ಚಳಿಗಾಲಕ್ಕೆ ಬೆಸ್ಟ್ ಈ ಖಡಕ್ ಪಕೋಡ ಖಡಿ

Snacks

oi-Sumalatha

By Sumalatha

Published: Thursday, October 20, 2011, 17:48 [IST]

ಉತ್ತರ ಭಾರತದಲ್ಲಿ ಹೆಚ್ಚಾಗಿ ತಯಾರಿಸುವ ಮೊಸರು ಮತ್ತು ಕಡಲೆಹಿಟ್ಟಿನ ಮಿಶ್ರಣದ ಖಡಿ ಚಳಿಗಾಲಕ್ಕೆ ಬೆಸ್ಟ್ ಖಾದ್ಯ. ಮೊಸರಿನ ಖಡಿಯೊಂದಿಗೆ ಪಕೋಡಾ ಬೆರೆಸಿ ತಿಂದರೆ ಚಳಿಯಲ್ಲಿ ಸಖತ್ ಟೇಸ್ಟ್ ನೀಡುತ್ತೆ. ಸುಲಭವಾಗಿ ತಯಾರಿಸಬಹುದಾದ ಈ ಪಕೋಡ ಖಡಿ ಹೇಗೆ ಮಾಡೋದು ಎಂದು ಇಲ್ಲಿ ನೋಡಿ.

ಪಕೋಡಾ ಖಡಿಗೆ ಏನೇನು ಬೇಕು?
ಖಡಿಗೆ ಬೇಕಾಗುವ ಪದಾರ್ಥ: 4 ಕಪ್ ಕದಡಿದ ಮೊಸರು, 2 ಚಮಚ ಕಡಲೆ ಹಿಟ್ಟು, ಉಪ್ಪು, ಅರಿಶಿನ, ಕೊತ್ತಂಬರಿ ಸೊಪ್ಪು, ಹಸಿರು ಮೆಣಸಿನ ಕಾಯಿ, ಕರಿಬೇವು, ಮೆಂತ್ಯೆ, ಕೆಂಪು ಮೆಣಸಿನ ಕಾಯಿ ಪುಡಿ, ಸೊಂಪು, ಜೀರಿಗೆ, ಸಾಸಿವೆ, ಇಂಗು, ನೀರು.
ಪಕೋಡಾಗೆ ಬೇಕಾಗುವ ಪದಾರ್ಥ: 1 ಕಪ್ ಕಡಲೆಹಿಟ್ಟು, ಉಪ್ಪು, ಸೋಂಪು, ಕೆಂಪು ಮೆಣಸಿನಕಾಯಿ ಪುಡಿ, ಅಡುಗೆ ಸೋಡಾ, ನೀರು, ಎಣ್ಣೆ.

ಪಕೋಡಾ ಖಡಿ ತಯಾರಿಸೋದು ಹೇಗೆ?
* ಒಂದು ಬಟ್ಟಲಿನಲ್ಲಿ ಪಕೋಡಾ ತಯಾರಿಸಲು ಮೇಲೆ ತಿಳಿಸಿರುವ ಸಾಮಾನುಗಳನ್ನು (ಎಣ್ಣೆ ಹೊರತುಪಡಿಸಿ) ಮಿಶ್ರಣ ಮಾಡಿ ನೀರು ಬೆರೆಸಿ ಹದವಾಗಿ ಕಲೆಸಬೇಕು.

* ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಅದರಲ್ಲಿ ಪಕೋಡಾಗೆಂದು ಕಲೆಸಿದ ಹಿಟ್ಟನ್ನು ಹಾಕಿ ಕೆಂಪಾಗುವವರೆಗೂ ಹುರಿದು ನಂತರ ಪೇಪರ್ ಮೇಲೆ ಎಣ್ಣೆ ಹೀರಿಕೊಳ್ಳಲು ಹರಡಿ ಒಂದೆಡೆ ಇಟ್ಟುಕೊಳ್ಳಬೇಕು.

* ಬಟ್ಟಲೊಂದರಲ್ಲಿ ಖಡಿಗೆಂದು ತಿಳಿಸಿರುವ ಕಡಲೆಹಿಟ್ಟು ಮತ್ತು ಮೊಸರನ್ನು ಕಲೆಸಿಕೊಂಡು ನೀರು ಹಾಕಿ ಚೆನ್ನಾಗಿ ಕದಡಬೇಕು. ಇದಕ್ಕೆ ಅರಿಶಿನ, ಹಸಿರುಮೆಣಸಿನ ಕಾಯಿ ಮತ್ತು ಉಪ್ಪು ಹಾಕಿ ಒಂದೆಡೆ ಇಡಬೇಕು.

* ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಕಾಯಿಸಿ ಅದಕ್ಕೆ ಸಾಸಿಗೆ, ಜೀರಿಗೆ, ಮೆಂತ್ಯೆ, ಇಂಗು, ಕರಿಬೇವು, ಸೋಂಪು ಹಾಕಿ ಒಂದು ನಿಮಿಷ ಹುರಿದು ನಂತರ ಕೆಂಪು ಮೆಣಸಿನ ಕಾಯಿ ಪುಡಿ ಹಾಕಬೇಕು. ತಕ್ಷಣವೇ ಇದಕ್ಕೆ ಕಲೆಸಿಟ್ಟುಕೊಂಡಿದ್ದ ಮೊಸರಿನ ಮಿಶ್ರಣವನ್ನು ಹಾಕಿ 3-4 ನಿಮಿಷದವರೆಗೆ ಬಿಡದೆ ಚೆನ್ನಾಗಿ ತಿರುಗಿಸಬೇಕು. ಇಲ್ಲವೆಂದರೆ ಮೊಸರು ಒಡೆದುಹೋಗುತ್ತದೆ. 10-14 ನಿಮಿಷ ಸಣ್ಣ ಉರಿಯಲ್ಲಿ ಇದನ್ನು ಬೇಯಿಸಬೇಕು.

* ಈಗ ಖಡಿಗೆ ಕರಿದ ಪಕೋಡಾ ಹಾಕಿ ಮೃದುವಾಗಿ ಕಲೆಸಿ ಒಲೆ ಆರಿಸಬೇಕು.

ಕೊತ್ತಂಬರಿ ಸೊಪ್ಪನ್ನು ಸಣ್ಣದಾಗಿ ಕತ್ತರಿಸಿ ಮೇಲೆ ಉದುರಿಸಿದರೆ ಪಕೋಡಾ ಖಡಿ ತಿನ್ನಲು ರೆಡಿ. ರೋಟಿ, ಅನ್ನ ಯಾವುದೊಂದಿಗಾದರೂ ಈ ಪಕೋಡಾ ಖಡಿ ತಿನ್ನಲು ರುಚಿಕರವಾಗಿರುತ್ತೆ.