ವ್ಯಾಕ್ಸಿಂಗ್‌ನಿಂದ ಉಂಟಾಗುವ ಈ ತೊಂದರೆಗಳನ್ನು ತಡೆಯುವುದು ಹೇಗೆ?

ಕೂದಲು ತುಂಡಾಗುವುದು

ಶೇವಿಂಗ್‌ ಮಾಡುವಾಗ ಕೂದಲು ತುಂಡಾಗುತ್ತದೆ. ಇದರಿಂದ ಬೇಗನೆ ಬೆಳೆಯುವುದು. ವ್ಯಾಕ್ಸಿಂಗ್ ಮಾಡುವಾಗ ಚೆನ್ನಾಗಿ ಆಗದಿದ್ದರೆ, ಕೂದಲು ತುಂಡಾದರೆ ಅದನ್ನು ತೆಗೆಯಲು ಆಗುವುದಿಲ್ಲ, ತೆಗೆಯಲು ಪ್ರಯತ್ನಿಸಿದರೆ ತುಂಬಾ ನೋವಾಗುವುದು ಹಾಗೂ ಬೇಗನೆ ಬೆಳೆಯುವುದು.

ಕೆಂಪು ಗುಳ್ಳೆಗಳು ಮತ್ತು ತುರಿಕೆ

ತುಂಬಾ ಸೂಕ್ಷ್ಮ ತ್ವಚೆಯವರಿಗೆ ವ್ಯಾಕ್ಸಿಂಗ್ ಮಾಡಿಸಿದ ಬಳಿಕ ತುರಿಕೆ ಉಂಟಾಗುವುದು, ಇನ್ನು ಕೆಲವರಿಗೆ ಕೆಂಪು-ಕೆಂಪು ಗುಳ್ಳೆಗಳು ಏಳುವುದು. ಕೆಲವರಿಗೆ ಒಂದೆರಡು ದಿನದಲ್ಲಿ ಇದು ಸರಿ ಹೋದರೆ, ಇನ್ನು ಕೆಲವರಿಗೆ ಒಂದು ವಾರಕ್ಕಿಂತ ಹೆಚ್ಚು ದಿನ ಇರುತ್ತದೆ, ಇದರಿಂದಾಗಿ ಮೈ ಮೇಲೆ ಕಲೆಗಳು ಉಳಿಯುವ ಸಾಧ್ಯತೆಯೂ ಇದೆ.

ಏನು ಮಾಡಬಹುದು?

ಸೆನ್ಸಿಟಿವ್ ಅಂದರೆ ತುಂಬಾ ಸೂಕ್ಷ್ಮ ತ್ವಚೆಯವರು ವ್ಯಾಕ್ಸಿಂಗ್ ಮಾಡುವ ಮುನ್ನ ಪ್ಯಾಚ್‌ ಟೆಸ್ಟ್ ಮಾಡುವುದು ಒಳ್ಳೆಯದು. ಸಾಮಾನ್ಯ ತ್ವಚೆಯವರು ವ್ಯಾಕ್ಸಿಂಗ್‌ ಮಾಡಿದ ಬಳಿಕ ಮಾಯಿಶ್ಚರೈಸರ್‌ ಹಚ್ಚಿದರೆ ಸಾಕು. ಇನ್ನು ವ್ಯಾಕ್ಸಿಂಗ್ ಮಾಡಿ ಬಂದ ಬಳಿಕ ಬಿಸಿ ನೀರು ಹಾಕುವುದು, ಸೋಪು ಹಚ್ಚುವುದು ಮಾಡಬಾರದು. ಎರಡರಿಂದ ಮೂರು ದಿನದವರೆಗೆ ತುಂಬಾ ಬಿಸಿಲಿನಲ್ಲಿ ಓಡಾಡಬೇಡಿ.

ತ್ವಚೆ ನೇತು ಬೀಳುವುದು

ವ್ಯಾಕ್ಸಿಂಗ್‌ ಮಾಡುವುದರಿಂದ ತ್ವಚೆ ಸಡಿಲವಾಗುವ ಸಾಧ್ಯತೆ ಇದೆ. ವ್ಯಾಕ್ಸಿಂಗ್‌ ಮಾಡುವಾಗ ಕೂದಲನ್ನು ಎಳೆಯುತ್ತೇವೆ. ಹೀಗೆ ಎಳೆಯುವುದರಿಂದ ತ್ವಚೆ ಸಡಿಲವಾಗುವುದು.

ಏನು ಮಾಡಬಹುದು?

ಆಗಾಗ ವ್ಯಾಕ್ಸಿಂಗ್ ಮಾಡಬೇಡಿ, ತಿಂಗಳಿಗೊಮ್ಮೆ ಮಾಡಿಸಿ. ವ್ಯಾಕ್ಸಿಂಗ್‌ ಮಾಡಿದ ಬಳಿಕ ಮಾಯಿಶ್ಚರೈಸರ್ ಹಚ್ಚಿ ಆರೈಕೆ ಮಾಡಿ.

ತ್ವಚೆ ಕಪ್ಪಾಗುವುದು

ವ್ಯಾಕ್ಸಿಂಗ್ ಮಾಡುವುದರಿಂದ ತ್ವಚೆಯುರಿ ಉಂಟಾಗಿ, ತ್ವಚೆ ಕಪ್ಪಾಗುವ ಸಾಧ್ಯತೆ ಇದೆ. ಹಾಟ್‌ ವ್ಯಾಕ್ಸ್ ಹಾಕಿ ಕೂದಲನ್ನು ಎಳೆದು ತೆಗೆಯುವುದರಿಂದ ಅಲ್ಲಲ್ಲಿ ಚಿಕ್ಕ-ಚಿಕ್ಕ ಬೊಬ್ಬೆಗಳು ಎದ್ದು ಅವುಗಳು ಕಲೆಯಾಗುವುದು. ಕೈ ವ್ಯಾಕ್ಸ್ ಮಾಡಿದಾಗ, ಕಾಲಿನಲ್ಲಿ ಈ ರೀತಿ ಉಂಟಾಗುವುದು.

ಏನು ಮಾಡಬಹುದು?

ವ್ಯಾಕ್ಸ್ ಮಾಡಿದ ಬಳಿಕ ಮಾಯಿಶ್ಚರೈಸರ್ ಹಚ್ಚಬೇಕು. ಕೆಲವು ದಿನಗಳ ಬಳಿಕ ತ್ವಚೆಯನ್ನು ಎಕ್ಸ್‌ಫೋಲೆಟ್ ಮಾಡಬೇಕು. ಹೀಗೆ ಮಾಡಿದರೆ ತ್ವಚೆ ಹೊಳಪನ್ನು ಪಡೆಯುತ್ತದೆ.

ಸೂರ್ಯನ ಬಿಸಿಲಿಗೆ ಹೋಗಲು ಸಾಧ್ಯವಾಗುವುದಿಲ್ಲ

ವ್ಯಾಕ್ಸಿಂಗ್ ಮಾಡಿದ ಬಳಿಕ ಬಿಸಿಲಿನಲ್ಲಿ ಓಡಾಡಲು ಸಾಧ್ಯವಾಗುವುದಿಲ್ಲ. ಆದ್ದರಿಂದ ಟ್ರಿಪ್ ಹೋಗುವಾಗ, ಬೀಚ್ ಕಡೆ ಹೋಗುವಾಗ ವ್ಯಾಕ್ಸಿಂಗ್‌ ಮಾಡಿದ ವಾರದೊಳಗೆ ಹೋದರೆ ಸನ್‌ಟ್ಯಾನ್ ಆಗುವ ಸಾಧ್ಯತೆ ಹೆಚ್ಚು. ಬಿಸಿಲಿನಲ್ಲಿ ಸ್ವಲ್ಪ ಹೊತ್ತು ನಿಂತರೂ ಉರಿ ಉಂಟಾಗುವುದು ಹಾಗೂ ತ್ವಚೆ ಕಲೆಯುಂಟಾಗುವುದು.

ಏನು ಮಾಡಬಹುದು?

ವ್ಯಾಕ್ಸಿಂಗ್ ಮಾಡಿದ ಬಳಿಕ ಬಿಸಿಲಿನಲ್ಲಿ ಓಡಾಡುವಾಗ ಸನ್‌ಸ್ಕ್ರೀನ್ ಹಚ್ಚಲು ಮರೆಯಬಾರದು.

ತ್ವಚೆ ಕಿತ್ತು ಬರುವುದು

ವ್ಯಾಕ್ಸಿಂಗ್ ಮಾಡುವಾಗ ಸ್ವಲ್ಪ ಯಡವಟ್ಟಾದರೂ ತ್ವಚೆ ಕಿತ್ತು ಬರುವ ಸಾಧ್ಯತೆ ಇದೆ. ಇದರಿಂದ ಗಾಯವಾಗಿ ಆ ಭಾಗದಲ್ಲಿ ಕಲೆ ಉಳಿಯುವುದು. ವ್ಯಾಕ್ಸ್ ತುಂಬಾ ಬಿಸಿಯಾಗಿದ್ದಾಗ ಬಳಸಿದರೆ ಈ ರೀತಿ ಉಂಟಾಗುತ್ತದೆ. ಹಾಟ್‌ ವ್ಯಾಕ್ಸ್ ಹಚ್ಚಿ ಬೇಡದ ಕೂದಲನ್ನು ತೆಗೆದಾಗ ಗಾಯವಾಗುವ ಸಾಧ್ಯತೆ ಹೆಚ್ಚು.

ಏನು ಮಾಡಬಹುದು?

ವ್ಯಾಕ್ಸ್ ತುಂಬಾ ಬಿಸಿಯಾಗಿರದಂತೆ ನೋಡಿಕೊಳ್ಳಬೇಕು. ವ್ಯಾಕ್ಸ್ ತುಂಬಾ ಬಿಸಿಯಾಗಿದ್ದರೆ ಬಳಸಬೇಡಿ. ಇನ್ನು ವ್ಯಾಕ್ಸ್ ಮಾಡಿದ ಬಳಿಕ ಬೊಬ್ಬೆ ಬರುವುದನ್ನು ತಡೆಯಲು ಮಾಯಿಶ್ಚರೈಸರ್ ಹಚ್ಚಿ.