ಹಿಂದಿನ ಮಾಜಿ ಸಂಗಾತಿಯ ಕನಸುಗಳೇಕೆ ಕಾಡುತ್ತವೆ? ಇಲ್ಲಿದೆ ಉತ್ತರ..

ನೆನಪುಗಳ ಕಾಡುವಿಕೆಗೆ ಒಂದು ವಿಶೇಷ ಅರ್ಥವಿದೆ

ನಮಗೆ ಗೊತ್ತಿದ್ದು ಅಥವಾ ಗೊತ್ತಿಲ್ಲದಿರುವಂತೆಯೇ ಹಿಂದಿನ ವಿಷಯಗಳು ಕನಸಿನಲ್ಲಿ ಕಾಣಿಸಿಕೊಳ್ಳುತ್ತವೆ... ಈ ಕನಸುಗಳಿಗೆ ಒಂದು ನಿರ್ದಿಷ್ಟ ಅರ್ಥವಿದೆ. ಯಾವುದೋ ಒಂದು ಆಸೆ, ಆಕಾಂಕ್ಷೆಯನ್ನು ಪೂರೈಸಿಕೊಳ್ಳುವ ಸುಪ್ತ ಬಯಕೆ ಅದರಲ್ಲಿ ಅಡಗಿರುತ್ತದೆ. ಕನಸುಗಳ ಬಗ್ಗೆ ಹೇಳುವುದಾದರೆ ಕೆಲವು ವಾಸ್ತವಕ್ಕೆ ಹತ್ತಿರವಾಗಿರುತ್ತವೆ ಹಾಗೂ ಇನ್ನು ಕೆಲವು ಕೇವಲ ಸಾಂಕೇತಿಕವಾಗಿರುತ್ತವೆ. ಹಿಂದಿನ ಸಂಗಾತಿ, ಪತಿ, ಪತ್ನಿಗಳ ನೆನಪುಗಳು ಇಂಥ ಅರ್ಥವನ್ನು ಬಿಂಬಿಸುತ್ತವೆ.

ಯಾವುದೋ ಆಸೆಯ ಪೂರೈಕೆಯ ಬಯಕೆ ಇರಬಹುದು

ಕನಸುಗಳಲ್ಲಿ ಹಿಂದಿನ ಸಂಗಾತಿಯ ನೆನಪಿನ ಕಾಡುವಿಕೆ ಎಂದರೆ ಅದು ನೀವು ಅವರೊಂದಿಗೆ ಹೊಂದಿದ್ದ ನೇರ ಸಂಬಂಧವನ್ನು ಸೂಚಿಸುತ್ತದೆ. ಅಂದರೆ ಅವರೊಂದಿಗೆ ನೀವು ಇನ್ನೂ ಪೂರೈಸಿಕೊಳ್ಳಲಾಗದ ಯಾವುದೋ ಆಸೆಯನ್ನು ನೆರವೇರಿಸಿಕೊಳ್ಳಬೇಕೆಂಬ ಸುಪ್ತ ಭಾವನೆಯನ್ನು ಇದು ಬಿಂಬಿಸುತ್ತದೆ. ಬಯಕೆಯೇ ಇಲ್ಲಿ ಪ್ರಧಾನವಾಗಿದ್ದು, ಕಾಣುವ ಘಟನೆ ಅಥವಾ ಸಂಗಾತಿಯು ಕೇವಲ ಸಾಂಕೇತಿಕವಾಗಿರಬಹುದು.

ಸಂಬಂಧವನ್ನು ಕಳೆದುಕೊಂಡ ನೋವಿರಬಹುದು

ಕಳೆದು ಹೋದ ಸಂಬಂಧದಿಂದ ನಿಮ್ಮ ಮನಸ್ಸಿಗೆ ಉಂಟಾಗಿರುವ ನೋವು ಅಥವಾ ನೀವಿಬ್ಬರೂ ಆಗ ಜೊತೆಯಾಗಿ ಕಳೆದ ಮಧುರ ಕ್ಷಣಗಳ ಬಗ್ಗೆ ಈ ಕನಸುಗಳು ಸಾಂಕೇತಿಕ ಅರ್ಥವನ್ನು ಸೂಚಿಸುತ್ತವೆ. ಒಂದೇ ಮಾತಲ್ಲಿ ಹೇಳಬೇಕೆಂದರೆ ನೀವು ನಿಮ್ಮ ಸಂಗಾತಿಯನ್ನು 'ಮಿಸ್' ಮಾಡಿಕೊಳ್ಳುತ್ತಿರುವಿರಿ ಎಂದರ್ಥ.

ಅರ್ಧ ತೀರಿದ ಬಯಕೆಗಳು ಕಾಡುತ್ತವೆ

ಹಿಂದಿನ ಸಂಗಾತಿಯೊಂದಿಗೆ ಇರುವಾಗ ಅದೆಷ್ಟೋ ಸಮಯ ಜೊತೆಯಾಗಿ ಕಳೆದಿರುತ್ತೀರಿ. ಆಗ ಜೊತೆಯಾಗಿ ಮಾಡಿದ ಕ್ರಿಯೆಗಳು ಅಥವಾ ಅವನ್ನು ಇನ್ನಷ್ಟು ಅನುಭವಿಸಬೇಕಿತ್ತು ಎಂಬ ಸುಪ್ತ ಭಾವನೆಗಳು ಸಹ ಕನಸಿನಲ್ಲಿ ಸಂಗಾತಿಯ ನೆನಪಾಗಲು ಕಾರಣವಾಗುತ್ತವೆ. ಭಾವನಾತ್ಮಕ, ಲೈಂಗಿಕ, ದೈಹಿಕ ಅಥವಾ ಪೋಷಣಾತ್ಮಕ ಅಂಶಗಳು ಇದರಲ್ಲಿ ಪ್ರಧಾನವಾಗಿರುತ್ತವೆ. ಇವು ನೇರವಾಗಿ ಅಥವಾ ಸಾಂಕೇತಿಕವಾಗಿ ನೆನಪುಗಳ ರೂಪದಲ್ಲಿ ಮರುಕಳಿಸುತ್ತವೆ.

ಹಿಂದಿನ ಸಂಗಾತಿಯನ್ನು ಈಗಿನ ಸಂಗಾತಿಯಲ್ಲಿ ಕಾಣಬಯಸುವುದು

ಹಿಂದಿನ ಸಂಗಾತಿಯ ಯಾವುದೋ ಗುಣವನ್ನು ಈಗಿನ ಸಂಗಾತಿಯಲ್ಲಿ ಬಯಸುತ್ತಿರಬಹುದು ಅಥವಾ ಆ ಸಂಗಾತಿಯೊಂದಿಗೆ ನಡೆಸಿದ ರೀತಿಯ ಕ್ರಿಯೆಯನ್ನು ಈಗಿನ ಸಂಗಾತಿಯೊಂದಿಗೆ ನಡೆಸುವ ಭಾವನೆ ಒಳಗೆ ಇದ್ದಾಗ ಹಾಗೂ ಅದನ್ನು ಹೇಳಿಕೊಳ್ಳಲು ಸಾಧ್ಯವಾಗದಿದ್ದಾಗ ಅಥವಾ ನಿಮಗೆ ನೀವೆ ಅದನ್ನು ಒಪ್ಪಿಕೊಳ್ಳಲು ಸಾಧ್ಯವಾಗದಿರುವಾಗ ಇಂಥ ಕನಸುಗಳು ಪದೆ ಪದೆ ಕಾಡುತ್ತವೆ. ಈಗಿನ ಸಂಗಾತಿಯು ಎಲ್ಲ ರೀತಿಯಲ್ಲಿ ಸರಿಯಾಗಿದ್ದರೂ ಹಿಂದಿನ ಸಂಗಾತಿಯೊಂದಿಗೆ ನಡೆಸಿದ ಮಿಲನ ಕ್ರಿಯೆ ಅಥವಾ ಆತ ನೀಡುತ್ತಿದ್ದ ಪ್ರೀತಿಯ ಬಗ್ಗೆ ಕೆಲ ಸುಪ್ತ ಭಾವನೆಗಳು ಆಗಾಗ ಮೇಲೆದ್ದು ನೆನಪಗಳ ರೂಪದಲ್ಲಿ ಬರುತ್ತಿರುತ್ತವೆ. ಬಿಟ್ಟು ಹೋದ ಸಂಗಾತಿಯ ಕಾರಣದಿಂದ ಅದಾವುದೋ ಭರಿಸಲಾಗದ ಕೊರತೆ ಎಲ್ಲೋ ಒಂದು ಕಡೆ ಕಾಡಿಸುತ್ತಲೇ ಇರುತ್ತದೆ. ಉದಾಹರಣೆಗೆ ನೋಡುವುದಾದರೆ ಹಿಂದಿನ ಸಂಗಾತಿಯೊಂದಿಗೆ ನೀವು ಆಗಾಗ ಸಾಹಸ ಪ್ರಯಾಣ ಮಾಡುತ್ತಿದ್ದರಿ ಎಂದುಕೊಳ್ಳೋಣ. ಆದರೆ ಈಗಿನ ಸಂಗಾತಿಗೆ ಅದು ಇಷ್ಟವಿಲ್ಲದಿರಬಹುದು ಅಥವಾ ಸಾಹಸ ಪ್ರಯಾಣಕ್ಕೆ ಸಮರ್ಥರಾಗಿಲ್ಲದಿರಬಹುದು. ಇಂಥ ಸಂದರ್ಭಗಳಲ್ಲಿ ಆ ಕಳೆದು ಹೋದ ಕ್ಷಣಗಳು ಮತ್ತೆ ಬಾರವು ಎಂಬ ನೋವು ಕಾಡಿಸಿ ಅದು ಕನಸಿನ ರೂಪದಲ್ಲಿ ಪ್ರಕಟವಾಗುತ್ತದೆ.

ಅನುಭವಿಸಿದ ಯಾತನೆಗಳೂ ಆಗಾಗ ನೆನಪಾಗಿ ಕಾಡುತ್ತವೆ

ಕೇವಲ ಸುಂದರ ಕ್ಷಣಗಳು ಮಾತ್ರವಲ್ಲದೆ ಹಿಂದಿನ ಸಂಗಾತಿಯಿಂದ ಅನುಭವಿಸಿದ ದೌರ್ಜನ್ಯ, ನೋವುಗಳು ಸಹ ಕನಸಿನ ರೂಪದಲ್ಲಿ ಕಾಡಿಸಬಹುದು. ಹಿಂದಿನ ಗಂಡನೊಂದಿಗೆ ಚಿಕ್ಕ ರೂಮಿನಲ್ಲಿ ಕೂಡಿ ಹಾಕಿರುವ ಹಾಗೆ ಕನಸುಗಳು ಬೀಳಬಹುದು. ಇದೆಲ್ಲ ಆ ಸಮಯದಲ್ಲಿ ಅನುಭವಿಸಿದ ಯಾತನೆಯ ನೆನಪುಗಳಾಗಳಾಗಿರುತ್ತದೆ. ಅಂದರೆ ಕೆಟ್ಟ ಸಂಗಾತಿಯ ನೆನಪುಗಳು ಸಹ ಬಿಡದೆ ಕಾಡುವುದು ಮಾತ್ರ ಸತ್ಯ.