ಕಾಜು ಬರ್ಫಿ: ದೀಪಾವಳಿಗೆ ಸ್ಪೆಷಲ್ ರೆಸಿಪಿ

ಈ ದೀಪಾವಳಿಗೆ ಕಾಜೂ ಬರ್ಫಿಯನ್ನು ಬೇಕರಿಯಿಂದ ಕೊಂಡುಕೊಳ್ಳಬೇಕಾಗಿಲ್ಲ, ಅಷ್ಟೇ ರುಚಿಕರವಾದ ಬರ್ಫಿಯನ್ನು ನೀವೇ ತಯಾರಿಸಬಹುದು. ಇದನ್ನು ಮಾಡುವಾಗ ಸಕ್ಕರೆ ಪಾಕದ ಹದ ಸರಿಯಾಗಿದ್ದರೆ ಸಾಕು, ಸೂಪರ್ ರುಚಿಯ ಕಾಜು ಬರ್ಫಿ ರೆಡಿಯಾಗುವುದು.

ಬನ್ನಿ ಇದನ್ನು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಪದಾರ್ಥಗಳು
ಗೋಡಂಬಿ 1 ಕಪ್
ಜೋಳದ ಹಿಟ್ಟು 1 ಚಮಚ
ಸಕ್ಕರೆ ಅರ್ಧ ಕಪ್
ನೀರು 1/4 ಕಪ್
ತುಪ್ಪ
ಸಿಲ್ವರ್ ಕವರ್(ಬೇಕಿದ್ದರೆ ಬಳಸಬಹುದು)

ಮಾಡುವ ವಿಧಾನ:

* ಗೋಡಂಬಿಯನ್ನು ಪುಡಿ ಮಾಡಿ, ನಂತರ ಅದನ್ನು ಜೋಳದ ಹಿಟ್ಟಿನ ಜೊತೆ ಹಾಕಿ ಮಿಕ್ಸ್ ಮಾಡಿ ಇಡಿ.

* ಪ್ಯಾನ್ ಗೆ ನೀರು ಹಾಕಿ ಕುದಿಸಿ, ನೀರು ಕುದಿ ಬರುತ್ತಿರುವಾಗ ಸಕ್ಕರೆಯನ್ನು ಹಾಕಿ. ಸಕ್ಕರೆ ಕರಗಿ ಸಿರಪ್ ರೀತಿಯಾಗುವವರೆಗೆ ಕುದಿಸಿ.

* ಈಗ ಜೋಳ ಮತ್ತು ಗೋಡಂಬಿ ಮಿಶ್ರಣ ಪುಡಿಯನ್ನು ನಿಧಾನಕ್ಕೆ ಸಿರಪ್ ಗೆ ಹಾಕಿ, ಅದೇ ಸಮಯದಲ್ಲಿ ಪುಡಿ ಗಂಟು-ಗಂಟು ಆಗದಿರಲು ಸೌಟ್ ನಿಂದ ತಿರುಗಿಸಿ. ನಂತರ ಸಾಧಾರಣ ಉರಿಯಲ್ಲಿ ಪಾತ್ರೆಯ ಬಾಯಿ ಮುಚ್ಚದೆ ಬೇಯಿಸಿ, ಮಿಶ್ರಣ ತಳ ಹಿಡಿಯದಿರಲು ಸೌಟ್ ನಿಂದ ತಿರುಗಿಸುತ್ತಾ ಇರಿ. ಈ ರೀತಿ 5-6 ನಿಮಿಷ ಬೇಯಿಸಿದ ಬಳಿಕ, ತಟ್ಟೆಗೆ ಸುರಿಯಿರಿ. ಅದರ ಮೇಲೆ ಸ್ವಲ್ಪ ತುಪ್ಪವನ್ನು ಸುರಿದು ತಣ್ಣಗಾಗಲು ಬಿಡಿ. ನಂತರ ಅದನ್ನು ನಿಮಗೆ ಬೇಕಾದ ಆಕಾರಕ್ಕೆ ಕತ್ತರಿಸಿ, ಸಿಲ್ವರ್ ಪೇಪರ್ ಸುತ್ತಿ, ನಂತರ ಗಾಳಿಯಾಡದ ಡಬ್ಬಿದಲ್ಲಿ ಹಾಕಿ ಫ್ರಿಜ್ ನಲ್ಲಿಟ್ಟರೆ ಒಂದು ವಾರದವರೆಗೆ ಹಾಳಾಗುವುದಿಲ್ಲ.