ಬಾಯಲ್ಲಿ ನೀರೂರಿಸುವ ಮಟರ್ ಪುಲಾವ್: ಈ ರುಚಿಗೆ ಮನಸೋಲದವರಿಲ್ಲ.. ಈ ರೀತಿ ಮಾಡಿ

10 ನಿಮಿಷದಲ್ಲಿ ಪುಲಾವ್ ರೆಡಿ! ಹೋಟೆಲ್ ಸ್ಟೈಲ್ ಟೇಸ್ಟಿ ಮಟರ್ ಪುಲಾವ್ ಮಾಡುವ ವಿಧಾನ ಇಲ್ಲಿದೆ. ಎಲ್ಲರೂ ಮೆಚ್ಚುತ್ತಾರೆ. ಹೌದು, ಚಳಿಗಾಲದಲ್ಲಿ ಅತಿಥಿಗಳಿಗಾಗಿ ರುಚಿಕರ ಮಟರ್ ಪುಲಾವ್ (Matar Pulao) ಸಿದ್ಧಪಡಿಸಿ. ಈ ವಿಶೇಷ ಅಡುಗೆಯಲ್ಲಿ ತಾಜಾ ಹಸಿ ಬಟಾಣಿ ಮತ್ತು ಮಸಾಲೆಗಳನ್ನು ಬಳಸಲಾಗುತ್ತದೆ. ಇದರ ಅದ್ಭುತ ರುಚಿ ಮನಮೋಹಕವಾಗಿರುತ್ತದೆ. ಇದನ್ನು ದೈನಂದಿನ ಊಟ ಅಥವಾ ವಿಶೇಷ ಸಂದರ್ಭಗಳಲ್ಲಿಯೂ ಸಹ ಮಾಡಬಹುದಾಗಿದೆ.

ಮಟರ್ ಪುಲಾವ್ ಜನಪ್ರಿಯವಾಗಿರುವ, ತ್ವರಿತವಾಗಿ ತಯಾರಿಸಬಹುದಾದ ಒಂದು ತಿನಿಸು. ಅಕ್ಕಿ ಮತ್ತು ಹಸಿ ಬಟಾಣಿಯನ್ನು ಬಳಸಿ, ಕಡಿಮೆ ಮಸಾಲೆಗಳೊಂದಿಗೆ ಇದನ್ನು ತಯಾರಿಸಲಾಗುತ್ತದೆ. ಸಾಮಾನ್ಯವಾಗಿ ಚಳಿಗಾಲದಲ್ಲಿ ಇದು ಹೆಚ್ಚು ಬಳಕೆಯಲ್ಲಿರುತ್ತದೆ. ಏಕೆಂದರೆ, ಆ ಸಮಯದಲ್ಲಿ ತಾಜಾ ಬಟಾಣಿ ಸುಲಭವಾಗಿ ಲಭ್ಯವಿರುತ್ತದೆ. ಇದನ್ನು ಮೊಸರು, ರಾಯತ, ಉಪ್ಪಿನಕಾಯಿ ಅಥವಾ ಬೇಳೆ ಸಾರಿನೊಂದಿಗೆ ಸವಿಯಬಹುದು.

Photo Credit: ಸಂಗ್ರಹ ಚಿತ್ರ

ಪ್ರೋಟೀನ್ ಮತ್ತು ಫೈಬರ್‌ನ ಮೂಲ

ರುಚಿಯ ಜೊತೆಗೆ, ಮಟರ್ ಪುಲಾವ್ ಆರೋಗ್ಯಕ್ಕೂ ಒಳ್ಳೆಯದು. ಇದು ಪ್ರೋಟೀನ್ ಮತ್ತು ಫೈಬರ್‌ನ ಉತ್ತಮ ಮೂಲವಾಗಿದೆ. ಮಟರ್ ಪುಲಾವ್ ಎಂದರೆ ಹಸಿ ಬಟಾಣಿ ಮತ್ತು ಅಕ್ಕಿಯಿಂದ ತಯಾರಿಸುವ ಒಂದು ಸೌಮ್ಯ ಮಸಾಲೆಯುಕ್ತ ಖಾದ್ಯ. ಇದನ್ನು ತುಪ್ಪ, ಈರುಳ್ಳಿ, ಹಸಿ ಮೆಣಸು ಮತ್ತು ಇಡೀ ಮಸಾಲೆಗಳ ಒಗ್ಗರಣೆಯೊಂದಿಗೆ ಸಿದ್ಧಪಡಿಸಲಾಗುತ್ತದೆ. ಈ ಲೇಖನದಲ್ಲಿ ನಾವು ಮಟರ್ ಪುಲಾವ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ (Matar Pulao Recipe) ಸುಲಭ ವಿಧಾನದ ಬಗ್ಗೆ ತಿಳಿಸಿದ್ದೇವೆ.

ಮಟರ್ ಪುಲಾವ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಬಾಸುಮತಿ ಅಕ್ಕಿ - 1 ಕಪ್
• ಹಸಿ ಬಟಾಣಿ - ¾ ಕಪ್
• ಸಣ್ಣಗೆ ಹೆಚ್ಚಿದ ಈರುಳ್ಳಿ - 1
• ಹಸಿ ಮೆಣಸು - 2
• ಲವಂಗ - 3 ರಿಂದ 4
• ಚಕ್ಕೆ - 1 ಸಣ್ಣ ತುಂಡು
• ಜೀರಿಗೆ - 1 ಚಮಚ
• ತುಪ್ಪ ಅಥವಾ ಎಣ್ಣೆ - 2 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ನೀರು - 2 ಕಪ್

Photo Credit: ಸಂಗ್ರಹ ಚಿತ್ರ

ಮಟರ್ ಪುಲಾವ್ ತಯಾರಿಸುವ ವಿಧಾನ

- ಮೊದಲಿಗೆ, ಅಕ್ಕಿಯನ್ನು ಚೆನ್ನಾಗಿ ತೊಳೆದು 15 ರಿಂದ 20 ನಿಮಿಷಗಳ ಕಾಲ ನೆನೆಸಿಡಿ. ನಂತರ, ಒಂದು ಪ್ಯಾನ್ ಅಥವಾ ಕುಕ್ಕರ್‌ನಲ್ಲಿ ತುಪ್ಪವನ್ನು ಬಿಸಿ ಮಾಡಿ. ಬಿಸಿಯಾದ ತುಪ್ಪಕ್ಕೆ ಜೀರಿಗೆ, ಲವಂಗ, ಚಕ್ಕೆ ಮತ್ತು ಹಸಿ ಮೆಣಸು ಹಾಕಿ ಒಗ್ಗರಣೆ ಮಾಡಿ.

- ಒಗ್ಗರಣೆ ಪರಿಮಳ ಬಂದ ನಂತರ, ಹೆಚ್ಚಿದ ಈರುಳ್ಳಿ ಸೇರಿಸಿ, ತಿಳಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ. ಈಗ ಹಸಿ ಬಟಾಣಿ ಸೇರಿಸಿ, ಎರಡು ನಿಮಿಷಗಳ ಕಾಲ ಬಾಡಿಸಿ. ನಂತರ, ನೆನೆಸಿದ ಅಕ್ಕಿಯನ್ನು ಸೇರಿಸಿ ನಿಧಾನವಾಗಿ ಮಿಕ್ಸ್ ಮಾಡಿ.

- ಅಕ್ಕಿ ಮಿಶ್ರಣಕ್ಕೆ ನೀರು ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ. ನಂತರ, ಮುಚ್ಚಳವನ್ನು ಮುಚ್ಚಿ ಕಡಿಮೆ ಉರಿಯಲ್ಲಿ ಬೇಯಲು ಬಿಡಿ. ನೀರು ಪೂರ್ಣವಾಗಿ ಆರಿ, ಅಕ್ಕಿ ಬೆಂದ ನಂತರ ಗ್ಯಾಸ್ ಆಫ್ ಮಾಡಿ.

- ಬೇಯಿಸಿದ ಪುಲಾವ್ ಅನ್ನು 5 ನಿಮಿಷಗಳ ಕಾಲ ಮುಚ್ಚಿಡಿ. ನಂತರ ನಿಧಾನವಾಗಿ ತಿರುಗಿಸಿ, ಹಗುರವಾಗಿ ಮಾಡಿ. ಇಷ್ಟು ಮಾಡಿದರೆ ಸಾಕು, ಈಗ ರುಚಿಕರವಾದ ಮಟರ್ ಪುಲಾವ್ ಸವಿಯಲು ಸಿದ್ಧ.

ಮಟರ್ ಪುಲಾವ್ ಇನ್ನಷ್ಟು ರುಚಿಕರವಾಗಬೇಕೆ?

ನೀವು ಇದಕ್ಕೆ ಗೋಡಂಬಿ, ಒಣದ್ರಾಕ್ಷಿ, ಕ್ಯಾರೆಟ್ ಅಥವಾ ಕ್ಯಾಪ್ಸಿಕಂ ಸೇರಿಸಬಹುದು. ತುಪ್ಪದಲ್ಲಿ ತಯಾರಿಸುವುದರಿಂದ ಪುಲಾವ್‌ನ ರುಚಿ ಮತ್ತಷ್ಟು ಹೆಚ್ಚುತ್ತದೆ. ಇದನ್ನು ರಾಯತ, ಹಪ್ಪಳ, ಸಲಾಡ್ ಅಥವಾ ಯಾವುದೇ ಗ್ರೇವಿ ಸಬ್ಜಿಗಳಾದ ಚೋಲೆ, ಪನ್ನೀರ್ ಬಟರ್ ಮಸಾಲಾ ಅಥವಾ ದಾಲ್ ಮಖನಿ ಜೊತೆ ಸವಿಯುವುದು ಉತ್ತಮ.