ಖಾರ ಖಾರ ಹುಳಿ ಹುಳಿಯ ಹುಣಸೆ ಹುಳಿ ಗೊಜ್ಜು..! ಎಲ್ಲಾ ಊಟಕ್ಕೂ ಸೈ.!

ಬೆಳಗ್ಗೆ ತಿಂಡಿಗೆ ಯಾವುದಾರು ಚಟ್ನಿ, ಗೊಜ್ಜು, ಪಲ್ಯ ಮಾಡಿ ಸವಿಯುವುದು ಸಾಮಾನ್ಯ. ಏಕೆಂದರೆ ಬೆಳಗ್ಗೆ ತಿಂಡಿಗೆ ಈ ರೀತಿಯಾಗಿ ಯಾವುದಾದರು ಪಲ್ಯ, ಗೊಜ್ಜು ಇದ್ದರೇನೆ ಆ ತಿಂಡಿಗೆ ಮತ್ತಷ್ಟು ರುಚಿ ಬರಲಿದೆ. ಹೀಗಾಗಿ ಕಾಳು ಪಲ್ಯ, ಗೊಜ್ಜು, ಚಟ್ನಿ ಮಾಡಿಯೇ ಮಾಡುತ್ತಾರೆ. ಆದ್ರೆ ನಿತ್ಯ ತಿಂಡಿಗೆ ನಿತ್ಯವೂ ಒಂದೊಂದು ಚಟ್ನಿ, ಮಾಡುವುದು ಅಂದ್ರೆ ಹೆಚ್ಚು ಕೆಲಸ ಹಿಡಿದಂತೆ.

ಆದ್ರೆ ನಾವೊಮ್ಮೆ ಮಾಡಿದ ಗೊಜ್ಜು ಹಲವು ವಾರ ಇಟ್ಟು ಸವಿಯಬಹುದಾಗಿದ್ದರೆ ಎಲ್ಲರು ಸಹ ಮಾಡಲು ಮುಂದಾಗುತ್ತಾರೆ. ಹೀಗಾಗಿ ನಾವಿಂದು ಹುಣಸೆ ಹುಳಿಯ ಖಾರ ಖಾರದ ಗೊಜ್ಜು ಮಾಡುವ ಕುರಿತು ತಿಳಿದುಕೊಳ್ಳೋಣ. ಹುಣಸೆ ಹುಳಿಯ ಈ ಗೊಜ್ಜು ಅತ್ಯಂತ ರುಚಿಕರವಾಗಿರುತ್ತೆ. ಈ ಗೊಜ್ಜನ್ನು ನೀವು ಚಪಾತಿ, ದೋಸೆ, ಇಡ್ಲಿ ಸೇರಿ ಎಲ್ಲಾ ತಿಂಡಿಗ ಜೊತೆಗೂ ಸವಿಯಬಹುದು.

ನಾವಿಂದು ಈ ಹುಣಸೆ ಹುಳಿ ಗೊಜ್ಜು ಮಾಡುವ ಕುರಿತು ತಿಳಿಯೋಣ. ಈ ಗೊಜ್ಜನ್ನು ಹಲವು ದಿನಗಳ ಕಾಲ ಇಟ್ಟು ಸವಿಯಬಹುದು, ಹೀಗಾಗಿ ಈ ಗೊಜ್ಜು ನೀವು ಬೇಕಾದಾಗ ಮಾಡಿ ಇಟ್ಟು ಯಾವಾಗ ಬೇಕಾದರೆ ಆಗ ಸವಿಯಬಹುದು. ಹಾಗಾದ್ರೆ ಈ ಗೊಜ್ಜು ಮಾಡುವುದು ಹೇಗೆ? ಹುಣಸೆ ಹುಳಿ ಗೊಜ್ಜು ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?, ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಹುಣಸೆ ಹುಳಿ ಗೊಜ್ಜು ಮಾಡಲು ಬೇಕಾಗುವ ಪದಾರ್ಥಗಳು

• ಹುಣಸೆ ಹುಳಿ
• ಸಾಂಬಾರ್ ಈರುಳ್ಳಿ
• ಬೆಳ್ಳುಳ್ಳಿ
• ಜೀರಿಗೆ
• ಸಾಸಿವೆ
• ಮೆಂತ್ಯ
• ಕರಿಬೇವು
• ಒಣ ಮೆಣಸು
• ಟೊಮೆಟೋ
• ಖಾರದ ಪುಡಿ
• ಧನಿಯಾ ಪುಡಿ
• ಅರಶಿಣ
• ಎಣ್ಣೆ
• ತುಪ್ಪ
• ಬೆಲ್ಲ
• ಉಪ್ಪು

ಹುಣಸೆ ಹುಳಿ ಗೊಜ್ಜು ಮಾಡುವುದು ಹೇಗೆ?

ಮೊದಲು ಒಂದು ಬಾಣಲೆ ಒಲೆ ಮೇಲೆ ಇಟ್ಟು ಅದಕ್ಕೆ ಮೂರರಿಂದ ನಾಲ್ಕು ಸ್ಪೂನ್ ಎಣ್ಣೆ ಹಾಕಿಕೊಳ್ಳಿ. ಅನಂತರ ಇದಕ್ಕೆ ಸಾಸಿವೆ, ಜೀರಿಗೆ, ಮೆಂತ್ಯ ಕಾಳು, ಬೆಳುಳ್ಳಿ, ಕರಿಬೇವು, ಒಣ ಮೆಣಸು ಹಾಕಿ ಫ್ರೈ ಮಾಡಿಕೊಳ್ಳಿ. 1 ನಿಮಿಷದ ಬಳಿಕ ಇಡಿ ಸಾಂಬಾರ್ ಈರುಳ್ಳಿಯನ್ನು ಹಾಕಿಕೊಳ್ಳಿ. 10 ಸಾಂಬಾರ್ ಈರುಳ್ಳಿ ಹಾಕಿ ಸಾಂಬಾರ್ ಈರುಳ್ಳಿ ಇಲ್ಲದಿದ್ದರೆ 2 ಸಾಮಾನ್ಯ ಈರುಳ್ಳಿಯನ್ನು ಕತ್ತರಿಸಿಕೊಂಡು ಇದಕ್ಕೆ ಬಳಸಬಹುದು.

ಈಗ 2 ನಿಮಿಷ ಫ್ರೈ ಆದ ಬಳಿಕ ಇದಕ್ಕೆ ಖಾರದ ಪುಡಿ, ಧನಿಯಾ ಪುಡಿ, ಅರಶಿಣ ಪುಡಿ ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಈಗ ಮಿಕ್ಸಿ ಜಾರ್‌ಗೆ 2 ಟೊಮೆಟೋ ಹಾಕಿಕೊಂಡು ಚೆನ್ನಾಗಿ ಪೇಸ್ಟ್ ಮಾಡಿಕೊಂಡು ಆ ಪೇಸ್ಟ್ ಅನ್ನು ಈ ಬಾಣಲೆಗೆ ಹಾಕಿಕೊಂಡು ಮಿಕ್ಸ್ ಮಾಡಿ. 3 ನಿಮಿಷ ಮುಚ್ಚಳ ಮುಚ್ಚಿ ಬೇಯಿಸಿಕೊಳ್ಳಬೇಕು.

ಈಗ ಗಟ್ಟಿಯಾದ ಗೊಜ್ಜು ಕಾಣಿಸುತ್ತೆ. ಈಗ ಒಂದು ನಿಂಬೆ ಹಣ್ಣು ಗಾತ್ರದ ಹುಣಸೆ ಹುಳಿಯನ್ನು ನೀರಿನಲ್ಲಿ ನೆನೆಸಿ ಅದರಿಂದ ಹುಳಿ ತೆಗೆದು ಹಾಕಿಕೊಳ್ಳಿ. ನಂತರ ಇದಕ್ಕೆ ಅರ್ಧ ಗ್ಲಾಸ್ ನೀರು ಹಾಕಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಕಿಕೊಂಡು 5 ನಿಮಿಷ ಕುದಿಬರಲು ಬಿಡಬೇಕು. ಕೊನೆಯದಾಗಿ ಇದಕ್ಕೆ ಸ್ವಲ್ಪ ಬೆಲ್ಲ, ಒಂದು ಸ್ಪೂನ್ ತುಪ್ಪ ಹಾಕಿ ಮಿಕ್ಸ್ ಮಾಡಿಕೊಂಡರೆ ಸಾಕಾಗುತ್ತದೆ. ನಿಮ್ಮ ಮುಂದೆ ಖಾರ ಖಾರದ ಈ ಹುಣಸೆ ಹುಳಿ ಗೊಜ್ಜು ರೆಡಿಯಾಗುತ್ತದೆ. ನೀವು ಕೂಡ ಒಮ್ಮೆ ಮನೆಯಲ್ಲಿ ಇದನ್ನು ಟ್ರೈ ಮಾಡಿ ನೋಡಿ.

ಇದನ್ನು ಹಲವು ದಿನಗಳ ಕಾಲ ಇಟ್ಟು ಯಾವುದೇ ತಿಂಡಿ, ಊಟದ ಜೊತೆಗೂ ಕೂಡ ಬಳಸಬಹುದು. ಖಾರ ಖಾರ ಹುಳಿ ಹುಳಿಯಾದ ಇದರ ರುಚಿ ಅದ್ಭುತವಾಗಿರುತ್ತೆ.