ಆನ್‌ಲೈನ್ ಕ್ಲಾಸ್‌: ಮಕ್ಕಳು ಅತಿಯಾಗಿ ಟೆಕ್ ಬಳಸುವುದು ತಪ್ಪಿಸುವುದು ಹೇಗೆ?

ಮಕ್ಕಳು ಆನ್‌ಲೈನ್‌ನಲ್ಲಿರುವಾಗ ಪೋಷಕರು ಏನು ಮಾಡಬೇಕು?

ಮಕ್ಕಳು ಆನ್‌ಲೈನ್‌ ಕ್ಲಾಸ್‌ನಲ್ಲಿರುವಾಗ ಅವರಿಗೆ ಬೇಕಾದ ಸಹಾಯ ಮಾಡಿ, ನಂತರ ತಮ್ಮ ಕೆಲಸ ಕಾರ್ಯಗಳನ್ನು ಮುಗಿಸಿಕೊಳ್ಳಬೇಕು. ಆಗ ಮಕ್ಕಳ ಕ್ಲಾಸ್‌ ಮುಗಿದ ಬಳಿಕ ಅವರೊಡನೆ ಆಟ ಆಡಬಹುದು. ಇದರಿಂದ ಮಕ್ಕಳು ಕ್ಲಾಸ್ ಮುಗಿದ ಬಳಿಕ ಪುನಃ ಮೊಬೈಲ್ ನೋಡುತ್ತಾ ಅಥವಾ ಟಿವಿ ನೋಡುತ್ತಾ ಕಳೆಯುವುದನ್ನು ತಪ್ಪಿಸಬಹುದು. ಇದರಿಂದ ಮಕ್ಕಳ ಮಾನಸಿಕ ಹಾಗೂ ದೈಹಿಕ ಆರೋಗ್ಯಕ್ಕೆ ಒಳ್ಳೆಯದು.

ಪೋಷಕರೇ ನಿಮ್ಮ ಯೋಚನೆಯನ್ನು ಬದಲಾಯಿಸಿ

ಮಕ್ಕಳ ಸ್ಕ್ರೀನ್ ಟೈಮ್ ಬಗ್ಗೆ ನೀವು ಯೋಚಿಸುವ ರೀತಿಯನ್ನು ಬದಲಾಯಿಸಬೇಕು. ಇಷ್ಟು ಹೊತ್ತಿಗೆ ಮಾತ್ರ ಮೊಬೈಲ್ ಮುಟ್ಟಬೇಕು, ಕ್ಲಾಸ್‌ ಮುಗಿದ ತಕ್ಷಣ ಮೊಬೈಲ್ ದೂರವಿಡಬೇಕು ಎಂಬ ರೂಲ್ಸ್ ಮಾಡಲು ಹೋದರೆ ಅದರಿಂದ ಮಕ್ಕಳಿಗೆ ಸಿಟ್ಟು, ಹಠ ಮತ್ತಷ್ಟು ಅಧಿಕವಾಗುವುದೇ ಹೊರತು ಮತ್ತೇನು ಪ್ರಯೋಜನ ಉಂಟಾಗುವುದಿಲ್ಲ. ಬದಲಿಗೆ ಪೋಷಕರೇ ನೀವು ಬದಲಾಗಬೇಕಾಗಿದೆ.

ಮಕ್ಕಳೊಂದಿಗೆ ಮೊಬೈಲ್‌ ಅಥವಾ ಟ್ಯಾಪ್‌ಟಾಪ್ ಬಳಕೆ ಬಗ್ಗೆ ಚರ್ಚಿಸಿ ಆಗ ಈ ತಂತ್ರಜ್ಞಾನವನ್ನು ಮತ್ತಷ್ಟು ಆರೋಗ್ಯಕರವಾಗಿ ಬಳಸುವುದು ಹೇಗೆ ಎಂಬ ಐಡಿಯಾ ನಿಮಗೂ, ಮಕ್ಕಳಿಗೂ ತಿಳಿಯುತ್ತದೆ. ಅವರಿಗೂ ಇದನ್ನು ತುಂಬಾ ಹಿಡಿದುಕೊಂಡು ಕೂರುವ ಬದಲು ಬೇರೆ ಆಟ ಆಡೋಣ ಎಂಬ ಮನಸ್ಸಾಗುವುದು, ಆಗ ನಿಮ್ಮ ಮಾತುಗಳನ್ನು ಕೇಳುವರು.

ಹೊಸ ಆ್ಯಪ್ ಕುರಿತು ಕಲಿಯಲು, ಗೇಮ್ ಕಲಿಯಲು ಬಿಡಿ

ಬರೀ ಪಠ್ಯಕ್ಕೆ ಮಾತ್ರ ಮೊಬೈಲ್ ಬಳಸು, ಅದರಲ್ಲಿ ಬೇರೇನೂ ನೋಡಬೇಡ ಎಂದೆಲ್ಲಾ ಹೇಳುತ್ತಾ ಇರಬೇಡಿ, ಇದರಿಂದ ಅವರಿಗೆ ಕಿರಿಕಿರ ಆಗುವುದು. ತಂತ್ರಜ್ಞಾನದಲ್ಲಿ ಕಲಿಯಲು ಅನೇಕ ಒಳ್ಳೆಯ ವಿಷಯಗಳಿರುತ್ತದೆ. ಅದನ್ನು ಕಲಿಯುವಂತೆ ಹುರಿದುಂಬಿಸಿ. ಅದೇ ಸಮಯದಲ್ಲಿ ಅವರು ಮೊಬೈಲ್‌ ಅನ್ನು ಹೇಗೆ ಬಳಸುತ್ತಿದ್ದಾರೆ ಎಂಬುವುದರ ಕುರಿತು ಕೂಡ ಕಣ್ಣಿಟ್ಟರಬೇಕು.

ಮಕ್ಕಳು ತಮ್ಮ ಅನುಭವಗಳನ್ನು ಹೇಳುವಾಗ ತಾಳ್ಮೆಯಿಂದ ಕೇಳಿ

ನಿಮಗೆ ಎಷ್ಟೇ ಕೆಲಸದ ಒತ್ತಡವಿರಲಿ ಅವರು ಅವರ ಪಠ್ಯಕ್ಕೆ ಸಂಬಂಧಿಸಿದ ಅಥವಾ ಹೊಸ ವಿಷಯಗಳಿಗೆ ಸಂಬಂಧಿಸಿದ ಏನಾದರೂ ವಿಷಯಗಳನ್ನು ಹೇಳುವಾಗ ತಾಳ್ಮೆಯಿಂದ ಕೇಳಿ, ಆಗ ಅವರಿಗೆ ಹೊಸತನ್ನು ಕಲಿಯುವ ಹುರುಪು ಮತ್ತಷ್ಟು ಅಧಿಕವಾಗುವುದು.