ಬಾಳೆಕಾಯಿ ಮಿಶ್ರಿತ ಮಿಕ್ಸ್ಡ್ ವೆಜ್ ಅವೀಲ್

ಮಾಡುವ ವಿಧಾನ

ಬಾಳೆಕಾಯಿಯ ಸಿಪ್ಪೆ ತೆಗೆದು ಕತ್ತರಿಸಿ ನೀರಿಗೆ ಹಾಕಿಕೊಳ್ಳಿ. ಒಂದೆರಡು ನಿಮಿಷದ ನಂತರ ಆ ನೀರನ್ನು ಎಸೆಯರಿ. ಆಗ ಬಾಳೆಕಾಯಿಯ ಚೊಗರಿನ ಅಂಶ ಹೊರಟು ಹೋಗುತ್ತದೆ ಮತ್ತು ಬಾಳೆಕಾಯಿ ಹೆಚ್ಚಿದ ಕೂಡಲೇ ಕಪ್ಪಾಗುವುದನ್ನು ಇದರಿಂದ ತಡೆಯಬಹುದು.

ಬೀನ್ಸ್, ಕ್ಯಾರೆಟ್, ಆಲೂಗಡ್ಡೆ ಎಲ್ಲವನ್ನೂ ಚೆನ್ನಾಗಿ ತೊಳೆದು ನಿಮ್ಮ ಅನುಕೂಲದ ಗಾತ್ರಕ್ಕೆ ಹೆಚ್ಚಿಕೊಳ್ಳಿ.

ಎಲ್ಲಾ ತರಕಾರಿಗಳನ್ನು ಸೇರಿಸಿ ಉಪ್ಪು ಹಾಕಿ ಬೇಯಿಸಿಕೊಳ್ಳಿ.

ತೆಂಗಿನ ತುರಿಗೆ ಹಸಿ ಜೀರಿಗೆ, ಹಸಿಮೆಣಸು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ. ಕೆಲವರು ಅವೀಲ್ ದಪ್ಪ ಬರಲು ಒಂದು ಸ್ಪೂನ್ ಕಡಲೆಬೇಳೆಯನ್ನು ಅರ್ಧ ಘಂಟೆ ನೆನಸಿ ರುಬ್ಬುವಾಗ ಸೇರಿಸಿಕೊಳ್ಳುತ್ತಾರೆ. ಆದರೆ ಗ್ಯಾಸ್ಟ್ರಿಕ್ ಸಮಸ್ಯೆ ಇರುವವರು ಸೇರಿಸಿಕೊಳ್ಳದೇ ಇರುವುದು ಒಳಿತು.

ನಂತರ ಬೇಯಿಸಿದ ತರಕಾರಿಗೆ ರುಬ್ಬಿದ ಮಿಶ್ರಣ ಸೇರಿಸಿ ಕುದಿಯಲು ಬಿಡಿ. ಕುದಿಯುವಾಗ ಬೆಲ್ಲ ಮತ್ತು ಅರಿಶಿನ ಸೇರಿಸಿ.( ಸಿಹಿ ಇಷ್ಟವಿಲ್ಲದೆ ಇರುವವರು ಬೆಲ್ಲ ಸೇರಿಸುವ ಅಗತ್ಯವಿಲ್ಲ)

ನಾಲ್ಕರಿಂದ ಐದು ನಿಮಿಷ ಕುದಿಸಿದ ನಂತರ ಹೆಚ್ಚಿನ ಕೊತ್ತುಂಬರಿ ಸೊಪ್ಪು ಸೇರಿಸಿ. ಅರ್ಧ ಘಂಟೆ ತಣಿಯಲು ಬಿಡಿ.

ಊಟಕ್ಕೆ ಕೂರುವಾಗ ಮೊಸರು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿಕೊಂಡರೆ ಬಾಳೆಕಾಯಿ ಮಿಶ್ರಿತ ಮಿಕ್ಸ್ಡ್ ವೆಜ್ ಅವೀಲ್ ಸಿದ್ಧ.

ಬೇಕಿದ್ದರೆ ಸಾಸಿವೆ ಒಗ್ಗರಣೆ ಹಾಕಬಹುದು. ನಾವಿಲ್ಲಿ ಒಗ್ಗರಣೆ ಮಾಡಿಲ್ಲ. ಸುಮ್ಮನೆ ಹೆಚ್ಚುವರಿ ಒಗ್ಗರಣೆ ಎಣ್ಣೆ ಸೇವನೆಯ ಅಗತ್ಯವಿಲ್ಲ ಎನ್ನುವ ಕಾರಣಕ್ಕೆ ಒಗ್ಗರಣೆಯನ್ನು ಮಾಡಿಲ್ಲ.