ಹಾಲು ಒಡೆಯಿತೇ? ಎಸೆಯಬೇಡಿ, ಇದರ ಹಲವು ಪ್ರಯೋಜನಗಳನ್ನು ಬಳಸಿಕೊಳ್ಳಿ

ಸಾಲಾಡ್ ಅಲಂಕಾರಕ್ಕಾಗಿ

ಮುಂದಿನ ಬಾರಿ ಹಾಲು ಒಡೆದಾಗ ಹುಳಿ ಕ್ರೀಂ ಬದಲು ಈ ಹಾಲನ್ನು ನಿಮ್ಮ ಸಾಲಾಡ್ ಮೇಲೆ ಸುರಿದು ಅಲಂಕರಿಸಬಹುದು. ಆದರೆ ಇದಕ್ಕಾಗಿ ಪ್ಯಾಶ್ಚರೀಕರಿಸಿದ ಹಾಲು ಹಾಳಾದರೆ ಬಳಸಬಾರದು, ಕೇವಲ ಪ್ಯಾಶ್ಚರೀಕರಿಸದ ಹಾಲು ಹಾಳಾದರೆ ಮಾತ್ರವೇ ಅನುಸರಿಸಬಹುದು.

ಗಿಡಕ್ಕೆ ಗೊಬ್ಬರವಾಗಿ

ಹಾಲನ್ನು ಒಡೆದ ಬ್ಯಾಕ್ಟೀರಿಯಾಗಳೇ ಮಣ್ಣನ್ನೂ ಒಡೆದು ಫಲವತ್ತಾಗಿಸುವ ಕ್ಷಮತ್ ಹೊಂದಿವೆ. ಹಾಗಾಗಿ ಒಡೆದ ಹಾಲನ್ನು ಹೂಕುಂಡಕ್ಕೆ ಸುರಿಯುವ ಮೂಲಕ ಗಿಡಗಳಿಗೆ ಉತ್ತಮ ಗೊಬ್ಬರ ದೊರಕಿದಂತಾಗುತ್ತದೆ ಮಾತ್ರವಲ್ಲದೇ ಪ್ರಾಣಿಗಳ ಜೀವಕೋಶಗಳಿಗೆ ಅಗತ್ಯವಿರುವ ಕ್ಯಾಲ್ಸಿಯಂ ಅಂಶವನ್ನು ಹೆಚ್ಚಾಗಿಯೇ ಒದಗಿಸಲು ಸಾಧ್ಯವಾಗುತ್ತದೆ.

ಸಾಕುಪ್ರಾಣಿಗೆ ಆಹಾರ

ಒಡೆದ ಹಾಲನ್ನು ನಾವು ಜೀರ್ಣಿಸಿಕೊಳ್ಳಲಾರೆವಾದರೂ ನಮ್ಮ ಸಾಕುಪ್ರಾಣಿಗಳು ಸುಲಭವಾಗಿ ಜೀರ್ಣಿಸಿಕೊಳ್ಳಬಲ್ಲವು. ಹಾಗಾಗಿ ಇವುಗಳನ್ನು ಸುರಕ್ಷಿತವಾಗಿ ನಮ್ಮ ಸಾಕುಪ್ರಾಣಿಗಳಿಗೆ ಒದಗಿಸಬಹುದು. ಅಥವಾ ಇತರ ಆಹಾರಗಳಾದ ಬಿಸ್ಕತ್ ಮೊದಲಾದವುಗಳ ಜೊತೆಗೆ ಬೆರೆಸಿ ನೀಡಬಹುದು. ಇದರಿಂದ ಪ್ರಾಣಿಗಳಿಗೆ ಹೆಚ್ಚಿನ ಪ್ರೋಟೀನ್ ಮತ್ತು ಕ್ಯಾಲ್ಸಿಯಂ ದೊರಕುತ್ತದೆ.

ಮುಖಲೇಪದ ರೂಪದಲ್ಲಿ

ಇದರಲ್ಲಿರುವ ಬ್ಯಾಕ್ಟೀರಿಯಾಗಳು ವಿಶೇಷವಾಗಿ ಚರ್ಮದಾಳದಲ್ಲಿರುವ ಕ್ರಿಮಿ ಮತ್ತು ಕೆಟ್ಟ ಬ್ಯಾಕ್ಟೀರಿಯಾಗಳನ್ನು ಕೊಂದು ನಿವಾರಿಸುವ ಕ್ಷಮತೆ ಪಡೆದಿವೆ. ಹಾಗಾಗಿ ಒಡೆದ ಹಾಲನ್ನು ಮುಖಲೇಪದ ರೂಪದಲ್ಲಿ ಬಳಸುವ ಮೂಲಕ ಮೊಡವೆಗಳಿರುವ ಚರ್ಮಕ್ಕೆ ಹೆಚ್ಚಿನ ಆರೈಕೆ ಒದಗಿಸಬಹುದು. ಒಡೆದ ಹಾಲನ್ನು ನೇರವಾಗಿ ಮುಖಕ್ಕೆ ಹಚ್ಚಿಕೊಳ್ಳುವ ಮೂಲಕ ಕೊಂಚ ಹೊತ್ತು ವಾಸನೆಯನ್ನು ಸಹಿಸಬೇಕಾಗಿ ಬಂದರೂ, ಬಳಿಕ ಇದು ನೀಡುವ ಪರಿಣಾಮ ಮಾತ್ರ ಸಿಹಿಯೇ ಆಗಿರುತ್ತದೆ.

ಚೀಸ್

ಹೆಚ್ಚಿನ ಜನರಿಗೆ ಈ ಮಾಹಿತಿಯ ಅರಿವಿಲ್ಲದಿರಬಹುದು, ಏನೆಂದರೆ ಚೀಸ್ ಅನ್ನು ಹುಳಿಬರಿಸಿದ ಮೊಸರಿನಿಂದ ತಯಾರಿಸಲಾಗುತ್ತದೆ. ಹಾಗಾಗಿ ಮುಂದಿನ ಬಾರಿ ಹಾಲು ಒಡೆದಾಗ ನಿಮ್ಮದೇ ಆದ ಚೀಸ್ ತಯಾರಿಗೆ ಇದನ್ನು ಬಳಸಬಹುದು. ನಿಮಗೆ ಸೂಕ್ತವೆನಿಸಿದ ಯಾವುದೇ ಪ್ರಕಾರವನ್ನು ಅನುಸರಿಸಿ ಚೀಸ್ ತಯಾರಿಸಿ. ಈ ಮೂಲಕ ಹಣದಲ್ಲಿಯೂ ಉಳಿತಾಯ ಸಾಧಿಸಬಹುದು.

ಬೇಕರಿ ಉತ್ಪನ್ನಗಳಲ್ಲಿ

ನಿಮಗೆ ಮನೆಯಲ್ಲಿಯೇ ಬೇಕರಿ ಉತ್ಪನ್ನಗಳನ್ನು, ಕೇಕ್, ಪಫ್ಸ್ ಮೊದಲಾದವುಗಳನ್ನು ಮಾಡುವ ಉತ್ಸಾಹವಿದೆಯೇ ಅಥವಾ ಸರಳವಾಗಿ ದೋಸೆ ಮಾಡುವುದಾದರೂ ಇದರಲ್ಲಿ ಹುಳಿಬರಿಸುವ ಹುದುಗುಪದಾರ್ಥವನ್ನಾಗಿ ಒಡೆದ ಹಾಲನ್ನು ಬಳಸಬಹುದು. ಅಚ್ಚರಿ ಎಂದರೆ, ಯಾವಾಗ ಒಡೆದ ಹಾಲನ್ನು ಈ ಖಾದ್ಯಗಳಲ್ಲಿ ಹುಳಿಕಾರಕವಾಗಿ ಬಳಸುತ್ತೇವೆಯೋ ಆಗ ಆ ಖಾದ್ಯ ಆಕರ್ಷಕವಾಗಿ ಉಬ್ಬುವ ಜೊತೆಗೇ ಹುಳಿಯೇ ಇರದೇ ಅತ್ಯುತ್ತಮ ರುಚಿಯನ್ನು ಹೊಂದುತ್ತದೆ.