ಆಲೂ ಕರಿಯ ರುಚಿ ದುಪ್ಪಟ್ಟು.. ಮನೆಯಲ್ಲೇ ಮಾಡಿ ಸೂಜಿ-ಮೆಂತ್ಯ ಪುರಿ! ಗರಿಗರಿಯಾಗಿ ಬರಲು ಈ ಟ್ರಿಕ್ ಬಳಸಿ

ಹೊಟ್ಟೆ ತುಂಬಾ ರುಚಿ! ಆಲೂ ಕರಿಯ ಜೊತೆ ಸೂಪರ್ ಕಂಬಿನೇಷನ್.. ಮನೆಯಲ್ಲೇ ಮಾಡಿ ಕ್ರಿಸ್ಪಿ ಸೂಜಿ ಮೆಂತ್ಯ ಪುರಿ. ಹೌದು, ಆಲೂಗೆಡ್ಡೆ ಪಲ್ಯ ಭಾರತದ ಮನೆ ಮನೆಗಳಲ್ಲಿ ಜನಪ್ರಿಯವಾಗಿರುವ ಪಕ್ಕಾ ಆಹಾರ. ಇದನ್ನು ಸಾಮಾನ್ಯವಾಗಿ ಮೃದುವಾದ ಪುರಿ ಅಥವಾ ರೋಟಿ ಜೊತೆ ಸೇವಿಸಿದಾಗ ಅದರ ರುಚಿ ದುಪ್ಪಟ್ಟಾಗುತ್ತದೆ. ಆದರೆ, ಸಾಮಾನ್ಯ ಪುರಿಗೆ ಆರೋಗ್ಯಕರ ಮತ್ತು ಗರಿಗರಿಯಾದ ಹೊಸ ಸ್ಪರ್ಶ ನೀಡಲು, ಚಳಿಗಾಲದಲ್ಲಿ ಸುಲಭವಾಗಿ ಸಿಗುವ ತಾಜಾ ಮೆಂತ್ಯ ಸೊಪ್ಪು ಮತ್ತು ರವೆ (ಸೂಜಿ) ಬಳಸಿ ತಯಾರಿಸುವ 'ರವೆ ಮೆಂತ್ಯ ಪುರಿ' ಒಂದು ಉತ್ತಮ ಪರ್ಯಾಯ.

ಈ ವಿಶೇಷ ಪೂರಿ (Poori) ರುಚಿಯ ಜೊತೆಗೆ ಆರೋಗ್ಯಕ್ಕೂ ಉತ್ತಮ. ಮೆಂತ್ಯ ಸೊಪ್ಪಿನ ಪೌಷ್ಟಿಕಾಂಶಗಳು ಮತ್ತು ಸೂಜಿ ರವೆಯ ಗರಿಗರಿತನದಿಂದಾಗಿ, ಇದು ಉಪಾಹಾರಕ್ಕೆ, ಮಕ್ಕಳ ಟಿಫಿನ್‌ಗೆ ಅಥವಾ ದೀರ್ಘ ಪ್ರಯಾಣಕ್ಕೆ ಸೂಕ್ತವಾದ ಖಾದ್ಯ. ಇದನ್ನು ಸುಲಭವಾಗಿ ತಯಾರಿಸಬಹುದು ಹಾಗೂ ಹೆಚ್ಚು ಸಮಯ ಅಥವಾ ಸಾಮಗ್ರಿಗಳ ಅಗತ್ಯವಿರುವುದಿಲ್ಲ. ಹಾಗಿದ್ರೆ, ರವೆ ಮೆಂತ್ಯ ಪುರಿ (Suji-Methi Puri Recipe) ತಯಾರಿಸುವ ಸರಳ ವಿಧಾನವನ್ನು ತಿಳಿಯೋಣ ಬನ್ನಿ.

ರವೆ ಮೆಂತ್ಯ ಪುರಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ರವೆ (ಸೂಜಿ) - 1 ಕಪ್
• ಗೋಧಿ ಹಿಟ್ಟು - ಅರ್ಧ ಕಪ್
• ತಾಜಾ ಮೆಂತ್ಯದ ಸೊಪ್ಪು (ಸಣ್ಣಗೆ ಕತ್ತರಿಸಿದ್ದು) - ಅರ್ಧ ಕಪ್
• ಶುಂಠಿ ಪೇಸ್ಟ್ - ಅರ್ಧ ಚಮಚ
• ಹಸಿ ಮೆಣಸಿನಕಾಯಿ (ಕತ್ತರಿಸಿದ್ದು) - ಒಂದು
• ಕೆಂಪು ಮೆಣಸಿನ ಪುಡಿ - ಅರ್ಧ ಚಮಚ
• ಅರಿಶಿನ (ಹಳದಿ) - ಅರ್ಧ ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಅಡುಗೆ ಎಣ್ಣೆ (ಹಿಟ್ಟಿಗೆ) - ಎರಡು ಚಮಚ
• ನೀರು - ಅಗತ್ಯವಿರುವಷ್ಟು
• ಎಣ್ಣೆ (ಪುರಿ ಕರಿಯಲು) - ಬೇಕಾದಷ್ಟು

ರವೆ ಮೆಂತ್ಯ ಪುರಿ ತಯಾರಿಸುವ ಸುಲಭ ವಿಧಾನ

- ಮೊದಲಿಗೆ, ಒಂದು ಪಾತ್ರೆಯಲ್ಲಿ 1 ಕಪ್ ರವೆ, 1/2 ಕಪ್ ಗೋಧಿ ಹಿಟ್ಟು, ಸಣ್ಣಗೆ ಕತ್ತರಿಸಿದ 1/2 ಕಪ್ ಮೆಂತ್ಯ ಸೊಪ್ಪು, 1/2 ಚಮಚ ಶುಂಠಿ ಪೇಸ್ಟ್, 1 ಕತ್ತರಿಸಿದ ಹಸಿಮೆಣಸಿನಕಾಯಿ, 1/2 ಚಮಚ ಅರಿಶಿಣ, 1/2 ಚಮಚ ಕೆಂಪು ಮೆಣಸಿನ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಚೆನ್ನಾಗಿ ಬೆರೆಸಿ.

- ಗಟ್ಟಿಯಾದ ಹಿಟ್ಟು ಕಲಸಿ ನೆನೆಸಿ. ಈಗ ಮಿಶ್ರಣಕ್ಕೆ 2 ಚಮಚ ಅಡುಗೆ ಎಣ್ಣೆ ಸೇರಿಸಿ ಹಿಟ್ಟಿನೊಂದಿಗೆ ಸಂಪೂರ್ಣವಾಗಿ ಮಿಕ್ಸ್ ಮಾಡಿ.

- ನಂತರ, ಸ್ವಲ್ಪ ಸ್ವಲ್ಪ ನೀರನ್ನು ಸೇರಿಸುತ್ತಾ ಗಟ್ಟಿಯಾದ ಹಿಟ್ಟನ್ನು ಕಲಸಿ. ಪುರಿ ಹಿಟ್ಟು ಚಪಾತಿ ಹಿಟ್ಟಿಗಿಂತ ಗಟ್ಟಿಯಾಗಿರಬೇಕು.

- ಕಲಸಿದ ಹಿಟ್ಟನ್ನು 8 ರಿಂದ 10 ನಿಮಿಷ ಒದ್ದೆ ಬಟ್ಟೆಯಿಂದ ಮುಚ್ಚಿ ನೆನೆಯಲು ಬಿಡಿ.

- ಈಗ ಪುರಿ ಲಟ್ಟಿಸುವುದು. ನೆನೆದ ಹಿಟ್ಟನ್ನು ಮತ್ತೊಮ್ಮೆ ನಾದಿ ಸಣ್ಣ ಉಂಡೆಗಳನ್ನು (ಲೋಯಿ) ಮಾಡಿ.

- ಲಟ್ಟಣಿಗೆಯ ಸಹಾಯದಿಂದ ಇವುಗಳನ್ನು ದುಂಡಗೆ, ಸಮಾನ ಗಾತ್ರದಲ್ಲಿ ಲಟ್ಟಿಸಿಕೊಳ್ಳಿ. ತುಂಬಾ ತೆಳ್ಳಗೆ ಅಥವಾ ದಪ್ಪವಾಗಿಸಬೇಡಿ.

- ನಂತರ ಕಡಾಯಿಯಲ್ಲಿ ಎಣ್ಣೆ ಬಿಸಿ ಮಾಡಿ (ಹೊಗೆ ಬರುವಷ್ಟು ಬೇಡ). ಎಣ್ಣೆ ಸಾಕಷ್ಟು ಬಿಸಿಯಾದಾಗ, ಒಂದೊಂದಾಗಿ ಪುರಿ ಹಾಕಿ. ಸೌಟಿನಿಂದ ನಿಧಾನವಾಗಿ ಒತ್ತಿ.

- ಪುರಿ ಉಬ್ಬಿದಾಗ ತಿರುಗಿಸಿ ಎರಡೂ ಬದಿಯಲ್ಲಿ ಚಿನ್ನದ ಕಂದು ಬಣ್ಣ ಬರುವವರೆಗೆ, ಗರಿಗರಿಯಾಗುವವರೆಗೆ ಹುರಿಯಿರಿ. ಎಣ್ಣೆಯಿಂದ ತೆಗೆದು ಟಿಶ್ಯೂ ಪೇಪರ್ ಮೇಲೆ ಹಾಕಿ.

- ತಯಾರಾದ ಈ ಗರಂ ಗರಂ ರವೆ ಮೆಂತ್ಯ ಪುರಿಯನ್ನು (Suji Methi Puri) ನಿಮ್ಮ ನೆಚ್ಚಿನ ಆಲೂಗೆಡ್ಡೆ ಪಲ್ಯ ಅಥವಾ ಇತರೆ ಪಲ್ಯಗಳೊಂದಿಗೆ ಸವಿಯಿರಿ.

- ಈ ಸರಳ ವಿಧಾನ ಅನುಸರಿಸಿ, ರುಚಿ ಹಾಗೂ ಆರೋಗ್ಯದ ಸಮತೋಲನವಿರುವ ಗರಿಗರಿಯಾದ ಸೂಜಿ ಮೆಂತ್ಯ ಪುರಿಯನ್ನು ಸುಲಭವಾಗಿ ತಯಾರಿಸಬಹುದು. ಇದು ನಿಮ್ಮ ಭೋಜನದ ರುಚಿಯನ್ನು ದ್ವಿಗುಣಗೊಳಿಸುವುದು ಖಚಿತ.