ಹಸಿ ಮೆಣಸು-ಮೊಸರು ಕರಿ: ಈ ಬೇಸಿಗೆಗೆ ಇಂಥ ಅಡುಗೆಗಳಿದ್ದರೆ ಆಹಾರ ರುಚಿಸುವುದು

ಈ ಬೇಸಿಗೆಯಲ್ಲಿ ಊಟಕ್ಕೆ ಈ ಮೊಸರಿನ ಸಾರು ಮಾಡಿದರೆ ಊಟ ತುಂಬಾನೇ ರುಚಿ ಅನಿಸುತ್ತೆ, ಮೊಸರು ಸಾರನ್ನು ಹಲವಾರು ರುಚಿಯಲ್ಲಿ ಮಾಡಬಹುದು, ಇದು ತುಂಬಾನೇ ಸರಳವಾದ ರೆಸಿಪಿಯಾಗಿದೆ, ಅಲ್ಲದೆ ಅಷ್ಟೊಂದು ರುಚಿಯಾಗಿರುತ್ತದೆ. ಈ ಮೊಸರು ಸಾರು, ಒಂದು ಪಲ್ಯವಿದ್ದರ ಸಾಕಾಗುತ್ತೆ ಊಟ ಬಲು ರುಚಿ ಅನಿಸುವುದು, ಊಟ ತುಂಬಾನೇ ತೃಪ್ತಿ ಅನಿಸುವುದು. ಬನ್ನಿ ಇದನ್ನು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಗ್ರಿ
ಅರ್ಧ ಲೀಟರ್ ಮೊಸರು
ಸ್ವಲ್ಪ ಕಲ್ಲುಪ್ಪು ಸೇರಿಸಿ ಮಿಕ್ಸ್ ಮಾಡಿ
ಚಿಕ್ಕ ಈರುಳ್ಳಿ 15-20
8-10 ಎಸಳು ಬೆಳ್ಳುಳ್ಳಿ
ಸ್ವಲ್ಪ ಶುಂಠಿ
ಸ್ವಲ್ಪ ಜೀರಿಗೆ
ಅರ್ಧ ಚಮಚ ಕಾಳು ಮೆಣಸು
ಹಸಿಮೆಣಸು 5-6 ( ಖಾರ ಸ್ವಲ್ಪ ಕಡಿಮೆ ಇರುವ ಹಸಿ ಮೆಣಸು 10-12 ಕೂಡ ಬಳಸಬಹುದು)

ಒಗ್ಗರಣೆಗೆ
2 ಚಮಚ ಎಣ್ಣೆ
ಸ್ವಲ್ಪ ಸಾಸಿವೆ
ಸ್ವಲ್ಪ ಮೆಂತೆ
ಸ್ವಲ್ಪ ಕರಿಬೇವು
ಸ್ವಲ್ಪ ಇಂಗು
ಸ್ವಲ್ಪ ಅರಿಶಿಣ ಪುಡಿ
ಸ್ವಲ್ಪ ಕೊತ್ತಂಬರಿ ಪುಡಿ

ಮಾಡುವ ವಿಧಾನ

• ಅರ್ಧ ಲೀಟರ್ ಮೊಸರನ್ನು ಒಂದು ಬೌಲ್‌ಗೆ ಹಾಕಿ ಅದಕ್ಕೆ ಅರ್ಧ ಚಮಚ ಮೊಸರು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿಡಿ
• ಈಗ ನೀವು ಚಿಕ್ಕ ಈರುಳ್ಳಿ, ಬೆಳ್ಳುಳ್ಳಿ, ಶುಂಠಿ, ಕಾಳು ಮೆಣಸು, ಜೀರಿಗೆ ಇವೆಲ್ಲಾ ಮಿಕ್ಸಿ ಜಾರ್‌ಗೆ ಹಾಕಿ ತರಿತರಿಯಾಗಿ ರುಬ್ಬಿ ಇಡಿ.
• ಕಲ್ಲಿನಲ್ಲಿಯೂ ಜಜ್ಜಬಹುದು
• ಈಗ ಹಸಿ ಮೆಣಸು ತೊಟ್ಟು ಸಹಿತ ತೆಗೆದುಕೊಂಡು ಅರ್ಧದಷ್ಟು ಕತ್ತರಿಸಿ ಹಸಿ, ಎರಡು ಭಾಗ ಮಾಡಬಾರದು , ಕತ್ತಿಯಿಂದ ಗೀಟು ಹಾಕಿದರೆ ಸಾಕು.
• ಈ ಪಾತ್ರೆ ಬಿಸಿ ಮಾಡಿ (ಮಣ್ಣಿನ ಪಾತ್ರೆಯಾದರೆ ಇನ್ನೂ ಒಳ್ಳೆಯದು)
• ಅದಕ್ಕೆ 2 ಚಮಚ ತೆಂಗಿನೆಣ್ಣೆ ಹಾಕಿ(ನೀವು ತೆಂಗಿನೆಣ್ಣೆ ಬಳಸಲ್ಲ ಅಂದರೆ ನೀವು ಅಡುಗೆಗೆ ಬಳಸುವ ಎಣ್ಣೆ ಹಾಕಬಹುದು)
• ಎಣ್ಣೆ ಬಿಸಿಯಾದಾಗ ಸ್ವಲ್ಪ ಸಾಸಿವೆ ಹಾಕಿ, ಸಾಸಿವೆ ಚಟ್‌ಪಟ್‌ ಶಬ್ದ ಮಾಡುತ್ತದೆ
• ಸ್ವಲ್ಪ ಮೆಂತೆ ಹಾಕಿ
• ಈಗ ಹಸಿ ಮೆಣಸು ಹಾಕಿ
• ಹಸಿ ಮೆಣಸು ಸ್ವಲ್ಪ ಫ್ರೈಯಾದರೆ ಸಾಕು
• ಸ್ವಲ್ಪ ಕರಿಬೇವು ಹಾಕಿ
• ಸ್ವಲ್ಪ ಉಪ್ಪು ಸೇರಿಸಿ (ಉಪ್ಪು ಮೊಸರಿನಲ್ಲಿಯೂ ಇರುವುದರಿಂದ ಸ್ವಲ್ಪ ಹಾಕಿದರೆ ಸಾಕು)
• ಸ್ವಲ್ಪ ಅರಿಶಿಣ ಪುಡಿ ಸೇರಿಸಿ
• ಈಗ ಜಜ್ಜಿಟ್ಟಿರುವ ಈರುಳ್ಳಿ ಮಿಶ್ರಣ ಹಾಕಿ
• ಅದರ ಹಸಿ ವಾಸನೆ ಹೋಗುವವರೆಗೆ ಫ್ರೈ ಮಾಡಿ
• ಈಗ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ
• ಸ್ವಲ್ಪ ಇಂಗು ಪುಡಿ ಸೇರಿಸಿ
• ಈಗ ಮೊಸರು ಸೇರಿಸಿ ಒಂದು ನಿಮಿಷ ಬಿಸಿ ಮಾಡಿ ಸ್ಟೌವ್‌ ಆಫ್‌ ಮಾಡಿ
• ಇಷ್ಟು ಮಾಡಿದರೆ ಸಾಕು ಮೆಣಸಿನಕಾಯಿ-ಮೊಸರಿನ ಕರಿ ರೆಡಿ.
• ಅನ್ನದ ಜೊತೆ ಕಲೆಸಿಕೊಂಡು ತಿನ್ನಲು ಸೂಪರ್ ಆಗಿರುತ್ತದೆ.

ಸಲಹೆ:

1. ಮೊಸರಿಗೆ ಒಂದು ತೊಟ್ಟು ಕೂಡ ನೀರು ಸೇರಿಸಬೇಡಿ
2. ಮೊಸರನ್ನು ತುಂಬಾ ಕುದಿಸಬೇಡಿ, ಬೇಕಿದ್ದರೆ ಸ್ಟೌವ್‌ ಆಫ್ ಮಾಡಿದ ತಕ್ಷಣ ಮೊಸರು ಹಾಕಿದರೂ ಆಗುತ್ತೆ
3. 3-4 ಜನರಿಗೆ ತಯಾರು ಮಾಡುವಾಗ ಅರ್ಧ ಲೀಟರ್ ಮೊಸರು ಸಾಕಾಗುತ್ತೆ
4. ಇನ್ನೂ ಹೆಚ್ಚಿನ ಜನರಿಗೆ ತಯಾರು ಮಾಡುವುದಾದರೆ ಅದಕ್ಕೆ ತಕ್ಕಂತೆ ಸಾಮಗ್ರಿ ಹೆಚ್ಚು ಬಳಸಿ
5. ಹಸಿಮೆಣಸಕಾಯಿ ತುಂಬಾ ಖಾರ ಇರುವುದು, ಖಾರ ಕಡಿಮೆ ಇರುವುದು ಸಿಗುತ್ತೆ, ಹೆಚ್ಚು ಖಾರ ಇರುವ ಹಸಿಮೆಣಸು ಬಳಸುವುದಾದರೆ ನಿಮ್ಮ ಖಾರಕ್ಕೆ ತಕ್ಕಂತೆ ಬಳಸಿದರೆ ಸಾಕಾಗುತ್ತೆ.
6. ಇದಕ್ಕೆ ಚಿಕ್ಕ ಈರುಳ್ಳಿಯೇ ಬಳಸಬೇಕು, ದೊಡ್ಡ ಈರುಳ್ಳಿ ಅಷ್ಟು ಟೇಸ್ಟ್ ಅನಿಸಲ್ಲ.