ತರಕಾರಿ ಮಿಶ್ರಿತ ರವಾ ಉಪ್ಪಿಟ್ಟು ಪಾಕವಿಧಾನ

Recipes

lekhaka-Lekhaka

Posted By: Divya pandith

Published: Wednesday, December 13, 2017, 11:12 [IST]

ತರಕಾರಿ ಮಿಶ್ರಿತ ರವಾ ಉಪ್ಪಿಟ್ಟು ಪಾಕವಿಧಾನ
ತರಕಾರಿ ಮಿಶ್ರಿತ ರವಾ ಉಪ್ಪಿಟ್ಟು ದಕ್ಷಿಣ ಭಾರತೀಯರ ಸಾಂಪ್ರದಾಯಿಕ ಉಪಹಾರಗಳಲ್ಲಿ ಒಂದು. ಇದನ್ನು ಉಪ್ಮಾ, ಖಾರಾ ಬಾತ್ ಎಂದು ಕರೆಯುತ್ತಾರೆ. ಇದನ್ನು ಸವಿಯುವಾಗ ಕೇಸರಿ ಬಾತ್ ಅನ್ನು ಜೊತೆಗೆ ಸೇಸೇರಿಸುವುದು ಒಂದು ಸುಂದರವಾದ ಸಂಯೋಜನೆ ಎನ್ನಬಹುದು. ಇದರ ತಯಾರಿಯಲ್ಲಿ ಬಳಸುವ ಕ್ಯಾರೆಟ್, ಕ್ಯಾಪ್ಸಿಕಮ್, ಬಟಾಣಿ, ಉಪ್ಪು, ಕೊತ್ತಂಬರಿ ಸೊಪ್ಪು ಹಾಗೂ ಉಪ್ಪು ಇದರ ರುಚಿಯನ್ನು ಹೆಚ್ಚಿಸುತ್ತವೆ.

ಆರೋಗ್ಯಕರ ಉಪಹಾರಗಳಲ್ಲಿ ಒಂದಾದ ಈ ತಿಂಡಿಯನ್ನು ಬಹಳ ಸರಳ ಹಾಗೂ ಸುಲಭ ವಿಧಾನಗಳಲ್ಲಿ ತಯಾರಿಸಬಹುದು. ಇದನ್ನು ಕೆಲವರು ಭೋಜನಕ್ಕೂ ತಯಾರಿಸುತ್ತಾರೆ. ಈ ಉಪಹಾರದಲ್ಲಿ ಹೆಚ್ಚು ಎಣ್ಣೆಯನ್ನು ಬಳಸಲಾಗುತ್ತದೆ. ರವಾ ಮತ್ತು ತರಕಾರಿ ಹೆಚ್ಚಿನ ಪ್ರಮಾಣದಲ್ಲಿ ಹೀರಿಕೊಳ್ಳುವುದರಿಂದ ಎಣ್ಣೆಯನ್ನು ಹೆಚ್ಚಿನ ಪ್ರಮಾಣದಲ್ಲಿ ಬಳಸಲಾಗುವುದು.

ಕರ್ನಾಟಕದ ಬಹುತೇಕ ಪ್ರದೇಶಗಳಲ್ಲಿ ಮುಂಜಾನೆಯ ಉಪಹಾರವಾಗಿ ಈ ತಿಂಡಿಯನ್ನು ತಯಾರಿಸಲಾಗುತ್ತದೆ. ಇದನ್ನು ನೀವು ಸಹ ತಯಾರಿಸಿ ಸವಿಯಬೇಕು ಎನ್ನುವ ಉತ್ಸಾಹದಲ್ಲಿದ್ದರೆ ಈ ಮುಂದೆ ನೀಡಿರುವ ವೀಡಿಯೋ ಹಾಗೂ ಹಂತ ಹಂತವಾದ ಚಿತ್ರವಿವರಣೆಯನ್ನು ಪರಿಶೀಲಿಸಿ.

ಹಂತ ಹಂತವಾದ ಚಿತ್ರವಿವರಣೆ:

1. ಒಂದು ದಪ್ಪ ತಳದ ಪಾತ್ರೆಯಲ್ಲಿ ರವಾ ಹಾಕಿ ಬಿಸಿ ಮಾಡಿ.

2. ಸುಮಾರು 3-5 ನಿಮಿಷಗಳಕಾಲ, ಸ್ವಲ್ಪ ಕಂದು ಬಣ್ಣಕ್ಕೆ ತಿರುಗುವವರೆಗೂ ಹುರಿಯಿರಿ.

3. ಹುರಿದ ನಂತರ ಒಂದು ಬೌಲ್‍ಗೆ ವರ್ಗಾಯಿಸಿ ಒಂದೆಡೆ ಇಡಿ.

4. ಒಂದು ಪಾತ್ರೆಯಲ್ಲಿ ಎಣ್ಣೆಯನ್ನು ಹಾಕಿ ಬಿಸಿ ಮಾಡಿ.

5. ನಂತರ ಉದ್ದಿನ ಬೇಳೆ ಮತ್ತು ಸಾಸಿವೆಯನ್ನು ಹಾಕಿ.

6. ನಂತರ ಕಡ್ಲೆ ಬೇಳೆ ಮತ್ತು ತುರಿದುಕೊಂಡ ಶುಂಠಿ ಸೇರಿಸಿ.

7. ಚೆನ್ನಾಗಿ ಕಲುಕಿ.

8. ಕರಿಬೇವಿನ ಎಲೆ ಮತ್ತು ಹೆಚ್ಚಿಕೊಂಡ ಹಸಿಮೆಣಸಿನ ಕಾಯನ್ನು ಸೇರಿಸಿ ಕಲುಕಿ.

9. ನಂತರ ಹೆಚ್ಚಿಕೊಂಡ ಈರುಳ್ಳಿ ಹಾಕಿ. ಅದು ತಿಳಿ ಕಂದು ಬಣ್ಣಕ್ಕೆ ತಿರುಗುವ ವರೆಗೆ ಹುರಿಯಿರಿ.

10. ನಂತರ ಹೆಚ್ಚಿಕೊಂಡ ಕ್ಯಾರೆಟ್ ಸೇರಿಸಿ.

11. ಚೆನ್ನಾಗಿ ತಿರುವಿ ಹಾಗೂ ಸ್ವಲ್ಪ ಸಮಯ ಬೇಯಲು ಬಿಡಿ.

12. ನಂತರ ಹೆಚ್ಚಿಕೊಂಡ ಕ್ಯಾಪ್ಸಿಕಮ್ ಮತ್ತು ಬಟಾಣಿಯನ್ನು ಸೇರಿಸಿ.

13. ನಂತರ 3 ಬೌಲ್ ನೀರನ್ನು ಸೇರಿಸಿ. ಸಾಮಾನ್ಯವಾಗಿ ಒಂದು ಕಪ್ ರವಾಕ್ಕೆ ಎರಡು ಕಪ್ ಅಥವಾ ಮೂರು ಕಪ್ ನೀರಿನ ಪ್ರಮಾಣ ಬಳಸುತ್ತಾರೆ. ಅದು ನಿಮ್ಮ ಆಧ್ಯತೆಗೆ ಬಳಸಬಹುದು.

14. ತೆಂಗಿನ ತುರಿ ಮತ್ತು ಉಪ್ಪನ್ನು ಸೇರಿಸಿ.

15. ನಂತರ ಮುಚ್ಚಳವನ್ನು ಮುಚ್ಚಿ 8-10 ನಿಮಿಷಗಳಕಾಲ ಬೇಯಲು ಬಿಡಿ.

16. ನಂತರ ಮುಚ್ಚಳವನ್ನು ತೆರೆದು ಒಮ್ಮೆ ಮಿಶ್ರಣವನ್ನು ತಿರುವಿ.

17. ನಿಧಾನವಾಗಿ ರವಾವನ್ನು ಸೇರಿಸುತ್ತಾ ಹೋಗಿ. ರವಾ ಗಂಟಾಗದಂತೆ ತಿರುವುತ್ತಿರಬೇಕು.

18. ಎಲ್ಲಾ ಸಾಮಾಗ್ರಿಗಳು ಬೆರೆತುಕೊಳ್ಳಲು ಚೆನ್ನಾಗಿ ತಿರುವುತ್ತಿರಬೇಕು.

19. ನೀರು ಸಂಪೂರ್ಣವಾಗಿ ಆವಿಯಾಗುವವರೆಗೂ ಮುಚ್ಚಳವನ್ನು ಮುಚ್ಚಿಡಬೇಕು.

20. ನಂತರ ಮುಚ್ಚಳವನ್ನು ತೆರೆದು ಅರ್ಧ ಟೇಬಲ್ ಚಮಚ ಹೆಚ್ಚಿಕೊಂಡ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ. ಚೆನ್ನಾಗಿ ಮಿಶ್ರಗೊಳಿಸಿ.

21. ನಂತರ ಉರಿಯನ್ನು ಆರಿಸಿ.

22. ನಂತರ ಒಂದು ಟೇಬಲ್ ಚಮಚ ನಿಂಬೆ ರಸವನ್ನು ಸೇರಿಸಿ ಮಿಶ್ರಗೊಳಿಸಿ.

23. ಬಳಿಕ ಒಂದು ಬೌಲ್‍ಗೆ ವರ್ಗಾಯಿಸಿ, ಬಿಸಿ ಬಿಸಿ ಇರುವಾಗಲೇ ಸವಿಯಲು ನೀಡಿ.