ಆಲೂಗೆಡ್ಡೆಯಿಂದ ಮನೆ ಕ್ಲೀನಿಂಗ್ ಹೇಗೆ?

Improvement

oi-Reena

By Hema S

Updated: Thursday, October 18, 2012, 17:08 [IST]

ಆಲೂಗೆಡ್ಡೆಯನ್ನು ಅಡುಗೆಗೆ ಬಳಸುತ್ತೇವೆ ಆದರೆ ಅದನ್ನು ಮನೆ ಕ್ಲೀನಿಂಗ್ ನಲ್ಲಿ ಬಳಸಿದರೆ ಅನೇಕ ಪ್ರಯೋಜನಗಳನ್ನು ಪಡೆಯುಬಹುದೆಂಬ ವಿಷಯ ಹೆಚ್ಚಿನವರಿಗೆ ಗೊತ್ತಿರುವುದಿಲ್ಲ. ಹಸಿ ಆಲೂಗೆಡ್ಡೆ ಮನೆ ಕ್ಲೀನಿಂಗ್ ನಲ್ಲಿ ಹೇಗೆ ಸಹಕಾರಿಯಾಗಿದೆ ಎಂದು ನೋಡೋಣ ಬನ್ನಿ:

ಮನೆ ಶುಚಿಯಲ್ಲಿ ಆಲೂಗೆಡ್ಡೆಯ ಬಳಕೆ:

ತುಕ್ಕು ಹೋಗಲಾಡಿಸಲು: ಕಬ್ಬಿಣದ ವಸ್ತುಗಳಿಗೆ ಬೇಗನೆ ತುಕ್ಕು ಹಿಡಿಯುತ್ತದೆ. ಈ ರೀತಿ ತುಕ್ಕು ಹಿಡಿದರೆ ಕಬ್ಬಿಣದ ವಸ್ತುಗಳು ಹಾಳಾಗುವುದು. ಈ ತುಕ್ಕನ್ನು ಹೋಗಲಾಡಿಸಲು ಆಲೂಗೆಡ್ಡೆಯನ್ನು ಬಳಸಿ. ಆಲೂಗೆಡ್ಡೆಯಲ್ಲಿ ಆಕ್ಸಾಲಿಕ್ ಆಸಿಡ್ ಇದ್ದು ಈ ಆಸಿಡ್ ತುಕ್ಕನ್ನು ಹೋಗಲಾಡಿಸುವ ಸಾಮರ್ಥ್ಯವನ್ನು ಹೊಂದಿದೆ. ತುಕ್ಕು ಹಿಡಿದಿರುವ ವಸ್ತುವಿಗೆ ಆಲೂಗೆಡ್ಡೆಗೆ ಸ್ವಲ್ಪ ಅಡುಗೆ ಸೋಡಾ ಹಾಕಿ ಉಜ್ಜಿ ತುಕ್ಕನ್ನು ಹೋಗಲಾಡಿಸಬಹುದು.

ಕಿಟಕಿಯ ಗ್ಲಾಸ್ ಗಳನ್ನು ಶುಚಿ ಮಾಡಲು: ಕಿಟಕಿಯ ಗ್ಲಾಸ್ ಕೊಳೆಯಾಗಿದ್ದರೆ ಹಸಿ ಆಲೂಗೆಡ್ಡೆಯನ್ನು ಗ್ಲಾಸ್ ಗೆ ಹಾಕಿ ಉಜ್ಜಿ, ನಂತರ ಹತ್ತಿಯ ಬಟ್ಟೆಯಿಂದ ಒರೆಸಿದರೆ ಕಿಟಕಿಯ ಗಾಜು ಸ್ವಚ್ಛವಾಗಿ ಕಾಣುವುದು.

ಒಡೆದ ಗ್ಲಾಸ್ ಚೂರುಗಳನ್ನು ತೆಗೆಯಲು: ಗ್ಲಾಸ್ ಬಿದ್ದು ಒಡೆದರೆ ಅದರ ಚಿಕ್ಕಚೂರುಗಳನ್ನು ಹೆಕ್ಕುವುದು ಕಷ್ಟ. ಆ ಸಮಯದಲ್ಲಿ ಆಲೂಗೆಡ್ಡೆಯನ್ನು ಸಮ ಅರ್ಧ ಮಾಡಿ ಅದರಿಂದ ನೆಲ ಒರೆಸಿದೆರೆ ಚಿಕ್ಕ ಗಾಜಿನ ಚೂರುಗಳು ಆಲೂಗೆಡ್ಡೆಗೆ ಅಂಟಿಕೊಳ್ಳುತ್ತದೆ.

ಹೂ ಗುಚ್ಛದಲ್ಲಿ ಹೂ ಚುಚ್ಚಿಡಲು ಬಳಸಬಹುದು: ಹೂಗಳು ನೇರವಾಗಿ ನಿಲ್ಲಲು ಫ್ಲವರ್ ಫಾಮ್ ಬಳಸಲಾಗುವುದು. ಅದರ ಬದಲು ಆಲೂಗೆಡ್ಡೆಯನ್ನು ಕತ್ತರಿಸಿದರೆ ಅದರಲ್ಲಿ ಹೂಗಳನ್ನು ಚುಚ್ಚಿ ನಿಲ್ಲಿಸಬಹುದು.

ಬೆಳ್ಳಿಯ ವಸ್ತುಗಳ ಶುಚಿತ್ವಕ್ಕೆ: ಬೆಳ್ಳಿಯ ವಸ್ತುಗಳನ್ನು ಟೂತ್ ಪೇಸ್ಟ್, ನಿಂಬೆರಸ, ಟೀ ಪುಡಿ, ಅಡುಗೆ ಸೋಡಾ ಇವುಗಳನ್ನು ಸಾಮಾನ್ಯವಾಗಿ ಬಳಸುತ್ತೇವೆ. ಬೆಳ್ಳಿಯ ವಸ್ತುಗಳಿಗೆ ಹಸಿ ಆಲೂಗೆಡ್ಡೆಯಿಂದ ಉಜ್ಜಿ ನಂತರ ತೊಳೆದರೆ ಬೆಳ್ಳಿ ವಸ್ತುಗಳು ಹೊಳಪನ್ನು ಪಡೆಯುತ್ತದೆ.