ಬಿಸಿಲಿನಲ್ಲಿ ಎನರ್ಜಿ ಬೇಕೆ? ಬಾಡಿ ಕೂಲ್ ಮಾಡುವ ಈ ಮಾಲ್ಟ್ ಕುಡಿಯಿರಿ.. ಮಾಡೋದು ಹೇಗೆ?

ಬೇಸಿಗೆಯ ಬಿಸಿಲಿಗೆ ಎನರ್ಜಿ ಬೇಕೆ? ದೇಹಕ್ಕೆ ತಂಪು ನೀಡುವ ಪೌಷ್ಟಿಕಯುಕ್ತ ರಾಗಿ ಹಾಲು ಕುಡಿಯಿರಿ. ಇಲ್ಲಿದೆ ಸುಲಭ ರೆಸಿಪಿ. ಹೌದು, ಎಲ್ಲೆಡೆ ಬೇಸಿಗೆಯ ತಾಪಮಾನ ಏರಿದ್ದು, ದೇಹಕ್ಕೆ ತಂಪು ಹಾಗೂ ಶಕ್ತಿ ನೀಡುವ ಪಾನೀಯಗಳ ಅಗತ್ಯವಿದೆ. ಮಾರುಕಟ್ಟೆಯಲ್ಲಿ ಲಭ್ಯವಿರುವ ಕೃತಕ ಪಾನೀಯಗಳ ಬದಲಿಗೆ, ಮನೆಯಲ್ಲೇ ತಯಾರಿಸಬಹುದಾದ ಪೌಷ್ಟಿಕಾಂಶ ಭರಿತ ರಾಗಿ ಹಾಲು (Ragi Milk) ಅತ್ಯುತ್ತಮ ಆಯ್ಕೆಯಾಗಬಹುದು. ಇದನ್ನು ಸುಲಭವಾಗಿ ಮಾಡುವ ವಿಧಾನ ಇಲ್ಲಿದೆ.

ಬೇಸಿಗೆ ಕಾಲದಲ್ಲಿ ಮಿತಿಮೀರಿದ ಸೆಕೆ ಮತ್ತು ಬಿಸಿಲಿನಿಂದ ಹೊರಗೆ ಹೆಜ್ಜೆ ಇಡಲು ಹಿಂಜರಿಕೆ ಸಾಮಾನ್ಯ. ಬಿಸಿಲಿನ ತಾಪದಿಂದ ದೇಹದಿಂದ ಬೆವರಿನ ರೂಪದಲ್ಲಿ ನೀರು ಹೆಚ್ಚು ಖರ್ಚಾಗಿ ಬಸವಳಿಕೆಯಾಗಬಹುದು. ನಿರ್ಜಲೀಕರಣವನ್ನು (Dehydration) ತಡೆಯಲು ಕೇವಲ ನೀರು ಸಾಕಾಗುವುದಿಲ್ಲ. ದೇಹಕ್ಕೆ ಅಗತ್ಯವಿರುವ ಪೋಷಕಾಂಶಗಳನ್ನು ಒದಗಿಸುವ ಹಾಗೂ ದೇಹವನ್ನು ತಂಪಾಗಿರಿಸುವ ನೈಸರ್ಗಿಕ ಪಾನೀಯಗಳ ಸೇವನೆ ಅತಿ ಮುಖ್ಯ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಮಾರುಕಟ್ಟೆಯ ಕೃತಕ ಬಣ್ಣ ಮತ್ತು ಸಕ್ಕರೆ ತುಂಬಿದ ತಂಪು ಪಾನೀಯಗಳಿಗಿಂತ, ಮನೆಯಲ್ಲೇ ತಯಾರಿಸಿದ ನೈಸರ್ಗಿಕ ಪಾನೀಯಗಳು ಆರೋಗ್ಯಕ್ಕೆ ಸಂಜೀವಿನಿಯಂತೆ ಕೆಲಸ ಮಾಡುತ್ತವೆ. ಇಂತಹ ಪಾನೀಯಗಳಲ್ಲಿ ರಾಗಿ ಹಾಲು ಪ್ರಮುಖವಾದದ್ದು. ಇದು ಕರ್ನಾಟಕದ ಹೆಮ್ಮೆಯ ಧಾನ್ಯ. ಅಲ್ಲದೆ, ಪೋಷಕಾಂಶಗಳ ಆಗರವಾಗಿದೆ. ರಾಗಿಯಲ್ಲಿ ದೇಹದ ಉಷ್ಣಾಂಶವನ್ನು ಕಡಿಮೆ ಮಾಡಿ, ಆಂತರಿಕವಾಗಿ ತಂಪು ನೀಡುವ ವಿಶಿಷ್ಟ ಗುಣವಿದೆ. ರಾಗಿ ಹಾಲು ತಯಾರಿಸುವ ವಿಧಾನ (Ragi Milk Recipe) ಇಲ್ಲಿದೆ.

ರಾಗಿ ಹಾಲಿನ ಆರೋಗ್ಯ ಗುಣಗಳು

ರಾಗಿ ಹಾಲು ಹಲವು ಪೌಷ್ಟಿಕ ಗುಣಗಳನ್ನು ಹೊಂದಿದೆ. ಇದು ಕ್ಯಾಲ್ಸಿಯಂನ ಆಗರವಾಗಿ ಮೂಳೆಗಳನ್ನು ಬಲಪಡಿಸಿ, ಹಲ್ಲುಗಳ ಆರೋಗ್ಯಕ್ಕೆ ಸಹಕಾರಿ. ರಾಗಿಯಲ್ಲಿರುವ ನಾರಿನಂಶ ಮಧುಮೇಹವನ್ನು ನಿಯಂತ್ರಿಸಿ, ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಸಮತೋಲನದಲ್ಲಿಡಲು ನೆರವಾಗುತ್ತದೆ.

ಬೊಜ್ಜು ಕರಗಿಸುವ ಪ್ರಯತ್ನದಲ್ಲಿರುವವರಿಗೆ ಮತ್ತು ಹೆಚ್ಚು ಹೊತ್ತು ಹೊಟ್ಟೆ ತುಂಬಿದ ಭಾವನೆ ಬೇಕಿರುವವರಿಗೆ ರಾಗಿ ಹಾಲು ಉತ್ತಮ. ಬೇಸಿಗೆಯಲ್ಲಿ ತಕ್ಷಣದ ಶಕ್ತಿಗಾಗಿ, ಸುಸ್ತಾದಾಗ ಒಂದು ಗ್ಲಾಸ್ ರಾಗಿ ಹಾಲು ಸೇವಿಸಿದರೆ ದೇಹಕ್ಕೆ ಚೈತನ್ಯ ದೊರೆಯುತ್ತದೆ.

ರಾಗಿ ಹಾಲು ತಯಾರಿಸಲು ಬೇಕಾದ ಸಾಮಗ್ರಿಗಳು

• ರಾಗಿ ಹಿಟ್ಟು
• ಬೆಲ್ಲ
• ಉಪ್ಪು
• ಗೋಡಂಬಿ
• ಬಾದಾಮಿ
• ಏಲಕ್ಕಿ ಪುಡಿ
• ಕಾಯಿಸಿ ಆರಿಸಿದ ಹಾಲು

ರಾಗಿ ಹಾಲು ತಯಾರಿಸುವ ವಿಧಾನ

- ಮೊದಲಿಗೆ, ರಾಗಿ ಹಿಟ್ಟನ್ನು ಜರಡಿಯಿಂದ ಸೋಸಿಕೊಂಡು ಒಂದು ಪಾತ್ರೆಗೆ ಹಾಕಿ. ನಂತರ ಸ್ವಲ್ಪ ನೀರನ್ನು ಬೆರೆಸಿ, ಗಂಟುಗಳಿಲ್ಲದಂತೆ ನುಣುಪಾದ ಪೇಸ್ಟ್ ರೂಪಕ್ಕೆ ಕಲಸಿಟ್ಟುಕೊಳ್ಳಬೇಕು.

- ಒಂದು ಪಾತ್ರೆಯಲ್ಲಿ ಎರಡು ಕಪ್ ನೀರನ್ನು ಕುದಿಯಲು ಇರಿಸಿ. ನೀರು ಕುದಿಯಲು ಆರಂಭಿಸಿದಾಗ, ತಯಾರಿಸಿಟ್ಟುಕೊಂಡ ರಾಗಿ ಹಿಟ್ಟಿನ ಮಿಶ್ರಣವನ್ನು ನಿಧಾನವಾಗಿ ಸೇರಿಸಿ. ಸೌಟಿನಿಂದ ನಿರಂತರವಾಗಿ ಕೈಯಾಡಿಸುತ್ತಾ ಇರಿ ಇದರಿಂದ ಗಂಟುಗಳಾಗುವುದು ಅಥವಾ ತಳ ಹಿಡಿಯುವುದನ್ನು ತಪ್ಪಿಸಬಹುದು. ಹಿಟ್ಟು ಚೆನ್ನಾಗಿ ಬೆಂದು ಹೊಳಪು ಬಂದ ನಂತರ, ಜ್ವಾಲೆಯನ್ನು ಆರಿಸಿ ಸಂಪೂರ್ಣವಾಗಿ ತಣ್ಣಗಾಗಲು ಬಿಡಿ.

- ಮಿಕ್ಸಿ ಜಾರ್‌ಗೆ ಸಿಪ್ಪೆ ಸುಲಿದ ನೆನೆಸಿದ ಬಾದಾಮಿ ಹಾಗೂ ಗೋಡಂಬಿಯನ್ನು ಹಾಕಿ. ಇದಕ್ಕೆ ಈಗ ಸಂಪೂರ್ಣವಾಗಿ ತಣ್ಣಗಾದ ರಾಗಿ ಮಿಶ್ರಣವನ್ನು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ.

- ನಂತರ, ಈ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಬೆಲ್ಲ, ಒಂದು ಚಿಟಿಕೆ ಉಪ್ಪು ಮತ್ತು ಏಲಕ್ಕಿ ಪುಡಿಯನ್ನು ಸೇರಿಸಿ ಒಮ್ಮೆ ಚೆನ್ನಾಗಿ ಮಿಶ್ರಣ ಮಾಡಿ. ಚಿಟಿಕೆ ಉಪ್ಪು ಸೇರಿಸುವುದರಿಂದ ಪಾನೀಯದ ಸಿಹಿ ರುಚಿ ಹೆಚ್ಚುತ್ತದೆ.

- ಅಂತಿಮವಾಗಿ, ಕಾಯಿಸಿ ಆರಿಸಿದ ಒಂದು ಗ್ಲಾಸ್ ಹಾಲನ್ನು ಸೇರಿಸಿ ಒಂದೆರಡು ಸೆಕೆಂಡುಗಳ ಕಾಲ ಮಿಕ್ಸಿಯಲ್ಲಿ ತಿರುಗಿಸಿ. ಈಗ ಆರೋಗ್ಯಕರವಾದ ರಾಗಿ ಹಾಲು ಸಿದ್ಧವಾಗುತ್ತದೆ.

ಸವಿಯುವುದು ಹೇಗೆ?

ತಯಾರಾದ ರಾಗಿ ಹಾಲನ್ನು ಗಾಜಿನ ಲೋಟಕ್ಕೆ ಸುರಿದು, ಸಣ್ಣಗೆ ಹೆಚ್ಚಿದ ಬಾದಾಮಿ ಚೂರುಗಳನ್ನು ಮೇಲೆ ಅಲಂಕರಿಸಿ. ತಣ್ಣಗೆ ಸೇವಿಸಲು ಇಷ್ಟಪಡುವವರು ಫ್ರಿಜ್‌ನಲ್ಲಿಟ್ಟು ಕುಡಿಯಬಹುದು. ಅಥವಾ ತಕ್ಷಣವೇ ಬೇಕೆನಿಸಿದರೆ, ಕೆಲವು ಐಸ್ ಕ್ಯೂಬ್‌ಗಳನ್ನು ಸೇರಿಸಿಕೊಂಡು ಆನಂದಿಸಬಹುದು.

ಒಟ್ಟಾರೆ, ದಿನವಿಡೀ ಚೈತನ್ಯದಿಂದಿರಲು ಮತ್ತು ಬೇಸಿಗೆಯ ತಾಪದಿಂದ ದೇಹವನ್ನು ರಕ್ಷಿಸಿಕೊಳ್ಳಲು ರಾಗಿ ಹಾಲು ಅತ್ಯುತ್ತಮ ಮನೆಮದ್ದು. ಈ ರೆಸಿಪಿಯನ್ನು ಇಂದೇ ಪ್ರಯತ್ನಿಸಿ, ಉತ್ತಮ ಆರೋಗ್ಯ ನಿಮ್ಮದಾಗಿಸಿಕೊಳ್ಳಿ.