ಮಾವಿನ ಜಾದು! ಮ್ಯಾಂಗೋ ಬಿರಿಯಾನಿ, ಅಚಾರಿ ಚಿಕನ್, ಹಲಸಿನ ಕರಿ.. ಟ್ರೈ ಮಾಡಲೇಬೇಕು

ಮಾವಿನಕಾಯಿ ಹೀಗೂ ಬಳಸಬಹುದು! ಬಿರಿಯಾನಿ, ಚಿಕನ್, ಹಲಸಿನಕಾಯಿಯ ಹೊಸ ರುಚಿ. ನೀವು ಒಮ್ಮೆ ಟ್ರೈ ಮಾಡಲೇಬೇಕು. ಹೌದು, ಈಗಾಗಲೇ ಮಳೆಗಾಲ (Monsoon) ಆರಂಭವಾಗಿದೆ. ಬಿಸಿಬಿಸಿ ಹಾಗೂ ರುಚಿಕರ ಆಹಾರಗಳಿಗೆ ಬೇಡಿಕೆ ಹೆಚ್ಚುತ್ತದೆ. ಈ ಮಾನ್ಸೂನ್ ಋತುವಿನಲ್ಲಿ ಕೆಲವು ಪ್ರಸಿದ್ಧ ಬಾಣಸಿಗರು ಮಾವಿನಕಾಯಿಯ (Mango) ವಿಶೇಷ ಟ್ವಿಸ್ಟ್‌ಗಳೊಂದಿಗೆ ಅದ್ಭುತವಾದ ಖಾದ್ಯಗಳನ್ನು ಸಿದ್ಧಪಡಿಸುತ್ತಿದ್ದಾರೆ. ಮಾವಿನ ಸಿಹಿ, ಹುಳಿ ಮತ್ತು ಕಟುವಾದ ರುಚಿ ಮಳೆಗಾಲದ ತಂಪು ವಾತಾವರಣಕ್ಕೆ ಹೇಳಿಮಾಡಿಸಿದಂತಿದೆ. ಮಾವಿನಕಾಯಿ ಬಿರಿಯಾನಿಯಿಂದ ಹಿಡಿದು ಅಚಾರಿ ಚಿಕನ್, ಹಲಸಿನಕಾಯಿ ಕರಿವರೆಗೆ, ಮಾವಿನ ಹಣ್ಣಿನ ರುಚಿಯನ್ನು ವಿವಿಧ ಖಾದ್ಯಗಳಲ್ಲಿ ಸವಿಯಲು ಸಿದ್ಧರಾಗಿ.

ಮಾವಿನ ಹಣ್ಣನ್ನು ಸಾಮಾನ್ಯವಾಗಿ ಸಿಹಿ ತಿಂಡಿಗಳಿಗೆ ಮಾತ್ರ ಬಳಸುತ್ತಾರೆ ಎಂಬ ನಿಮ್ಮ ಭಾವನೆಗೆ ಕೊಂಚ ವಿರಾಮ ನೀಡಿ. ಏಕೆಂದರೆ, ಇದು ಹಲವಾರು ಬಗೆಯ ಖಾರದ ಮುಖ್ಯ ಭಕ್ಷ್ಯಗಳನ್ನು ತಯಾರಿಸಲು ಬಳಕೆಯಾಗುತ್ತದೆ. ನೀವು ಮಾವಿನ ಹಣ್ಣನ್ನು ಸಿಹಿ ತಿಂಡಿಗಳು, ಪಾನೀಯಗಳು ಅಥವಾ ಉಪ್ಪಿನಕಾಯಿಗಳಲ್ಲಿ ಸವಿದಿರಬಹುದು. ಆದರೆ, ಇದರಿಂದ ಇನ್ನೂ ಹೆಚ್ಚಿನ ಅಡುಗೆಗಳನ್ನು ಮಾಡಬಹುದು. ಮೇಲೋಗರದಿಂದ ಹಿಡಿದು ಬಿರಿಯಾನಿಯವರೆಗೆ, ಮಾವಿನ ಹಣ್ಣಿನಿಂದ ತಯಾರಿಸಬಹುದಾದ ರುಚಿಕರವಾದ ಅಡುಗೆಗಳ ಬಗ್ಗೆ ಇಲ್ಲಿದೆ ಮಾಹಿತಿ.

ಮಾನ್ಸೂನ್ ಸ್ಪೆಷಲ್ ಖಾದ್ಯಗಳು

ಮ್ಯಾಂಗೋ ಬಿರಿಯಾನಿ

ಮ್ಯಾಂಗೋ ಬಿರಿಯಾನಿ (Mango Biryani) ಮಳೆಗಾಲದ ವಿಶೇಷ ಖಾದ್ಯ. ಮಾವಿನಕಾಯಿಯ ವಿಶಿಷ್ಟ ಹುಳಿ-ಸಿಹಿಯ ರುಚಿ ಮತ್ತು ಬಿರಿಯಾನಿಯ ಸುವಾಸನೆ ಒಂದಾದಾಗ ಅದ್ಭುತವಾದ ಖಾದ್ಯ ಸೃಷ್ಟಿಯಾಗುತ್ತದೆ. ಬಾಣಸಿಗರು ಹಸಿ ಮಾವಿನಕಾಯಿ ಅಥವಾ ಬಲಿತ ಮಾವಿನ ಹಣ್ಣನ್ನು ಬಳಸಿ ಈ ಬಿರಿಯಾನಿಗೆ ವಿಶಿಷ್ಟ ಸ್ಪರ್ಶ ನೀಡುತ್ತಾರೆ. ಇದು ಮಾವಿನ ಪ್ರಿಯರಿಗೆ ಹೊಸ ಅನುಭವ ನೀಡುತ್ತದೆ.

ಬಾಸುಮತಿ ಅಕ್ಕಿಯನ್ನು ನೀರಿನಲ್ಲಿ ಮತ್ತು ತುಪ್ಪದಲ್ಲಿ ಶೇ.70 ರಷ್ಟು ಬೇಯಿಸಬೇಕು. ನಂತರ, ಒಂದು ಬಾಣಲೆಯಲ್ಲಿ ಜೀರಿಗೆ, ಈರುಳ್ಳಿ ಮತ್ತು ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಅನ್ನು ಸೇರಿಸಿ. ಕೊತ್ತಂಬರಿ ಪುಡಿ, ಅರಿಶಿನ ಮತ್ತು ಕೆಂಪು ಮೆಣಸಿನ ಪುಡಿಯಂತಹ ಮಸಾಲೆಗಳೊಂದಿಗೆ, ಕತ್ತರಿಸಿದ ಮಾವಿನಕಾಯಿಯನ್ನು ಹಾಕಿ 2 ರಿಂದ 3 ನಿಮಿಷ ಬೇಯಿಸಿ. ಬಳಿಕ, ಒಂದು ಪಾತ್ರೆಯಲ್ಲಿ ಅನ್ನ ಮತ್ತು ಮಾವಿನಕಾಯಿ ಮಿಶ್ರಣವನ್ನು ಹಾಕಿ ಬೇಯಿಸಿ. ಈ ಮ್ಯಾಂಗೋ ಬಿರಿಯಾನಿಯು ಮಾವಿನಕಾಯಿಯ ಸಿಹಿ ಮತ್ತು ಮಸಾಲೆಗಳ ಪರಿಮಳವನ್ನು ಹೊಂದಿರುತ್ತದೆ.

ಅಚಾರಿ ಚಿಕನ್

ಆಚಾರ ಎಂದರೆ ಉಪ್ಪಿನಕಾಯಿ. ಮಾವಿನಕಾಯಿಯ ಉಪ್ಪಿನಕಾಯಿಯ ಮಸಾಲೆಗಳನ್ನು ಬಳಸಿ ತಯಾರಿಸುವ ಚಿಕನ್ ಕರಿ (Achari Chicken). ಇದು ಮಳೆಗಾಲದ ಚಳಿಗೆ ಸೂಕ್ತವಾದ ಖಾರ ಮತ್ತು ಮಸಾಲೆಯುಕ್ತ ರುಚಿಯನ್ನು ನೀಡುತ್ತದೆ. ಮಾವಿನ ಹುಳಿ, ಮಸಾಲೆಯುಕ್ತ ಚಿಕನ್‌ನೊಂದಿಗೆ ಸೇರಿ ವಿಭಿನ್ನ ಅನುಭವ ನೀಡುತ್ತದೆ. ಆಮ್ ಕಾ ಅಚಾರ್ ಮುರ್ಗ್‌ನ ವಿಶೇಷತೆಯೆಂದರೆ, ಇದು ಸಾಂಪ್ರದಾಯಿಕ ಭಾರತೀಯ ಮಾವಿನಕಾಯಿ ಉಪ್ಪಿನಕಾಯಿಯ ಖಾರ ಮತ್ತು ಮಸಾಲೆಯುಕ್ತ ಸುವಾಸನೆಯೊಂದಿಗೆ ಕ್ಲಾಸಿಕ್ ಚಿಕನ್ ಮೇಲೋಗರದ ಸಮ್ಮಿಲನವಾಗಿದೆ. ಮಾವಿನಕಾಯಿ ಉಪ್ಪಿನಕಾಯಿಯೊಂದಿಗೆ ಜೀರಿಗೆ, ಮೆಂತ್ಯ, ಸಾಸಿವೆ ಮತ್ತು ಸೋಂಪು ಇತ್ಯಾದಿ ಮಸಾಲೆಗಳನ್ನು ಸೇರಿಸುವುದರಿಂದ ಈ ಖಾದ್ಯವು ತನ್ನ ರುಚಿಯನ್ನು ಪಡೆಯುತ್ತದೆ.

ಹಲಸಿನಕಾಯಿ ಕರಿ

ಹಲಸಿನಕಾಯಿ ಸಾಮಾನ್ಯವಾಗಿ ಮಾಂಸಕ್ಕೆ ಪರ್ಯಾಯವಾಗಿ ಬಳಸಲಾಗುತ್ತದೆ. ಇದಕ್ಕೆ ಮಾವಿನ ಹಣ್ಣಿನ ಸಿಹಿ ಮತ್ತು ಹುಳಿ ಮಿಶ್ರಣವನ್ನು ಸೇರಿಸಿದಾಗ, ಸಾಂಪ್ರದಾಯಿಕ ಕರಿಗೆ ಹೊಸ ರುಚಿ ಸಿಗುತ್ತದೆ. ಇದು ಸಸ್ಯಾಹಾರಿಗಳಿಗೆ ಮಾನ್ಸೂನ್ ಋತುವಿನ ವಿಶೇಷ ಖಾದ್ಯವಾಗಿದೆ. ಆಮ್ ಔರ್ ಕಠಲ್ ಕಿ ಸಬ್ಜಿ (Jackfruit Curry Recipe) ರುಚಿಕರವಾದ ಖಾದ್ಯವಾಗಿದೆ. ಹುಳಿ ಮಾವಿನಕಾಯಿ ಮತ್ತು ಕಚ್ಚಾ ಹಲಸಿನಕಾಯಿಯ ವಿಶಿಷ್ಟ ಸಂಯೋಜನೆಗೆ ಹೆಸರುವಾಸಿ. ಇದು ಬಿಹಾರದಲ್ಲಿ ಬಹಳ ಪ್ರಸಿದ್ಧವಾಗಿದೆ. ಇದನ್ನು ತಯಾರಿಸುವ ವಿಧಾನ ಇಲ್ಲಿದೆ.

500 ಗ್ರಾಂ ಹಲಸಿನಕಾಯಿಯನ್ನು ಕುದಿಸಿ ಹುರಿಬೇಕು. ನಂತರ, ಬಾಣಲೆಯಲ್ಲಿ 3 ಚಮಚ ಸಾಸಿವೆ ಎಣ್ಣೆಯನ್ನು ಬಿಸಿ ಮಾಡಿ ಅದಕ್ಕೆ 1 ಬೇ ಎಲೆ, 1 ಚಮಚ ಜೀರಿಗೆ ಮತ್ತು ಇಂಗು ಹಾಕಿ. ಈಗ 1 ಈರುಳ್ಳಿ, 4 ಜಜ್ಜಿದ ಬೆಳ್ಳುಳ್ಳಿ ಎಸಳು, 1 ಇಂಚು ತುರಿದ ಶುಂಠಿ ಮತ್ತು 2 ಸೀಳಿದ ಹಸಿ ಮೆಣಸಿನಕಾಯಿ ಹಾಕಿ. ನಂತರ 1 ಚಮಚ ಅರಿಶಿನ, 1 ಚಮಚ ಕೆಂಪು ಮೆಣಸಿನ ಪುಡಿ, 1.5 ಚಮಚ ಕೊತ್ತಂಬರಿ ಪುಡಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ. ಕುದಿಸಿದ ಹಲಸಿನಕಾಯಿ ಮತ್ತು 1 ಕತ್ತರಿಸಿದ ಹಸಿ ಮಾವಿನಕಾಯಿ ಹಾಕಿ. ನೀರು ಸೇರಿಸಿ, ಕಡಿಮೆ ಉರಿಯಲ್ಲಿ ಬೇಯಿಸಿ ಮತ್ತು ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ.

ಈ ಮಾನ್ಸೂನ್ ಸಮಯದಲ್ಲಿ, ಈ ವಿಶೇಷ ಮಾವಿನ ಟ್ವಿಸ್ಟ್ ಹೊಂದಿರುವ ಖಾದ್ಯಗಳನ್ನು ಸವಿಯಲು ನೀವು ಸಿದ್ಧರಾಗಿ. ಇದು ನಿಮ್ಮ ಬಾಯಿ ರುಚಿಗೆ ಹೊಸ ಅನುಭವ ನೀಡುತ್ತದೆ. ಉಪ್ಪಿನಕಾಯಿ, ಚಟ್ನಿ ಬಿಟ್ಟು ಮಾವಿನಕಾಯಿಯಿಂದ ವಿಭಿನ್ನ ಖಾದ್ಯಗಳನ್ನು ತಯಾರಿಸಿ.