ನಿಮ್ಮ ಬಾಳಸಂಗಾತಿಯಾಗುವವರಲ್ಲಿ ಈ ಅಭ್ಯಾಸಗಳಿದ್ದರೆ, ಮದುವೆಯ ಬಗ್ಗೆ ಇನ್ನೊಮ್ಮೆ ಯೋಚಿಸಿ

ಪ್ರತಿ ವಿಚಾರಕ್ಕೂ ನಕಾರಾತ್ಮಕ ಪ್ರತಿಕ್ರಿಯೆ:

ಕೆಲವೊಮ್ಮೆ ಪರಸ್ಪರರ ಒಳಿತಿಗಾಗಿ ವಿಷಯಗಳನ್ನು ಹೇಳುವುದು ಒಳ್ಳೆಯದು, ಆದರೆ ಪ್ರತಿಯೊಂದು ವಿಚಾರಕ್ಕೂ ನಕಾರಾತ್ಮಕವಾಗಿ ಸ್ಪಂದಿಸುತ್ತಿದ್ದರೆ ಅಥವಾ ನೀವು ಯಾವುದೇ ಕೆಲಸ ಮಾಡಲು ಹೊರಟರೂ ಅದಕ್ಕೆ ಅಡ್ಡಪಡಿಸುತ್ತಲೇ ಇದ್ದರೆ, ನೀವು ಸ್ವಲ್ಪ ಎಚ್ಚರಿಕೆಯಿಂದ ಮದುವೆಯ ನಿರ್ಧಾರ ಮಾಡುವುದು ಒಳ್ಳೆಯದು ಏಕೆಂದರೆ, ನಿಮ್ಮನ್ನು ಪ್ರೀತಿಸುವ ವ್ಯಕ್ತಿ, ಪ್ರತಿ ಕೆಲಸದಲ್ಲೂ ನಿಮಗೆ ಬೆನ್ನೆಲುಬಾಗಿ ನಿಲ್ಲಬೇಕೇ ಹೊರತು, ಪ್ರತಿ ಕೆಲಸಕ್ಕೂ ಅಡ್ಡಗೋಡೆಯಂತಲ್ಲ. ಹೀಗೆ ಪ್ರತಿಯೊಂದಕ್ಕೂ ಋಣಾತ್ಮಕವಾಗಿ ಪ್ರತಿಕ್ರಿಯಿಸಿದರೆ ಮುಂದೆ ಸಮಸ್ಯೆಗಳಾಗಿ ಬದಲಾಗಬಹುದು. ಆದ್ದರಿಂದ ಇಂತಹ ಅಭ್ಯಾಸಗಳಿದ್ದರೆ, ಅವರ ಜೊತೆ ಮದುವೆ ಉತ್ತಮ ಆಯ್ಕೆಯಲ್ಲ.

ಸದಾ ಮೇಲ್ವಿಚಾರಣೆ:

ಪ್ರತಿಯೊಬ್ಬರೂ ಕಾಳಜಿ ಮಾಡುವಂತಹ ಸಂಗಾತಿಯನ್ನು ಇಷ್ಟಪಡುತ್ತಾರೆ, ಆದರೆ ಕಾಳಜಿ ಮತ್ತು ವ್ಯಂಗ್ಯ ಅಥವಾ ಅನುಮಾನದ ಮೇಲ್ವಿಚಾರಣೆ ನಡುವೆ ವ್ಯತ್ಯಾಸವಿದೆ. ನಿಮ್ಮ ಸಂಗಾತಿ ಎಲ್ಲವನ್ನೂ ಸೂಕ್ಷ್ಮವಾಗಿ ಗಮನಿಸುವ ಅಭ್ಯಾಸವನ್ನು ಹೊಂದಿದ್ದರೆ, ಆತುರದಲ್ಲಿ ಮದುವೆಯ ನಿರ್ಧಾರವನ್ನು ತೆಗೆದುಕೊಳ್ಳಬೇಡಿ. ನೀವು ಏನು ಮಾಡುತ್ತೀರಿ, ಎಲ್ಲಿ ಹೋಗುತ್ತೀರಿ, ಯಾರ ಜೊತೆ ಹೋಗುತ್ತೀರಿ ಎಂಬುದು ಸುರಕ್ಷತೆ ದೃಷ್ಟಿಯಿಂದ ಕೇಳುತ್ತಿದ್ದರೆ ಉತ್ತಮ. ಆದರೆ ಎಲ್ಲಿ ಹೋಗುತ್ತಿದ್ದೇನೆಂದು ಹೇಳಿ ಹೋಗಿದ್ದರೂ, ಪದೇ ಪದೇ ಕರೆಮಾಡಿ, ನೀವಿರುವ ಜಾಗವನ್ನು ಪ್ರಶ್ನೆ ಮಾಡುತ್ತಿದ್ದರೆ, ಆ ವ್ಯಕ್ತಿಯ ಬಗ್ಗೆ ಮತ್ತೊಮ್ಮೆ ಯೋಚಿಸುವುದು ಒಳಿತು.

ಗೊಂದಲ:

ನಿಮ್ಮ ಸಂಗಾತಿಗೆ ನಿಮ್ಮೊಂದಿಗೆ, ಪಾರ್ಟಿಯಲ್ಲಿ ಸುತ್ತಾಡಲು ಇಷ್ಟ. ಆದರೆ ಮದುವೆಯ ವಿಚಾರ ಬಂದರೆ ಅಲಕ್ಷ್ಯ ಮಾಡುತ್ತಿದ್ದರೆ ಅಥವಾ ಮದುವೆಯ ಮಾತುಗಳಲ್ಲಿ ಗೊಂದಲಗಳಿದ್ದರೆ, ನೀವು ಜಾಗರೂಕರಾಗಿರಬೇಕು. ಇದರರ್ಥ ಅವರಿಗೆ ನಿಮ್ಮೊಂದಿಗೆ ಕಾಲ ಕಳೆಯಲಷ್ಟೇ ಆಸಕ್ತಿ ಬಿಟ್ಟರೆ ಮದುವೆಯಲ್ಲಿ ಇಲ್ಲ ಎಂಬುದು. ಒಂದು ವೇಳೆ ಇವರನ್ನು ಮದುವೆಯಾದರೂ ಸಹ, ಮದುವೆಯ ನಂತರ ಜಗಳಕ್ಕೆ ಕಾರಣವಾಗಬಹುದು.

ನಿಷ್ಟೆಯಿಲ್ಲದಿರುವುದು:

ಬದುಕುವುದಕ್ಕೆ ಸುಳ್ಳು ಹೇಳುವುದು ಸಾಮಾನ್ಯ, ಆದರೆ ಸುಳ್ಳು ಹೇಳಿಕೊಂಡೇ ಬದುಕುವುದು ಸರಿಯಲ್ಲ. ಸುಳ್ಳುಗಳನ್ನೇ ಮೈಗೂಡಿಸಿಕೊಂಡಿದ್ದರೆ ಅಥವಾ ಸುಳ್ಳುನಿಂದಲೇ ಸಂಬಂಧ ಕಟ್ಟಿಕೊಂಡಿದ್ದರೆ ನೀವು ಸ್ವಲ್ಪ ಯೋಚಿಸಿ. ಏಕೆಂದರೆ ಮದುವೆ ಮುನ್ನವೇ ಇಷ್ಟೊಂದು ಅಪ್ರಾಮಾಣಿಕನಾಗಿರುವವರು ಮದುವೆಯಾದ ಮೇಲೆ ಹೇಗಿರಬಹುದೆಂದು. ಪ್ರಾಮಾಣಿಕತೆ, ನಿಷ್ಠೆ ನಿಜವಾದ ಪ್ರೀತಿಗೆ ಅವಶ್ಯಕವಾದ ವಿಚಾರಗಳು, ಅವೇ ನಿಮ್ಮ ಸಂಗಾತಿಯ ಬಳಿ ಇಲ್ಲವಾದರೆ, ಅಲ್ಲಿ ಪ್ರೀತಿ ಹುಟ್ಟಲೂ ಸಾಧ್ಯವೇ ಇಲ್ಲ.

ಕುಟುಂಬವನ್ನು ಇಷ್ಟಪಡದೇ ಇರುವುದು:

ಪ್ರತಿಯೊಬ್ಬರಿಗೂ ಕುಟುಂಬವೆಂಬುದು ಒಂದು ಬೆಲೆಕಟ್ಟಲಾಗದ ಭಾವನೆ. ತನ್ನನ್ನು ವರಿಸುವ ಹುಡುಗ ಅಥವಾ ಹುಡುಗಿ ತನ್ನ ಕುಟುಂಬವನನ್ನು ಇಷ್ಟಪಡಬೇಕು, ತನ್ನ ಕುಟುಂಬದ ಭಾಗವಾಗರಬೇಕು ಎಂದು ಎಲ್ಲರೂ ಆಶಿಸುತ್ತಾರೆ. ಆದರೆ ನಿಮ್ಮ ಸಂಗಾತಿಯಾಗುವವರಿಗೆ ನಿಮ್ಮ ಕುಟುಂಬದ ಮೇಲೆ ಗೌರವ, ಪ್ರೀತಿ ಇಲ್ಲದಿದ್ದರೆ, ಆ ಕನಸು ಭಗ್ನವಾಗಬಹುದು. ಆದ್ದರಿಂದ ಇಂತಹ ಮನಸ್ಥಿತಿ ಇರುವ ವ್ಯಕ್ತಿಯನ್ನು ಮದುವೆಯಾಗದಿರುವುದೇ ಉತ್ತಮ.