ಅಸಲಿ ಅಯ್ಯಂಗಾರರ ಅಪ್ಪಟ ಪುಳಿಯೋಗರೆ

Rice

oi-Staff

By * ಭಾಗ್ಯ ಶೇಷಾದ್ರಿ, ಕೋಲಂಬೊ

Updated: Thursday, March 14, 2013, 18:08 [IST]

ಈಗಿನ ಕಾಲದಲ್ಲಿ ಎಲ್ಲರೂ ಪುಳಿಯೋಗರೆ ಮಾಡುವುದನ್ನು ಹಾಗೂಹೀಗೂ ಕಲಿತಿದ್ದಾರೆ. ಅಂಗಡಿಗಳಲ್ಲಿಯೂ ಶುದ್ಧ ಪುಳಿಯೋಗರೆ ಎಂದು ಲೆಬಲ್ ಅಂಟಿಸಿ ಮಾರಾಟಮಾಡುತ್ತಾರೆ. ನಾನು ಕೂಡ ಅಲ್ಲಲ್ಲಿ ಪುಳಿಯೋಗರೆ ಪುಡಿ ಖರೀದಿಸಿದ್ದೇನೆ, ತಿಂದಿದ್ದೇವೆ. ಆದರೆ, ಅದು ಅಬ್ಬಬ್ಬಾ ಎಂದರೆ ಗೊಜ್ಜಿನ ಚಿತ್ರಾನ್ನ ರೀತಿಯಲ್ಲಿ ಇರುತ್ತದೆಯೇ ಹೊರತು ಅಪ್ಪಟ ಪುಳಿಯೋಗರೆ ಎನಿಸಿಕೊಳ್ಳುವುದಿಲ್ಲ. ಇದನ್ನು ನಾನು ನಿಮಗೆ ತಿಳಿಸಲು ಕಾರಣವಿದೆ, ಸ್ವಲ್ಪ ಜಂಬದಿಂದಲೇ ಹೇಳುತ್ತಿದ್ದೇನೆ, ಕ್ಷಮಿಸಿ. ನಮ್ಮದು ಅಯ್ಯಂಗಾರ್ ಮನೆತನ. ನೂರಾರು ವರ್ಷಗಳಿಂದ ನಮ್ಮ ಮನೆಯಲ್ಲಿ ಪುಳಿಯೋಗರೆ ಮಾಡುತ್ತಾ ಬಂದಿದ್ದಾರೆ. ಅದನ್ನು ಹೇಗೆ ಮಾಡಬೇಕೋ ಹಾಗೆ ಮಾಡಿದರೆ ಚೆನ್ನಾಗಿರತ್ತೆ. ಹಾಗೆ ತಯಾರಾದರೆ ಮಾತ್ರ ನಮ್ಮ ಚೆಲುವ ನಾರಾಯಾಣನಿಗೆ ಪ್ರೀತಿ.

ಬೆಟ್ಟದಪುರದಲ್ಲಿರುವ ನಮ್ಮ ತಾಯಿ ಮಂಗಮ್ಮ ಅವರಿಂದ ಪುಳಿಯೋಗರೆ ರೆಸಿಪಿಯನ್ನು ಫೋನಿನಲ್ಲಿ ಕೇಳಿ ಬರೆದುಕೊಂಡು ನಿಮಗೆ ಬರೆಯುತ್ತಿದ್ದೇನೆ. ಮೊದಮೊದಲು ನಾನು ಮಾಡಿದ್ದು ಅಷ್ಟು ಸರಿಯಾಗಿ ಬರುತ್ತಿರಲಿಲ್ಲ. ಈಗೀಗ ಹದ ಸಿಕ್ಕಿದೆ. ಪಾಟ್ ಲಕ್ , ವೀಕ್ ಎಂಡ್ ಪಾರ್ಟಿಗಳಿಗೆ ನಮ್ಮ ಮನೆಯಿಂದ ಪುಳಿಯೋಗರೆ ಹಾಟ್ ಕೇಸ್ ನಲ್ಲಿ ಹೋಗಲೇಬೇಕು ಎನ್ನುವುದು ಇಲ್ಲಿ ಮನೆಮಾತಾಗಿದೆ. ನನ್ನಂತೆ ನೀವೂ ಪುಳಿಯೋಗರೆ ಮಾಡಿ, ಸವಿಯಿರಿ. 5-6 ಜನ ಊಟಕ್ಕೆ ಅಗತ್ಯವಾದ ಪ್ರಮಾಣದಲ್ಲಿ ರೆಸಿಪಿ ನಿರೂಪಿಸಲಾಗಿದೆ. ಪುಳಿಯೋಗರೆಗೆ ಸಿದ್ಧ ಮಾಡಿಕೊಳ್ಳಲು ಐದು ಹಂತಗಳಿವೆ:

ಅ) 100 ಗ್ರಾಮ್ ಹುಣಿಸೆಹಣ್ಣನ್ನು ನೆನೆಸಿಟ್ಟು ಅದರ ರಸಹಿಂಡಿಕೊಂಡು ಅದಕ್ಕೆ ನಿಂಬೆಹಣ್ಣಿನ ಗಾತ್ರದಷ್ಟು ಬೆಲ್ಲ ಹಾಕಿ ಚೆನ್ನಾಗಿ ಕುದಿಸಿಟ್ಟುಕೊಳ್ಳಬೇಕು.
ಆ) ಆರು ಚಮಚ ಕರಿಎಳ್ಳನ್ನು ಲೈಟಾಗಿ ಹುರಿದು ಮಿಕ್ಸಿಗೆ ಹಾಕಿ ನುಣ್ಣಗೆ ಪುಡಿಮಾಡಿಟ್ಟುಕೊಳ್ಳಬೇಕು. ಅರ್ಧ ಗಿಟುಕು ಒಣ ಕೊಬ್ಬರಿಯನ್ನು ತುರಿದು ರೆಡಿ ಮಾಡಿಟ್ಟುಕೊಂಡಿರಬೇಕು.
ಇ) ಒಂದು ಚಮಚ ಮೆಂತ್ಯ, ಎರಡು ಚಮಚ ಕರಿ ಮೆಣಸು, ಮೂರು ಚಮಚ ಕೊತ್ತಂಬರಿ ಬೀಜ, ಎರಡು ಚಮಚ ಜೀರಿಗೆ, 5-6 ಬಳ್ಳಿ ಒಣಮೆಣಸಿನಕಾಯಿ, 4-5 ಗುಂಟೂರು ಮೆಣಸಿನಕಾಯಿ (ಬಳ್ಳಿಕಾಯಿ ಬಣ್ಣಕ್ಕೆ, ಗುಂಟೂರು ಕಾಯಿ ಖಾರಕ್ಕೆ): ಇವಿಷ್ಟನ್ನೂ ಎರಡೋ ಮೂರೋ ಚಮಚ ಎಣ್ಣೆಯಲ್ಲಿ ಸಣ್ಣ ಉರಿಯಲ್ಲಿ ಗರಿಗರಿ ಹುರಿದು ಆನಂತರ ಮಿಕ್ಸಿಗೆ ಹಾಕಿ ಪುಡಿ ಮಾಡಿಟ್ಟುಕೊಳ್ಳಬೇಕು.
ಈ) ಒಗ್ಗರಣೆಗೆ 75 ಮಿಲಿಲೀಟರ್ ಎಣ್ಣೆ, ಒಂದು ಚಮಚ ಸಾಸಿವೆ, ಎರಡು ಚಮಚ ಉದ್ದಿನಬೇಳೆ, ಎರಡು ಚಮಚ ಕಡಲೆಬೇಳೆ, 50 ಗ್ರಾಂ ಕಡಲೆಕಾಯಿ ಬೀಜ, ಮಾಗಿದ ಕರಿಬೇವಿನ ಎಲೆಗಳು ಮತ್ತು ಅರ್ಧ ಚಮಚ ಇಂಗು.
(ಉ)ಉದುರು ಉದುರಾಗಿ ಮಾಡಿದ ಅನ್ನ. ಕುಕ್ಕರ್ ಧಿಕ್ಕರಿಸಿ ಬಸಿದ ಅನ್ನ ಮಾಡಿದರೆ ಗುಡ್.

ಮಾಡುವ ವಿಧಾನ :

ಹುಣಿಸೆ ಬೆಲ್ಲದ ರಸವನ್ನು(ಅ) ಬಾಣಲೆಗೆ ಹಾಕಿ ಬೆಚ್ಚಗಾದ ನಂತರ ಅದಕ್ಕೆ ಮಸಾಲೆ ಪುಡಿಯನ್ನು(ಇ) ಬೆರೆಸಿ ಮರದ ಸೌಟಿನಲ್ಲಿ ಚೆನ್ನಾಗಿ ಹದಬರುವ ತನಕ ಸಂಸ್ಕರಿಬೇಕು. ಮಸಾಲೆ ಕೂಡಿಕೊಂಡ ನಂತರ ಎಳ್ಳು, ಕೊಬ್ಬರಿ(ಆ) ಪುಡಿಯನ್ನು ಬೆರೆಸಿ ಹಿತವಾಗಿ ಕಲಸಬೇಕು. ಈ ಗೊಜ್ಜನ್ನು(ಅ+ಆ+ಇ) ಹರಿವಾಣದಲ್ಲಿ ಆರುತ್ತಿರುವ ಅನ್ನದ ಮೇಲೆ ಹಾಕಬೇಕು. ಒಗ್ಗರಣೆಯನ್ನು(ಈ) ಪ್ರತ್ಯೇಕವಾಗಿ ಮಾಡಿ ಅದನ್ನು ಹರಿವಾಣಕ್ಕೆ ಸುರಿಯಿರಿ. ಕೈಗೆ ಸ್ವಲ್ಪ ಎಣ್ಣೆ ಸವರಿಕೊಂಡು ಅನ್ನ(ಉ) ಕಲಸಿದರೆ ಪುಳಿಯೋಗರೆ ಸಿದ್ಧವಾಗುತ್ತದೆ. ಕಲಸುವಾಗ ರುಚಿಗೆ ತಕ್ಕಷ್ಟು ಐಯೋಡೈಸ್ಡ್ ಉಪ್ಪು ಬೆರೆಸಬೇಕು. (ಬರೆಯುವಾಗ ಮರೆತುಬಿಟ್ಟಿದ್ದೆ, ಕ್ಷಮಿಸಿ.)

ವಿಶೇಷ ಸೂಚನೆ :

*ಅಕ್ಕಿ ದಪ್ಪ ಅಥವಾ ಸಣ್ಣಗಿದ್ದರೆ ಪರವಾಗಿಲ್ಲ. ಆದರೆ ಹಳೆ ಅಕ್ಕಿಯಾಗಿರಬೇಕು.
*ಹುಣಿಸೆಹಣ್ಣನ್ನೇ ಉಪಯೋಗಿಸಬೇಕು. ಪೇಸ್ಟ್ ಬೇಡ.
*ಖಾರ ಹೆಚ್ಚು ಇಷ್ಟಪಡುವವರು ಗುಂಟೂರು ಮೆಣಸಿನಕಾಯಿ ಎರಡು ಹೆಚ್ಚಿಗೆ ಬಳಸಬಹುದು.
*ಒಗ್ಗರಣೆ ಮಾಡುವಾಗ ಬೇಳೆಗಳು, ಕಡಲೆಕಾಯಿ ಬೀಜ ಮತ್ತು ಕರಿಬೇವು ಸೀದು ಕಪ್ಪಗಾಗದಂತೆ ಎಚ್ಚರವಹಿಸಬೇಕು.
* ಪುಳಿಯೋಗರೆ ಉಳಿದರೆ ಅಥವಾ ಉಳಿಸಿ ಭದ್ರವಾಗಿ ಮುಚ್ಚಿಟ್ಟರೆ ಎರಡುದಿನವಾದರೂ ಕೆಡುವುದಿಲ್ಲ. ಬದಲಾಗಿ ಒಳ್ಳೆ ರುಚಿ ಬಂದಿರುತ್ತದೆ. ನಾರಾಯಣಮಸ್ತು.