ತ್ವಚೆಯ ಆರೈಕೆಯಲ್ಲಿ ತಜ್ಞರು ಶಿಫಾರಸ್ಸು ಮಾಡಿರುವ ಈ ತೈಲಗಳಿದ್ದರೆ ಉತ್ತಮ

Published: Monday, April 25, 2022, 11:32 [IST]

ಮುಖಕ್ಕೆ ಎಣ್ಣೆಯನ್ನು ಬಳಸಬಾರದು ಎಂಬುದು ಕೆಲವರ ನಂಬಿಕೆ. ಆದರೆ ಇದು ತಪ್ಪು. ಇದರ ಸಹಾಯದಿಂದ, ಫೇಶಿಯಲ್ ಮಾಡಬಹುದು. ಇದು ತ್ವಚೆಯನ್ನು ಪೋಷಿಸುವ ಜೊತೆಗೆ, ಸುಕ್ಕುಗಳಿಂದ ರಕ್ಷಿಸುತ್ತದೆ. ಆದರೆ, ಅನೇಕರಿಗೆ ಈ ಬಗ್ಗೆ ತಿಳಿದಿಲ್ಲ, ಇದರಿಂದಾಗಿ ಅವರು ಫೇಶಿಯಲ್ ಮಾಡಲು ಪಾರ್ಲರ್‌ಗೆ ಹೋಗುತ್ತಾರೆ. ಆದರೆ ಮನೆಯಲ್ಲಿ ಫೇಶಿಯಲ್‌ಗೆ ಇದಕ್ಕಿಂತ ಉತ್ತಮವಾದದ್ದು ಯಾವುದೂ ಇಲ್ಲ. ಆದರೆ, ಅದನ್ನು ಬಳಸುವ ಮೊದಲು, ಮುಖಕ್ಕೆ ಯಾವ ಎಣ್ಣೆಯನ್ನು ಬಳಸಬಹುದು ಎಂಬುದನ್ನು ಅರ್ಥಮಾಡಿಕೊಳ್ಳಬೇಕು.
ವಾಸ್ತವವಾಗಿ, ಮುಖದ ಚರ್ಮವು ಬಹಳ ಸೂಕ್ಷ್ಮವಾದ ಭಾಗವಾಗಿದ್ದು, ಹೆಚ್ಚಿನ ಎಚ್ಚರಿಕೆ ವಹಿಸಬೇಕು. ತಜ್ಞರ ಪ್ರಕಾರ, ಫೇಶಿಯಲ್‌ಗೆ ಯಾವಾಗಲೂ ಮೊದಲ ಆಯ್ಕೆ ಮಾಡಬಹುದಾದ ಕೆಲವು ಎಣ್ಣೆಗಳಿವೆ. ಅಷ್ಟೇ ಅಲ್ಲ, ಈ ಎಣ್ಣೆಗಳನ್ನು ತ್ವಚೆಯ ಆರೈಕೆಯಲ್ಲಿ ಸೇರಿಸಿಕೊಳ್ಳಬೇಕು. ಹಾಗಾದರೆ, ಆ ತೈಲಗಳಾವುವು ನೋಡೋಣ.

ತ್ವಚೆಯ ಆರೈಕೆಯಲ್ಲಿ ಬಳಸಬಹುದಾದ ತೈಲಗಳ ಬಗ್ಗೆ ಈ ಕೆಳಗೆ ನೀಡಲಾಗಿದೆ:

ಕುಂಕುಮಾದಿ ತೈಲ:

ಕುಂಕುಮಾದಿ ತೈಲವನ್ನು ಸುಂದರ ಮತ್ತು ಆರೋಗ್ಯಕರ ಚರ್ಮಕ್ಕಾಗಿ ಬಳಸಬಹುದು. ಇದು ಸಾಂಪ್ರದಾಯಿಕ ಆಯುರ್ವೇದ ಎಣ್ಣೆಯಾಗಿದ್ದು ಚರ್ಮವನ್ನು ಆರೋಗ್ಯವಾಗಿಡಲು ಸಹಾಯ ಮಾಡುತ್ತದೆ. ಈ ಎಣ್ಣೆಯ ಮುಖ್ಯ ಅಂಶದ ಬಗ್ಗೆ ಮಾತನಾಡುವುದಾದರೆ, ಇದರಲ್ಲಿ ಕೇಸರಿ ಮತ್ತು ಶ್ರೀಗಂಧವನ್ನು ಬಳಸಲಾಗಿದೆ. ಇದು ಚರ್ಮದ ಟೋನ್ ಅನ್ನು ಸರಿದೂಗಿಸುವುದಲ್ಲದೇ, ತ್ವಚೆಯನ್ನು ಪೋಷಿಸಿ, ಆರ್ಧ್ರಕವಾಗಿರಿಸುತ್ತದೆ.

ತೆಂಗಿನ ಎಣ್ಣೆ:

ತೆಂಗಿನ ಎಣ್ಣೆ ಸಾಮಾನ್ಯವಾಗಿ ತುಂಬಾ ಹಗುರವಾಗಿರುತ್ತದೆ. ಹೆಚ್ಚಿನ ಜನರು ಇದನ್ನು ಬಳಸುವುದಕ್ಕೆ ಇದೇ ಕಾರಣ. ತಜ್ಞರ ಪ್ರಕಾರ, ಹಗುರವಾಗಿರುವುದರಿಂದ, ಇದು ವಾತ ಮತ್ತು ಪಿತ್ತ ದೋಷಗಳನ್ನು ಸಮತೋಲನಗೊಳಿಸುತ್ತದೆ. ಮೇಕಪ್ ತೆಗೆದುಹಾಕಲು ಮತ್ತು ಮಾಯಿಶ್ಚರೈಸರ್ ಆಗಿ ಇದನ್ನು ಆಗಾಗ್ಗೆ ಬಳಸಬಹುದು. ಇದನ್ನು ದೈನಂದಿನ ಮುಖದ ಮಸಾಜ್‌ಗೂ ಬಳಸಬಹುದು.

ಕ್ಯಾರೆಟ್ ಬೀಜದ ಎಣ್ಣೆ:

ಕ್ಯಾರೆಟ್ ಬೀಜದ ಎಣ್ಣೆಯು ಉತ್ತಮ ನೈಸರ್ಗಿಕ ಎಣ್ಣೆಯಾಗಿದ್ದು, ಅದು ಸನ್ಸ್ಕ್ರೀನ್ ಆಗಿ ಕಾರ್ಯನಿರ್ವಹಿಸುತ್ತದೆ. ಜೊತೆಗೆ ತ್ವಚೆಯ ಆರೋಗ್ಯವನ್ನೂ ಹೆಚ್ಚಿಸುತ್ತದೆ. ವಿಶೇಷವೆಂದರೆ ಈ ಎಣ್ಣೆಯು ವಿಟಮಿನ್ ಎ ಗುಣಗಳನ್ನು ಹೊಂದಿದ್ದು, ಇದು ಬಹುಮುಖ ರೀತಿಯಲ್ಲಿ ಕಾರ್ಯನಿರ್ವಹಿಸುತ್ತದೆ. ಇದು ವಯಸ್ಸಾದ ವಿರೋಧಿ ಮತ್ತು ಹಾನಿಗೊಳಗಾದ ಚರ್ಮವನ್ನು ಸರಿಪಡಿಸಲು ಸಹಾಯ ಮಾಡುತ್ತದೆ .

ಬಕುಚಿ ಎಣ್ಣೆ:

ಔಷಧೀಯ ಗುಣಗಳಲ್ಲಿ ಸಮೃದ್ಧವಾಗಿರುವ ಬಕುಚಿ ಎಣ್ಣೆಯನ್ನು ಲ್ಯುಕೋಡರ್ಮಾ , ವಿಟಲಿಗೋ ಮತ್ತು ಸೋರಿಯಾಸಿಸ್‌ನಂತಹ ಪರಿಸ್ಥಿತಿಗಳಲ್ಲಿ ಬಳಸಲು ಉತ್ತಮವೆಂದು ಪರಿಗಣಿಸಲಾಗಿದೆ. ಇತ್ತೀಚಿನ ದಿನಗಳಲ್ಲಿ ಇದು ಚರ್ಮದ ಆರೈಕೆ ಉತ್ಪನ್ನಗಳಲ್ಲಿ ಬಳಸಲಾಗುವ ಅತ್ಯುತ್ತಮ ತೈಲಗಳಲ್ಲಿ ಒಂದಾಗಿದೆ. ಇದು ಚರ್ಮದ ಟೋನ್ ಅನ್ನು ಸಮತೋಲನಗೊಳಿಸುವುದರ ಜೊತೆಗೆ, ಇದು ವಯಸ್ಸಾದ ಚಿಹ್ನೆಗಳನ್ನು ತಡೆಯುತ್ತದೆ.

ಜೊಜೊಬ ಎಣ್ಣೆ:

ಚರ್ಮದ ಸೂಕ್ಷ್ಮತೆಯನ್ನು ಕಡಿಮೆ ಮಾಡುವ ವಿಷಯದಲ್ಲಿ ಜೊಜೊಬಾ ಎಣ್ಣೆಯು ಅತ್ಯುತ್ತಮ ತೈಲಗಳಲ್ಲಿ ಒಂದಾಗಿದೆ. ಇದು ಮೊಡವೆಗಳನ್ನು ಕಡಿಮೆ ಮಾಡಲು ಮತ್ತು ಸನ್ ಬರ್ನ್ ತಡೆಯಲು ಚೆನ್ನಾಗಿ ಕೆಲಸ ಮಾಡುತ್ತದೆ. ಇದಲ್ಲದೆ, ಇದು ಚರ್ಮವನ್ನು ಪೋಷಿಸುತ್ತದೆ.