ಬಿಟ್ಟರೂ ಬಿಡದ ಕಾಫಿ ಚಟ ಬಿಡಿಸಲು ಸಲಹೆ

Wellness

oi-Sumalatha N

By Sumalatha N

Published: Saturday, August 6, 2011, 15:27 [IST]

ಕಾಫಿ ಚಟ ಒತ್ತಡದ ಬದುಕಿನ ಇನ್ನೊಂದು ರೂಪ ಅಂತಲೇ ಹೇಳಬಹುದು. ತುಂಬಾ ಸುಸ್ತಾದಾಗ ತಾತ್ಕಾಲಿಕ ರಿಲಾಕ್ಸ್ ಗಾಗಿ ಆರಂಭಿಸಿದ ಕಾಫಿ ಸೇವನೆ ನಂತರ ಚಟವಾಗಿ ಅಂಟಿಕೊಳ್ಳುತ್ತೆ. ಆದರೆ ಇದರ ಅಪಾಯಕಾರಿ ಪರಿಣಾಮ ದೊಡ್ಡ ಸಮಸ್ಯೆ ತಂದೊಡ್ಡುವ ಮುನ್ನ ಕಾಫಿ ಸೇವನೆ ಕಡಿಮೆಗೊಳಿಸಬೇಕು, ಸಾಧ್ಯವಾದರೆ ತ್ಯಜಿಸಿಬಿಡಬೇಕು. ತ್ಯಜಿಸಿದ ನಂತರವೂ ಕೆಲವು ದಿನ ಕಷ್ಟವೆನಿಸಬಹುದು. ಆದರೆ ಅದಕ್ಕೆ ಹೆದರಿ ಕಾಫಿ ಚಟಕ್ಕೆ ಮತ್ತೆ ಅಂಟಿಕೊಂಡರೆ ತೊಂದರೆ ಖಚಿತ.

ಕಾಫಿ ಚಟದ ಪರಿಣಾಮಗಳು: ನಿದ್ದೆ ಬರದಿರುವುದು, ಚರ್ಮದ ತೊಂದರೆ, ನರಗಳ ಸೆಳೆತ, ತಲೆನೋವು ಆರಂಭಗೊಳ್ಳುತ್ತವೆ.

ನೀವು ಕಾಫಿಯನ್ನು ಬಿಡಬೇಕು ಎಂದು ನಿಶ್ಚಯ ಮಾಡಿಕೊಂಡಿದ್ದೀರಿ ಎಂದಾದರೆ ಅದರಿಂದ ಹೊರಬರಲು ತಯಾರಾಗಿರಿ. ಇಲ್ಲಿವೆ ಒಂದಿಷ್ಟು ಸುಲಭೋಪಾಯ:

1. ಕಾಫಿಯನ್ನು ತಕ್ಷಣ ಬಿಟ್ಟುಬಿಡಬಾರದು, ಇದರಿಂದ ಶೀತ ಕಾಣಿಸಿಕೊಳ್ಳಬಹುದು. ಸೇವನೆಯಲ್ಲಿ ಕ್ರಮೇಣ ಕಡಿಮೆ ಮಾಡಿಕೊಂಡು ನಂತರ ಬಿಡಲು ಪ್ರಯತ್ನಿಸಬೇಕು.

2. ಕಾಫಿಗೆ ಬದಲಾಗಿ ಟೀ ಕುಡಿಯಲು ಆರಂಭಿಸಿ. ಕಾಫಿಯಷ್ಟು ಅಪಾಯಕಾರಿಯಲ್ಲದ ಟೀ ಉತ್ತಮ. ಅದರಲ್ಲೂ ಹರ್ಬಲ್ ಅಥವಾ ಗ್ರೀನ್ ಟೀ ಆದರೆ ಆರೋಗ್ಯಕ್ಕೆ ಇನ್ನೂ ಒಳ್ಳೆಯದು.

3. ನಿಮ್ಮ ಸ್ನೇಹಿತರಿಗೆ ನೀವು ಕಾಫಿಯನ್ನು ತ್ಯಜಿಸುತ್ತಿರುವ ವಿಷಯವನ್ನು ಪದೇ ಪದೇ ಹೇಳುತ್ತಿರಿ. ಇಲ್ಲವೆಂದರೆ ಜೊತೆ ಸೇರಿದಾಗ ಇದರ ಸೇವನೆ ಹೆಚ್ಚಾಗಿ ಚಟಕ್ಕೆ ಇನ್ನಷ್ಟು ಕುಮ್ಮಕ್ಕು ನೀಡಿದಂತಾಗುತ್ತದೆ.

4. ತಲೆಸುತ್ತು ಅಥವಾ ತಲೆ ನೋವು ಕಾಣಿಸಿಕೊಂಡರೆ ಅಥವಾ ಸುಸ್ತಾದರೆ ಕಾಫಿ ಬದಲು ಬಿಸಿ ನೀರನ್ನು ಸೇವಿಸಿ ನೋಡಿ, ಇದು ಹೆಚ್ಚು ಸಹಾಯ ಮಾಡುತ್ತದೆ.

5. ವ್ಯಾಯಾಮ ಮಾಡುವುದು ದೇಹವನ್ನೂ ಮನಸ್ಸನ್ನು ಪ್ರಸನ್ನಗೊಳಿಸುತ್ತದೆ. ವ್ಯಾಯಾಮ ಚಟಗಳನ್ನು ಬಿಡಲು ಪರೋಕ್ಷವಾಗಿ ಸಹಾಯ ಮಾಡುತ್ತದೆ.

6. ನಿಶ್ಚಿತ ಸಮಯದಲ್ಲಿ ನಿದ್ದೆ ಮಾಡಿ, ಆದಷ್ಟು ತುಂಬಾ ತಡವಾಗು ಮಲಗುವುದನ್ನು ಕಡಿಮೆ ಮಾಡಿ, 7 ಗಂಟೆ ಅವಧಿಯ ನಿದ್ದೆಗೆ ನಿಮ್ಮ ಸಮಯವನ್ನು ಹೊಂದಿಸಿಕೊಳ್ಳಿ.

ಇದರ ಹೊರತಾಗಿಯೂ ನಿಮಗೆ ಕಾಫಿಚಟದಿಂದ ಹೊರಬರುವುದು ಕಷ್ಟವೆನಿಸಬಹುದು. ಆದರೆ ಅಂತಃ ಶಕ್ತಿಯೊಂದಿದ್ದರೆ ಏನು ಬೇಕಾದರೂ ಸಾಧ್ಯವಿದೆ. ಒಮ್ಮೆ ಇದನ್ನು ಬಿಡಲು ಗಟ್ಟಿ ಮನಸ್ಸು ಮಾಡಿ ಪ್ರಯತ್ನಪಟ್ಟು ನೋಡಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.