ಕೊರೊನಾವೈರಸ್‌ ಲಾಕ್‌ಡೌನ್‌ನಿಂದಾಗಿ ಸಂಸಾರದಲ್ಲಿ ಒಡುಕು ಮೂಡುತ್ತಿದೆಯೇ?

ಮಿಲನ

ಗಂಡ-ಹೆಂಡತಿ ಜಗಳ ಉಂಟು ಮಲಗುವ ತನಕ ಎಂಬ ಮಾತೇ ಇದೆ. ಏನೇ ವೈಮನಸ್ಸು ಇದ್ದರೂ ಎರಡು ಶರೀರಗಳು ಒಂದಾದಾಗ ಅನುರಾಗ ಮೂಡುವುದು. ವೈರಸ್, ಆರ್ಥಿಕ ಸಮಸ್ಯೆ, ಮತ್ತಿತರ ಎಲ್ಲಾ ಸಮಸ್ಯೆಗಳನ್ನು ಆ ಕ್ಷಣ ನೀವಿಬ್ಬರು ಮರೆತು ಖುಷಿಯಾಗಿರುವಿರಿ.

ಆದರೆ ಕೆಲವೊಮ್ಮೆ ಮಾನಸಿಕ ಒತ್ತಡ, ಮತ್ತಿತರ ಸಮಸ್ಯೆಯಿಂದಾಗಿ ನಿಮ್ಮ ಸಂಗಾತಿ ಬೇಸರದಲ್ಲಿದ್ದರೆ ನಿಮ್ಮ ಜೊತೆ ಖುಷಿಯಾಗಿರಲು ಆಸಕ್ತಿ ತೋರದಿದ್ದರೆ ಒತ್ತಾಯ ಮಾಡುವುದು ಅಥವಾ ಮಾತಿನಲ್ಲಿ ನೋಯಿಸುವುದು ಮಾಡಬೇಡಿ. ಇದರಿಂದ ಸಮಸ್ಯೆ ಮತ್ತಷ್ಟು ಹೆಚ್ಚಾಗುವುದು. ಅವರ ಮನಸ್ಥಿತಿಯನ್ನು ಗೌರವಿಸಿ. ಒಂದು ಬೆಚ್ಚಗಿನ ಅಪ್ಪುಗೆ, ಮಧುರವಾದ ಮುತ್ತು ನೀಡುವುದು, ಅವರ ಕೈಯನ್ನು ಹಿಡಿದು ಅವರನ್ನು ಕಂಫರ್ಟ್ ಝೋನ್‌ಗೆ ತನ್ನಿ, ಆಗ ಅವರು ನಿಮ್ಮನ್ನು ಸೇರಲು ಆಸಕ್ತಿ ತೋರಿಸುತ್ತಾರೆ.

ಆರೋಗ್ಯಕರ ಸಂಭೋಗ ಗಂಡ-ಹೆಂಡತಿ ಸಂಬಂಧವನ್ನು ಮತ್ತಷ್ಟು ಗಟ್ಟಿಯಾಗಿಸುವುದು.

ಮಾತಿಗೆ ಮಾತು ಬೆಳೆಸಬೇಡಿ

ಅವರು ಏನೋ ಒಂದು ಹೇಳಿದ್ದಕ್ಕೆ ನೀವು ತಿರುಗಿ ಹೇಳುವುದು ಹೀಗೆ ಮಾತಿಗೆ- ಮಾತು ಬೆಳೆಸುವುದರಿಂದ ಮನಸ್ತಾಪ ಬರುವುದಲ್ಲದೇ ಮತ್ತೇನು ಪ್ರಯೋಜನವಿಲ್ಲ. ಇನ್ನು ನಿಮ್ಮ ಸಂಗಾತಿ ಮೂಡಿ ಟೈಪ್ ಆಗಿದ್ದರೆ ಮಾತನಾಡುವಾಗ ತುಂಬಾ ಹುಷಾರು ಆಗಿರಬೇಕು, ಇಲ್ಲಾ ಅಂದ್ರೆ ನಿಮ್ಮ ಮಾತುಗಳೇ ಸಾಕು ಅವರ ಮನಸ್ಸು ಹಾಳಾಗಲು.

ಇದರಿಂದ ಇಬ್ಬರ ನೆಮ್ಮದಿಯೂ ಹಾಳಾಗುವುದು. ಮನೆಯಲ್ಲಿರುವುದೇ ಹಿಂಸೆ ಅನಿಸುವುದು. ಹೊರಗಡೆ ಹೋಗಲೂ ಸಾಧ್ಯವಾಗದೆ ಮನೆಯಲ್ಲಿ ಇರಲೂ ಆಗದೆ ಉಸಿರುಗಟ್ಟಿದ ಅನುಭವ ಉಂಟಾಗುವುದು. ಹಾಗಾದರೆ ಇರಲು ನಿಮಗೆ ಅವರಲ್ಲಿ ಏನಾದರೂ ತಪ್ಪುಗಳು ಕಂಡರೆ ನೀವು ಮಾಡಿದ್ದು, ನಿಮ್ಮಂದ ಆಗಿದ್ದು ಅನ್ನುವ ಬದಲು ನನಗೆ ಅನಿಸುತ್ತೆ ಅಂತ ನಿಮ್ಮ ಅಭಿಪ್ರಾಯವನ್ನು ಸಮಯ, ಸಂದರ್ಭ ನೋಡಿ ಹೇಳಿ.

ಇಬ್ಬರು ಕೂತಾಗ ಸಮಸ್ಯೆಗಳ ಬಗ್ಗೆ ಮಾತನಾಡಿ

ಸಮಸ್ಯೆ, ತೊಂದರೆಗಳನ್ನು ಮನಸ್ಸಿನಲ್ಲಿಯೇ ಇಟ್ಟು ಕೊರಗುವುದಕ್ಕೆ ಇಬ್ಬರೇ ಒಂದು ಕಡೆ ಕೂತು ನಿಮ್ಮ ಸಮಸ್ಯೆಗಳ ಕುರಿತು ಮಾತನಾಡಿ. ಆಗ ಸಮಸ್ಯೆಗೆ ಒಂದು ಪರಿಹಾರವೂ ಕಂಡು ಕೊಳ್ಳಲು ಸಾಧ್ಯವಾಗುತ್ತದೆ. ಏನೇ ಸಮಸ್ಯೆಯಿದ್ದರೂ ಮನಸ್ಸು ಬಿಚ್ಚಿ ಮಾತನಾಡಿದರೆ ಸರಿ ಹೋಗುವುದು. ಇನ್ನು ಆರ್ಥಿಕ ತೊಂದರೆಯಾದರೆ ಇನ್ನು ಸ್ವಲ್ಪ ಸಮಯದಲ್ಲಿ ಜೀವನ ಸುಧಾರಿಸುತ್ತದೆ, ನಾವೊಬ್ಬರೇ ಅಲ್ಲ, ಇಡೀ ವಿಶ್ವದಲ್ಲಿ ಅನೇಕರು ಸಮಸ್ಯೆ ಎದುರಿಸುತ್ತಿದ್ದಾರೆ, ಈ ಲಾಕ್‌ಡೌನ್ ಮುಗಿದ ಮೇಲೆ ಎಲ್ಲವೂ ಸರಿ ಹೋಗುವುದು ಎಂದು ಧೈರ್ಯ ತುಂಬಿ.

ಅವರ ಖಾಸಗಿತನಕ್ಕೂ ಸಮಯ ನೀಡಿ

ಪ್ರತಿಯೊಬ್ಬರು ಕೆಲವೊಂದು ಕ್ಷಣ ನಮಗಾಗಿಯೇ ಇರಬೇಕೆಂದು ಬಯಸುವುದು ಸಹಜ. ಮನೆ ಸ್ವಲ್ಪ ದೊಡ್ಡದಾಗಿದ್ದರೆ ಸ್ವಲ್ಪ ಹೊತ್ತು ಅವರು ಹೋಗಿ ಒಂಟಿಯಾಗಿ ಕೂರಬೇಕೆಂದು ಬಯಸಿದರೆ ಡಿಸ್ಟರ್ಬ್‌ ಮಾಡಬೇಡಿ. ಇನ್ನು ಪರಸ್ಪರ ಮೊಬೈಲ್ ಚೆಕ್‌ ಮಾಡುವುದೆಲ್ಲಾ ಮಾಡಬೇಡಿ. ಇದರಿಂದ ಮನಸ್ಸಿನ ನೆಮ್ಮದಿ ಹಾಳಾಗುವುದು. ನಿಮ್ಮ ಇಷ್ಟದ ಸಿನಿಮಾ ಕಾಣುವುದು, ಓದುವುದು, ಹಾಡು ಕೇಳುವುದು ಮಾಡಿ, ಅವರನ್ನು ಅವರಿಷ್ಟದ ಕೆಲಸ ಮಾಡಲು ಬಿಡಿ.

ಇಬ್ಬರು ಜೊತೆಗೂಡಿ ಕೆಲವೊಂದಿಷ್ಟು ಕೆಲಸ ಮಾಡಿ'

ಮನೆಯಲ್ಲಿಯೇ ಇದ್ದು ಬೋರಾಯ್ತು ಅನ್ನುವ ಬದಲು ಗಾರ್ಡಿನಿಂಗ್ ಮಾಡುವುದು ಅಥವಾ ಹಪ್ಪಳ ಸಂಡಿಗೆ ಮಾಡುವುದು, ಅಥವಾ ಏನಾದರೂ ಕ್ರಿಯೇಟಿವ್ ವರ್ಕ್ ಮಾಡುವುದು ಮಾಡಿ. ಇದರಿಂದ ಇಬ್ಬರು ಜೊತೆಗೂಡಿ ಖುಷಿ ಖುಷಿಯಾಗಿ ಮಾಡುವುದರ ಜೊತೆಗೆ ಮನಸ್ಸಿನ ಬೇಸರ ಕೂಡ ಕಡಿಮೆಯಾಗುವುದು. ಈ ಸಮಯವನ್ನು ನಿಮ್ಮ ಸಂಬಂಧ ಮತ್ತಷ್ಟು ಗಟ್ಟಿಯಾಗಿಸಲು ಗಮನ ಹರಿಸಿ... ಅನಗ್ಯತ ವಿಷಯಗಳನ್ನು ಮನಸ್ಸಿನಿಂದ ತೆಗೆದು ಹಾಕಿ ಇಬ್ಬರು ಖುಷಿಯಾಗಿರಲು ಪ್ರಯತ್ನಿಸಿ.