ರಾಗಿ ರೊಟ್ಟಿ ಬಿಡಿ.. ಪಾಲಕ್ ಬಳಸಿ ಮೃದುವಾದ ರೊಟ್ಟಿ ಮಾಡಿ! ತೂಕವೂ ಡಬಲ್ ಇಳಿಯುತ್ತೆ

ಅತಿ ಕಡಿಮೆ ಎಣ್ಣೆಯಲ್ಲಿ ತಯಾರಿಸಿ ಹತ್ತಿಯಂತಹ ಮೃದುವಾದ ರೊಟ್ಟಿ. ತೂಕ ಇಳಿಸಲು ಇದು ಅತ್ಯುತ್ತಮ ಉಪಾಹಾರ. ಹೌದು, ಪಾಲಕ್ ಸೊಪ್ಪು ಆರೋಗ್ಯದ ಗಣಿ. ಮಕ್ಕಳಿಂದ ಹಿಡಿದು ದೊಡ್ಡವರವರೆಗೆ ಎಲ್ಲರ ಪ್ರೀತಿಪಾತ್ರವಾದ ಇದು ರೊಟ್ಟಿಗೆ (Spinach Roti) ಆಧಾರ. ಹೌದು, ನಮ್ಮ ದೈನಂದಿನ ಆಹಾರದಲ್ಲಿ ಹಸಿರು ಸೊಪ್ಪುಗಳ ಬಳಕೆ ಅತ್ಯಂತ ಮುಖ್ಯ. ಪಾಲಕ್ ಸೊಪ್ಪು ಕಬ್ಬಿಣಾಂಶ, ವಿಟಮಿನ್‌ಗಳು ಹಾಗೂ ಫೈಬರ್‌ನ ಸಮೃದ್ಧ ಮೂಲವಾಗಿದೆ.

ಪಾಲಕ್ ದೇಹಕ್ಕೆ ಅತ್ಯಗತ್ಯ ಪೋಷಕಾಂಶಗಳನ್ನು ಒದಗಿಸುತ್ತದೆ. ಸಾಮಾನ್ಯವಾಗಿ ಮನೆಗಳಲ್ಲಿ ಪಾಲಕ್ ಪಲ್ಯ ಅಥವಾ ಪರೋಟಗಳನ್ನು ಮಾಡುವುದು ವಾಡಿಕೆ. ಆದರೆ, ಪಾಲಕ್ ಪರೋಟಗಳಿಗಿಂತಲೂ ಸುಲಭವಾಗಿ, ಕಡಿಮೆ ಎಣ್ಣೆ ಬಳಸಿ ಪಾಲಕ್ ರೊಟ್ಟಿ (Palak Roti) ತಯಾರಿಸಬಹುದು. ಇಂದಿನ ವೇಗದ ಜೀವನಶೈಲಿಗೆ ಇದು ಅತ್ಯಂತ ಸೂಕ್ತವಾದ ತಿಂಡಿ. ಇದು ಸಮಯ ಉಳಿತಾಯದೊಂದಿಗೆ ಆರೋಗ್ಯವನ್ನೂ ಪೋಷಿಸುತ್ತದೆ.

ಸಾಮಾನ್ಯವಾಗಿ ಮಕ್ಕಳು ಹಸಿರು ಸೊಪ್ಪುಗಳನ್ನು ತಿನ್ನಲು ಹಿಂದೇಟು ಹಾಕುತ್ತಾರೆ. ಅಂತಹ ಸಂದರ್ಭಗಳಲ್ಲಿ, ಪಾಲಕ್ ಸೊಪ್ಪನ್ನು ನೇರವಾಗಿ ನೀಡುವ ಬದಲು, ಅದನ್ನು ಹಿಟ್ಟಿನೊಂದಿಗೆ ಬೆರೆಸಿ ಮೃದುವಾದ ಪಾಲಕ್ ರೊಟ್ಟಿ ಮಾಡಿ ಕೊಡಬಹುದು. ಹತ್ತಿಯಂತೆ ಮೃದುವಾಗಿರುವ ಈ ರೊಟ್ಟಿಗಳು ಬೆಳಗಿನ ತಿಂಡಿ, ಮಧ್ಯಾಹ್ನದ ಲಂಚ್ ಬಾಕ್ಸ್ ಅಥವಾ ರಾತ್ರಿಯ ಊಟಕ್ಕೂ ಹೇಳಿ ಮಾಡಿಸಿದಂತಿವೆ. ಮಕ್ಕಳಿಗೆ ತಿಳಿಯದೆಯೇ ಪೌಷ್ಟಿಕಾಂಶ ಸಿಗುತ್ತೆ. ಪಾಲಕ್ ರೊಟ್ಟಿ ಮಾಡುವ ವಿಧಾನ (Palak Roti Recipe) ಇಲ್ಲಿದೆ.

ಪಾಲಕ್ ರೊಟ್ಟಿಯ ಪ್ರಯೋಜನಗಳು

- ಪಾಲಕ್ ಸೊಪ್ಪಿನಲ್ಲಿ ಕಬ್ಬಿಣಾಂಶವು ಹೇರಳವಾಗಿದ್ದು, ಇದು ದೇಹದಲ್ಲಿ ಹಿಮೋಗ್ಲೋಬಿನ್ ಮಟ್ಟವನ್ನು ಹೆಚ್ಚಿಸಲು ನೆರವಾಗುತ್ತದೆ. ಹೀಗಾಗಿ, ರಕ್ತಹೀನತೆಯ ಸಮಸ್ಯೆ ನಿವಾರಣೆಗೆ ಪಾಲಕ್ ಉಪಯುಕ್ತ ಆಹಾರ.

- ಪಾಲಕ್‌ನಲ್ಲಿರುವ ಅಧಿಕ ಫೈಬರ್ ಅಂಶದಿಂದಾಗಿ ಜೀರ್ಣಾಂಗ ವ್ಯವಸ್ಥೆಯು ಸುಧಾರಿಸುತ್ತದೆ. ಇದರಿಂದ ಜೀರ್ಣಕ್ರಿಯೆಗೆ ಸುಲಭವಾಗುತ್ತದೆ ಮತ್ತು ಮಲಬದ್ಧತೆಯಂತಹ ಸಮಸ್ಯೆಗಳನ್ನು ತಡೆಯಬಹುದು.

- ಪಾಲಕ್ ಸೊಪ್ಪಿನಲ್ಲಿ ವಿಟಮಿನ್ ಕೆ ಹೇರಳವಾಗಿದ್ದು, ಇದು ಮೂಳೆಗಳ ಆರೋಗ್ಯವನ್ನು ಕಾಪಾಡಲು ಮತ್ತು ಅವುಗಳನ್ನು ಬಲಪಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

- ಗೋಧಿಹಿಟ್ಟು ಮತ್ತು ಪಾಲಕ್ ಸೊಪ್ಪಿನ ಈ ಸಂಯೋಜನೆಯು ಹೊಟ್ಟೆಯನ್ನು ದೀರ್ಘಕಾಲ ತುಂಬಿರುವಂತೆ ಮಾಡುತ್ತದೆ. ಇದರಿಂದ ಅತಿಯಾದ ಆಹಾರ ಸೇವನೆಯನ್ನು ತಪ್ಪಿಸಬಹುದು, ಇದು ತೂಕ ಇಳಿಸಿಕೊಳ್ಳಲು ಬಯಸುವವರಿಗೆ ಸೂಕ್ತವಾಗಿದೆ.

ಪಾಲಕ್ ರೊಟ್ಟಿಗೆ ಬೇಕಾಗುವ ಪದಾರ್ಥಗಳು

• ಪಾಲಕ್ ಸೊಪ್ಪು
• ಗೋಧಿ ಹಿಟ್ಟು
• ರುಚಿಗೆ ತಕ್ಕಂತೆ ಉಪ್ಪು
• ಎಣ್ಣೆ ಅಥವಾ ತುಪ್ಪ
• ನೀರು

ಪಾಲಕ್ ರೊಟ್ಟಿ ತಯಾರಿಸುವ ವಿಧಾನ

- ಮೊದಲಿಗೆ ಪಾಲಕ್ ಸೊಪ್ಪನ್ನು ಚೆನ್ನಾಗಿ ತೊಳೆದು, ಕಾಂಡಗಳನ್ನು ತೆಗೆದು ಸಣ್ಣಗೆ ಕತ್ತರಿಸಿ.

- ಮಿಕ್ಸರ್ ಜಾರ್‌ಗೆ ಹಾಕಿ ಸ್ವಲ್ಪ ನೀರು ಸೇರಿಸಿ ನುಣ್ಣನೆಯ ಪೇಸ್ಟ್ ತಯಾರಿಸಿ. ಸೊಪ್ಪನ್ನು ಹಸಿಯಾಗಿಯೇ ರುಬ್ಬಬಹುದು ಅಥವಾ ಒಂದು ನಿಮಿಷ ಬಿಸಿ ನೀರಿನಲ್ಲಿ ಬ್ಲಾಂಚ್ ಮಾಡಿ. ನಂತರ ರುಬ್ಬಬಹುದು.

- ಒಂದು ಪಾತ್ರೆಯಲ್ಲಿ ಗೋಧಿ ಹಿಟ್ಟು, ಉಪ್ಪು ಮತ್ತು ಒಂದು ಚಮಚ ಎಣ್ಣೆ ಸೇರಿಸಿ. ನಂತರ ಪಾಲಕ್ ಪೇಸ್ಟ್ ಹಾಕಿ ಚೆನ್ನಾಗಿ ಬೆರೆಸಿ. ಅಗತ್ಯವಿದ್ದಲ್ಲಿ ಮಾತ್ರ ಸ್ವಲ್ಪ ನೀರು ಸೇರಿಸಿ ಮೃದುವಾದ ಹಿಟ್ಟನ್ನು ಕಲಸಿ.

- ಈಗ ಹಿಟ್ಟನ್ನು ಚೆನ್ನಾಗಿ ನಾದಿದ ನಂತರ, ತೇವವಾದ ಬಟ್ಟೆ ಅಥವಾ ಮುಚ್ಚಳದಿಂದ ಮುಚ್ಚಿ 10 ರಿಂದ 15 ನಿಮಿಷಗಳ ಕಾಲ ವಿಶ್ರಾಂತಿಗೆ ಬಿಡಿ. ಇದು ರೊಟ್ಟಿಗಳು ಅತ್ಯಂತ ಮೃದುವಾಗಿ ಬರಲು ಸಹಕಾರಿ.

- ಹಿಟ್ಟಿನಿಂದ ಸಣ್ಣ ಉಂಡೆಗಳನ್ನು ಮಾಡಿಕೊಳ್ಳಿ. ಲಟ್ಟಣಿಗೆಯ ಸಹಾಯದಿಂದ, ಸ್ವಲ್ಪ ಒಣ ಹಿಟ್ಟನ್ನು ಬಳಸಿ ತೆಳುವಾದ ಮತ್ತು ಗೋಲಾಕಾರದ ರೊಟ್ಟಿಗಳನ್ನು ಲಟ್ಟಿಸಿಕೊಳ್ಳಿ.

- ಈಗ ಒಲೆಯ ಮೇಲೆ ಹಂಚನ್ನು ಬಿಸಿ ಮಾಡಲು ಇಡಿ. ಬಿಸಿಯಾದ ಹಂಚಿನ ಮೇಲೆ ಲಟ್ಟಿಸಿದ ರೊಟ್ಟಿಯನ್ನು ಹಾಕಿ.

- ಒಂದು ಬದಿಯಲ್ಲಿ ಗುಳ್ಳೆಗಳು ಬಂದ ತಕ್ಷಣ ಮಗುಚಿ ಹಾಕಿ. ಎರಡೂ ಬದಿಗಳಲ್ಲಿ ಕೆಂಪು ಚುಕ್ಕೆಗಳು ಮೂಡುವವರೆಗೆ ಚೆನ್ನಾಗಿ ಬೇಯಿಸಿ. ಇಷ್ಟವಿದ್ದಲ್ಲಿ ತುಪ್ಪ ಅಥವಾ ಬೆಣ್ಣೆಯನ್ನುಬಳಸಬಹುದು.

ಸವಿಯುವುವು ಹೇಗೆ?

- ತಂಪಾದ ಮೊಸರು ಅಥವಾ ರಾಯ್ತಾದೊಂದಿಗೆ ಪಾಲಕ್ ರೊಟ್ಟಿ ಅತ್ಯುತ್ತಮ ಜೋಡಿ.

- ಮಸಾಲೆಯುಕ್ತ ಆಲೂಗಡ್ಡೆ ಪಲ್ಯ ಅಥವಾ ಕುರ್ಮಾದೊಂದಿಗೆ ಈ ರೊಟ್ಟಿ ಅತ್ಯಂತ ಸ್ವಾದಿಷ್ಟವಾಗಿರುತ್ತದೆ.

- ಸರಳವಾಗಿ ತಿನ್ನಲು ಇಷ್ಟಪಡುವವರು ಕೇವಲ ಬೆಣ್ಣೆ ಮತ್ತು ಉಪ್ಪಿನಕಾಯಿಯೊಂದಿಗೆ ಸವಿಯಬಹುದು.