ಬೀಟ್ರೂಟ್ ಮತ್ತು ಕ್ಯಾರೆಟ್ ಬಳಸಿ ಈ ರೀತಿ ಸ್ಯಾಂಡ್‌ವಿಚ್ ಮಾಡಿ! ರಕ್ತಹೀನತೆ ದೂರ.. ಹಸಿವು ಮಾಯ!

ಚಳಿಗಾಲದ ಹಸಿವಿಗೆ ಕಲರ್ ಕಲರ್ ಟ್ರೀಟ್! ಬೀಟ್ರೂಟ್-ಕ್ಯಾರೆಟ್ ಬಳಸಿ ಕೇವಲ 5 ನಿಮಿಷದಲ್ಲಿ ಮಾಡಿ ಸೂಪರ್ ಹೆಲ್ದಿ ಸ್ಯಾಂಡ್‌ವಿಚ್. ಚಳಿಗಾಲದ (Winter) ತಂಪು ವಾತಾವರಣದಲ್ಲಿ ಆರೋಗ್ಯಕರ ಮತ್ತು ರುಚಿಕರ ಆಹಾರ ಸೇವಿಸಲು ಯಾರು ತಾನೇ ಇಷ್ಟಪಡುವುದಿಲ್ಲ? ಕೇವಲ ಐದು ನಿಮಿಷಗಳಲ್ಲಿ ತಯಾರಿಸಬಹುದಾದ ಬೀಟ್ರೂಟ್-ಕ್ಯಾರೆಟ್ ಸ್ಯಾಂಡ್‌ವಿಚ್ (Beetroot Carrot Sandwich) ಇದಕ್ಕೆ ಪರಿಪೂರ್ಣ ಉತ್ತರ. ಇದು ನಿಮ್ಮ ಹಸಿವನ್ನು ನೀಗಿಸುವುದಲ್ಲದೆ, ದೇಹಕ್ಕೆ ಅಗತ್ಯ ಪೋಷಕಾಂಶಗಳನ್ನು ಒದಗಿಸುತ್ತದೆ.

ಚಳಿಗಾಲ ಆರಂಭವಾಗುತ್ತಿದ್ದಂತೆ, ಮಾರುಕಟ್ಟೆಗಳಲ್ಲಿ ತಾಜಾ ತರಕಾರಿಗಳ ಮಹಾಪೂರವೇ ಹರಿಯುತ್ತದೆ. ಕೆಂಬಣ್ಣದ ಬೀಟ್ರೂಟ್ ಮತ್ತು ಸಿಹಿಯಾದ ಕ್ಯಾರೆಟ್‌ಗಳು ಈ ಋತುವಿನ ವಿಶೇಷ ಆಕರ್ಷಣೆ. ಈ ಎರಡು ತರಕಾರಿಗಳನ್ನು ಬಳಸಿ ತಯಾರಿಸುವ ಈ ಸ್ಯಾಂಡ್‌ವಿಚ್ ಬೆಳಗಿನ ಉಪಾಹಾರ ಅಥವಾ ಸಂಜೆಯ ತಿಂಡಿಗೆ ಉತ್ತಮ ಆಯ್ಕೆಯಾಗಿದೆ. ಈ ಲೇಖನದಲ್ಲಿ ಬೀಟ್ರೂಟ್-ಕ್ಯಾರೆಟ್ ಸ್ಯಾಂಡ್‌ವಿಚ್ (Beetroot Carrot Sandwich Recipe) ಅನ್ನು ಹೇಗೆ ತಯಾರಿಸಬಹುದು ಎಂಬುದನ್ನು ತಿಳಿಸಲಾಗಿದೆ.

Photo Credit: ಸಂಗ್ರಹ ಚಿತ್ರ

ಬೀಟ್‌ರೂಟ್-ಕ್ಯಾರೆಟ್ ಸ್ಯಾಂಡ್‌ವಿಚ್ ಕೇವಲ ಆರೋಗ್ಯಕರ ಮಾತ್ರವಲ್ಲ. ತನ್ನ ಆಕರ್ಷಕ ಬಣ್ಣ ಮತ್ತು ರುಚಿಯಿಂದ ಮಕ್ಕಳಿಂದ ಹಿಡಿದು ದೊಡ್ಡವರವರೆಗೆ ಎಲ್ಲರ ಮನ ಗೆಲ್ಲುತ್ತದೆ. ಮೆಯೋನೀಸ್ ಅಥವಾ ಹಂಗ್ ಕರ್ಡ್ ಬಳಸಿ ತಯಾರಿಸಿದ ಕ್ರೀಮಿ ಮಿಶ್ರಣ ಮತ್ತು ಲಘುವಾಗಿ ಟೋಸ್ಟ್ ಮಾಡಿದ ಬ್ರೆಡ್, ಇದನ್ನು ಚಳಿಗಾಲದ ಅತ್ಯುತ್ತಮ ಸ್ನ್ಯಾಕ್ ಆಗಿ ಮಾಡುತ್ತದೆ.

ಆರೋಗ್ಯ ಪ್ರಯೋಜನಗಳು

• ಬೀಟ್ರೂಟ್ ಮತ್ತು ಕ್ಯಾರೆಟ್ ಎರಡೂ ವಿಟಮಿನ್‌ಗಳು, ಖನಿಜಗಳು (ವಿಶೇಷವಾಗಿ ವಿಟಮಿನ್ ಎ ಮತ್ತು ಕಬ್ಬಿಣಾಂಶ) ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳಿಂದ ಸಮೃದ್ಧವಾಗಿವೆ.

• ಬೀಟ್ರೂಟ್ ರಕ್ತಹೀನತೆಯನ್ನು ತಡೆಯಲು ಮತ್ತು ರಕ್ತದೊತ್ತಡ ನಿಯಂತ್ರಿಸಲು ನೆರವಾಗುತ್ತದೆ.

• ಕ್ಯಾರೆಟ್ ಕಣ್ಣಿನ ಆರೋಗ್ಯಕ್ಕೆ ಅತ್ಯುತ್ತಮ.

• ಈ ಸಂಯೋಜನೆಯು ಚಳಿಗಾಲದಲ್ಲಿ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿ, ನಿಮ್ಮನ್ನು ಕ್ರಿಯಾಶೀಲವಾಗಿಡಲು ಸಹಕಾರಿ.

• ಇದು ಜೀರ್ಣಿಸಿಕೊಳ್ಳಲು ಸುಲಭ ಮತ್ತು ಫೈಬರ್ ಅಂಶದಿಂದ ಕೂಡಿದೆ.

ಬೀಟ್ರೂಟ್-ಕ್ಯಾರೆಟ್ ಸ್ಯಾಂಡ್‌ವಿಚ್‌ಗೆ ಬೇಕಾಗುವ ಸಾಮಗ್ರಿಗಳು

• ಬ್ರೆಡ್ ಸ್ಲೈಸ್‌ಗಳು (ಬಿಳಿ / ಕಂದು / ಮಲ್ಟಿಗ್ರೇನ್)
• ತುರಿದ ಬೀಟ್ರೂಟ್ - 1 ಕಪ್
• ತುರಿದ ಕ್ಯಾರೆಟ್ - 1 ಕಪ್
• ಸಣ್ಣಗೆ ಕತ್ತರಿಸಿದ ಈರುಳ್ಳಿ - 1
• ಮೆಯೋನೆಸ್ ಅಥವಾ ಹಂಗ್ ಕರ್ಡ್ - 2 ಅಥವಾ 3 ಚಮಚ
• ಕರಿಮೆಣಸು - 1 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಚಿಲ್ಲಿ ಫ್ಲೇಕ್ಸ್ - 1 ಚಮಚ
• ನಿಂಬೆ ರಸ - 1 ಚಮಚ
• ಬೆಣ್ಣೆ -ಸ್ವಲ್ಪ (ಟೋಸ್ಟ್ ಮಾಡಲು)

ಬೀಟ್ರೂಟ್-ಕ್ಯಾರೆಟ್ ಸ್ಯಾಂಡ್‌ವಿಚ್ ತಯಾರಿಸುವ ವಿಧಾನ

- ಮೊದಲಿಗೆ, ಒಂದು ಬೌಲ್‌ನಲ್ಲಿ ತುರಿದ ಬೀಟ್‌ರೂಟ್, ಕ್ಯಾರೆಟ್, ಹೆಚ್ಚಿದ ಈರುಳ್ಳಿ, ಉಪ್ಪು, ಕರಿಮೆಣಸಿನ ಪುಡಿ, ಚಿಲ್ಲಿ ಫ್ಲೇಕ್ಸ್ ಮತ್ತು ನಿಂಬೆ ರಸ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈಗ, ಇದಕ್ಕೆ ಮೆಯೋನೀಸ್ ಅಥವಾ ಹಂಗ್ ಕರ್ಡ್ ಸೇರಿಸಿ. ಬಳಿಕ ತರಕಾರಿಗಳೊಂದಿಗೆ ಚೆನ್ನಾಗಿ ಕಲಸಿ.

- ಬಳಿಕ ಬ್ರೆಡ್ ಸ್ಲೈಸ್‌ಗಳ ಒಂದು ಬದಿಗೆ ಬೆಣ್ಣೆ ಹಚ್ಚಿ. ಬೆಣ್ಣೆ ಹಚ್ಚಿದ ಬ್ರೆಡ್ ಮೇಲೆ ಫಿಲ್ಲಿಂಗ್ ಅನ್ನು ಸಮವಾಗಿ ಹರಡಿ, ಇನ್ನೊಂದು ಬ್ರೆಡ್ ಸ್ಲೈಸ್‌ನಿಂದ ಮುಚ್ಚಿ.

- ಈಗ ಸ್ಯಾಂಡ್‌ವಿಚ್ ಮೇಕರ್‌ನಲ್ಲಿ ಗ್ರಿಲ್ ಮಾಡಿ ಅಥವಾ ತವೆಯ ಮೇಲೆ ಎರಡೂ ಬದಿಗಳು ಗೋಲ್ಡನ್ ಬ್ರೌನ್ ಬರುವವರೆಗೆ ಟೋಸ್ಟ್ ಮಾಡಿ.

ಈ ಪ್ರಮುಖ ಸಲಹೆ ತಿಳಿಯಿರಿ

ಬೀಟ್‌ರೂಟ್ ಮತ್ತು ಕ್ಯಾರೆಟ್‌ಗಳನ್ನು ಹಸಿಯಾಗಿ ಬಳಸುವುದರಿಂದ ಅವುಗಳ ಪೋಷಕಾಂಶಗಳು ಉಳಿಯುತ್ತವೆ. ಬೇಕಿದ್ದರೆ, ಬಳಸುವ ಮೊದಲು ತುಪ್ಪ ಅಥವಾ ಎಣ್ಣೆಯಲ್ಲಿ ಒಂದು ನಿಮಿಷ ಲಘುವಾಗಿ ಹುರಿಯಬಹುದು.

ಈ ಬೀಟ್‌ರೂಟ್-ಕ್ಯಾರೆಟ್ ಸ್ಯಾಂಡ್‌ವಿಚ್ ತಯಾರಿಸಲು ಸುಲಭ, ಪೌಷ್ಟಿಕಾಂಶದಿಂದ ಕೂಡಿದೆ ಮತ್ತು ರುಚಿಕರವಾಗಿದೆ. ಚಳಿಗಾಲದಲ್ಲಿ ನಿಮ್ಮ ಹಸಿವು ಮತ್ತು ಆರೋಗ್ಯ ಎರಡನ್ನೂ ಕಾಪಾಡಲು ಇದು ಅತ್ಯುತ್ತಮ ಆಯ್ಕೆಯಾಗಿದೆ.