ಬಾಯಿ ಚಪ್ಪರಿಸುವ ರುಚಿ! ಊಟದ ರುಚಿ ಡಬಲ್ ಮಾಡಲು ಈ ಚಟ್ನಿ ಸಾಕು.. ಹಳ್ಳಿ ಶೈಲಿಯಲ್ಲಿ ಮಾಡಿ ನೋಡಿ

ಬಾಯಿ ಚಪ್ಪರಿಸುವ ರುಚಿ! ಊಟದ ರುಚಿ ಹೆಚ್ಚಿಸಲು ಈ ಒಂದೇ ಒಂದು ಚಟ್ನಿ ಸಾಕು. ಹಳ್ಳಿ ಶೈಲಿಯ ನಿಂಬೆಹಣ್ಣು ಮತ್ತು ಕೆಂಪು ಮೆಣಸಿನಕಾಯಿ ಚಟ್ನಿ ಮಾಡಿ ನೋಡಿ. ಪರೋಟದಿಂದ ಕಿಚಡಿವರೆಗೆ, ಎಲ್ಲದಕ್ಕೂ ಸೈ. ಹೌದು, ಊಟದಲ್ಲಿ ಚಟ್ನಿಗಿರುವ (Chutney Recipe) ಸ್ಥಾನ ಅತಿ ವಿಶಿಷ್ಟ. ರುಚಿಕರ ಪಲ್ಯಗಳ ಮತ್ತು ಸಾರುಗಳಿದ್ದರೂ, ಒಂದು ಚಮಚ ಚಟ್ನಿ ಇಲ್ಲದಿದ್ದರೆ ಊಟ ಅಪೂರ್ಣ ಎನಿಸುತ್ತದೆ.

ಕೆಲವೊಮ್ಮೆ ಸರಳವಾದ ಅಡುಗೆಗಳಿಗೂ ಈ ಚಟ್ನಿಗಳು ಹೊಸ ರುಚಿ ನೀಡಬಲ್ಲವು. ಅಂತಹ ಹತ್ತು ಹಲವು ಚಟ್ನಿಗಳ ಸಾಲಿಗೆ ಮತ್ತಷ್ಟು ಮೆರುಗು ನೀಡುವ ಒಂದು ಸರಳ ಹಾಗೂ ವಿಭಿನ್ನ ಚಟ್ನಿ ಎಂದರೆ ನಿಂಬೆಹಣ್ಣು-ಕೆಂಪು ಮೆಣಸಿನಕಾಯಿ ಚಟ್ನಿ (Lemon Red Chilli Chutney). ಹುಳಿ, ಖಾರ ಮತ್ತು ಸಿಹಿಯ ಪರಿಪೂರ್ಣ ಸಮತೋಲನ ಹೊಂದಿರುವ ಈ ರುಚಿಕರ ಚಟ್ನಿ, ನಿಮ್ಮ ಪ್ರತಿಯೊಂದು ತಿಂಡಿ ಮತ್ತು ಊಟದ ಸ್ವಾದವನ್ನು ಡಬಲ್ ಮಾಡುತ್ತೆ.

Photo Credit: ಸಂಗ್ರಹ ಚಿತ್ರ

ಪರೋಟದಿಂದ ಕಿಚಡಿಯವರೆಗೆ, ಯಾವುದೇ ಆಹಾರದೊಂದಿಗೂ ಇದು ಅದ್ಭುತವಾಗಿ ಹೊಂದಿಕೊಳ್ಳುತ್ತದೆ. ಮನೆಯಲ್ಲಿಯೇ ಸುಲಭವಾಗಿ ತಯಾರಿಸಬಹುದಾದ ಈ ಚಟ್ನಿಯ ಮಾಹಿತಿ (Lemon Chutney Recipe) ಇಲ್ಲಿದೆ. ಜೊತೆಗೆ ಅದನ್ನು ಹೆಚ್ಚು ಕಾಲ ತಾಜಾವಾಗಿ ಇಡುವ ಟಿಪ್ಸ್‌ ಕೂಡಾ ಈ ಲೇಖನದಲ್ಲಿ ತಿಳಿಸಲಾಗಿದೆ.

ಆರೋಗ್ಯಕ್ಕೆ ಏನು ಲಾಭ?

ನಿಂಬೆಹಣ್ಣು ವಿಟಮಿನ್ ಸಿ ಯಿಂದ ಸಮೃದ್ಧವಾಗಿದ್ದು, ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹಕಾರಿ. ಚಟ್ನಿಯಲ್ಲಿ ಬಳಸಲಾದ ಜೀರಿಗೆ ಮತ್ತು ಶುಂಠಿಯು ಜೀರ್ಣಕ್ರಿಯೆಗೆ ಸಹಾಯ ಮಾಡುತ್ತದೆ. ಇದು ಬಾಯಿಯ ರುಚಿಯನ್ನು ಹೆಚ್ಚಿಸುವುದರ ಜೊತೆಗೆ ಹಸಿವನ್ನು ಕೂಡಾ ಪ್ರಚೋದಿಸುತ್ತದೆ.

ಈ ಚಟ್ನಿಗೆ ಅಗತ್ಯವಿರುವ ಸಾಮಗ್ರಿಗಳು

• ನಿಂಬೆಹಣ್ಣು - 2
• ಒಣ ಕೆಂಪು ಮೆಣಸಿನಕಾಯಿ - 4 ರಿಂದ 5
• ಉಪ್ಪು - ರುಚಿಗೆ ತಕ್ಕಷ್ಟು
• ಕಪ್ಪು ಉಪ್ಪು - 1 ಚಮಚ
• ಜೀರಿಗೆ - 1 ಚಮಚ
• ಬೆಳ್ಳುಳ್ಳಿ - 3 ಎಸಳು
• ಶುಂಠಿ - ಅರ್ಧ ತುಂಡು
• ಬೆಲ್ಲ ಅಥವಾ ಸಕ್ಕರೆ - 1 ಚಮಚ
• ಎಣ್ಣೆ (ಸಾಸಿವೆ ಎಣ್ಣೆ) - 2 ಚಮಚ

ಈ ಚಟ್ನಿ ತಯಾರಿಸುವ ವಿಧಾನ

- ಮೊದಲು ನಿಂಬೆಹಣ್ಣುಗಳನ್ನು ಚೆನ್ನಾಗಿ ತೊಳೆದು ಸಣ್ಣ ತುಂಡುಗಳಾಗಿ ಕತ್ತರಿಸಿಕೊಳ್ಳಿ.

- ಚಟ್ನಿ ಕಹಿಯಾಗುವುದನ್ನು ತಪ್ಪಿಸಲು ನಿಂಬೆಹಣ್ಣಿನ ಒಳಗಿರುವ ಎಲ್ಲಾ ಬೀಜಗಳನ್ನು ಸಂಪೂರ್ಣವಾಗಿ ತೆಗೆದುಹಾಕುವುದನ್ನು ಖಚಿತಪಡಿಸಿಕೊಳ್ಳಿ.

- ಈಗ ಒಂದು ಸಣ್ಣ ತವಾವನ್ನು ಬಿಸಿ ಮಾಡಿ. ಅದರಲ್ಲಿ ಒಣ ಕೆಂಪು ಮೆಣಸಿನಕಾಯಿ ಮತ್ತು ಜೀರಿಗೆಯನ್ನು ಸ್ವಲ್ಪ ಹೊತ್ತು ಹುರಿದುಕೊಳ್ಳಿ. ಹೀಗೆ ಹುರಿಯುವುದರಿಂದ ಚಟ್ನಿಗೆ ಉತ್ತಮ ಸುಗಂಧ ಮತ್ತು ಗಾಢವಾದ ರುಚಿ ಲಭಿಸುತ್ತದೆ.

- ಬಳಿಕ ಮಿಕ್ಸಿ ಜಾರ್‌ಗೆ ಕತ್ತರಿಸಿದ ನಿಂಬೆಹಣ್ಣಿನ ತುಂಡುಗಳು, ಹುರಿದ ಮೆಣಸಿನಕಾಯಿ ಹಾಗೂ ಜೀರಿಗೆಯನ್ನು ಹಾಕಿ.

- ಇದರೊಂದಿಗೆ ಬೆಳ್ಳುಳ್ಳಿ, ಶುಂಠಿ, ಸಾಮಾನ್ಯ ಉಪ್ಪು, ಕಪ್ಪು ಉಪ್ಪು ಮತ್ತು ಒಂದು ಚಮಚ ಬೆಲ್ಲ ಅಥವಾ ಸಕ್ಕರೆ ಸೇರಿಸಿ. ನುಣ್ಣಗೆ ರುಬ್ಬಿಕೊಳ್ಳಿ. ಅಗತ್ಯವಿದ್ದರೆ ಮಾತ್ರ ಸ್ವಲ್ಪ ನೀರನ್ನು ಬಳಸಬಹುದು.

- ಚಟ್ನಿ ರುಬ್ಬಿದ ನಂತರ, ಎರಡು ಚಮಚ ಸಾಸಿವೆ ಎಣ್ಣೆಯನ್ನು ಬಿಸಿ ಮಾಡಿ. ಅದು ಸಂಪೂರ್ಣವಾಗಿ ತಣ್ಣಗಾದ ಮೇಲೆ ರುಬ್ಬಿದ ಚಟ್ನಿಯೊಂದಿಗೆ ಚೆನ್ನಾಗಿ ಮಿಕ್ಸ್ ಮಾಡಿ.

- ಈ ಹಂತವು ಚಟ್ನಿಯನ್ನು ಹೆಚ್ಚು ಕಾಲ ತಾಜಾವಾಗಿ ಇಡಲು ಮತ್ತು ರುಚಿಯನ್ನು ಹೆಚ್ಚಿಸಲು ನೆರವಾಗುತ್ತದೆ.

- ಈ ಸ್ಪೆಷಲ್ ಚಟ್ನಿ ಹಲವು ಬಗೆಯ ಖಾದ್ಯಗಳೊಂದಿಗೆ ಹೊಂದಿಕೆಯಾಗುತ್ತದೆ.

ಬೆಳಗಿನ ತಿಂಡಿ

ಆಲೂ ಪರೋಟ, ಗೋಬಿ ಪರೋಟ ಅಥವಾ ಸಾಮಾನ್ಯ ಚಪಾತಿಯೊಂದಿಗೆ ಇದರ ರುಚಿ ಅದ್ಭುತವಾಗಿ ಇರುತ್ತದೆ.

ಮಧ್ಯಾಹ್ನದ ಊಟ

ಬಿಸಿಬಿಸಿ ಕಿಚಡಿ, ದಾಲ್-ರೈಸ್ ಅಥವಾ ಮೊಸರನ್ನದ ಜೊತೆ ಈ ಚಟ್ನಿ ಇದ್ದರೆ ಊಟದ ರುಚಿಯೇ ಇಮ್ಮಡಿಯಾಗುತ್ತದೆ.

ಸಂಜೆ ತಿಂಡಿ

ಸಮೋಸಾ ಅಥವಾ ಪಕೋಡಾಗಳಂತಹ ಸಂಜೆಯ ತಿಂಡಿಗಳ ಜೊತೆ ಡಿಪ್ ಆಗಿಯೂ ಇದನ್ನು ಬಳಸಬಹುದು.

ಒಟ್ಟಾರೆ, ನಿಮಿಷಗಳಲ್ಲಿ ತಯಾರಿಸಬಹುದಾದ ಈ ನಿಂಬೆ-ಕೆಂಪು ಮೆಣಸಿನಕಾಯಿ ಚಟ್ನಿ ನಿಮ್ಮ ಮನೆಯವರ ಮೆಚ್ಚುಗೆ ಪಡೆಯುವದರಲ್ಲಿ ಡೌಟೇ ಇಲ್ಲ. ಒಮ್ಮೆ ತಯಾರಿಸಿ ನೋಡಿ, ಇದರ ವಿಶಿಷ್ಟ ರುಚಿ ನಿಮಗೂ ಇಷ್ಟ ಆಗುತ್ತೆ.