ನವಾಬಿ ಶೈಲಿಯ ರಾಜವೈಭೋಗದ ಅಡುಗೆ! ಈ ರೀತಿ ಮಾಡಿ ಅವಧಿ ಕೋಫ್ತಾ ಪುಲಾವ್.. ಎಲ್ಲರೂ ಫಿದಾ ಆಗ್ತಾರೆ!

ನವಾಬಿ ಶೈಲಿಯ ರಾಜವೈಭೋಗದ ಅಡುಗೆ! ಮನೆಯಲ್ಲೇ ಮಾಡಿ ಘಮಘಮಿಸುವ 'ಅವಧಿ ಕೋಫ್ತಾ ಪುಲಾವ್' (Awadhi Kofta Pulao). ಎಲ್ಲರೂ ನಿಮ್ಮ ಅಡುಗೆಗೆ ಫಿದಾ ಆಗ್ತಾರೆ. ಹೌದು, ಅವಧಿ ಶೈಲಿಯ ಖಾದ್ಯಗಳು ವಿಶಿಷ್ಟ ಸ್ಥಾನಮಾನ ಹೊಂದಿವೆ. ಅದರಲ್ಲೂ, ಲಖನೌನ ಸಾಂಪ್ರದಾಯಿಕ ಅಡುಗೆಯಾದ 'ಅವಧಿ ಕೋಫ್ತಾ ಪುಲಾವ್' ತನ್ನ ಅದ್ಭುತ ರುಚಿಯಿಂದ ಜಾಗತಿಕವಾಗಿ ಜನಪ್ರಿಯವಾಗಿದೆ. ಅವಧಿ ಕೋಫ್ತಾ ಪುಲಾವ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ ವಿಧಾನ ಇಲ್ಲಿದೆ.

ಮಸಾಲೆ ಭರಿತ ಕೋಫ್ತಾಗಳು ಮತ್ತು ಸುವಾಸನೆಯುಕ್ತ ಬಾಸುಮತಿ ಅಕ್ಕಿಯ ಮಿಶ್ರಣವು ಪ್ರತಿ ತುತ್ತಿನಲ್ಲಿ ರಾಜಮನೆತನದ ಭೋಜನದ ಅನುಭವವನ್ನು ನೀಡುತ್ತದೆ. ಸಾಮಾನ್ಯವಾಗಿ ಹಬ್ಬಗಳು ಅಥವಾ ವಿಶೇಷ ಸಂದರ್ಭಗಳಲ್ಲಿ ತಯಾರಿಸುವ ಈ ಖಾದ್ಯದ ಘಮಲು ಇಡೀ ಮನೆಯನ್ನು ಆವರಿಸುತ್ತದೆ. ಈ ರುಚಿಕರ ಮತ್ತು ನವಾಬಿ ಸ್ವಾದದ ಅವಧಿ ಕೋಫ್ತಾ ಪುಲಾವ್ ಅನ್ನು ಮನೆಯಲ್ಲಿಯೇ ತಯಾರಿಸಲು ಸುಲಭವಾದ ವಿಧಾನ (Awadhi Kofta Pulao Recipe) ಇಲ್ಲಿದೆ. ಈ ಪದ್ಧತಿಯನ್ನು ಅನುಸರಿಸಿ, ನೀವು ರಾಯಲ್ ಊಟದ ಅನುಭವ ಪಡೆಯಬಹುದು.

Photo Credit: ಸಂಗ್ರಹ ಚಿತ್ರ

ಅವಧಿ ಕೋಫ್ತಾ ಪುಲಾವ್‌ಗೆ ಬೇಕಾಗುವ ಸಾಮಗ್ರಿಗಳು

• ಬಾಸುಮತಿ ಅಕ್ಕಿ
• ಮಟನ್ ಅಥವಾ ಲ್ಯಾಂಬ್ ಕೀಮಾ
• ಕಡಲೆಹಿಟ್ಟು (ಬೇಸನ್)
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್
• ದಾಲ್ಚಿನ್ನಿ
• ಏಲಕ್ಕಿ (ಹಸಿ)
• ಕೆಂಪು ಮೆಣಸಿನ ಪುಡಿ
• ಕೇಸರಿ
• ಗುಲಾಬಿ ನೀರು
• ಈರುಳ್ಳಿ
• ಹಾಲು
• ತುಪ್ಪ
• ರುಚಿಗೆ ತಕ್ಕಷ್ಟು ಉಪ್ಪು

ಕೋಫ್ತಾ ಪುಲಾವ್ ತಯಾರಿಸುವ ವಿಧಾನ

- ಮೊದಲು ಚಕ್ಕೆ ಮತ್ತು ಏಲಕ್ಕಿಯನ್ನು ನಯವಾಗಿ ಪುಡಿಮಾಡಿರಿ. ಇದಾದ ನಂತರ, ಶುಂಠಿ ಮತ್ತು ಬೆಳ್ಳುಳ್ಳಿಯನ್ನು ಸೇರಿಸಿ ಪೇಸ್ಟ್‌ ಮಾಡಿಕೊಳ್ಳಿ. ಮಧ್ಯಮ ಅಳತೆಯ 2 ಈರುಳ್ಳಿಯನ್ನು ಒರಟಾಗಿ ಪೇಸ್ಟ್‌ ಮಾಡಿ, ಹಾಗೆಯೇ ಉಳಿದ 3 ಈರುಳ್ಳಿಯನ್ನು ತೆಳುವಾಗಿ ಕತ್ತರಿಸಿಕೊಳ್ಳಿ.

- ಈಗ ಒಂದು ದೊಡ್ಡ ಕಡಾಯಿಯಲ್ಲಿ ತುಪ್ಪವನ್ನು ಬಿಸಿ ಮಾಡಿ, ತೆಳುವಾಗಿ ಹೆಚ್ಚಿದ ಈರುಳ್ಳಿಯನ್ನು ಕಂದು ಬಣ್ಣ ಬರುವವರೆಗೆ ಹುರಿದು, ತೆಗೆದಿಡಿ.

- ನಂತರ, ಕೀಮಾಗೆ ಅರ್ಧದಷ್ಟು ಪುಡಿಮಾಡಿದ ಚಕ್ಕೆ-ಏಲಕ್ಕಿ ಪುಡಿ, ಹುರಿದ ಕಡಲೆಹಿಟ್ಟು, 1 ಚಮಚ ತುಪ್ಪ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ.

- ಕೋಫ್ತಾಗಳನ್ನು ತಯಾರಿಸಲು ಈ ಮಿಶ್ರಣವನ್ನು ಚೆನ್ನಾಗಿ ಬೆರೆಸಿ, ಸಣ್ಣ ಸಣ್ಣ ಚೆಂಡುಗಳ ಆಕಾರ ನೀಡಿ. ಬಿಸಿಯಾದ ತುಪ್ಪದಲ್ಲಿ ಈ ಕೋಫ್ತಾಗಳನ್ನು ಹೊಂಬಣ್ಣ ಬರುವವರೆಗೆ ಹುರಿದು, ಒಂದು ಪಕ್ಕಕ್ಕೆ ತೆಗೆದಿರಿಸಿಕೊಳ್ಳಿ.

- ಅಕ್ಕಿ ಬೇಯಿಸಲು, 1.5 ಲೀಟರ್ ನೀರನ್ನು ಕುದಿಸಿ. ಅದಕ್ಕೆ ಉಪ್ಪು ಮತ್ತು ಉಳಿದ ಚಕ್ಕೆ-ಏಲಕ್ಕಿ ಪುಡಿಯನ್ನು ಸೇರಿಸಿ.

- ನಂತರ ನೆನೆಸಿಟ್ಟ ಅಕ್ಕಿಯನ್ನು ಹಾಕಿ ಅರ್ಧದಷ್ಟು ಬೇಯಿಸಿ. ಅಕ್ಕಿ ಅರೆಬೆಂದ ನಂತರ ನೀರನ್ನು ಬಸಿದು, ಅಕ್ಕಿಯನ್ನು ಪಕ್ಕಕ್ಕಿಟ್ಟುಕೊಳ್ಳಿ.

- ಗ್ರೇವಿ ತಯಾರಿಸಲು, ಈರುಳ್ಳಿ ಹುರಿದ ಅದೇ ಪಾತ್ರೆಯಲ್ಲಿ ಮತ್ತೆ ಸ್ವಲ್ಪ ತುಪ್ಪ ಹಾಕಿ. ಇದಕ್ಕೆ ಈರುಳ್ಳಿ ಪೇಸ್ಟ್ ಮತ್ತು ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಮಧ್ಯಮ ಉರಿಯಲ್ಲಿ ಚೆನ್ನಾಗಿ ಹುರಿಯಿರಿ.

- ಈಗ ಕೆಂಪು ಮೆಣಸಿನ ಪುಡಿಯನ್ನು ಸೇರಿಸಿ, ಮತ್ತಷ್ಟು ಹುರಿದು, ನಂತರ ಹುರಿದ ಕೋಫ್ತಾಗಳನ್ನು ಹಾಕಿರಿ.

- ಒಂದು ಕಪ್ ನೀರು ಸೇರಿಸಿ ಕೋಫ್ತಾಗಳನ್ನು ಬೇಯಿಸಿ. ಇದೇ ಸಮಯದಲ್ಲಿ, ಕೇಸರಿಯನ್ನು ಬೆಚ್ಚಗಿನ ಹಾಲಿನಲ್ಲಿ ನೆನೆಸಿಡಿ.

'ದಮ್' ಕಟ್ಟುವ / ಹಾಕುವ ವಿಧಾನ

- ದಪ್ಪ ತಳದ ಪಾತ್ರೆಯಲ್ಲಿ, ಮೊದಲು ಅರ್ಧ ಬೆಂದ ಅಕ್ಕಿಯನ್ನು ಸಮವಾಗಿ ಹರಡಿ. ಅದರ ಮೇಲೆ ತಯಾರಿಸಿದ ಕೋಫ್ತಾಗಳು ಮತ್ತು ಸ್ವಲ್ಪ ಗ್ರೇವಿಯನ್ನು ಹಾಕಿ.

- ನಂತರ, ಅರ್ಧದಷ್ಟು ಗುಲಾಬಿ ನೀರು ಮತ್ತು ಅರ್ಧದಷ್ಟು ಕೇಸರಿ ಹಾಲನ್ನು ಇದರ ಮೇಲೆ ಸಮವಾಗಿ ಸುರಿಯಿರಿ.

- ಉಳಿದ ಅಕ್ಕಿಯನ್ನು ಇದರ ಮೇಲಿನ ಪದರವಾಗಿ ಹರಡಿ. ನಂತರ ಉಳಿದ ಗುಲಾಬಿ ನೀರು ಮತ್ತು ಕೇಸರಿ ಹಾಲನ್ನು ಸೇರಿಸಿ.

- ಪಾತ್ರೆಯ ಮುಚ್ಚಳವನ್ನು ಹಿಟ್ಟಿನಿಂದ ಅಂಚುಗಳನ್ನು ಸಂಪೂರ್ಣವಾಗಿ ಸೀಲ್ ಮಾಡಿ, ಸುಮಾರು 20 ನಿಮಿಷಗಳ ಕಾಲ ಕಡಿಮೆ ಉರಿಯಲ್ಲಿ ದಮ್ ಆಗಲು ಬಿಡಿ.

- ದಮ್ ಹಾಕಿ ಬೇಯಿಸಿದ ನಂತರ, ಮುಚ್ಚಳ ತೆಗೆದು, ಅದರ ಮೇಲೆ ಹುರಿದ ಈರುಳ್ಳಿಯಿಂದ ಅಲಂಕರಿಸಿ.

- ಇಷ್ಟು ಮಾಡಿದರೆ ಸಾಕು, ಅವಧಿ ಕೋಫ್ತಾ ಪುಲಾವ್ (Nawabi Style Kofta Pulao) ಸವಿಯಲು ಸಿದ್ಧ. ಇದನ್ನು ರಾಯಿತಾ ಅಥವಾ ಸಲಾಡ್‌ನೊಂದಿಗೆ ಸವಿಯಿರಿ.