ಗ್ಯಾಸ್‌ ಅಗತ್ಯವೇ ಇಲ್ಲ.. 10 ನಿಮಿಷದಲ್ಲಿ ಈ ಐಸ್ ಕ್ರೀಮ್ ಮಾಡಿ! 3 ಪದಾರ್ಥ ಸಾಕು

ಗ್ಯಾಸ್‌ ಆನ್‌ ಮಾಡುವ ಕೆಲಸವಿಲ್ಲ! ಸೀತಾಫಲದಿಂದ ಈ ಡಿಶ್ ಮಾಡಿ, ಎಲ್ಲರೂ ಪಿಧಾ ಆಗ್ತಾರೆ. ಈ ಸಿಹಿ ತಿಂಡಿ ಮಕ್ಕಳಿಂದ ಹಿಡಿದು ದೊಡ್ಡವರಿಗೂ ಇಷ್ಟ. ಹೌದು, ಸೀತಾಫಲ ಹಣ್ಣು ಕೇವಲ ರುಚಿಯಲ್ಲಿ ಮಾತ್ರವಲ್ಲದೆ, ಆರೋಗ್ಯ ಪ್ರಯೋಜನಗಳ ವಿಷಯದಲ್ಲೂ ಮುಂದಿದೆ. ವಿಟಮಿನ್‌ಗಳು, ಖನಿಜಗಳು ಮತ್ತು ಪ್ರಬಲ ಉತ್ಕರ್ಷಣ ನಿರೋಧಕಗಳಿಂದ ತುಂಬಿರುವ ಸೀತಾಫಲ, ಕೆಲವೊಮ್ಮೆ ಮಕ್ಕಳಿಗೆ ಇಷ್ಟವಾಗುವುದಿಲ್ಲ. ಇಂತಹ ಮಕ್ಕಳು ಸಹ ಇಷ್ಟಪಟ್ಟು ಸವಿಯುವಂತೆ ಸೀತಾಫಲ ಐಸ್ ಕ್ರೀಮ್ (Custard Apple Ice Cream) ತಯಾರಿಸಬಹುದು.

ಸೀತಾಫಲದ (Custard Apple) ನೈಸರ್ಗಿಕ ಸಿಹಿ ಮತ್ತು ವಿಶಿಷ್ಟ ಪರಿಮಳ ಐಸ್ ಕ್ರೀಮ್‌ಗೆ ಹೊಸ ರುಚಿ ನೀಡುತ್ತದೆ. ಈ ವಿಧಾನದ ವಿಶೇಷತೆ ಏನೆಂದರೆ, ಇದಕ್ಕೆ ಗ್ಯಾಸ್‌ ಅಥವಾ ಒಲೆಯ ಬಳಕೆಯೇ ಇರುವುದಿಲ್ಲ. ಈ ಐಸ್ ಕ್ರೀಮ್ ಸುಲಭವಾಗಿ, ಆರೋಗ್ಯಕರವಾಗಿ ತಯಾರಿಸಬಹುದು. ಬನ್ನಿ, ಮನೆಯಲ್ಲೇ ಸರಳ ವಿಧಾನದ ಮೂಲಕ ಈ ಸೀತಾಫಲ ಐಸ್ ಕ್ರೀಮ್ (Ice Cream Recipe) ತಯಾರಿಸುವುದು ಹೇಗೆ ಎಂದು ತಿಳಿಯೋಣ.

ಸೀತಾಫಲ ಐಸ್ ಕ್ರೀಮ್ ತಯಾರಿಸಲು ಬೇಕಾದ ಸಾಮಗ್ರಿಗಳು

• ಸೀತಾಫಲ ಹಣ್ಣುಗಳು
• ಸಕ್ಕರೆ ಪುಡಿ
• ಹಾಲಿನ ಕೆನೆ ಅಥವಾ ಫ್ರೆಶ್ ಕ್ರೀಮ್
• ವೆನಿಲ್ಲಾ ಎಸೆನ್ಸ್
• ಹಾಲಿನ ಪುಡಿ

ಸೀತಾಫಲ ಐಸ್ ಕ್ರೀಮ್ ತಯಾರಿಸುವ ವಿಧಾನ

ಮನೆಯಲ್ಲಿಯೇ ಸುಲಭವಾಗಿ ಸೀತಾಫಲ ಐಸ್‌ಕ್ರೀಮ್ ತಯಾರಿಸುವ ವಿಧಾನ ಇಲ್ಲಿದೆ. ಯಾವುದೇ ಅಡುಗೆ ಮಾಡುವ ಅಗತ್ಯವಿಲ್ಲದೆ, ಕೇವಲ ಕೆಲವೇ ಹಂತಗಳಲ್ಲಿ ರುಚಿಕರವಾದ ಐಸ್‌ಕ್ರೀಮ್ ಸಿದ್ಧಪಡಿಸಬಹುದು.

- ಮೊದಲಿಗೆ, ಚೆನ್ನಾಗಿ ಹಣ್ಣಾದ ನಾಲ್ಕು ಸೀತಾಫಲಗಳನ್ನು ತೆಗೆದುಕೊಳ್ಳಿ. ಅವುಗಳನ್ನು ಅರ್ಧಕ್ಕೆ ಕತ್ತರಿಸಿ ತಿರುಳನ್ನು ಬೇರ್ಪಡಿಸಿಕೊಳ್ಳಿ. ಈ ತಿರುಳಿನಿಂದ ಬೀಜಗಳನ್ನು ಕೈಯಿಂದ ಅಥವಾ ದೊಡ್ಡ ರಂಧ್ರಗಳಿರುವ ಜರಡಿಯ ಮೂಲಕ ತೆಗೆಯಬೇಕು. ಸುಮಾರು ಅರ್ಧ ಕಪ್ ಸೀತಾಫಲ ತಿರುಳನ್ನು ಐಸ್‌ಕ್ರೀಮ್‌ನ ಕೊನೆಯ ಪದರಕ್ಕಾಗಿ ಪ್ರತ್ಯೇಕವಾಗಿ ಇಟ್ಟುಕೊಳ್ಳಿ.

- ನಂತರ, ಒಂದು ಮಿಕ್ಸರ್ ಜಾರ್‌ಗೆ ಒಂದು ಕಪ್ ಸೀತಾಫಲ ತಿರುಳು, 1/3 ಕಪ್ ಸಕ್ಕರೆ ಪುಡಿ, 1/3 ಕಪ್ ಹಾಲಿನ ಪುಡಿ, ಒಂದು ಕಪ್ ಹಾಲಿನ ಕೆನೆ (ಅಥವಾ ಫ್ರೆಶ್ ಕ್ರೀಮ್) ಮತ್ತು ಒಂದು ಟೀಚಮಚ ವೆನಿಲ್ಲಾ ಎಸೆನ್ಸ್ ಸೇರಿಸಿ. ಈ ಎಲ್ಲಾ ಪದಾರ್ಥಗಳನ್ನು ನುಣ್ಣಗೆ, ನೊರೆ ಬರುವವರೆಗೆ ಚೆನ್ನಾಗಿ ಬ್ಲೆಂಡ್ ಮಾಡಬೇಕು.

- ಬ್ಲೆಂಡ್ ಮಾಡಿದ ಮಿಶ್ರಣವನ್ನು ಒಂದು ಪಾತ್ರೆ ಅಥವಾ ಡಬ್ಬದಲ್ಲಿ ಹಾಕಿ, ಮುಚ್ಚಳದಿಂದ ಮುಚ್ಚಿ. ಇದನ್ನು ಎರಡು ರಿಂದ ಮೂರು ಗಂಟೆಗಳ ಕಾಲ ಫ್ರಿಜ್‌ನ ಡಿಪ್ ಫ್ರೀಜರ್‌ನಲ್ಲಿಡಿ. ಇದು ಐಸ್‌ಕ್ರೀಮ್ ಮಿಶ್ರಣ ಗಟ್ಟಿಯಾಗಲು ಸಹಾಯ ಮಾಡುತ್ತದೆ.

- ಮೂರು ಗಂಟೆಗಳ ನಂತರ, ಫ್ರಿಜ್‌ನಿಂದ ಮಿಶ್ರಣವನ್ನು ಹೊರತೆಗೆದು, ಗಟ್ಟಿಯಾದ ಈ ಪದಾರ್ಥವನ್ನು ಮತ್ತೆ ಮಿಕ್ಸರ್ ಜಾರ್‌ಗೆ ಹಾಕಿ ಚೆನ್ನಾಗಿ ಬ್ಲೆಂಡ್ ಮಾಡಿ. ಹೀಗೆ ಮಾಡುವುದರಿಂದ ಐಸ್‌ಕ್ರೀಮ್ ಹೆಚ್ಚು ಮೃದುವಾಗಿ ಮತ್ತು ಹಿಮಗಡ್ಡೆಗಳಿಲ್ಲದೆ ತಯಾರಾಗುತ್ತದೆ.

- ಈ ಮಿಶ್ರಣವನ್ನು ಅಂತಿಮವಾಗಿ ಫ್ರೀಜ್ ಮಾಡಲು ಒಂದು ಟ್ರೇ ಅಥವಾ ಪಾತ್ರೆಯಲ್ಲಿ ಹಾಕಿ. ಅದಕ್ಕೆ ಹಿಂದೆ ತೆಗೆದಿರಿಸಿದ್ದ ಅರ್ಧ ಕಪ್ ಸೀತಾಫಲ ತಿರುಳನ್ನು ಸೇರಿಸಿ, ಸ್ಪೂನ್‌ನಿಂದ ನಿಧಾನವಾಗಿ ಬೆರೆಸಿ. ಮಿಶ್ರಣದ ಮೇಲೆ ಪ್ಲಾಸ್ಟಿಕ್ ಕವರ್ ಹಾಕಿ, ಮುಚ್ಚಳದಿಂದ ಮುಚ್ಚಿ ರಾತ್ರಿಯಿಡೀ ಅಥವಾ ಕನಿಷ್ಠ ಎಂಟು ಗಂಟೆಗಳ ಕಾಲ ಡಿಪ್ ಫ್ರೀಜರ್‌ನಲ್ಲಿ ಇಡಿ.

ಈ ಸರಳ ವಿಧಾನದಿಂದ ತಯಾರಿಸಿದ ಪೌಷ್ಟಿಕ ಮತ್ತು ಸ್ವಾದಿಷ್ಟ ಸೀತಾಫಲ ಐಸ್‌ಕ್ರೀಮ್ (Sitaphal Ice Cream) ಅನ್ನು ಸವಿಯಲು ಸಿದ್ಧವಾಗಿರುತ್ತದೆ. ಈ ಐಸ್‌ಕ್ರೀಮ್ ಅನ್ನು ಫ್ರೀಜರ್‌ನಲ್ಲಿ ಕನಿಷ್ಠ ಒಂದು ವಾರದವರೆಗೆ ತಾಜಾವಾಗಿ ಸಂಗ್ರಹಿಸಿಡಬಹುದು.