ಟೀ ಜೊತೆ ಸವಿಯಿರಿ ತಾಜಾ ಬಾಳೆಕಾಯಿ ಬಜ್ಜಿ

Snacks

oi-Reena

By Hema S

Updated: Saturday, February 23, 2013, 17:09 [IST]

ಸಂಜೆ ಟೀ ಜೊತೆ ಸವಿಯಲು ತಿಂಡಿ ಮಾಡಬೇಕು, ಆದರೆ ಹೆಚ್ಚಿನ ಪರಿಶ್ರಮವಿರಬಾರದು ಎಂದು ಬಯಸುವುದಾದರೆ ಬಾಳೆ ಕಾಯಿ/ಹಣ್ಣಿನ ಬಜ್ಜಿ ತಯಾರಿಸಬಹುದು. ಬಾಳೆಕಾಯಿ ಹಾಗೂ ಬಾಳೆ ಹಣ್ಣಿನ ಬಜ್ಜಿಯನ್ನು ತಯಾರಿಸುವ ವಿಧಾನ ಒಂದೇ, ಆದರೆ ತಿಂಡಿ ಸ್ವಲ್ಪ ಸಿಹಿಯಾಗಿರಬೇಕೆಂದು ಬಯಸುವುದಾದರೆ ನೇಂದ್ರ ಬಾಳೆ ಹಣ್ಣನ್ನು, ಇಲ್ಲದಿದ್ದರೆ ಸಾರು ಬಾಳೆಯನ್ನು ಬಳಸಿ ಈ ಬಜ್ಜಿಯನ್ನು ತಯಾರಿಸಲಾಗುವುದು.

ಈ ಎರಡು ಬಜ್ಜಿಗಳಲ್ಲಿ ನಿಮಗೆ ಯಾವುದು ಇಷ್ಟವೋ ಅದನ್ನು ತಯಾರಿಸಬಹುದು. ಈ ಬಜ್ಜಿ ರೆಸಿಪಿ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಗ್ರಿಗಳು:
ಸಾರು ಬಾಳೆಕಾಯಿ ಅಥವಾ ನೇಂದ್ರಬಾಳೆ ಹಣ್ಣು ಹಣ್ಣು 3
ಕಡ್ಲೆಹಿಟ್ಟು ಅರ್ಧ ಬಟ್ಟಲು ಬಟ್ಟಲು
ಅಕ್ಕಿಹಿಟ್ಟು ಎರಡು ಚಮಚ
ಖಾರದ ಪುಡಿ (ಖಾರಕ್ಕೆ ತಕ್ಕಷ್ಟು)
1/4 ಚಮಚ ಅರಿಶಿಣ ಪುಡಿ
ಉಪ್ಪು
ಚಿಟಿಕೆಯಷ್ಟು ಸೋಡ
ಎಣ್ಣೆ

ತಯಾರಿಸುವ ವಿಧಾನ:

* ಬಾಳೆಕಾಯಿಯ ಸಿಪ್ಪೆ ಸುಲಿದು ನೀರಿನಲ್ಲಿ ಹಾಕಿಡಿ, ಇಲ್ಲದಿದ್ದರೆ ಅದು ಕಪ್ಪಾಗುವುದು. ನಂತರ ಉದ್ದಕ್ಕೆ ತೆಳ್ಳಗ್ಗೆ 3-4 ತುಂಡುಗಳಾಗಿ ಕತ್ತರಿಸಿ.

* ನೇಂದ್ರಬಾಳೆ ಹಣ್ಣಿದ್ದರೆ ನೇಂದ್ರ ಬಾಳೆ ಹಣ್ಣಿನ ಸಿಪ್ಪೆ ಸುಲಿದು ಅದನ್ನು ಉದ್ದಕ್ಕೆ 3 ಭಾಗಗಳಂತೆ ಕತ್ತರಿಸಿ.

* ಕಡ್ಲೆಹಿಟ್ಟು, ಅಕ್ಕಿಹಿಟ್ಟು, ಖಾರದ ಪುಡಿ, ಅರಿಶಿಣ ಪುಡಿ ಮತ್ತು ಸೋಡ ಹಾಕಿ ಚೆನ್ನಾಗಿ ಕೆಲೆಸಿ ಅದಕ್ಕೆ ಸ್ವಲ್ಪ ನೀರು ಹಾಕಿ ಕಲೆಸಿ, ಹಿಟ್ಟನ್ನು ತುಂಬಾ ತೆಳ್ಳಗೆ ಮಾಡಬೇಡಿ.

* ಬಾಣಲೆಗೆ ಅರ್ಧದಷ್ಟು ಎಣ್ಣೆ ಹಾಕಿ ಕಾಯಿಸಿ.

* ಈಗ ಬಾಳೆಕಾಯಿ ಅಥವಾ ಬಾಳೆ ಹಣ್ಣಿನ ತಿಂಡುಗಳನ್ನು ಕಡಲೆ ಹಣ್ಣಿನ ಹಿಟ್ಟಿಗೆ ಅದ್ದಿ ಎಣ್ಣೆಗೆ ಹಾಕಿ. ನಂತರ ಕಂದು ಬಣ್ಣಕ್ಕೆ ಬಂದಾಗ ಎಣ್ಣೆಯಿಂದ ತೆಗೆದು ನೀರಿನ ಪಸೆಯಿಲ್ಲದ ಪಾತ್ರೆಗೆ ಹಾಕಿ

ಸಲಹೆ: ಬಾಳೆಕಾಯಿ ಅಥವಾ ಬಾಳೆ ಹಣ್ಣಿನ ಬಜ್ಜಿಯನ್ನು ಮಾಡಿ ತುಂಬಾ ದಿನಾ ಇಡಲು ಸಾಧ್ಯವಿಲ್ಲ, ಇದನ್ನು ತಾಜಾ ತಿಂದರೆ ಮಾತ್ರ ಹೆಚ್ಚು ರುಚಿಕರ.