ಕಾಯಿ ಟೊಮೆಟೋ ಚಟ್ನಿ ಹೀಗೆ ಮಾಡಿ..! ತಿಂಗಳ ಕಾಲ ಇಟ್ಟರೂ ಹಾಳಾಗಲ್ಲ..!

ನೀವು ನಿತ್ಯ ಬೆಳಗ್ಗೆ ತಿಂಡಿಗೆ ಒಂದಲ್ಲಾ ಒಂದು ಚಟ್ನಿ, ಪಲ್ಯ ಮಾಡಿ ಬೇಸರ ಬಂದಿರಬಹುದು. ಏಕೆಂದರೆ ತಿಂಡಿಯ ಜೊತೆಗೆ ಯಾವುದಾದರೊಂದು ಚಟ್ನಿ ಅಥವಾ ಪಲ್ಯ ಮಾಡಿದ್ದರೇನೆ ಆ ದಿನದ ತಿಂಡಿಗೆ ರುಚಿ ಬರುತ್ತೆ. ಹಾಗೆ ಎಲ್ಲರಿಗೂ ಬ್ರೇಕ್‌ಫಾಸ್ಟ್‌ಗೆ ಒಂದು ಖಾದ್ಯ ಇರಲೇಬೇಕು. ಹಾಗೆ ಕೆಲವು ದಿನಗಳ ಕಾಲ ಬ್ರೇಕ್‌ಫಾಸ್ಟ್ ಜೊತೆಗೆ ಸವಿಯಲು ಒಂದು ಖಾದ್ಯ ಬೇಕು ಎನಿಸಿರುತ್ತದೆ.

ಹೀಗಾಗಿ ಇದಕ್ಕೆ ಪೂರಕ ಎನ್ನುವಂತೆ ನಾವಿಂದು ಹಸಿ ಟೊಮೆಟೋದಿಂದ ಮಾಡುವಂತಹ ಅದ್ಭುತ ರುಚಿ ಚಟ್ನಿ ಕುರಿತು ತಿಳಿದುಕೊಳ್ಳೋಣ. ಕಾಯಿ ಟೊಮೆಟೋ ಬಹಳ ಹುಳಿಯಾಗಿರುತ್ತೆ. ಹೀಗಾಗಿ ಇದರ ಖಾದ್ಯ ಮಾಡುವಾಗ ಬಹಳ ಎಚ್ಚರಿಕೆ ಇಡಬೇಕು. ಸರಿಯಾದ ಪ್ರಮಾಣದ ವಸ್ತುಗಳ ಹಾಕಿ ಮಾಡಬೇಕಾಗುತ್ತದೆ. ಆದ್ರೆ ಈ ಚಟ್ನಿಯನ್ನು ನೀವು ಎಷ್ಟು ದಿನಗಳ ವರೆಗೆ ಬೇಕಾದರೂ ಇಟ್ಟು ಸವಿಯಬಹುದು. ಬಹುಬೇಗ ಇದು ಹಾಳಾಗುವುದಿಲ್ಲ.

ಈ ಕಾಯಿ ಟೊಮೆಟೋ ಚಟ್ನಿಯನ್ನು ನೀವು ಚಪಾತಿ, ದೋಸೆ, ಇಡ್ಲಿ ಹಾಗೆ ಊಟದ ಜೊತೆಗೂ ಸವಿಯಬಹುದು, ಅಷ್ಟೊಂದು ರುಚಿಕರವಾಗಿರುತ್ತೆ. ಹಾಗಾದ್ರೆ ಈ ಕಾಯಿ ಟೊಮೆಟೋ ಚಟ್ನಿ ಮಾಡೋದು ಹೇಗೆ? ಇದಕ್ಕೆ ಯಾವೆಲ್ಲಾ ಪದಾರ್ಥಗಳ ಹಾಕಬೇಕು? ಮಾಡುವ ವಿಧಾನವೇನು?, ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಕಾಯಿ ಟೊಮೆಟೋ ಚಟ್ನಿ ಮಾಡಲು ಬೇಕಾಗುವ ವಸ್ತುಗಳು

• ಕಾಯಿ ಟೊಮೇಟೊ
• ಜೀರಿಗೆ
• ಸಾಸಿವೆ
• ಹಸಿ ಮೆಣಸು
• ಒಣ ಮೆಣಸು
• ಬೆಳ್ಳುಳ್ಳಿ
• ಕರಿಬೇವು
• ಈರುಳ್ಳಿ
• ಎಣ್ಣೆ
• ಅರಿಶಿನ ಪುಡಿ
• ಕೊತ್ತಂಬರಿ ಸೊಪ್ಪು
• ಬೆಲ್ಲ
• ಉಪ್ಪು

ಕಾಯಿ ಟೊಮೆಟೋ ಚಟ್ನಿ ಮಾಡುವ ವಿಧಾನವೇನು?

ಮೊದಲು ಬಾಣಲೆ ಒಲೆ ಮೇಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿಕೊಂಡು ಎಣ್ಣೆ ಕಾದ ಬಳಿಕ ಇದಕ್ಕೆ ಸಾಸಿವೆ, ಜೀರಿಗೆ ಹಾಕಿಕೊಳ್ಳಿ. ನಂತರ ಇದಕ್ಕೆ ಹಸಿ ಮೆಣಸು, ಬೆಳ್ಳುಳ್ಳಿ, ಕರಿಬೇವು ಒಂದಾದ ಮೇಲೆ ಒಂದು ಹಾಕಿ ಫ್ರೈ ಮಾಡಿ. ಈಗ ಇದಕ್ಕೆ ಸಣ್ಣದಾಗಿ ಹೆಚ್ಚಿಕೊಂಡ ಈರುಳ್ಳಿ ಸಹ ಹಾಕಿ 1 ನಿಮಿಷ ಫ್ರೈ ಮಾಡಿಕೊಳ್ಳಿ.

ಈಗ 4 ಕಾಯಿ ಟೊಮೆಟೋ ವನ್ನ 1ರಲ್ಲಿ 4 ಭಾಗ ಮಾಡಿ ಕತ್ತರಿಸಿಕೊಂಡು ಇದಕ್ಕೆ ಹಾಕಿಕೊಂಡು ಫ್ರೈ ಮಾಡಿಕೊಳ್ಳಿ. ಹಾಗೆ ಇದಕ್ಕೆ ಕೊತ್ತಂಬರಿ ಸೊಪ್ಪು ಕೂಡ ಹಾಕಿಕೊಂಡು ಫ್ರೈ ಮಾಡಿ. 2 ನಿಮಿಷ ಫ್ರೈ ಮಾಡಿದ ಬಳಿಕ ಒಲೆ ಆಫ್ ಮಾಡಿಕೊಳ್ಳಿ. ನಂತರ ಈ ಮಸಾಲೆಗಳು ತಣ್ಣಗಾಗಲು ಬಿಡಿ. ಈ ಮಸಾಲೆಗಳು ತಣ್ಣಗಾದ ಬಳಿಕ ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ಈ ಎಲ್ಲಾ ಪದಾರ್ಥಗಳ ಹಾಕಿಕೊಳ್ಳಿ.

ನಂತರ ನೀರು ಹಾಕಿಕೊಳ್ಳದೆ ಈ ಎಲ್ಲಾ ಮಸಾಲೆಗಳನ್ನು ರುಬ್ಬಿಕೊಳ್ಳಿ. ನುಣ್ಣಗೆ ಅಲ್ಲದೆ ತರಿತರಿಯಾಗಿ ಎಲ್ಲಾ ವಸ್ತುಗಳನ್ನು ಒಂದೇ ಬಾರಿಗೆ ಹಾಕಿ ರುಬ್ಬಿಕೊಳ್ಳಿ ರುಬ್ಬುವಾಗ ರುಚಿಗೆ ತಕ್ಕಷ್ಟು ಉಪ್ಪು ಕೂಡ ಹಾಕಿಕೊಳ್ಳಿ. ಹಾಗೆ ಇದಕ್ಕೆ ಬೆಲ್ಲದ ಪುಡಿ ಕೂಡ ಹಾಕಿ ರುಬ್ಬಿಕೊಳ್ಳಿ. ನಂತರ ಇದನ್ನು ತೆಗೆದು ಒಂದು ಬೌಲ್‌ಗೆ ಹಾಕಿಟ್ಟುಕೊಳ್ಳಿ.

ಈಗ ಒಂದು ಬಾಣಲೆಗೆ ಮತ್ತೆ ಎಣ್ಣೆ ಹಾಕಿ ಅದಕ್ಕೆ ಜೀರಿಗೆ, ಸಾಸಿವೆ, ಒಣಮೆಣಸು ಹಾಕಿ ಫ್ರೈ ಮಾಡಿ. ನಂತರ ಕರಿಬೇವು ಹಾಕಿಕೊಂಡು ಈಗ ಬೌಲ್‌ನಲ್ಲಿರುವ ಚಟ್ನಿಯನ್ನು ಒಗ್ಗರಣೆ ಇರುವ ಬಾಣೆಲೆಗೆ ಹಾಕಿಕೊಂಡು ಮಿಕ್ಸ್ ಮಾಡಿ ಹಾಗೆ ಬಿಡಿ. 1 ನಿಮಿಷದ ಬಳಿಕ ಒಲೆ ಆಫ್ ಮಾಡಿಕೊಂಡರೆ ನಿಮ್ಮ ಮುಂದೆ ಕಾಯಿ ಟಮೆಟೋ ಚಟ್ನಿ ರೆಡಿಯಾಗುತ್ತೆ. ಇದರ ರುಚಿ ನೀವು ಕೂಡ ಸವಿದು ನೋಡಿ.