ಒಡೆದ ಹಾಲಿನಿಂದ ಮಾಡಿ ಈ ಅದ್ಭುತ ರುಚಿ ಬರ್ಫಿ! 3 ಪದಾರ್ಥ, 10 ನಿಮಿಷ ಸಾಕು.. ಸಿಂಪಲ್ ಟ್ರಿಕ್ ಇಲ್ಲಿದೆ

ಹಾಲು ಒಡೆದಿದೆಯಾ? ಬೇಸರ ಬೇಡ... ಬಾಯಲ್ಲಿ ಕರಗುವ ಈ ಬರ್ಫಿ ಮನೆಯಲ್ಲೇ ಮಾಡಿ! ಹೌದು, ಹಾಲು ಒಡೆದುಹೋಯಿತೆಂದರೆ (Curdled Milk) ಬೇಸರ ಸಾಮಾನ್ಯ. ಇನ್ನು ಚಿಂತಿಸಬೇಕಾಗಿಲ್ಲ.. ಇಂತಹ ಸಂದರ್ಭದಲ್ಲಿ ಮನೆಯಲ್ಲೇ ಅತ್ಯಂತ ಸುಲಭವಾಗಿ ಮತ್ತು ರುಚಿಕರವಾಗಿ ಈ ಹೊಸ ರುಚಿಯ ಬರ್ಫಿ (Burfi) ತಯಾರಿಸಬಹುದು. ಈ ಬರ್ಫಿ ತಯಾರಿಸಲು ಬೇಕಾದ ಸಾಮಗ್ರಿಗಳು ಮತ್ತು ಸಿಂಪಲ್ ವಿಧಾನ ಇಲ್ಲಿದೆ.

ಹಾಲು ಹಾಳಾಯಿತು ಎಂದು ಚೆಲ್ಲುವ ಬದಲು, ಇಲ್ಲವೇ ಪನೀರ್ ತಯಾರಿಸಿ ತೃಪ್ತಿಪಡುವ ಬದಲು, ಬಾಯಲ್ಲಿ ಕರಗುವಂತಹ ಹಲ್ವಾಯಿ ಶೈಲಿಯ ಕಲಾಕಂಡ್ (Kalakand Burfi) ಸಿಹಿತಿಂಡಿಯನ್ನು ಕ್ಷಣಮಾತ್ರದಲ್ಲಿ ಸಿದ್ಧಪಡಿಸಬಹುದು. ಅಡುಗೆಮನೆಯಲ್ಲಿ ಅನಿರೀಕ್ಷಿತವಾಗಿ ಹಾಲು ಒಡೆದಾಗ (spoiled milk), ಇದು ಒಂದು ಅದ್ಭುತ ಪರಿಹಾರವಾಗಬಲ್ಲದು.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಸ್ವೀಟ್ ಅಂಗಡಿಗಳಲ್ಲಿ ಕಲಾಕಂಡ್ ಅತ್ಯಂತ ಜನಪ್ರಿಯ. ಉತ್ತಮ ಬೆಲೆಯ ತಿಂಡಿಗಳಲ್ಲಿ ಒಂದೆನಿಸಿದೆ. ಇದರ ವಿಶಿಷ್ಟವಾದ ಕಣಕಣದಂತಹ ವಿನ್ಯಾಸ ಮತ್ತು ಹಾಲಿನ ಸಹಜ ಸಿಹಿ ಎಲ್ಲರನ್ನೂ ಆಕರ್ಷಿಸುತ್ತದೆ. ಸಾಮಾನ್ಯವಾಗಿ ಕಲಾಕಂಡ್ ತಯಾರಿಸಲು ಗಂಟೆಗಟ್ಟಲೆ ಹಾಲು ಕುದಿಸಿ, ಬತ್ತಿಸಿ ಮಾಡಲಾಗುತ್ತದೆ. ಆದರೆ, ಹಾಲು ಅಕಸ್ಮಾತಾಗಿ ಹೊಡೆದು ಹೋದಾಗ, ಅದನ್ನು ಅತ್ಯಂತ ಕಡಿಮೆ ಸಮಯದಲ್ಲಿ ಬಳಸಿಕೊಂಡು ಇದೇ ರುಚಿಯ ಬರ್ಫಿ (Kalakand Burfi Recipe) ಈ ರೀತಿ ತಯಾರಿಸಿ.

ಬರ್ಫಿ ತಯಾರಿಸಲು ಬೇಕಾದ ಸಾಮಗ್ರಿಗಳು

• ಒಡೆದ ಹಾಲು
• ಸಕ್ಕರೆ
• ನೀರು
• ಏಲಕ್ಕಿ ಪುಡಿ
• ಬಾದಾಮಿ
• ಗೋಡಂಬಿ
• ಪಿಸ್ತಾ
• ತುಪ್ಪ

ಬರ್ಫಿ ತಯಾರಿಸುವ ವಿಧಾನ

- ಮೊದಲಿಗೆ, ಚೆನ್ನಾ ಅಂದರೆ ಹಾಲಿನ ಮುದ್ದೆಯನ್ನು ತಯಾರಿಸಿ. ಒಡೆದ ಹಾಲನ್ನು ಒಂದು ನಯವಾದ ಕಾಟನ್ ಬಟ್ಟೆಗೆ ಹಾಕಿ ಸೋಸಿಕೊಳ್ಳಿ.

- ನಂತರ ಬಟ್ಟೆಯನ್ನು ಗಟ್ಟಿಯಾಗಿ ಹಿಂಡಿ, ಹಾಲಿನಲ್ಲಿರುವ ಎಲ್ಲಾ ನೀರನ್ನು ಸಂಪೂರ್ಣವಾಗಿ ತೆಗೆದುಹಾಕಿ. ಬಟ್ಟೆಯಲ್ಲಿ ಉಳಿಯುವ ಗಟ್ಟಿಯಾದ ಹಾಲಿನ ಅಂಶವೇ ಚೆನ್ನಾ.

- ಒಂದು ವೇಳೆ ನಿಂಬೆಹಣ್ಣು ಬಳಸಿ ಹಾಲು ಒಡೆಸಿದ್ದರೆ, ಆ ಚೆನ್ನಾವನ್ನು ಒಮ್ಮೆ ತಣ್ಣೀರಿನಲ್ಲಿ ತೊಳೆದು ಹುಳಿ ಅಂಶವನ್ನು ಹೋಗಲಾಡಿಸಿ.

- ಈಗ, ಒಂದು ದಪ್ಪ ತಳದ ಪಾತ್ರೆಯನ್ನು ಒಲೆಯ ಮೇಲಿಟ್ಟು, ಅದಕ್ಕೆ ಸಿದ್ಧಪಡಿಸಿದ ಚೆನ್ನಾವನ್ನು ಹಾಕಿ. ಸಣ್ಣ ಉರಿಯಲ್ಲಿ ನಿರಂತರವಾಗಿ ಕೈಯಾಡಿಸುತ್ತಾ ಬೇಯಿಸಿ. ಹಾಲಿನ ಮುದ್ದೆಯಲ್ಲಿರುವ ತೇವಾಂಶವು ಸಂಪೂರ್ಣವಾಗಿ ಆವಿಯಾಗುವವರೆಗೆ ಮಿಶ್ರಣವನ್ನು ಹುರಿಯಿರಿ. ಇದು ಬರ್ಫಿಯ ಉತ್ತಮ ವಿನ್ಯಾಸಕ್ಕೆ ಸಹಕಾರಿ.

- ಮತ್ತೊಂದು ಸಣ್ಣ ಪಾತ್ರೆಯಲ್ಲಿ ಸಕ್ಕರೆ ಮತ್ತು ಅರ್ಧ ಕಪ್ ನೀರನ್ನು ಹಾಕಿ ಕುದಿಸಿ. ಸಕ್ಕರೆ ಸಂಪೂರ್ಣವಾಗಿ ಕರಗಿ ಸ್ವಲ್ಪ ಜಿಗುಟಾದ ಪಾಕ ಬಂದಾಗ, ಅದನ್ನು ಪಾತ್ರೆಯಲ್ಲಿ ಬೇಯಿಸುತ್ತಿರುವ ಹಾಲಿನ ಮುದ್ದೆಗೆ ಸೇರಿಸಿ. ಸಕ್ಕರೆ ಮತ್ತು ಚೆನ್ನಾ ಒಂದಕ್ಕೊಂದು ಬೆರೆತು, ಮಿಶ್ರಣವು ಗಟ್ಟಿಯಾಗುತ್ತಾ ಬರುತ್ತದೆ.

- ಮಿಶ್ರಣವು ಪಾತ್ರೆಯ ಅಂಚುಗಳನ್ನು ಬಿಡಲು ಆರಂಭಿಸಿ, ತಿಳಿ ಗೋಧಿ ಬಣ್ಣಕ್ಕೆ ತಿರುಗಿದಾಗ, ಅದಕ್ಕೆ ಏಲಕ್ಕಿ ಪುಡಿಯನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಏಲಕ್ಕಿಯ ಸುಗಂಧವು ಕಲಾಕಂಡ್‌ನ ರುಚಿಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ನಂತರ, ಮಿಶ್ರಣವನ್ನು ಉರಿಯಿಂದ ಕೆಳಗಿಳಿಸಿ.

- ಒಂದು ಪ್ಲೇಟ್ ಅಥವಾ ಟ್ರೇಗೆ ಸ್ವಲ್ಪ ತುಪ್ಪ ಸವರಿ ಸಿದ್ಧಪಡಿಸಿಟ್ಟುಕೊಳ್ಳಿ. ಸಿದ್ಧವಾದ ಕಲಾಕಂಡ್ ಮಿಶ್ರಣವನ್ನು ಈ ಟ್ರೇಗೆ ಹಾಕಿ ಸಮನಾಗಿ ಹರಡಿ. ಅದರ ಮೇಲೆ ಸಣ್ಣಗೆ ಹೆಚ್ಚಿದ ಬಾದಾಮಿ, ಪಿಸ್ತಾ, ಮತ್ತು ಗೋಡಂಬಿ ಚೂರುಗಳನ್ನು ಹರಡಿ, ಚಮಚದಿಂದ ಹಗುರವಾಗಿ ಒತ್ತಿ. ಇದು ಬರ್ಫಿಗೆ ಮತ್ತಷ್ಟು ಆಕರ್ಷಣೆ ಮತ್ತು ರುಚಿಯನ್ನು ನೀಡುತ್ತದೆ.

- ಈ ಪದರವನ್ನು ಪೂರ್ಣವಾಗಿ ತಣ್ಣಗಾಗಲು ಬಿಡಿ. ಬರ್ಫಿಯನ್ನು ಸುಲಭವಾಗಿ ಕತ್ತರಿಸಲು, ಸುಮಾರು ಒಂದು ಗಂಟೆಗಳ ಕಾಲ ಫ್ರಿಡ್ಜ್‌ನಲ್ಲಿಡಲು ಶಿಫಾರಸು ಮಾಡಲಾಗುತ್ತದೆ. ನಂತರ, ನಿಮಗೆ ಇಷ್ಟವಾದ ಆಕಾರದಲ್ಲಿ (ಉದಾಹರಣೆಗೆ ಚೌಕ ಅಥವಾ ತ್ರಿಕೋನ) ಕತ್ತರಿಸಿದರೆ, ರುಚಿಕರವಾದ ಮೃದು ಕಲಾಕಂಡ್ ಬರ್ಫಿ ಸಿದ್ಧ!.

ಮಾಡುವಾಗ ಈ ಟಿಪ್ಸ್ ನೆನಪಿರಲಿ!

ಕಲಾಕಂಡ್ ಮಾಡುವಾಗ ಉರಿ ಯಾವಾಗಲೂ ಸಣ್ಣದಾಗಿರಬೇಕು. ಇಲ್ಲದಿದ್ದರೆ, ಮಿಶ್ರಣ ತಳ ಹಿಡಿದು ಕಹಿಯಾಗುವ ಸಾಧ್ಯತೆ ಇರುತ್ತದೆ. ಬರ್ಫಿ ಒರಟಾಗುವುದನ್ನು ತಪ್ಪಿಸಲು, ಮಿಶ್ರಣವು ಅತಿಯಾಗಿ ಗಟ್ಟಿಯಾಗುವ ಮುನ್ನವೇ ಒಲೆಯಿಂದ ಇಳಿಸಿ. ಮೃದುವಾಗಿರುವಾಗಲೇ ತಟ್ಟೆಗೆ ಹರಡುವುದು ಉತ್ತಮ ಫಲಿತಾಂಶಕ್ಕೆ ಕಾರಣವಾಗುತ್ತದೆ.

ಮುಂದಿನ ಬಾರಿ ಹಾಲು ಒಡೆದರೆ ಖಂಡಿತವಾಗಿಯೂ ಬೇಸರ ಪಡಬೇಡಿ. ಈ ಅದ್ಭುತವಾದ ಮತ್ತು ಸುಲಭವಾದ ಸ್ವೀಟ್ ರೆಸಿಪಿಯನ್ನು ಒಮ್ಮೆ ಪ್ರಯತ್ನಿಸಿ. ನಿಮ್ಮ ಮನೆಯವರು ಇದನ್ನು ಹೋಟೆಲ್‌ನಿಂದ ತಂದದ್ದು ಎಂದು ನಂಬುವುದು ಖಂಡಿತ. ಏಕೆಂದರೆ, ಇದು ಅಷ್ಟು ರುಚಿ ಮತ್ತು ಗುಣಮಟ್ಟದಿಂದ ಕೂಡಿರುತ್ತೆ.