ಸಂಕ್ರಾಂತಿಗೆ ಬೇಕೇ ಬೇಕು ಈ ಸ್ವೀಟ್! ಬಾಯಲ್ಲಿಟ್ಟರೆ ಬೆಣ್ಣೆಯಂತೆ ಕರಗುವ ತಿಲ್ ಅನಾರಸ.. ಮನೆಯಲ್ಲಿ ಇದನ್ನು ಮಾಡಿ

ಸಂಕ್ರಾಂತಿ ಹಬ್ಬಕ್ಕೆ ಬೇಕೇ ಬೇಕು ಈ ಅದ್ಭುತ ಸ್ವೀಟ್! ಬಾಯಲ್ಲಿಟ್ಟರೆ ಕರಗುವ ಎಳ್ಳಿನ ಅನಾರಸ.. ಅಂಗಡಿ ಶೈಲಿಯಲ್ಲೇ ಮನೆಯಲ್ಲಿ ಮಾಡಿ ನೋಡಿ. ಹೌದು, ಮಕರ ಸಂಕ್ರಾಂತಿ (Makar Sankranti 2026) ಹಬ್ಬವು ಎಳ್ಳು-ಬೆಲ್ಲದ ಸಮ್ಮಿಲನಕ್ಕೆ ಸಾಕ್ಷಿಯಾಗುವ ಪ್ರಮುಖ ಸುಗ್ಗಿಯ ಸಂಭ್ರಮ. ಈ ಹಬ್ಬದ ಮುಖ್ಯ ಆಕರ್ಷಣೆಗಳಲ್ಲಿ ಒಂದು ಸಾಂಪ್ರದಾಯಿಕ 'ತಿಲ್ ಅನಾರಸ' (Til Anarsa) ಅಥವಾ ಎಳ್ಳಿನ ಅನಾರಸ.

ಪ್ರಮುಖವಾಗಿ ಮಹಾರಾಷ್ಟ್ರ ಮತ್ತು ಕರ್ನಾಟಕದ ಕೆಲವು ಭಾಗಗಳಲ್ಲಿ ಜನಪ್ರಿಯವಾಗಿರುವ ಈ ಸಿಹಿ ತಿಂಡಿ, ಹೊರಗಿನಿಂದ ಗರಿಗರಿಯಾಗಿದ್ದರೆ, ಒಳಗಿನಿಂದ ಮೃದುವಾಗಿರುತ್ತದೆ. ಇದು ದೇಹಕ್ಕೆ ಉಷ್ಣತೆ ಮತ್ತು ಶಕ್ತಿ ನೀಡುವ ಪೌಷ್ಟಿಕಾಂಶಭರಿತ ಆಹಾರವಾಗಿದ್ದು, ಚಳಿಗಾಲದಲ್ಲಿ ಸೇವಿಸಲು ಉಪಯುಕ್ತವಾಗಿದೆ. ಅನಾರಸವನ್ನು (Anarsa Recipe) ತಯಾರಿಸುವುದು ಒಂದು ಕಲೆ, ಅದರಲ್ಲೂ ಎಣ್ಣೆಯಲ್ಲಿ ಒಡೆದು ಹೋಗದಂತೆ ಪರಿಪೂರ್ಣ ಆಕಾರವನ್ನು ಕಾಪಾಡಿಕೊಳ್ಳುವುದು ಸವಾಲು.

Photo Credit: ಸಂಗ್ರಹ ಚಿತ್ರ

ಈ ಲೇಖನದಲ್ಲಿ, ಅಕ್ಕಿ ಮತ್ತು ಬೆಲ್ಲವನ್ನು ಬಳಸಿ ಮಕ್ಕಳು ಹಾಗೂ ದೊಡ್ಡವರು ಇಷ್ಟಪಡುವಂತಹ ರುಚಿಕರ ಅನಾರಸ ಅಥವಾ ಕಜ್ಜಾಯವನ್ನು ತಯಾರಿಸಲು (Til Anarsa Recipe) ಕೆಲವು ಸರಳ ಟಿಪ್ಸ್ ನೀಡಲಾಗಿದೆ. ಅನಾರಸದ ಆರೋಗ್ಯ ಪ್ರಯೋಜನಗಳು ಹಾಗೂ ಸರಿಯಾದ ಪಾಕವಿಧಾನದ ಮೂಲಕ ನಿಮ್ಮ ಹಬ್ಬದ ಆಚರಣೆಯನ್ನು ಇನ್ನಷ್ಟು ಸಿಹಿಗೊಳಿಸಿಕೊಳ್ಳಿ.

ಎಳ್ಳಿನ ಅನಾರಸ ಸೇವನೆಯ ಲಾಭಗಳು

- ಎಳ್ಳು ಮತ್ತು ಬೆಲ್ಲದಿಂದ ತಯಾರಾಗುವ ಈ ಹಿಡಿಸು ಕ್ಯಾಲ್ಸಿಯಂ ಹಾಗೂ ಕಬ್ಬಿಣದಂಶವನ್ನು ಸಮೃದ್ಧವಾಗಿ ಹೊಂದಿದೆ.

- ಚಳಿಗಾಲದ ಸಂಕ್ರಾಂತಿ ಹಬ್ಬದ ಸಮಯದಲ್ಲಿ ದೇಹದ ಉಷ್ಣತೆಯನ್ನು ಕಾಪಾಡಿಕೊಂಡು ಬೆಚ್ಚಗಿಡಲು ಇದು ಸಹಕಾರಿ.

- ಬೆಲ್ಲದ ಅಂಶವು ದೇಹಕ್ಕೆ ತಕ್ಷಣದ ಶಕ್ತಿ ಹಾಗೂ ಚೈತನ್ಯವನ್ನು ನೀಡುತ್ತದೆ. ದೇಹದ ಆಯಾಸವನ್ನು ಕಡಿಮೆ ಮಾಡುತ್ತದೆ.

- ಮನೆಯಲ್ಲೇ ತಯಾರಿಸುವುದರಿಂದ ಯಾವುದೇ ರಾಸಾಯನಿಕಗಳಿಲ್ಲದ ಆರೋಗ್ಯಕರ ಮತ್ತು ನೈಸರ್ಗಿಕ ಸಿಹಿ ತಿಂಡಿ ಇದಾಗಿದೆ.

ತಿಲ್ ಅನಾರಸಗೆ ಬೇಕಾಗುವ ಸಾಮಗ್ರಿಗಳು

• ಬಿಳಿ ಎಳ್ಳು
• ಬೆಲ್ಲ
• ಅಕ್ಕಿ ಹಿಟ್ಟು
• ಏಲಕ್ಕಿ ಪುಡಿ
• ತುಪ್ಪ ಅಥವಾ ಎಣ್ಣೆ

ತಿಲ್ ಅನಾರಸ ತಯಾರಿಸುವ ವಿಧಾನ

- ಮೊದಲಿಗೆ, ಬಿಳಿ ಎಳ್ಳನ್ನು ಚೆನ್ನಾಗಿ ಸ್ವಚ್ಛಗೊಳಿಸಿ. ಬಾಣಲೆಯಲ್ಲಿ ಹಾಕಿ ಹದವಾದ ಉರಿಯಲ್ಲಿ ಲಘುವಾಗಿ ಹುರಿಯಿರಿ.

- ಎಳ್ಳು ತಣ್ಣಗಾದ ನಂತರ, ಅದನ್ನು ಮಿಕ್ಸರ್‌ನಲ್ಲಿ ಹಾಕಿಕೊಂಡು ನುಣ್ಣಗೆ ಪುಡಿ ಮಾಡದೆ, ತರಿತರಿಯಾಗಿ ಪುಡಿ ಮಾಡಿಕೊಳ್ಳಿ.

- ಒಂದು ಕಡಾಯಿಯಲ್ಲಿ ತುರಿದ ಬೆಲ್ಲವನ್ನು ಹಾಕಿ, ಅದಕ್ಕೆ 2-3 ಚಮಚ ನೀರು ಸೇರಿಸಿ ಸಣ್ಣ ಉರಿಯಲ್ಲಿ ಕರಗಿಸಿ.

- ಬೆಲ್ಲ ಸಂಪೂರ್ಣವಾಗಿ ಕರಗಿ ನೊರೆ ಬರಲು ಆರಂಭಿಸಿದಾಗ, ಪಾಕ ಸಿದ್ಧವಾಗಿದೆ ಎಂದು ತಿಳಿಯಬಹುದು. ಪಾಕವನ್ನು ಹೆಚ್ಚು ಗಟ್ಟಿಯಾಗಲು ಬಿಡಬೇಡಿ.

- ಈಗ ಸಿದ್ಧಪಡಿಸಿದ ಬೆಲ್ಲದ ಪಾಕಕ್ಕೆ ತರಿತರಿಯಾಗಿ ಪುಡಿ ಮಾಡಿದ ಎಳ್ಳು, ಅಕ್ಕಿ ಹಿಟ್ಟು ಮತ್ತು ಏಲಕ್ಕಿ ಪುಡಿಯನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಮಿಶ್ರಣವು ಹದವಾಗಿ ಬೆರೆತು ಗಟ್ಟಿಯಾಗುವುದೆಂದು ಖಚಿತಪಡಿಸಿಕೊಂಡ ನಂತರ ಉರಿಯನ್ನು ಆರಿಸಿ. ಇದನ್ನು ಸ್ವಲ್ಪ ಸಮಯ ತಣ್ಣಗಾಗಲು ಬಿಡಿ.

- ಈಗ ಕೈಗಳಿಗೆ ಸ್ವಲ್ಪ ತುಪ್ಪ ಸವರಿಕೊಂಡು, ಸಿದ್ಧಪಡಿಸಿದ ಮಿಶ್ರಣದಿಂದ ಸಣ್ಣ ಉಂಡೆಗಳನ್ನು ಮಾಡಿ.

- ನಂತರ ಅಂಗೈಯಿಂದ ಲಘುವಾಗಿ ಒತ್ತಿ ಚಪ್ಪಟೆ ಆಕಾರವನ್ನು (ವಡೆ ಅಥವಾ ಬಿಸ್ಕತ್ತು ಶೈಲಿಯಲ್ಲಿ) ನೀಡಿ. ಈ ಹಂತದಲ್ಲಿ ಜಾಗರೂಕತೆಯಿಂದ ಕೆಲಸ ಮಾಡಿ, ಅನಾರಸ ಒಡೆಯದಂತೆ ನೋಡಿಕೊಳ್ಳಿ.

- ಈಗ ಬಾಣಲೆಯಲ್ಲಿ ತುಪ್ಪ ಅಥವಾ ಎಣ್ಣೆಯನ್ನು ಬಿಸಿ ಮಾಡಿ. ಮಧ್ಯಮ ಉರಿಯಲ್ಲಿ ಅನಾರಸಗಳನ್ನು ಹಾಕಿ ಎರಡೂ ಬದಿ ಸುವರ್ಣ ಬಣ್ಣ ಬರುವವರೆಗೆ ಕರಿಯಿರಿ.

- ಅನಾರಸಗಳು ಬೇಯಲು ಹೆಚ್ಚು ಸಮಯ ತೆಗೆದುಕೊಳ್ಳುವುದಿಲ್ಲ. ನಂತರ ಅವುಗಳನ್ನು ಟಿಶ್ಯೂ ಪೇಪರ್ ಮೇಲೆ ತೆಗೆದಿಟ್ಟು ಹೆಚ್ಚುವರಿ ಎಣ್ಣೆಯನ್ನು ಬಸಿದು ತೆಗೆಯಿರಿ.

ಇಷ್ಟು ದಿನಗಳ ಕಾಲ ಕೆಡಲ್ಲ

ಅನಾರಸವನ್ನು ಕರಿಯಲು ಶುದ್ಧ ತುಪ್ಪವನ್ನು ಬಳಸಿದರೆ ರುಚಿ ಮತ್ತು ಪರಿಮಳ ಅದ್ಭುತವಾಗಿರುತ್ತದೆ. ಹಬ್ಬದ ಸಿಹಿ ಖಾದ್ಯಕ್ಕೆ ಮತ್ತಷ್ಟು ಮೆರುಗು ನೀಡುತ್ತದೆ. ತುಪ್ಪ ಲಭ್ಯವಿಲ್ಲದಿದ್ದರೆ, ಕಡಲೆಕಾಯಿ ಎಣ್ಣೆ ಅಥವಾ ಇತರ ಸಸ್ಯಜನ್ಯ ಎಣ್ಣೆಯನ್ನು ಬಳಸಬಹುದು. ಇವುಗಳನ್ನು ಗಾಳಿಯಾಡದ ಡಬ್ಬದಲ್ಲಿ ಸಂಗ್ರಹಿಸಿಟ್ಟರೆ 15 ರಿಂದ 20 ದಿನಗಳ ಕಾಲ ತಾಜಾವಾಗಿ ಕೆಡದಂತೆ ಇರುತ್ತವೆ.