ಬೆರಳಿನಲ್ಲಿ ಮೂಡಿರುವ ಉಂಗುರದ ಗುರುತಿನ ನಿವಾರಣೆ ಹೇಗೆ?

ಸತ್ತ ಜೀವಕೋಶಗಳನ್ನು ನಿವಾರಿಸಿ (Exfoliation)

ಸಾಮಾನ್ಯವಾಗಿ ಸ್ನಾನ ಅಥವಾ ಕೈ ತೊಳೆಯುವಾಗಲೂ ಉಂಗುರವನ್ನು ಕಳಚದೇ ಇದ್ದರೆ ಉಂಗುರದ ಅಡಿಭಾಗದಲ್ಲಿ ಕೊಳೆ ತುಂಬಿಕೊಳ್ಳುವುದು ಹಾಗೂ ಅಲ್ಲಿನ ಸತ್ತ ಜೀವಕೋಶಗಳಿಗೆ ಹೊರಹೋಗಲು ದಾರಿಯೇ ಇಲ್ಲದೇ ಅಲ್ಲಿಯೇ ಗಟ್ಟಿಯಾಗಿಬಿಡುತ್ತದೆ. ಈ ಜೀವಕೋಶಗಳು ಚರ್ಮದ ಬಣ್ಣವನ್ನು ಗಾಢವಾಗಿಸಿ ಹೆಚ್ಚೂ ಕಡಿಮೆ ಒಂದು ಹೆಚ್ಚುವರಿ ಪದರದಂತೆ ಅಂಟಿಕೊಂಡಿರುತ್ತದೆ. ಉಂಗುರ ತಗೆದಾಗ ಅಸಹ್ಯಕರವಾಗಿ ಕಾಣುತ್ತದೆ. ಆದ್ದರಿಂದ ಈ ಭಾಗದ ಸತ್ತ ಜೀವಕೋಶಗಳನ್ನು ನಿವಾರಿಸುವುದು ಅಗತ್ಯ. ಕೊಂಚ ಉಗುರುಬೆಚ್ಚನೆಯ ನೀರಿನಲ್ಲಿ ಬೆರಳನ್ನು ಕೊಂಚ ಹೊತ್ತು ಮುಳುಗಿಸಿಟ್ಟು ಬಳಿಕ ಒರಟು ಬ್ರಶ್ ನಿಂದ ಒರೆಸಿ ಈ ಪದರವನ್ನು ಹಂತಹಂತವಾಗಿ ನಿವಾರಿಸಬಹುದು.

ಸನ್ ಸ್ಕ್ರೀನ್ ಸಹಾ ಸೂಕ್ತವಾಗಿದೆ

ಉಂಗುರದ ಭಾಗ ಬಿಳಿಚಿಕೊಂಡಿರಲು ಸೂರ್ಯನ ಬೆಳಕು ಪ್ರಧಾನ ಪಾತ್ರ ವಹಿಸುತ್ತದೆ. ಅಂದರೆ ಬಿಸಿಲಿಗೆ ಬಿದ್ದ ಚರ್ಮ ಕೊಂಚ ದಟ್ಟವಾಗುತ್ತಾ ಹೋದರೆ ಉಂಗುರದ ಅಡಿಯ ಚರ್ಮಕ್ಕೆ ಬಿಸಿಲು ಸಿಗದೇ ಇರುವ ಕಾರಣ ಬಿಳಿಚಿಕೊಂಡೇ ಇರುತ್ತದೆ. ಇದನ್ನು ತಡೆಯಲು ಬಿಸಿಲಿಗೆ ಹೋಗುವಾಗ ಸನ್ ಸ್ಕ್ರೀನ್ ಲೇಪನವನ್ನು ಕೈಗಳಿಗೂ ಹಚ್ಚಿಕೊಂಡು ಹೋದರೆ ದಟ್ಟವಾಗಲು ಸಾಧ್ಯವಾಗುವುದಿಲ್ಲ.

ಮನೆಮದ್ದು

ಒಂದು ಚಿಕ್ಕ ಬೋಗುಣಿಯಲ್ಲಿ ಒಂದು ಲಿಂಬೆಯ ರಸವನ್ನು ಹಿಂಡಿ ಇದಕ್ಕೆ ಒಂದು ದೊಡ್ಡ ಚಮಚ ಜೇನು ಸೇರಿಸಿ ಕದಡಿ. ಈ ಮಿಶ್ರಣವನ್ನು ಒಂದು ಹತ್ತಿಯುಂಡೆಯ ಮೂಲಕ ದಪ್ಪನಾಗಿ ಚರ್ಮದ ಬಣ್ಣ ಬದಲಾಗಿದ್ದೆಡೆ ಹಚ್ಚಿ ಹದಿನೈದು ನಿಮಿಷ ಒಣಗಲು ಬಿಡಿ. ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ. ಈ ವಿಧಾನವನ್ನು ವಾರಕ್ಕೆ ಮೂರು ಸಲ ಅನುಸರಿಸುವ ಮೂಲಕ ಕಠಿಣಕರ ಎಂದೆನ್ನಿಸುವ ಭಾಗವೂ ನಿಧಾನವಾಗಿ ಸಹಜವರ್ಣ ಪಡೆಯುತ್ತದೆ. ಅಲ್ಲದೇ ಈ ವಿಧಾನದಿಂದ ಬೆರಳುಗಳೂ ಸೌಮ್ಯ ಮತ್ತು ಸುಂದರವಾಗಿ ಕಾಣುತ್ತವೆ.

ಗಿಡಮೂಲಿಕೆಗಳ ಆರೈಕೆ

ಈ ಭಾಗದ ವರ್ಣವನ್ನು ಸಹಜವರ್ಣಕ್ಕೆ ತಿರುಗಿಸಲು ಲೋಳೆಸರ ಉತ್ತಮ ಆಯ್ಕೆಯಾಗಿದೆ. ಇದಕ್ಕಾಗಿ ಈಗತಾನೇ ಹಿಂಡಿದ ಲೋಳೆಸರದ ರಸವನ್ನು ಹಚ್ಚಿಕೊಂಡು ಉಂಗುರವನ್ನು ಧರಿಸಿ ಆಗಾಗ ತಿರುಗಿಸುತ್ತಾ ಇರಿ. ಕನಿಷ್ಠ ದಿನಕ್ಕೆ ಮೂರು ಬಾರಿಯಾದರೂ ತಿರುಗಿಸಬೇಕು. ಇದರಿಂದ ಗಾಢವಾಗಿದ್ದ ಅಥವಾ ಬಿಳಿಚಿದ್ದ ಭಾಗ ನಿಧಾನವಾಗಿ ಸಹಜವರ್ಣ ಪಡೆಯುತ್ತದೆ.

ಮ್ಯಾನಿಕ್ಯೂರ್

ಉಗುರುಗಳಿಗೆ ಆರೈಕೆ ನೀಡುವ ಸೌಂದರ್ಯವಿಧಾನವಾದ ಮ್ಯಾನಿಕ್ಯೂರ್ ಸಹಾ ಉಂಗುರದ ಕಲೆಯನ್ನು ನಿವಾರಿಸಲು ಸಮರ್ಥವಾಗಿದೆ. ಇದಕ್ಕಾಗಿ ವೃತ್ತಿಪರ ಮ್ಯಾನಿಕ್ಯೂರ್ ತಜ್ಞರನ್ನು ಭೇಟಿಯಾಗಿ. ಬಣ್ಣ ಗಮನಾರ್ಹವಾಗಿ ಬದಲಾವಣೆಯಾಗಲು ತಿಂಗಳಿಗೆ ಕನಿಷ್ಟ ಎರಡು ಬಾರಿಯಾದರೂ ಭೇಟಿ ನೀಡಬೇಕು.

ಬೇರೆ ಬೆರಳಿಗೆ ತೊಡಿ

ಒಂದು ವೇಳೆ ಬದಲಾದ ಬಣ್ಣ ಬಹಳವಾಗಿಯೇ ಎದ್ದು ಕಾಣುತ್ತಿದ್ದರೆ ಇದಕ್ಕೆ ಅನಿವಾರ್ಯವಾಗಿ ಉಂಗುರವನ್ನು ಬೇರೆ ಬೆರಳಿಗೆ ಅಥವಾ ಇನ್ನೊಂದು ಕೈಗೆ ಬದಲಾಯಿಸುವುದೇ ಸೂಕ್ತ ಕ್ರಮ. ಬಹುಕಾಲ ತೆಗೆಯದೇ ಇದ್ದ ಉಂಗುರವನ್ನು ಬೆರಳ ಗಂಟಿನಿಂದ ಹೊರತೆಗೆಯುವುದು ಕಷ್ಟವಾದರೆ ನಿಮ್ಮ ಆಯ್ಕೆಯ ಅಕ್ಕಸಾಲಿಗರ ಬಳಿ ತೆರಳಿ ಅವರಲ್ಲಿರುವ ಉಪಕರಣದಿಂದ ತೆಗೆಸಿಕೊಳ್ಳಬಹುದು. ಉಂಗುರ ಇಲ್ಲದೇ ಬಿಸಿಲಿಗೆ ಒಡ್ಡಿದ ಬಳಿಕ ನಿಧಾನವಾಗಿ ಈ ಭಾಗವೂ ಸಹಜವರ್ಣ ಪಡೆಯುತ್ತಾ ಹೋಗುತ್ತದೆ.