ಅಜ್ಜಿ ಅಜ್ಜಿ ಮಾಡಿಕೊಡು ಬದನೆಕಾಯಿ ಬಜ್ಜಿ

Snacks

oi-Prasad P Naik

By * ಕುಮುದಾ ಶಂಕರ್, ಸೌದಿ ಅರೇಬಿಯಾ

Published: Friday, May 27, 2011, 17:56 [IST]

ಮುಂಗಾರು ಮಳೆ ಸುರಿಸಲು ಮೋಡಗಳು ಅಣಿಯಾಗುತ್ತಿವೆ. ಜೂನ್ ಮೊದಲನೇ ವಾರದಲ್ಲಿ ಹನಿಗಳ ಲೀಲೆ ಶುರುವಾಗಲಿದೆ. ಬೆಂಗಳೂರಿನಲ್ಲಂತೂ ಯಾವಾಗ ಮಳೆ ಸುರಿಯುವುದೋ, ಯಾವಾಗ ಬಿಸಿಲು ಸುರಿಯುವುದೋ ಬಲ್ಲವರೂ ಹೇಳಲು ಸಾಧ್ಯವಿಲ್ಲ. ಸದ್ಯಕ್ಕಂತೂ ಮೋಡ ಮುಸುಕಿದ ವಾತಾವರಣ. ಅಡ್ಡಾಡುವವರ ಕೈಯಲ್ಲೆಲ್ಲಾ ಸನ್ ಮಾರ್ಕಿನ ಛತ್ರಿಗಳು.

ಎಕ್ಸಾಕ್ಟಲಿ ಇಂಥದೇ ಸಮಯದಲ್ಲಿ ಬಿಸಿಬಿಸಿಯಾದ ಬಜ್ಜಿಯನ್ನು ಕಾಫಿಯ ಜೊತೆಗೆ ತಿನ್ನಲು ಮನಸಾಗುವುದು. ಹೊರಗಡೆ ತಿಂದರೆ ಕೆಮ್ಮು ಕಸಾರಿಕೆ ಗ್ಯಾರಂಟಿ ಎಂದು ಅಂದುಕೊಳ್ಳುವವರು ಅಜ್ಜಿಗೆ ಡಿಮ್ಯಾಂಡ್ ಮಾಡಿ ಬಜ್ಜಿ ಮಾಡಿ ತಿನ್ನಿರಿ. ಬೇಸಿಗೆ ರಜಕ್ಕೆಂದು ಅಜ್ಜಿ ಮನೆಗೆ ಹೋಗಿದ್ದರೆ, ಅಜ್ಜಿ ಅಜ್ಜಿ ಮಾಡಿಕೊಡು ಬದನೆಕಾಯಿ ಬಜ್ಜಿ ಅಂತ ಕಾಡಿಸಿ ಪೀಡಿಸಿ ಮಾಡಿಸಿ ತಿನ್ನಿರಿ. ಅಜ್ಜಿ ಇಲ್ಲಂತ ಖಂಡಿತ ಹೇಳಲ್ಲ.

ಬೇಕಾಗುವ ಸಾಮಗ್ರಿಗಳು:

ಬದನೆಕಾಯಿ
ಕಡ್ಲೆಹಿಟ್ಟು - ಒಂದು ಬಟ್ಟಲು
ಅಕ್ಕಿಹಿಟ್ಟು - ಎರಡು ಚಮಚ
ಅಚ್ಚಖಾರದ ಪುಡಿ
ಉಪ್ಪು
ಓಮ್ ಕಾಳು
ಕಾದ ಎಣ್ಣೆ - ಒಂದು ಚಮಚ
ಚಿಟಿಕೆ ಸೋಡ
ಕಲೆಸಲು ಬೇಕಾಗುವಷ್ಟು ನೀರು
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:

ಬದನೆಕಾಯಿಯನ್ನು ತೆಳುವಾಗಿ ಹೆಚ್ಚಿಕೊಂಡು ಸ್ವಲ್ಪ ಉಪ್ಪು ಹಾಕಿದ ನೀರಿನಲ್ಲಿ ಹಾಕಿಡಿ.

ಕಡ್ಲೆಹಿಟ್ಟು, ಅಕ್ಕಿಹಿಟ್ಟು, ಓಮ್ ಕಾಳು, ಉಪ್ಪು, ಅಚ್ಚಖಾರದ ಪುಡಿ ಮತ್ತು ಸೋಡ ಹಾಕಿ ಚೆನ್ನಾಗಿ ಬೆರೆಸಿ, ಅದಕ್ಕೆ ಕಾದಿರುವ ಎಣ್ಣೆ ಹಾಕಿ, ಜೊತೆಯಲ್ಲಿ ನೀರು ಹಾಕಿ, ಕಲೆಸಿಕೊಳ್ಳಿ. ಎಲ್ಲವನ್ನು ಚೆನ್ನಾಗಿ ಬೆರೆಸಿ ದೋಸೆ ಹಿಟ್ಟಿನ/ಬಜ್ಜಿಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ.

ಎಣ್ಣೆಯನ್ನು ಕಾಯಲು ಇಟ್ಟು, ಅದು ಕಾದ ನಂತರ, ಹೆಚ್ಚಿರುವ ಬದನೆಕಾಯಿಯನ್ನು ಕಲೆಸಿರುವ ಹಿಟ್ಟಿನಲ್ಲಿ ಅದ್ದಿ, ಕಾದಿರುವ ಎಣ್ಣೆಯಲ್ಲಿ ಅದನ್ನು ತೇಲಿಬಿಡಿ. ಅದು ಮೇಲೆ ಬಂದಾಗ ತಿರುವಿ ಹಾಕಿ, ಎರಡು ಬದಿಯೂ ಚೆನ್ನಾಗಿ ಬೇಯಿಸಿ.

ಎಣ್ಣೆಯಿಂದ ತೆಗೆದು ಪೇಪರ್ ಟವಲ್ ಮೇಲೆ ಹಾಕಿ. ರುಚಿರುಚಿಯಾದ ಬದನೆಕಾಯಿ ಬಜ್ಜಿ ತಯಾರ್. ಇದನ್ನು ಬಿಸಿಯಾಗಿ ತಿಂದರೆ ತುಂಬಾ ಚೆನ್ನಾಗಿ ಇರುತ್ತದೆ. ಬೇಕಾದರೆ ಚಟ್ನಿಯೊಂದಿಗೆ ಸರ್ವ್ ಮಾಡಬಹುದು. [ಕೃಪೆ : ಅಡುಗೆ ಸವಿರುಚಿ]