ಬೆಳಗಿನ ಅವಸರಕ್ಕೆ ಮೆಂತ್ಯದೋಸೆ

ಕುಸುಬುಲ ಅಕ್ಕಿ ಒಂದು ಕಪ್
ಉದ್ದಿನಕಾಳು ಅಕ್ಕಿಯ ಕಾಲು ಭಾಗದಷ್ಟು
ಮೆಂತ್ಯ 5 ಟೀ ಚಮಚ
ರುಚಿಗೆ ಉಪ್ಪು, ಅಡುಗೆ ಎಣ್ಣೆ
ಇಂಗು ಚಿಟಿಕೆ, ಜೀರಿಗೆ ಒಂದು ಚಮಚ

ತಯಾರಿಸುವ ವಿಧಾನ :

ಕುಸುಬಲ ಅಕ್ಕಿ , ಮೆಂತ್ಯ ಮತ್ತು ಉದ್ದಿನ ಕಾಳನ್ನು ಬೆಳಗ್ಗೆ 6 ಗಂಟೆಗೆ ನೆನೆ ಹಾಕಿದರೆ 8 ಗಂಟೆ ಹೊತ್ತಿಗೆ ನೆಂದಿರುತ್ತದೆ. ಸರಸರ ಮಿಕ್ಸಿಗೆ ಹಾಕಿದರೆ ಭರಭರ ರುಬ್ಬಿ ಹಿಟ್ಟು ರೆಡಿ ಆಗುತ್ತದೆ. ಹಿಟ್ಟಿಗೆ ಚೂರು ಎಣ್ಣೆಯಲ್ಲಿ ಬಿಸಿ ಮಾಡಿದ ಜೀರಿಗೆ, ಇಂಗು ಒಗ್ಗರಣೆ ಬೆರೆಸಿ. ಉಪ್ಪು ಹಾಕಿ. ಒಲೆಯ ಮೇಲೆ ಕಾವಲಿ ಸಿದ್ಧವಾಗಿರಲಿ. ಕಾವಲಿಗೆ ಹಿಡಿ ನೀರು ಎಸೆದರೆ ಚುಂಯ್! ಇವತ್ತಿನ ತಿಂಡಿ ಏನೆಂದು ಮನೆ ಮಂದಿ ಮತ್ತು ಪಕ್ಕದ ಮನೆಗೆ ಟಾಂಟಾಂ ಆಗುತ್ತದೆ. ಆಗಲಿ.

ಹಿಟ್ಟು ರೆಡಿ ಆದ ತಕ್ಷಣ ದೋಸೆ ಹುಯ್ಯಲು ಆರಂಭಿಸಬೇಕು. ತೆಳ್ಳಗೆ, ರವೆ ದೋಸೆ ರೀತಿಯಲ್ಲಿ ಕಾವಲಿ ಮೇಲೆ ದೋಸೆ ರಂಗೋಲಿ ಬಿಡಿಸಬೇಕು. ಚಟ್ನಿ ಮಾಡುವುದಕ್ಕೆ ಟೈಂ ಇರಲ್ಲವಾದ್ದರಿಂದ ಚಟ್ನಿಪುಡಿ, ಉಪ್ಪಿನಕಾಯಿಯಲ್ಲಿ ಸ್ವಲ್ಪ ಅಡ್ಜೆಸ್ಟ್ ಮಾಡಿಕೊಳ್ಳಿ. ಕಚೇರಿಗೆ ಹೊರಡಲು ಸಿದ್ಧರಾಗಿ.