ಬೇಳೆ ಹಾಕದೆಯೇ ಟೊಮೆಟೊ ಸಾರು ಮಾಡಬಹುದು: ಅನ್ನ, ಮುದ್ದೆಗೆ ಒಳ್ಳೆಯ ಕಾಂಬಿನೇಷನ್‌

ಟೊಮೆಟೊ ಸಾರು ಬೇಳೆ ಹಾಕದೆ ಕೂಡ ಗಟ್ಟಿ ಸಾರು ಸಾರು ಮಾಡಬಹುದು. ಈ ಸಾರು ಅನ್ನ, ಚಪಾತಿ, ಮುದ್ದೆ ಇವುಗಳ ಜೊತೆ ತಿನ್ನಲು ತುಂಬಾನೇ ರುಚಿಯಾಗಿರುತ್ತದೆ, ಈ ಸಾರು ಆಡುವ ವಿಧಾನ ಸ್ವಲ್ಪ ಭಿನ್ನ, ನೀವು ಟೊಮೆಟೊ ಮೊದಲಿಗೆ ಬೇಯಿಸಿ ಮಾಡುವ ಸಾರಿದು. ಇದನ್ನು ಮಾಡುವ ವಿಧಾನ ಸರಳವಾಗಿದ್ದು ಈ ರೆಸಿಪಿ ನೋಡೋಣ:

ಬೇಕಾಗುವ ಸಾಮಗ್ರಿ
(ಬೇಯಿಸಿ ಪೇಸ್ಟ್ ಮಾಡಲು)

ಟೊಮೆಟೊ 5-6
ಸ್ವಲ್ಪ ಹುಣಸೆಹಣ್ಣು
ಸ್ವಲ್ಪ ಬೆಳ್ಳುಳ್ಳಿ
1 ಚಮಚ ಕಾಳು ಮೆಣಸು
ಹಸಿ ಮೆಣಸು

ಸಾರು ಮಾಡಲು
1 ಚಮಚ ಎಣ್ಣೆ
ಸ್ವಲ್ಪ ಸಾಸಿವೆ
ಸ್ವಲ್ಪ ಜೀರಿಗೆ
ಬೆಳ್ಳುಳ್ಳಿ 3-4ಎಸಳು
ಕರಿಬೇವು
ರುಬ್ಬಿದ ಪೇಸ್ಟ್
ಬೇಯಿಸಿದ ನೀರು
ಸ್ವಲ್ಪ ನೀರು
ಅರಿಶಿಣ
ರುಚಿಗೆ ತಕ್ಕ ಉಪ್ಪು

ಮಾಡುವ ವಿಧಾನ:

• ನೀವು ಪಾತ್ರೆಗೆ ಒಂದು ಕಪ್ ನೀರಿಗೆ 5-6 ಟೊಮೆಟೊ (ತೊಳೆದು ಎರಡು ಭಾಗ ಮಾಡಿ) ಹಾಕಿ
• 2-3 ಹಸಿ ಮೆಣಸು ಅದೇ ನೀರಿಗೆ ಹಾಕಿ
• ಒಂದು ನೆಲ್ಲಿಕಾಯಿ ಗಾತ್ರದಷ್ಟು ಹುಣಸೆಹಣ್ಣು ಹಾಕಿ (ಟೊಮೆಟೊ ತುಂಬಾ ಹುಳಿಯಿದ್ದರೆ ಹುಣಸೆಹಣ್ಣು ಕಡಿಮೆ ಹಾಕಿ)
• 5-6 ಎಸಳು ಬೆಳ್ಳುಳ್ಳಿ ಸೇರಿಸಿ
• 1 ಚಮಚ ಕಾಳು ಮೆಣಸು
• 1 ಚಮಚ ಜೀರಿಗೆ ಹಾಕಿ
• ಈಗ ನೀವು ಸ್ವಲ್ಪಸೇರಿಸಿ ಪಾತ್ರೆಯ ಬಾಯಿ ಮುಚ್ಚಿ ಬೇಯಿಸಿ
• ಟೊಮೆಟೊ ಮೆತ್ತಗಾಗುವರೆಗೆ ಬೇಯಿಸಿ
• ಟೊಮೆಟೊ ಚೆನ್ನಾಗಿ ಬೆಂದ ಮೇಲೆ ಸ್ಟೌವ್‌ ಆಫ್ ಮಾಡಿ ತಣ್ಣಗಾಗಲು ಬಿಡಿ
• ನಂತರ ಬೇಯಿಸಿದ ನೀರನ್ನು ಪ್ರತ್ಯೇಕ ಪಾತ್ರೆಗೆ ಸೋಸಿ ಇಡಿ
• ಈಗ ನೀವು ಟೊಮೆಟೊಮೇಲಿರುವ ಸಿಪ್ಪೆ ತೆಗೆಯಿರಿ, ಚೆನ್ನಾಗಿ ಬೆಂದಿರುವುದರಿಂದ ಸಿಪ್ಪೆ ಸುಲಭದಲ್ಲಿ ತೆಗೆಯಬಹುದು.
• ಈಗ ಬೇಯಿಸಿ ಟೊಮೆಟೊ, ಹಸಿ ಮೆಣಸು ,ಬೆಳ್ಳುಳ್ಳಿಗೆ ನೀವು 1/4 ಕಪ್ ತೆಂಗಿನ ತುರಿ ಕೂಡ ಸೇರಿಸಿ ನುಣ್ಣನೆ ರುಬ್ಬಿಕೊಳ್ಳಿ.
• ಈಗ ನೀವು ಸಾರಿನ ಪಾತ್ರೆಗೆ ಒಂದು ಚಮಚ ಎಣ್ಣೆ ಹಾಕಿ
• ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಿ
• ಸಾಸಿವೆ ಚಟ್‌ಪಟ್‌ ಶಬ್ದ ಮಾಡುವಾಗ 1/2 ಚಮಚ ಜೀರಿಗೆ ಹಾಕಿ, 3-4 ಎಸಳು ಬೆಳ್ಳುಳ್ಳಿ, 2 ಒಣ ಮೆಣಸು ಮುರಿದು ಹಾಕಿ, ನಂತರ ಸ್ವಲ್ಪ ಕರಿ ಬೇವು ಹಾಕಿ, ಈರುಳ್ಳಿ ಬೇಕಿದ್ದರೆ ಒಂದು ಈರುಳ್ಳಿ ಹಾಕಿ ಅದು ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ
• ನಂತರ ರುಬ್ಬಿದ ಪೇಸ್ಟ್ ಹಾಕಿ, ಬೇಯಿಸುವಾಗ ಇಟ್ಟ ನೀರು ಸೇರಿಸಿ, ರುಚಿಗೆ ತಕ್ಕ ಉಪ್ಪು ಸೇರಿಸಿ ಕುದಿಸಿದರೆ ಟೊಮೆಟೊ ಸಾರು ರೆಡಿ.
• ಇದಕ್ಕೆ ಬೇಕಿದ್ದರೆ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಉರಿಯಿಂದ ಇಳಿಸಿದರೆ ರುಚಿಯಾದ ಸಾರು ರೆಡಿ.

ನೀವು ಟೊಮೆಟೊ ಚಿಕ್ಕ ಟೊಮೆಟೊ ಅಥವಾ ಹುಳಿ ಟೊಮೆಟೊ, ಜಾಮೂನು ಟೊಮೆಟೊ ಬಳಸಬಹುದು, ಆದರೆ ಹಸಿ ಟೊಮೆಟೊ ಬಳಸಬೇಡಿ, ಹಣ್ಣಾದ ಟೊಮೆಟೊ ಬಳಸಿ.