ಬೆನ್ನು ನೋವಿನ ಉಪಶಮನಕ್ಕೆ ಸರಳ ಸೂತ್ರ

ಗೋಧಿ ಹುಲ್ಲಿನ ಜ್ಯೂಸ್ ಕುಡಿಯಿರಿ

ಬೆನ್ನುಮೂಳೆಗೆ ಶಕ್ತಿಯನ್ನು ನೀಡುವ ಬೆನ್ನಿನ ಸ್ನಾಯುಗಳು ಶಕ್ತಿಹೀನವಾದರೂ ನೋವು ಉಲ್ಬಣಿಸುತ್ತದೆ. ಈ ಸ್ನಾಯುಗಳನ್ನು ಬಲಪಡಿಸಲು ಗೋಧಿ ಹುಲ್ಲಿನ ಜ್ಯೂಸ್ ಅತ್ಯುತ್ತಮವಾಗಿದೆ. ಇದರ ನಿಯಮಿತ ಸೇವನೆಯಿಂದ ಬೆನ್ನಿನ ಸ್ನಾಯುಗಳು ಬಲಗೊಂಡು ಹಳೆಯ ನೋವನ್ನೂ ಕಡಿಮೆಗೊಳಿಸಬಲ್ಲುದು.

ಆರಾಮ ಮಾಡದಿರಿ, ಚಟುವಟಿಕೆಗಳನ್ನು ಮುಂದುವರೆಸಿ

ಬೆನ್ನುನೋವಿಗೆ ನೋವು ಕೊಡುವುದೇ ಒಂದು ಚಿಕಿತ್ಸೆ. ಹೋಮಿಯೋಪಥಿ ಪದ್ಧತಿಯಲ್ಲಿ ಜನಪ್ರಿಯವಾದ ಈ ಪದ್ದತಿಯನ್ನು ಆಧುನಿಕ ವಿಜ್ಞಾನವೂ ಅನುಮೋದಿಸಿದೆ. ಈ ಪ್ರಕಾರ ಬೆನ್ನು ನೋವು ಇದೆ ಎಂದು ಆರಾಮ ಮಾಡುವುದು ಸರ್ವಥಾ ಸಲ್ಲದು. ಸಾಧ್ಯವಾದಷ್ಟು ಚಟುವಟಿಕೆಗಳನ್ನು ನಡೆಸುತ್ತಾ ಇರಬೇಕು. ಆದರೆ ಈ ನಿಟ್ಟಿನಲ್ಲಿ ಬೆನ್ನುಮೂಳೆಯ ಮೇಲೆ ಪೂರ್ಣವಾದ ಭಾರ ಬೀಳದಂತೆ ಕ್ರಮಗಳನ್ನು ಅನುಸರಿಸಬೇಕಾದುದು ಅಗತ್ಯ. ಸಹಿಸಲು ಸಾಧ್ಯವಾದಷ್ಟು ನೋವಿದ್ದರೆ ಪ್ರಾರಂಭದಲ್ಲಿ ಕೊಂಚ ನೋವು ಕಂಡುಬಂದರೂ, ಕೆಲನಿಮಿಷದ ನಡಿಗೆ, ಮೆಟ್ಟಲೇರುವುದು (ನಿಧಾನವಾಗಿ) ಅಥವಾ ಇಳಿಯುವುದು, ಬಾಗುವುದು, ಸೂಕ್ತವಾದ ಯೋಗಾಸನಗಳನ್ನು ಅನುಸರಿಸುವುದು, ಒಟ್ಟಾರೆ ನಿಮಗೆ ಸೂಕ್ತವೆನಿಸಿದ ವ್ಯಾಯಾಮವನ್ನು ದಿನದ ಯಾವುದೇ ಹೊತ್ತಿನಲ್ಲಿ ಅನುಸರಿಸಿ.

ನಿಮ್ಮ ಕುಳಿತುಕೊಳ್ಳುವ ಭಂಗಿಯನ್ನು ಬದಲಿಸಿ

ಸಾಮಾನ್ಯವಾಗಿ ನಾವು ಆರಾಮವಾಗಿ ಕುಳಿತುಕೊಳ್ಳುವ ಭರದಲ್ಲಿ ಬೆನ್ನು ಮೂಳೆಯನ್ನು ಕಮಾನಿನಂತೆ ಬಾಗಿಸುತ್ತೇವೆ. ಚಿಕ್ಕವಯಸ್ಸಿನಲ್ಲಿ ಈ ಪರಿ ಹೆಚ್ಚಿನ ಪರಿಣಾಮವನ್ನು ಬೀರದೇ ಇದ್ದರೂ ಕ್ರಮೇಣ ಬೆನ್ನುಮೂಳೆಯ ಕೆಳಗಿನ ತಟ್ಟೆಗಳು ಜಖಂಗೊಂಡು ಬೆನ್ನುನೋವು ನೀಡುತ್ತವೆ. ಇದಕ್ಕೆ ಸುಲಭ ಉಪಾಯವೆಂದರೆ ನೆಟ್ಟಗೆ ಕುಳಿತುಕೊಳ್ಳುವುದು.ಕುರ್ಚಿಯಲ್ಲಿ ನೆಟ್ಟಗೆ ಕುಳಿತುಕೊಳ್ಳುವುದು ಕೊಂಚ ಕಷ್ಟಕರವಾದುದರಿಂದ ಚಿಕ್ಕ ದಿಂಬೊಂದನ್ನು ಕುರ್ಚಿಯ ಬೆನ್ನಿನ ಕೆಳಭಾಗದಲ್ಲಿರಿಸುವ ಮೂಲಕ ಬೆನ್ನುಮೂಳೆ ನೆಟ್ಟಗಿರುವ ಭಂಗಿಯನ್ನು ಪಡೆಯಬಹುದು. ಇತ್ತೀಚಿನ ಕುರ್ಚಿಗಳು ಈ ಭಂಗಿಯನ್ನು ಅನುಸರಿಸುವಂತೆಯೇ ವಿನ್ಯಾಸಗೊಳಿಸಲಾಗುತ್ತಿದೆ. ಸಾಧ್ಯವಾದರೆ ಉತ್ತಮ ಗುಣಮಟ್ಟದ ಕುರ್ಚಿಯನ್ನು ನಿತ್ಯದ ಕೆಲಸಗಳಿಗಾಗಿ ಬದಲಿಸಬಹುದು.

ದಿನಕ್ಕೊಮ್ಮೆ ಪೂರ್ಣ ಪ್ರಮಾಣದ ನಿದ್ದೆ ಮಾಡಿ

ನಮಗೆ ದಿನಕ್ಕೆ ಎಂಟು ಘಂಟೆಗಳ ಕಾಲ ನಿದ್ದೆಯ ಅಗತ್ಯವಿದೆ. ಆದರೆ ಕೆಲಸದ ಭರದಲ್ಲಿ ಈ ನಿದ್ದೆಯನ್ನೂ ಕಡಿಮೆ ಮಾಡಿ ಕೆಲಸವನ್ನು ಹೆಚ್ಚಿಸುವುದು ಅಥವಾ ದಿನಕ್ಕೆರಡು ಹೊತ್ತಿನಲ್ಲಿ ಚಿಕ್ಕ ಚಿಕ್ಕ ನಿದ್ದೆಗಳನ್ನು ಮಾಡುವುದು ಬೆನ್ನುನೋವನ್ನು ಹೆಚ್ಚಿಸಲು ಕಾರಣವಾಗಿವೆ. ಬೆನ್ನುನೋವಿದ್ದರೆ ದಿನಕ್ಕೊಂದು ಪೂರ್ಣಪ್ರಮಾಣದ ನಿದ್ದೆಯನ್ನು ಪಡೆಯಲು ತಜ್ಞರು ಸಲಹೆ ನೀಡುತ್ತಾರೆ. ಇದರಿಂದಾಗಿ ಇಡಿಯ ಶರೀರದ ಸ್ನಾಯುಗಳು ಅಗತ್ಯವಾದ ವಿಶ್ರಾಂತಿ ಪಡೆಯುತ್ತವೆ. ಒಂದು ವೇಳೆ ಬೆನ್ನಿನ ಸ್ನಾಯುಗಳಲ್ಲಿ ಉರಿಯೂತ ಕಂಡುಬಂದಿದ್ದರೆ ಪೂರ್ಣ ಪ್ರಮಾಣದ ವಿಶ್ರಾಂತಿಯಿಂದಲೇ ಇದು ಶಮನಗೊಳ್ಳುತ್ತದೆ. ಕಡಿಮೆ ನಿದ್ದೆಯಲ್ಲಿ ಇದು ಪೂರ್ಣವಾಗಿ ಶಮನವಾಗದೇ ಚಟುವಟಿಕೆ ಪ್ರಾರಂಭವಾಗುತ್ತಿದ್ದಂತೆಯೇ ಉಲ್ಬಣಗೊಳ್ಳುವ ಸಾಧ್ಯತೆಗಳಿವೆ.

ಲಘು ವ್ಯಾಯಾಮಗಳನ್ನು ಮಾಡಿ

ವಿಶ್ರಾಂತಿ ಬೆನ್ನುನೋವಿಗೆ ಮಾರಕ. ಸಾಧ್ಯವಿದ್ದಷ್ಟೂ ಚಟುವಟಿಕೆಯಿಂದಿರಿ. ನಿಮಗೆ ಸಾಧ್ಯವಾದ ವ್ಯಾಯಾಮಗಳನ್ನು ಮಾಡುತ್ತಾ ಇರಿ. ನಡಿಗೆ ಮತ್ತು ಕೈಕಾಲುಗಳನ್ನು ಚಾಚುವುದು ಅತ್ಯುತ್ತಮ ವ್ಯಾಯಾಮಗಳು.ನಿಮಗೆ ಸೂಕ್ತವೆನಿಸಿದ ಇತರ ಯಾವುದೇ ವ್ಯಾಯಾಮವನ್ನು ನಿಯಮಿತವಾಗಿ ಅನುಸರಿಸಿ.

ಸೂಕ್ತ ಯೋಗಾಸನಗಳನ್ನು ಅನುಸರಿಸಿ

ಬೆನ್ನುನೋವು ಕಡಿಮೆಗೊಳಿಸಲೂ ಹಲವು ಯೋಗಾಸನಗಳಿವೆ. ಹೆಚ್ಚಿನ ನೋವಿದ್ದರೆ ಮಾರ್ಜ್ಯಾಸನ, ಭಾರದ್ವಾಜಾಸನ ಮತ್ತು ಮಸ್ತ್ಯಾಸನ ಉತ್ತಮ ಆಸನಗಳಾಗಿವೆ. ಕಡಿಮೆ ನೋವಿದ್ದರೆ ಅರ್ಧ ಮಸ್ತ್ಯೇಂದ್ರಾಸನ, ಉಷ್ಟ್ರಾಸನ, ಧನುರಾಸನ, ಸೇತು ಬಂಧ ಸರ್ವಾಂಗಾಸನ, ಅಧೋಮುಖ ಶ್ವಾನಾಸನ ಮೊದಲಾದ ಆಸನಗಳು ಸೂಕ್ತವಾಗಿವೆ. ಯೋಗಾಸನಗಳಲ್ಲಿ ಭಂಗಿಯ ಜೊತೆಗೇ ಉಸಿರಾಟವನ್ನೂ ನಿಯಂತ್ರಿಸಬೇಕಾದುದರಿಂದ ಸ್ನಾಯುಗಳು ಉತ್ತಮವಾದ ಸೆಳೆತವನ್ನು ಪಡೆದು ರಕ್ತಸಂಚಾರವನ್ನು ಹೆಚ್ಚಿಸಿ ಬೆನ್ನುನೋವನ್ನು ಕಡಿಮೆಗೊಳಿಸಲು ನೆರವಾಗುತ್ತವೆ.

ಪರ್ಪಾಟಕ ಮೂಲಿಕೆಯ ರಸವನ್ನು ಸೇವಿಸಿ

ಕನ್ನಡದಲ್ಲಿ ಪರ್ಪಾಟಕ ಅಥವಾ ಕಲ್ಲು ಸೂಸಿಗೆ ಎಂಬ ಗಿಡಮೂಲಿಕೆ (Comfrey Herb) ಯ ಎಲೆಗಳನ್ನು ನೀರಿನಲ್ಲಿ ಸುಮಾರು ಒಂದು ಘಂಟೆ ಕುದಿಸಿ ಸೋಸಿದ ನೀರು ಕುಡಿಯುವುದರಿಂದಲೂ ಬೆನ್ನುನೋವು ಕಡಿಮೆಯಾಗುತ್ತದೆ. ಈ ನೀರಿನಲ್ಲಿ ವಿವಿಧ ಪ್ರೋಟೀನುಗಳು, ವಿಟಮಿನ್, ಖನಿಜಗಳಿದ್ದು ಬೆನ್ನುನೋವನ್ನು ಶಮನಗೊಳಿಸಲು ಸಹಕಾರಿಯಾಗಿವೆ.

ಕ್ಯಾಲ್ಸಿಯಂ ಮತ್ತು ಮೆಗ್ನೀಶಿಯಂ ಸೇವಿಸಿ

ನಿಮ್ಮ ಆಹಾರದಲ್ಲಿ ಕ್ಯಾಲ್ಸಿಯಂ ಮತ್ತು ಮೆಗ್ನೀಶಿಯಂ ಹೇರಳವಾಗಿರುವಂತೆ ನೋಡಿಕೊಳ್ಳಿ. ಇದರಿಂದ ನಿಮ್ಮ ಬೆನ್ನುನೋವು ಶೀಘ್ರವಾಗಿ ಕಡಿಮೆಯಾಗುವುದು. ಹಸಿರು ಸೊಪ್ಪು, ಮೊಟ್ಟೆ, ಹಾಲು, ಬಾಳೆಹಣ್ಣು, ಒಣಫಲಗಳು, ಸೇಬು, ಅಂಜೂರ ಮೊದಲಾದವುಗಳಲ್ಲಿ ಕ್ಯಾಲ್ಸಿಯಂ ಹೇರಳವಾಗಿರುತ್ತದೆ. ಹಾಲಿನಲ್ಲಿರುವ ಕ್ಯಾಲ್ಸಿಯಂ ನಮಗೆ ನೇರವಾಗಿ ಲಭ್ಯವಾಗದೇ ಇರುವುದರಿಂದ ಬಿಸಿಹಾಲಿಗೆ ಕೊಂಚ ಜೇನನ್ನು ಸೇರಿಸಿ ಕುಡಿಯುವುದರಿಂದ ಉತ್ತಮ ಪರಿಣಾಮವನ್ನು ಪಡೆಯಬಹುದು.

ಬಿಸಿ ತಾಗಿಸಿ

ದೇಹಕ್ಕೆ ಬಿಸಿಯನ್ನು ನೀಡುವ ಬಿಸಿನೀರಿನ ಬಾಟಲುಗಳು ಅಥವಾ ಎಲೆಕ್ಟ್ರಿಕ್ ಉಪಕರಣಗಳು ಇಂದು ಮಾರುಕಟ್ಟೆಯಲ್ಲಿ ಲಭ್ಯವಿವೆ. ಇವುಗಳನ್ನು ಉಪಯೋಗಿಸಿ ಬೆನ್ನಿನ ಕೆಳಭಾಗಕ್ಕೆ ಶಾಖ ನೀಡುವುದರಿಂದ ಬೆನ್ನುನೋವು ಶೀಘ್ರ ಶಮನ ಪಡೆಯುತ್ತದೆ. ಸಾಂಪ್ರಾದಾಯಿಕ ವಿಧಾನದಂತೆ ಕಲ್ಲುಪ್ಪನ್ನು ಬಿಸಿಮಾಡಿ ಬಟ್ಟೆಯಲ್ಲಿಟ್ಟು ಶಾಖ ನೀಡುವುದರಿಂದಲೂ ಬೆನ್ನುನೋವು ಶೀಘ್ರ ಕಡಿಮೆಯಾಗುತ್ತದೆ.

ಆರಾಮದಾಯಕ ಪಾದರಕ್ಷೆಗಳನ್ನು ತೊಡಿರಿ

ಆರಾಮದಾಯಕವಲ್ಲದ ಪಾದರಕ್ಷೆಗಳೂ ಬೆನ್ನುನೋವನ್ನು ಹೆಚ್ಚಿಸಬಹುದು. ನಿಮ್ಮ ಶೂ ಅಥವಾ ನಿತ್ಯದ ಪಾದರಕ್ಷೆಗಳು ಆರಾಮದಾಯಕವಾಗಿರುವಂತೆ ನೋಡಿಕೊಳ್ಳಿ. ಹಿಮ್ಮಡಿ ಎತ್ತರವಿರದ, ಸಾಧ್ಯವಾದರೆ ಚಪ್ಪಟೆಯಾದ ಪಾದರಕ್ಷೆಗಳನ್ನು ಧರಿಸಿ.