ಕಡಿಮೆ ಎಣ್ಣೆ.. 5 ನಿಮಿಷದಲ್ಲಿ ಓಟ್ಸ್ ಪೋಹಾ ಮಾಡಿ! ಹೆಲ್ದಿ ಬ್ರೇಕ್‌ಫಾಸ್ಟ್‌.. ತೂಕವೂ ಇಳಿಯುತ್ತೆ

5 ನಿಮಿಷದಲ್ಲಿ ಓಟ್ಸ್ ಪೋಹಾ ಮಾಡಿ! ತೂಕ ಇಳಿಸಲು ಹಾಗೂ ಹೆಲ್ದಿ ಬ್ರೇಕ್‌ಫಾಸ್ಟ್‌ಗೆ ಇದು ಬೆಸ್ಟ್ ರೆಸಿಪಿ. ಹೌದು, ಪ್ರಸ್ತುತ ಜೀವನಶೈಲಿಯಲ್ಲಿ ಜನರು ಆರೋಗ್ಯಕರ ಮತ್ತು ಹಗುರವಾದ ಆಹಾರವನ್ನು ಹೆಚ್ಚು ಇಷ್ಟಪಡುತ್ತಿದ್ದಾರೆ. ವಿಶೇಷವಾಗಿ ಹೆಚ್ಚು ಹೊತ್ತು ಕುಳಿತು ಕೆಲಸ ಮಾಡುವ 'ಡೆಸ್ಕ್ ಜಾಬ್' ಉದ್ಯೋಗಿಗಳಿಗೆ, ಸರಿಯಾದ ಜೀರ್ಣಕ್ರಿಯೆಗೆ ಪೌಷ್ಟಿಕಾಂಶ ಭರಿತ ಲಘು ಆಹಾರಗಳು ಅತ್ಯಗತ್ಯ. ಈ ಬೇಡಿಕೆಗಳನ್ನು ಸಂಪೂರ್ಣವಾಗಿ ಪೂರೈಸುವ ಒಂದು ಉತ್ತಮ ಆಯ್ಕೆ ಎಂದರೆ 'ಓಟ್ಸ್ ಪೋಹಾ'.

ಅವಲಕ್ಕಿ ಮತ್ತು ಓಟ್ಸ್‌ ಆರೋಗ್ಯಕರ ಗುಣಗಳನ್ನು ಮೇಳೈಸುವ ಈ ಖಾದ್ಯ, ತಯಾರಿಸಲು ಅತ್ಯಂತ ಸುಲಭ. ಇದು ರುಚಿಕರವಾಗಿರುವುದಲ್ಲದೆ ಆರೋಗ್ಯಕ್ಕೆ ಹಲವಾರು ಪ್ರಯೋಜನಗಳನ್ನು ನೀಡುತ್ತದೆ. ಕೇವಲ ಕೆಲವೇ ನಿಮಿಷಗಳಲ್ಲಿ ಇದನ್ನು ಸಿದ್ಧಪಡಿಸಬಹುದು, ಇದು ಇಂದಿನ ವೇಗದ ಜೀವನಶೈಲಿಗೆ ಸೂಕ್ತವಾದ ಉಪಾಹಾರವಾಗಿದೆ.

ಓಟ್ಸ್ ಪೋಹಾ ಏಕೆ ಆರೋಗ್ಯಕರ?

ಸಾಮಾನ್ಯ ಅವಲಕ್ಕಿ (Poha) ಉತ್ತಮ ಕಾರ್ಬೋಹೈಡ್ರೇಟ್ ಮೂಲವಾಗಿದ್ದರೂ, ಓಟ್ಸ್ (Oats) ಅದಕ್ಕಿಂತ ಹೆಚ್ಚು ಫೈಬರ್ (ನಾರಿನಾಂಶ) ಮತ್ತು ಬೀಟಾ-ಗ್ಲುಕಾನ್ ಅಂಶಗಳನ್ನು ಹೊಂದಿರುತ್ತದೆ. ಇವು ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸಲು ಮತ್ತು ಕೊಲೆಸ್ಟ್ರಾಲ್ ಕಡಿಮೆ ಮಾಡಲು ನೆರವಾಗುತ್ತವೆ. ಈ ಮೂಲಕ ಹೃದಯದ ಆರೋಗ್ಯಕ್ಕೂ ಓಟ್ಸ್ ಪೋಹಾ (Oats Poha) ಉತ್ತಮವಾಗಿದೆ.

ಇದನ್ನು ತಯಾರಿಸುವಾಗ ವಿವಿಧ ತರಕಾರಿಗಳನ್ನು ಬಳಸುವುದರಿಂದ, ದೇಹಕ್ಕೆ ಅಗತ್ಯವಾದ ವಿಟಮಿನ್‌ಗಳು, ಖನಿಜಗಳು ಮತ್ತು ಆಂಟಿಆಕ್ಸಿಡೆಂಟ್‌ಗಳು ದೊರೆಯುತ್ತವೆ. ಇದು ಜೀರ್ಣಕ್ರಿಯೆಯನ್ನು ಸುಧಾರಿಸಿ, ಮಲಬದ್ಧತೆಯಂತಹ ಸಮಸ್ಯೆಗಳನ್ನು ನಿವಾರಿಸುತ್ತದೆ. ತೂಕ ಇಳಿಸುವ ಗುರಿ ಹೊಂದಿರುವವರಿಗೆ ಅಥವಾ ನಿಯಂತ್ರಿತ ಆಹಾರಕ್ರಮವನ್ನು ಅನುಸರಿಸುವವರಿಗೆ ಇದು (Oats Poha Recipe) ಅತ್ಯುತ್ತಮ ಮತ್ತು ಪೂರ್ಣ ಪ್ರಮಾಣದ ಆಹಾರವಾಗಿದೆ.

ಓಟ್ಸ್ ಪೋಹಾ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಓಟ್ಸ್ - 1 1/2 ಕಪ್
• ಮಿಶ್ರ ತರಕಾರಿಗಳು - 1 ರಿಂದ 1 1/2 ಕಪ್
(ಈರುಳ್ಳಿ, ಕ್ಯಾರೆಟ್, ಬಟಾಣಿ, ಇತ್ಯಾದಿ)
• ಕೊತ್ತಂಬರಿ ಸೊಪ್ಪು - ಸ್ವಲ್ಪ
• ಇಂಗು - ಒಂದು ಚಿಟಿಕೆ
• ಸಾಸಿವೆ - 1/2 ಚಮಚ
• ಕರಿಬೇವಿನ ಎಲೆಗಳು - 6 ಎಲೆಗಳು
• ಹಸಿಮೆಣಸು - 3
• ನಿಂಬೆಹಣ್ಣು - 1
• ಉಪ್ಪು
• ಅರಿಶಿನ
• ಎಣ್ಣೆ - ಒಗ್ಗರಣೆಗೆ ಬೇಕಾಗುವಷ್ಟು

ಓಟ್ಸ್ ಪೋಹಾ ತಯಾರಿಸುವ ಸರಳ ವಿಧಾನ

ಈ ರುಚಿಕರ ಪೋಹಾವನ್ನು ಈ ಕೆಳಗಿನ ಸರಳ ಹಂತಗಳಲ್ಲಿ ವೇಗವಾಗಿ ತಯಾರಿಸಬಹುದು.

- ಮೊದಲು ಒಂದು ದೊಡ್ಡ ಪಾತ್ರೆಗೆ ಓಟ್ಸ್ ಹಾಕಿ, ಒಮ್ಮೆ ನೀರಿ ನಿಂದ ತೊಳೆದು ಸಂಪೂರ್ಣವಾಗಿ ನೀರು ಬಸಿಯಿರಿ.

- ನೀರು ಹೋದ ನಂತರ, ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಅರಿಶಿನ, ಸಣ್ಣಗೆ ಕತ್ತರಿಸಿದ ಹಸಿಮೆಣಸು ಮತ್ತು ನಿಂಬೆ ರಸ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದು ಮಸಾಲೆ ಓಟ್ಸ್ ಮಿಶ್ರಣವಾಗಿ ಸಿದ್ಧವಾಗುತ್ತದೆ.

- ಒಗ್ಗರಣೆ ಮತ್ತು ತರಕಾರಿಗಳನ್ನು ಬೇಯಿಸಿ. ಬಾಣಲೆಯಲ್ಲಿ ಕಡಿಮೆ ಎಣ್ಣೆ ಬಿಸಿ ಮಾಡಿ. ಬಿಸಿಯಾದ ಕೂಡಲೇ ಇಂಗು, ಸಾಸಿವೆ ಹಾಕಿ ಸಿಡಿಯಲು ಬಿಡಿ.

- ನಂತರ ಕರಿಬೇವಿನ ಎಲೆಗಳು ಮತ್ತು ಹೆಚ್ಚಿದ ತರಕಾರಿ ಸೇರಿಸಿ. ತರಕಾರಿಗಳು ಬೇಗ ಬೇಯಲು ಆಗಾಗ ನೀರು ಚಿಮುಕಿಸಿ. ಸುಮಾರು 2 ನಿಮಿಷಗಳ ಕಾಲ ಮುಚ್ಚಳ ಹಾಕಿ ಬೇಯಿಸಿ.

- ತರಕಾರಿಗಳು ಮೃದುವಾದಾಗ, ತಯಾರಿಸಿಟ್ಟ ಮಸಾಲೆ ಓಟ್ಸ್ ಮಿಶ್ರಣವನ್ನು ಒಗ್ಗರಣೆಗೆ ಸೇರಿಸಿ. ಉರಿ ಕಡಿಮೆ ಮಾಡಿ, ಎಲ್ಲವನ್ನೂ ಚೆನ್ನಾಗಿ ಮಿಕ್ಸ್ ಮಾಡಿ.

- ಓಟ್ಸ್ ಮೃದುವಾಗುವವರೆಗೆ ಕೆಲವು ನಿಮಿಷ ಬೇಯಿಸಿ, ಗ್ಯಾಸ್ ಆಫ್ ಮಾಡಿ. ಬಿಸಿಬಿಸಿಯಾದ ಓಟ್ಸ್ ಪೋಹಾವನ್ನು ತಟ್ಟೆಗೆ ತೆಗೆದುಕೊಂಡು, ಕೊತ್ತಂಬರಿ ಸೊಪ್ಪು ಮತ್ತು ನಿಂಬೆ ರಸದೊಂದಿಗೆ ಬಡಿಸಿ.

ಈ ಓಟ್ಸ್ ಪೋಹಾ ಕೇವಲ ರುಚಿಕರವಷ್ಟೇ ಅಲ್ಲದೆ, ನಿಮ್ಮ ದಿನವನ್ನು ಶಕ್ತಿ ಮತ್ತು ಆರೋಗ್ಯದಿಂದ ಆರಂಭಿಸಲು ಸಹಾಯ ಮಾಡುವ ಸಂಪೂರ್ಣ ಉಪಾಹಾರ. ಇದನ್ನು ಸುಲಭವಾಗಿ ಮತ್ತು ವೇಗವಾಗಿ ತಯಾರಿಸಿ ನಿಮ್ಮ ಕುಟುಂಬದೊಂದಿಗೆ ಸವಿಯಿರಿ, ಆರೋಗ್ಯಕರ ಜೀವನಕ್ಕೆ ಹೆಜ್ಜೆ ಹಾಕಿ.