ಕರಿಬೇವು ಸೊಪ್ಪಿನ ಚಟ್ನಿಪುಡಿ.. ಆಹಾ!

* ಕರುಣಾ, ಮಣಿಪಾಲ.

ಬೇಕಾಗುವ ಪದಾರ್ಥಗಳು

ಬಲಿತ ಕರಿಬೇವಿನ ಸೊಪ್ಪು - 3 ಹಿಡಿ
ಉದ್ದಿನಬೇಳೆ - 150 ಗ್ರಾಂ
ಕಡಲೆಬೇಳೆ - 200 ಗ್ರಾಂ
ಒಣ ಕೊಬ್ಬರಿ - 150 ಗ್ರಾಂ
ಒಣಮೆಣಸಿನಕಾಯಿ - 75 ಗ್ರಾಂ
ತುಪ್ಪ - 2 ಟೀ ಚಮಚ
ಉಪ್ಪು - ರುಚಿಗೆ ಸಮನಾದಷ್ಟು
ಇಂಗು - ಚಿಟಿಕೆ
ಹುಣಿಸೇಹಣ್ಣು - ಎರಡು ತೊಲೆ
ಬೆಲ್ಲ - ಸಣ್ಣ ಉಂಡೆ ಗಾತ್ರದ್ದು

ವಿಧಾನ : ಒಳ್ಳೆ ಗರಿಗರಿ ಬ್ಯಾಡಗಿ ಒಣಮೆಣಸಿನಕಾಯಿ, ಕಡಲೆಬೇಳೆ, ಉದ್ದಿನಬೇಳೆಯನ್ನು ಬೇರೆಬೇರೆಯಾಗಿ ಹುರಿದಿಟ್ಟುಕೊಳ್ಳಬೇಕು. ಚೆನ್ನಾಗಿ ಬಲಿತ ಕರಿಬೇವಿನ ಸೊಪ್ಪನ್ನು ತೊಳೆದು ಒಣಗಿಸಿದ ನಂತರ ಕಾದ ತವಕ್ಕೆ ತುಪ್ಪ ಹಾಕಿ ಸೊಪ್ಪನ್ನು ಸುರಿದು ಬಾಡಿಸಿಬೇಕು. ಸೊಪ್ಪು ಸೀಯಬಾರದು ಎಚ್ಚರ. ಆನಂತರ ಇವಿಷ್ಟಕ್ಕೂ ಹುಣಿಸೇಹಣ್ಣು, ಉಪ್ಪು, ಒಣ ಕೊಬ್ಬರಿ ತುರಿ, ಬೆಲ್ಲ ಸೇರಿಸಿ ಮಿಕ್ಸಿಗೆ ಹಾಕಿ ಪುಡಿಪುಡಿ ಮಾಡಬೇಕು. ಪುಡಿ ತೀರಾ ನುಣ್ಣಗೆ ಆಗಬಾರದು. ಸ್ಪಲ್ಪ ತರಿತರಿ ಇರಲಿ.

ಆಮೇಲೆ, ಪ್ರತ್ಯೇಕವಾಗಿ ತುಪ್ಪ ಸಾಸಿವೆ ಬ್ಯಾಡಗಿ ಮೆಣಸಿನಕಾಯಿ ಒಗ್ಗರಣೆ ಮಾಡಿಕೊಂಡು ಪುಡಿಗೆ ಬೆರೆಸಿರಿ. ಶ್ರದ್ಧೆಯಿಂದಲೂ, ಒಳ್ಳೆ ಪದಾರ್ಥಗಳಿಂದಲೂ ತಯಾರಿಸಿದ ಕರಿಬೇವಿನ ಚಟ್ನಿಪುಡಿ ಊಟದ ಜತೆ, ತಿಂಡಿಯ ಜತೆ ನೆಂಚಲು ಚೆನ್ನಾಗಿರತ್ತೆ ಮಾತ್ರವಲ್ಲ, ನಾಲಗೆ ಕೆಟ್ಟಿದೆ ಎನ್ನುವವರು ಒಂದು ಚಮಚ ಹಾಗೆ ಬಾಯಿಗೆ ಹಾಕಿಕೊಂಡರೆ ನವನವೋನ್ಮೇಷಶಾಲಿನಿ ಆಗಿರುತ್ತದೆ.