್ನು ನೆರವೇರಿಸಲು ದೇವರ ಮಗನಾದ ಯೇಸುಕ್ರಿಸ್ತನು ಮುನುಷ್ಯಕುಮಾರನಾಗಿ ಜನಿಸುತ್ತಾನೆ. ತಂದೆಯಾದ ದೇವರ ಚಿತ್ತವನ್ನು ನೆರವೇರಿಸಲು ತನ್ನ ಪರಿಶುದ್ಧವಾದ ರಕ್ತವನ್ನು ಕಲ್ವಾರಿ ಶಿಲುಬೆಯಲ್ಲಿ ತನ್ನ ಮರಣಕ್ಕೆ ಒಪ್ಪುತ್ತಾನೆ. ಈ ಮೂಲಕ ಮನುಷ್ಯರನ್ನು ಪಾಪದಿಂದ ವಿಮೋಚನೆ ಮಾಡುತ್ತಾನೆ. ಆದ್ದರಿಂದ ಯೇಸು ಶಿಲುಬೆಗೆ ಏರಿದ ದಿನವನ್ನು ಗುಡ್‌ ಫ್ರೈಡೇ ಎಂದು ಆಚರಿಸುತ್ತಾರೆ.

ಯೇಸು ಅಪಾರವಾದ ನೋವು ಸಹಿಸಿ, ಸಾವಿನ ಸಮಯದಲ್ಲೂ ತನ್ನ ಆ ಸ್ಥಿತಿಗೆ ಕಾರಣರಾದರವನ್ನು ಕ್ಷಮಿಸಿ ಸಾಂತಿಯ ದೂತನಾಗುತ್ತಾನೆ. ಹಲವಾರು ಉನ್ನತ ಸಂದೇಶಗಳಿಗೆ ಸಾಕ್ಷಿಯಾದ ಸಾವು, ನೋವು ಮೀರಿದ ಮಾನವೀಯ ಆಯಾಯ ದೊರೆತ ಈ ದಿನವನ್ನು ಶುಭಶುಕ್ರವಾರವೆಂದು ಆಚರಿಸಲಾಗುವುದು.

ಆಚರಣೆ ಹೇಗಿರುತ್ತದೆ

ಯೇಸು ಕ್ರಿಸ್ತ ಬಂಧನಕ್ಕೆ ಒಳಗಾಗುವುದರಿಂದ ಹಿಡಿದು ಶಿಲುಬೆಯ ಮೇಲೆ ಸಾಯುವ ತನಕದ ಘಟನೆಗಳನ್ನು 14 ಭಾಗಗಳಾಗಿ ವಿಂಗಡಿಸಿ ಪ್ರತಿಯೊಂದು ಭಾಗವನ್ನು ಅವಲೋಕಿಸುತ್ತಾ ಪ್ರಾರ್ಥನೆ ಸಲ್ಲಿಸಲಾಗುವುದು. ಬಹುತೇಕ ಕ್ರೈಸ್ತರು ಬೂದಿ ಬುಧವಾರದಿಂದ ಇಲ್ಲಿಯವರೆಗೆ ಮಾಂಸ, ಪಾರ್ಟಿ ಇವುಗಳೆನ್ನೆಲ್ಲಾ ಬಿಟ್ಟು ಉಪವಾಸ ಮಾಡುತ್ತಾರೆ.

ಮನೆಯಲ್ಲಿಯೇ ಇದ್ದರೂ ಗುಡ್‌ಫ್ರೈಡೇ ಆಚರಣೆ ಹೇಗಿರಬೇಕು.

ಮನೆಯಲ್ಲಿಯೇ ಇದ್ದರೂ ಗುಡ್‌ ಫ್ರೈಡೇ ಆಚರಣೆಯ ಸಂದರ್ಭದಲ್ಲಿ ಒಳ್ಳೆಯ ಉಡುಪು ಧರಿಸಿರಬೇಕು. ಟಿವಿ ಸ್ವಿಚ್ಡ್‌ ಆಫ್‌ ಆಗಿರಬೇಕು, ಮೊಬೈಲ್‌ನಲ್ಲಿ ಯಾವುದೇ ಕರೆ ಸ್ವೀಕರಿಸಬಾರದು. ಧರ್ಮ ಗುರುಗ ಮಾರ್ಗದರ್ಶನದಂತೆ ನಡೆದುಕೊಳ್ಳಬೇಕು ಎಂದು ಚರ್ಚ್‌ನ ಧರ್ಮಗುರುಗಳು ಕ್ರೈಸ್ತ ಧರ್ಮದವರಿಗೆ ಸೂಚನೆ ನೀಡಿದ್ದಾರೆ. ಎಲ್ಲಾ ಆಚರಣೆಗಳನ್ನು ಆನ್‌ಲೈನ್ ಮೂಲಕ ನೋಡಿ ಪಾಲಿಸಬಹುದು. ಆದರೆ ಈ ಬಾರಿ ಪ್ರಸಾದ ಸಿಗುವುದಿಲ್ಲ.

ಈಸ್ಟರ್ ಹಬ್ಬ

ಗುಡ್‌ ಫ್ರೈಡೇ ಆದ ಮೂರನೇಯ ದಿನಕ್ಕೆ ಈಸ್ಟರ್ ಹಬ್ಬವನ್ನು ಆಚರಿಸಲಾಗುವುದು. ಯೇಸು ಶಿಲುಬೆಯಿಂದ ಎದ್ದುಬಂದ ದಿನವನ್ನು ಈಸ್ಟರ್‌ ದಿನವೆಂದು ಆಚರಿಸಲಾಗುವುದು. ಈಸ್ಟರ್ ಹಬ್ಬವನ್ನು ಸಡಗರ-ಸಂಭ್ರಮದಿಂದ ಆಚರಿಸಲಾಗುವುದು. ಈ ಬಾರಿ ಎಲ್ಲರೂ ತಮ್ಮ-ತಮ್ಮ ಮನೆಯಲ್ಲಿಯೇ ಆಚರಿಸಬೇಕಾಗುವುದು.