ಊಟದ ರುಚಿ ಹೆಚ್ಚಿಸುವ ಆಲೂ ರಾಯತ

Palya

oi-Staff

By * ನಿವೇದಿತಾ ಪ್ರಭಾಕರ್, ಬೆಂಗಳೂರು

Published: Tuesday, December 29, 2009, 12:40 [IST]

ಕೆಲವೊಂದು ತಿನ್ನುವ ಪದಾರ್ಥಗಳನ್ನು ಮಾಡುವುದು ಇಷ್ಟೇನಾ ಅಥವಾ ಇದೇನು ಮಹಾ ಅಂತ ಅಂದುಕೊಂಡರೂ ಊಟದ ರುಚಿಯನ್ನು ಹೆಚ್ಚಿಸುವ ಅವುಗಳ ಪಾತ್ರ ಕಡೆಗಣಿಸಲಾಗದು. ಊಟಕ್ಕೆ ಉಪ್ಪಿನಕಾಯಿ ಇದ್ದರೆ ಹೇಗೆ ರುಚಿಯೋ ಹಾಗೆಯೇ ಆಲೂ ರಾಯತ, ಮೈದಾಹಿಟ್ಟಿನ ರಾಯತ ಮುಂತಾದ ಸೈಡ್ ಡಿಶ್ ಗಳು ಎರಡು ತುತ್ತು ಜಾಸ್ತಿ ಹೊಟ್ಟೆಗಿಳಿಯುವಂತೆ ಮಾಡುತ್ತವೆ.

ಬಿಸಿಬಿಸಿ ತುಪ್ಪ ಅನ್ನದೊಡನೆ ಕಲಿಸಿ ತಿನ್ನಬಹುದಾದ ಆಲೂ ರಾಯತ ಮಾಡುವುದು ಹೇಗೆಂದು ತಿಳಿದುಕೊಳ್ಳೋಣ.

ಬೇಕಾದ ಪದಾರ್ಥಗಳು

ಆಲೂಗಡ್ಡೆ ಎರಡು
ಮೊಸರು ಎರಡು ಬಟ್ಟಲು
ಕೊತ್ತಂಬರಿ
ಒಗ್ಗರಣೆಗೆ ನಾಲ್ಕು ಚಮಚ ಎಣ್ಣೆ, ಹಸಿಮೆಣಸಿನಕಾಯಿ, ಜೀರಿಗೆ, ಐದು ಎಸಳು ಕರಿಬೇವು, ಇಂಗು
ರುಚಿಗೆ ಉಪ್ಪು

ತಯಾರಿಸುವ ವಿಧಾನ

ಆಲೂಗಡ್ಡೆಯನ್ನು ಕುಕ್ಕರಿನಲ್ಲಿಟ್ಟು ಚೆನ್ನಾಗಿ ಬೇಯಿಸಿಕೊಳ್ಳಿ. ಸ್ವಲ್ಪ ಆರಿದ ನಂತರ ಅದರ ಸಿಪ್ಪೆಯನ್ನು ಸುಲಿದು ಪುಡಿಪುಡಿ ಮಾಡಿಟ್ಟುಕೊಳ್ಳಿ. ಪೂರ್ತಿ ಆರಲು ಒಂದು ತಟ್ಟೆಯಲ್ಲಿ ಹರಿವಿಡಿ. ಅದಕ್ಕೆ ಮೊಸರು, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಬೆರೆಸಿ. ನಂತರ ಒಗ್ಗರಣೆಯನ್ನು ತಯಾರಿಸಿ ಆಲೂ ಮೊಸರಿನ ಮಿಶ್ರಣದ ಮೇಲೆ ಹಾಕಿ ಮತ್ತೊಮ್ಮೆ ಕೈಯಾಡಿಸಿ.

ಅಷ್ಟೇ ಆಲೂ ರಾಯತ ತಯಾರ್. ಮೇಲೆ ತಿಳಿಸಿದಂತೆ ಬಿಸಿಬಿಸಿ ಅನ್ನಕ್ಕೆ ಎರಡು ಚಮಚ ತುಪ್ಪ ಸುರಿದು ಸಾರು ಅನ್ನ ಉಣ್ಣುವ ಮೊದಲು ಆಲೂ ರಾಯತದಿಂದ ಕಲಿಸಿ ಹೊಟ್ಟೆಗಿಳಿಸಿ ನೋಡಿ. ಜೊತೆಗೊಂದಿಷ್ಟು ಮಾವಿನಕಾಯಿ ಉಪ್ಪಿನಕಾಯಿ ಇದ್ದರಂತೂ ಕೇಳುವುದೇ ಬೇಡ.