ಊಟದ ರುಚಿ 10 ಪಟ್ಟು ಹೆಚ್ಚಿಸುತ್ತೆ ಈ ಚಟ್ನಿ! ರೊಟ್ಟಿ, ಚಪಾತಿ, ಇಡ್ಲಿ ಜೊತೆ ತಿಂದರೆ ಸ್ವರ್ಗ.. ಮಾಡೋದು ಹೇಗೆ?

ಬಿಸಿ ಅನ್ನ ಅಥವಾ ರೊಟ್ಟಿಗೆ ಈ ಶೇಂಗಾ ಬೆಳ್ಳುಳ್ಳಿ ಚಟ್ನಿ ಮಾಡಿ.. ಊಟದ ರುಚಿ ಹತ್ತು ಪಟ್ಟು ಹೆಚ್ಚಾಗುತ್ತೆ. ಹೌದು, ಚಳಿಗಾಲದಲ್ಲಿ ಬಿಸಿಬಿಸಿ ಊಟದ ಜೊತೆಗೆ ಖಾರವಾಗಿ ಏನಾದರೂ ತಿನ್ನಬೇಕು ಅನಿಸುತ್ತಿದೆಯೇ? ಹಾಗಿದ್ದರೆ ಈ ಶೇಂಗಾ ಬೆಳ್ಳುಳ್ಳಿ ಚಟ್ನಿ (Peanut Garlic Chutney) ನಿಮಗಾಗಿ. ಶೇಂಗಾದ ಗರಿಗರಿ ಮತ್ತು ಬೆಳ್ಳುಳ್ಳಿಯ ಘಾಟು ಎರಡೂ ಸೇರಿ ಅದ್ಭುತ ರುಚಿ ನೀಡುತ್ತದೆ. ಇಡ್ಲಿ, ದೋಸೆ, ಚಪಾತಿ ಅಥವಾ ಬಿಸಿ ಅನ್ನಕ್ಕೆ ತುಪ್ಪ ಹಾಕಿ ಈ ಚಟ್ನಿ ತಿಂದರೆ ಸ್ವರ್ಗವೇ ಸರಿ.

ನಮ್ಮಲ್ಲಿ ಚಟ್ನಿಗಳಿಗೆ ವಿಶೇಷ ಸ್ಥಾನವಿದೆ. ಸಾಮಾನ್ಯ ಊಟವನ್ನೂ ವಿಶಿಷ್ಟವಾಗಿಸುವ ಶಕ್ತಿ ಈ ಚಟ್ನಿಗಳಿಗಿದೆ. ಅದರಲ್ಲೂ ಚಳಿಗಾಲದಲ್ಲಿ, ಬಿಸಿಬಿಸಿ ಅನ್ನ ಅಥವಾ ರೊಟ್ಟಿಯೊಂದಿಗೆ ಖಾರವಾದ, ಘಮಘಮಿಸುವ ಚಟ್ನಿ ಇದ್ದರೆ ಹಸಿವು ಇಮ್ಮಡಿಯಾಗುತ್ತದೆ. ಕೇವಲ ಹತ್ತು ನಿಮಿಷಗಳಲ್ಲಿ ತಯಾರಿಸಬಹುದಾದ, ರುಚಿಕರ ಮತ್ತು ಪೌಷ್ಟಿಕಾಂಶಯುಕ್ತ ಶೇಂಗಾ ಬೆಳ್ಳುಳ್ಳಿ ಚಟ್ನಿ ರೆಸಿಪಿ ಇಲ್ಲಿದೆ. ಶೇಂಗಾ ಬೆಳ್ಳುಳ್ಳಿ ಚಟ್ನಿಯನ್ನು ತಯಾರಿಸಲು (Garlic Chutney Recipe) ಅತಿ ಕಡಿಮೆ ಮತ್ತು ಮನೆಯಲ್ಲೇ ಸಿಗುವ ಪದಾರ್ಥಗಳು ಸಾಕು.

Photo Credit: ಸಂಗ್ರಹ ಚಿತ್ರ

ಶೇಂಗಾ ಬೆಳ್ಳುಳ್ಳಿ ಚಟ್ನಿಗೆ ಬೇಕಾಗುವ ಸಾಮಗ್ರಿಗಳು

• ಶೇಂಗಾ (ಕಡಲೆಕಾಯಿ ಬೀಜ) - 1 ಕಪ್
• ಬೆಳ್ಳುಳ್ಳಿ - 8-10 ಎಸಳುಗಳು
• ಹಸಿ ಮೆಣಸಿನಕಾಯಿ ಅಥವಾ ಒಣಮೆಣಸಿನಕಾಯಿ - 5
• ಉಪ್ಪು - ರುಚಿಗೆ ತಕ್ಕಷ್ಟು
• ಎಣ್ಣೆ (ಸಾಸಿವೆ ಎಣ್ಣೆ ಅಥವಾ ಅಡುಗೆ ಎಣ್ಣೆ) - 1 ಚಮಚ
• ನೀರು - ಅವಶ್ಯಕತೆಗೆ ತಕ್ಕಷ್ಟು

ಶೇಂಗಾ ಬೆಳ್ಳುಳ್ಳಿ ಚಟ್ನಿ ತಯಾರಿಸುವ ವಿಧಾನ

- ಮೊದಲು ಒಂದು ಬಾಣಲೆ ಬಿಸಿ ಮಾಡಿ. ಒಂದು ಕಪ್ ಶೇಂಗಾವನ್ನು ಹಾಕಿ, ಮಧ್ಯಮ ಉರಿಯಲ್ಲಿ ತಿಳಿ ಕಂದು ಬಣ್ಣಕ್ಕೆ ತಿರುಗಿ, ಹಿತವಾದ ಘಮ ಸೂಸುವವರೆಗೆ ಚೆನ್ನಾಗಿ ಹುರಿಯಿರಿ.

- ಶೇಂಗಾ ಸೀದುಹೋಗದಂತೆ ನಿಗಾ ವಹಿಸುವುದು ಮುಖ್ಯ. ಹುರಿದ ನಂತರ ತಟ್ಟೆಗೆ ವರ್ಗಾಯಿಸಿ ತಣ್ಣಗಾಗಲು ಬಿಡಿ (ಬಯಸಿದಲ್ಲಿ ಸಿಪ್ಪೆ ತೆಗೆಯಬಹುದು).

- ನೀವು ಒಣಮೆಣಸಿನಕಾಯಿ ಬಳಸುತ್ತಿದ್ದರೆ, ಅವುಗಳನ್ನು ಎಣ್ಣೆಯಿಲ್ಲದೆ ಒಂದು ನಿಮಿಷ ಹುರಿಯಿರಿ. ಹಸಿಮೆಣಸಿನಕಾಯಿ ಬಳಸುವುದಾದರೆ, ನೇರವಾಗಿ ಉಪಯೋಗಿಸಬಹುದು. ಬೆಳ್ಳುಳ್ಳಿ ಎಸಳುಗಳನ್ನು ಸುಲಿದು ಸಿದ್ಧಪಡಿಸಿಕೊಳ್ಳಿ.

- ಈಗ ಮಿಕ್ಸರ್ ಜಾರ್‌ಗೆ ಹುರಿದ ಶೇಂಗಾ, ಬೆಳ್ಳುಳ್ಳಿ ಎಸಳುಗಳು, ಮೆಣಸಿನಕಾಯಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ. ಮೊದಲು ನೀರು ಹಾಕದೆ ತರಿತರಿಯಾಗಿ ರುಬ್ಬಿಕೊಳ್ಳಿ. ನಂತರ ನಿಮಗೆ ಬೇಕಾದ ಹದಕ್ಕೆ (ಗಟ್ಟಿ ಅಥವಾ ತೆಳು) ಸ್ವಲ್ಪ ಸ್ವಲ್ಪ ನೀರು ಸೇರಿಸುತ್ತಾ ನುಣ್ಣಗೆ ಅರೆಯಿರಿ.

- ಚಟ್ನಿಯನ್ನು ಒಂದು ಬೌಲ್‌ಗೆ ವರ್ಗಾಯಿಸಿ. ಇದಕ್ಕೆ ಒಂದು ಸಣ್ಣ ಚಮಚ ಸಾಸಿವೆ ಎಣ್ಣೆಯನ್ನು ಮೇಲೆ ಹಾಕಿ ಚೆನ್ನಾಗಿ ಬೆರೆಸಿ. ಸಾಸಿವೆ ಎಣ್ಣೆಯು ಈ ಚಟ್ನಿಗೆ ವಿಶಿಷ್ಟವಾದ ನಾಟಿ ರುಚಿಯನ್ನು ನೀಡುತ್ತದೆ.

ಚಳಿಗಾಲದಲ್ಲಿ ಈ ಚಟ್ನಿ ಏಕೆ ಶ್ರೇಷ್ಠ?

• ಶೇಂಗಾ ಮತ್ತು ಬೆಳ್ಳುಳ್ಳಿ ದೇಹಕ್ಕೆ ನೈಸರ್ಗಿಕವಾಗಿ ಉಷ್ಣತೆ ಒದಗಿಸುತ್ತವೆ. ಇದು ಚಳಿಗಾಲದಲ್ಲಿ ನೆಗಡಿ ಮತ್ತು ಕೆಮ್ಮಿನಂತಹ ಸಮಸ್ಯೆಗಳನ್ನು ದೂರವಿಡಲು ಸಹಕಾರಿ. ದೇಹವನ್ನು ಆಂತರಿಕವಾಗಿ ಬೆಚ್ಚಗಿಡಲು ಇದು ನೆರವಾಗುತ್ತದೆ.

• ಶೇಂಗಾದಲ್ಲಿ ಪ್ರೋಟೀನ್ ಮತ್ತು ಉತ್ತಮ ಕೊಬ್ಬಿನಾಂಶ ಹೇರಳವಾಗಿದೆ. ಬೆಳ್ಳುಳ್ಳಿಯು ರೋಗನಿರೋಧಕ ಶಕ್ತಿಯನ್ನು (Immunity) ಹೆಚ್ಚಿಸಲು ಸಹಾಯ ಮಾಡುತ್ತದೆ. ಇದು ಸ್ವಾದಿಷ್ಟ ಮಾತ್ರವಲ್ಲದೆ, ಪೌಷ್ಟಿಕಾಂಶಭರಿತವೂ ಆಗಿದೆ.

• ಈ ಚಟ್ನಿಯನ್ನು ಒಗ್ಗರಣೆಯ ಹಂಗಿಲ್ಲದೆ ಜಟಾಪಟಿಯಾಗಿ ತಯಾರಿಸಬಹುದು. ಇಡ್ಲಿ, ದೋಸೆ, ಚಪಾತಿ, ರೊಟ್ಟಿ ಮಾತ್ರವಲ್ಲದೆ, ಬಿಸಿ ಅನ್ನಕ್ಕೆ ತುಪ್ಪದೊಂದಿಗೆ ಬೆರೆಸಿಯೂ ಸವಿಯಬಹುದು.

ಒಟ್ಟಾರೆ, ದಿನನಿತ್ಯದ ಬೇಳೆ ಸಾರು ಅಥವಾ ಪಲ್ಯದಿಂದ ಬೇಸರವಾಗಿದ್ದರೆ, ಈ ಕಡಲೆಕಾಯಿ ಅಥವಾ ಶೇಂಗಾ ಬೆಳ್ಳುಳ್ಳಿ ಚಟ್ನಿ ನಿಮ್ಮ ಊಟದ ಸವಿಯನ್ನು ಖಂಡಿತ ಬದಲಿಸುತ್ತದೆ. ಹರಿಹರ ಅಥವಾ ಉತ್ತರ ಕರ್ನಾಟಕ ಶೈಲಿಯ ಈ ಚಟ್ನಿ ನಿಮ್ಮ ಅಡುಗೆಮನೆಯಲ್ಲಿ ಮ್ಯಾಜಿಕ್ ಸೃಷ್ಟಿಸುವುದು ಖಚಿತ. ಇಂದೇ ಈ ಸರಳ ರೆಸಿಪಿಯನ್ನು ಟ್ರೈ ಮಾಡಿ. ನಿಮ್ಮ ಅನಿಸಿಕೆಗಳ್ನು ನಮ್ಮೊಂದಿಗೆ ಹಂಚಿಕೊಳ್ಳಿ.