ಬಾಯಾರಿಕೆ ನೀಗಿಸುವ ಮಾವಿನಕಾಯಿ ತಂಬುಳಿ

Published: Friday, March 30, 2012, 14:41 [IST]

ಬೇಸಿಗೆಯಲ್ಲಿ ಬಾಯಾರಿಕೆ ಜಾಸ್ತಿ ಇರುವುದರಿಂದ ಮಜ್ಜಿಗೆ ಅಥವಾ ನಿಂಬೆ ಹಣ್ಣಿನ ಪಾನಕ ಇವುಗಳನ್ನು ಮಾಡಿಡುತ್ತಾರೆ. ಊರ ಕಡೆ ಹೋದರೆ ತಂಬುಳಿ ಎಂಬ ಪಾನಕವನ್ನು ಕೊಡುತ್ತಾರೆ. ಈ ಪಾನಕ ಬೇಸಿಗೆಯ ಬಾಯಾರಿಕೆಯನ್ನು ನೀಗಿಸುವುದರ ಜೊತೆಗೆ ಆರೋಗ್ಯಕ್ಕೂ ಒಳ್ಳೆಯದು. ಇದರಲ್ಲಿ ಅನ್ನವನ್ನು ಕಲೆಸಿ ತಿನ್ನಲು ಕೂಡ ರುಚಿಯಾಗಿರುತ್ತದೆ. ಇಲ್ಲಿ ನಾವು ಮಾವಿನಕಾಯಿ ತಂಬುಳಿ ರೆಸಿಪಿ ನೀಡಲಾಗಿದೆ ನೋಡಿ.

ಬೇಕಾಗುವ ಸಾಮಗ್ರಿಗಳು:
* ಸಿಪ್ಪೆ ತೆಗೆದ ಮಾವಿನಕಾಯಿ 1/2
* ತೆಂಗಿನತುರಿ - 1 ಕಪ್
* ಹಸಿಮೆಣಸು 1 ಅಥವಾ 1/2
* ರುಚಿಗೆ ಉಪ್ಪು
* ನೀರು 3 - 4 ಕಪ್
ಒಗ್ಗರಣೆಗೆ: ಎಣ್ಣೆ - 1 ಚಮಚ, ಸಾಸಿವೆ - 1/2 ಚಮಚ, ಚಿಟಿಕೆ ಇಂಗು, ಕರಿಬೇವು 4 - 5 ಎಲೆಗಳು

ಮಾಡುವ ವಿಧಾನ:

1. ಮಾವಿನಕಾಯಿ ಹೋಳು, ಹಸಿಮೆಣಸು, ತೆಂಗಿನತುರಿ ಹಾಕಿ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಬೇಕು.

2. ರುಬ್ಬಿದ ಮಿಶ್ರಣಕ್ಕೆ 3 ರಿಂದ 4 ಕಪ್ ನಷ್ಟು ನೀರು ಸೇರಿಸಿ ತೆಳ್ಳಗೆ ಮಾಡಿ, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ.

3. ಇದನ್ನು ಬೇಕಿದ್ದರೆ ಒಗ್ಗರಣೆ ಹಾಕಬಹುದು. ಇಷ್ಟು ಮಾಡಿದರೆ ರುಚಿಕರವಾದ ತಂಬುಳಿ ರೆಡಿ.