ಇಡ್ಲಿ, ದೋಸೆ ಪಕ್ಕಕ್ಕೆ ಇಡಿ.. ಈ ಸ್ಪೆಷಲ್ ಖಪ್ರೋಲಿ ಟ್ರೈ ಮಾಡಿ! ಹತ್ತಿಯಂತೆ ಮೃದು, ಈ ರುಚಿಗೆ ಮಾರುಹೋಗ್ತೀರಾ!

ಇಡ್ಲಿ, ವಡೆ ಪಕ್ಕಕ್ಕೆ ಇಡಿ.. ಮಹಾರಾಷ್ಟ್ರದ ಸ್ಪೆಷಲ್ ಖಪ್ರೋಲಿ ಟ್ರೈ ಮಾಡಿ! ಹತ್ತಿಯಂತೆ ಮೃದು, ಈ ರುಚಿಗೆ ಮಾರುಹೋಗ್ತೀರಾ! ಹೌದು, ದಿನನಿತ್ಯದ ಇಡ್ಲಿ, ದೋಸೆ ಮತ್ತು ವಡೆಗಳಿಂದ ಬೇಸತ್ತಿದ್ದೀರ? ಇದರ ಬದಲಿಗೆ ವಿಭಿನ್ನ ರುಚಿಗಳನ್ನು ಹುಡುಕುವ ಆಹಾರಪ್ರಿಯರಿಗೆ, ಮಹಾರಾಷ್ಟ್ರದ ಸಾಂಪ್ರದಾಯಿಕ 'ಖಪ್ರೋಲಿ' (Maharashtra Special Khaproli) ಒಂದು ಅತ್ಯುತ್ತಮ ಆಯ್ಕೆಯಾಗಿದೆ. ಇದು ದೋಸೆಯಂತೆ ಕಂಡರೂ, ರುಚಿ-ಮೃದುತ್ವದಲ್ಲಿ ವಿಭಿನ್ನ. ಬಾಯಲ್ಲಿ ನೀರೂರಿಸುವ ಈ ವಿಶೇಷ ತಿನಿಸು ಹೊಸ ಅನುಭವ ನೀಡುತ್ತದೆ.

ಕಂಡಾಕ್ಷಣ ದೋಸೆ ಅಥವಾ ಊತಪ್ಪವನ್ನು ಹೋಲುವ ಖಪ್ರೋಲಿ, ರುಚಿ ಮತ್ತು ಮೃದುತ್ವದಲ್ಲಿ ತನ್ನದೇ ಆದ ವೈಶಿಷ್ಟ್ಯ ಹೊಂದಿದೆ. ಗರಿಗರಿಯಾದ ದೋಸೆಯಂತಲ್ಲದೆ (sponge dosa), ಇದು ಹತ್ತಿಯಂತೆ ನವಿರಾಗಿ, ಸ್ಪಂಜಿನಂತೆ ಮೃದುವಾಗಿರುತ್ತದೆ. ಸಿಹಿಯಾದ ತೆಂಗಿನ ಹಾಲು (ರಸ) ಅಥವಾ ಖಾರವಾದ ಚಟ್ನಿಯೊಂದಿಗೆ ಸವಿದರೆ ಇದು ಅದ್ಭುತ ರುಚಿ ನೀಡುತ್ತದೆ.

ಮಕ್ಕಳಿಂದ ಹಿಡಿದು ಹಿರಿಯರವರೆಗೂಎಲ್ಲರೂ ಇಷ್ಟಪಡುವ ಈ ಸುಲಭ ತಯಾರಿಕೆಯ ಖಾದ್ಯ, ಬಾಯಲ್ಲಿ ಇಟ್ಟಾಕ್ಷಣ ಕರಗಿಹೋಗುವಷ್ಟು ಕೋಮಲವಾಗಿರುತ್ತದೆ. ಹತ್ತಿಯಂತ ಮೃದುವಾದ ಖಪ್ರೋಲಿ ತಯಾರಿಸುವ ವಿಧಾನವನ್ನು (Khaproli Recipe) ಈಗ ವಿವರವಾಗಿ ತಿಳಿದುಕೊಳ್ಳೋಣ.

ಖಪ್ರೋಲಿ ತಯಾರಿಸಲು ಬೇಕಾದ ಸಾಮಗ್ರಿಗಳು

• ಅಕ್ಕಿ
• ಉದ್ದಿನ ಬೇಳೆ
• ಕಡಲೆ ಬೇಳೆ
• ಅವಲಕ್ಕಿ (ದಪ್ಪ)
• ಮೆಂತ್ಯ ಕಾಳು
• ಅರಿಶಿನ
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ ಅಥವಾ ಬೆಣ್ಣೆ (ಬೇಯಿಸಲು)

ಖಪ್ರೋಲಿ ತಯಾರಿಸುವ ವಿಧಾನ

- ಖಪ್ರೋಲಿ ತಯಾರಿಕೆಯ ಮೊದಲ ಹಂತವೆಂದರೆ ಸಾಮಗ್ರಿಗಳನ್ನು ನೆನೆಸುವುದು. ಒಂದು ಪಾತ್ರೆಯಲ್ಲಿ ಅಕ್ಕಿಯನ್ನು ಶುದ್ಧ ನೀರಿನಿಂದ ತೊಳೆದು ನೆನೆಸಿಡಿ.

- ಒಟ್ಟಿಗೆ ಉದ್ದಿನ ಬೇಳೆ, ಕಡಲೆ ಬೇಳೆ ಮತ್ತು ಮೆಂತ್ಯ ಕಾಳುಗಳನ್ನು ಇನ್ನೊಂದು ಪಾತ್ರೆಯಲ್ಲಿ ತೊಳೆದು, ಸಾಕಷ್ಟು ನೀರೊಂದಿಗೆ ಕನಿಷ್ಠ ಆರು ಗಂಟೆಗಳ ಕಾಲ ನೆನೆಸಲು ಬಿಡಿ. ಇದು ಹಿಟ್ಟಿನ ಉತ್ತಮ ಹುದುಗುವಿಕೆಗೆ ಅತ್ಯಗತ್ಯ.

- ಅಕ್ಕಿ ಮತ್ತು ಬೇಳೆಗಳು ಚೆನ್ನಾಗಿ ನೆನೆದ ನಂತರ, ಹಿಟ್ಟನ್ನು ರುಬ್ಬುವ ಸುಮಾರು ಹತ್ತು ನಿಮಿಷಗಳ ಮೊದಲು ಅವಲಕ್ಕಿಯನ್ನು ಪ್ರತ್ಯೇಕವಾಗಿ ನೀರಿನಲ್ಲಿ ನೆನೆಸಿಟ್ಟುಕೊಳ್ಳಿ. ಇದು ಖಪ್ರೋಲಿಗೆ ವಿಶೇಷ ಮೃದುತ್ವವನ್ನು ನೀಡುತ್ತದೆ.

- ನೆನೆಸಿದ ಅಕ್ಕಿ, ಬೇಳೆ ಮಿಶ್ರಣ ಮತ್ತು ಅವಲಕ್ಕಿಯನ್ನು ಮಿಕ್ಸಿ ಅಥವಾ ಗ್ರೈಂಡರ್ ಜಾರ್‌ಗೆ ಹಾಕಿ. ಅಗತ್ಯವಿರುವಷ್ಟು ನೀರನ್ನು ಸೇರಿಸುತ್ತಾ, ನಯವಾದ ಪೇಸ್ಟ್ ಆಗುವವರೆಗೆ ರುಬ್ಬಿಕೊಳ್ಳಿ. ಗಮನಿಸಿ, ಈ ಹಿಟ್ಟು ದೋಸೆ ಹಿಟ್ಟಿಗಿಂತ ಕೊಂಚ ದಪ್ಪವಾಗಿ, ಅತಿಯಾಗಿ ತೆಳುವಾಗದಂತೆ ನೋಡಿಕೊಳ್ಳಿ.

- ರುಬ್ಬಿದ ಹಿಟ್ಟನ್ನು ದೊಡ್ಡ ಪಾತ್ರೆಯೊಂದಕ್ಕೆ ವರ್ಗಾಯಿಸಿ, ಅದಕ್ಕೆ ಚಿಟಿಕೆ ಅರಿಶಿನ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ. ನಂತರ, ಹಿಟ್ಟನ್ನು ಕೈಗಳಿಂದಲೇ ಚೆನ್ನಾಗಿ ಮಿಕ್ಸ್ ಮಾಡಿ. ಈ ತಂತ್ರವು ಹಿಟ್ಟು ಸಮರ್ಪಕವಾಗಿ ಹುದುಗಲು ನೆರವಾಗುತ್ತದೆ. ಪಾತ್ರೆಯ ಮುಚ್ಚಳ ಮುಚ್ಚಿ, ಬೆಚ್ಚಗಿನ ಸ್ಥಳದಲ್ಲಿ ಸುಮಾರು ಎಂಟು ಗಂಟೆಗಳ ಕಾಲ ಅಥವಾ ರಾತ್ರಿಯಿಡೀ ಹುದುಗಲು ಬಿಡಿ.

- ಮರುದಿನ ಬೆಳಗ್ಗೆ ಹಿಟ್ಟು ಚೆನ್ನಾಗಿ ಉಬ್ಬಿ, ಮೃದುವಾಗಿ ಹುದುಗಿರಬೇಕು. ಸೌಟಿನಿಂದ ಒಮ್ಮೆ ನಿಧಾನವಾಗಿ ಬೆರೆಸಿ. ನಂತರ, ಒಲೆಯ ಮೇಲೆ ಕಾವಲಿಯನ್ನು (ತವಾ) ಇಟ್ಟು ಬಿಸಿ ಮಾಡಿ. ಕಾವಲಿ ಚೆನ್ನಾಗಿ ಕಾದ ನಂತರ, ಅದರ ಮೇಲೆ ಸ್ವಲ್ಪ ಎಣ್ಣೆ ಸವರಿ.

- ನಂತರ, ಒಂದು ಸೌಟು ಹಿಟ್ಟನ್ನು ಕಾವಲಿಯ ಮೇಲೆ ಹಾಕಿ ದೋಸೆಯಂತೆ ನಿಧಾನವಾಗಿ ಹರಡಿ. ನೆನಪಿಡಿ, ಇದನ್ನು ಸಾಮಾನ್ಯ ದೋಸೆಯಂತೆ ತೆಳ್ಳಗೆ ಮಾಡದೆ, ಬದಲಿಗೆ ಕಲಿದೋಸೆ ಅಥವಾ ಊತಪ್ಪದಂತೆ ಕೊಂಚ ದಪ್ಪವಾಗಿ ಬೇಯಿಸಬೇಕು. ಸುತ್ತಲೂ ಸ್ವಲ್ಪ ಎಣ್ಣೆ ಅಥವಾ ಬೆಣ್ಣೆಯನ್ನು ಹಾಕಿ, ಎರಡೂ ಬದಿಗಳಲ್ಲಿ ಚಿನ್ನದ ಕಂದು ಬಣ್ಣ ಬರುವವರೆಗೆ ಬೇಯಿಸಿ.

ಇಷ್ಟು ಮಾಡಿದರೆ, ಹತ್ತಿಯಂತೆ ಮೃದುವಾದ ಮಹಾರಾಷ್ಟ್ರದ ವಿಶೇಷ ಖಪ್ರೋಲಿ ಸವಿಯಲು ಸಿದ್ಧ. ಇದನ್ನು ಸಿಹಿಯಾದ ತೆಂಗಿನ ಹಾಲಿನ ಪಾನೀಯ (ರಸ) ಅಥವಾ ನಿಮ್ಮ ನೆಚ್ಚಿನ ಖಾರವಾದ ಚಟ್ನಿಯೊಂದಿಗೆ ಬಡಿಸಬಹುದು. ದಕ್ಷಿಣ ಭಾರತದ ಸಾಂಪ್ರದಾಯಿಕ ತಿಂಡಿಗಳಿಗೆ ಇದು ಒಂದು ಪೌಷ್ಟಿಕ ಹಾಗೂ ರುಚಿಕರ ಪರ್ಯಾಯವಾಗಿದೆ.