ಹಬ್ಬದ ಸಂಭ್ರಮ ಹೆಚ್ಚಿಸುವ ಕಾಲಾ ಜಾಮೂನ್.. ಬಾಯಲ್ಲಿ ಇಟ್ಟರೆ ಅಮೃತ! ಮಾಡೋದು ಹೇಗೆ?

ಗುಲಾಬ್ ಜಾಮೂನ್ ಎಲ್ಲರೂ ಇಷ್ಟಪಡುವ ಸಿಹಿ ತಿನಿಸು. ಆದರೆ, ಇದೇ ಗುಲಾಬ್ ಜಾಮೂನ್ (gulab jamun) ಅನ್ನು ಸ್ವಲ್ಪ ವಿಭಿನ್ನವಾಗಿ ಮಾಡುವ ಕಾಲಾ ಜಾಮೂನ್ ಕೂಡ ಬಹಳ ಜನಪ್ರಿಯ. ಮನೆಯಲ್ಲಿ ಇದನ್ನು ಸರಿಯಾಗಿ ಮಾಡಲು ಕಷ್ಟ ಎನ್ನುವವರಿಗೆ ಕೆಲವು ಸರಳ ಸಲಹೆಗಳೊಂದಿಗೆ ಸಿಹಿ ಅಂಗಡಿಗಳಲ್ಲಿ ಸಿಗುವಂತಹ ಪರಿಪೂರ್ಣ ಕಾಲಾ ಜಾಮೂನ್ (Kala Jamun Recipe) ತಯಾರಿಸುವ ವಿಧಾನ ಇಲ್ಲಿದೆ. ಇದನ್ನು ಅನುಸರಿಸಿ ನೀವು ಸುಲಭವಾಗಿ ಈ ರುಚಿಕರ ಸಿಹಿ ತಿನಿಸನ್ನು ಸಿದ್ಧಪಡಿಸಬಹುದು.

ಹಬ್ಬದ ಸಂಭ್ರಮವನ್ನು ಹೆಚ್ಚಿಸಲು ಮನೆಯಲ್ಲಿ ತಯಾರಿಸಿದ ಸಿಹಿ ತಿನಿಸುಗಳು ಅತ್ಯಗತ್ಯ. ಅನೇಕರು ಗುಲಾಬ್ ಜಾಮೂನ್‌ಗೆ ಒಗ್ಗಿಕೊಂಡಿರುತ್ತಾರೆ. ಆದರೆ, ಕಾಲಾ ಜಾಮೂನ್ ವಿಭಿನ್ನ ರುಚಿಯನ್ನು ಹೊಂದಿದೆ. ಇದು ಗುಲಾಬ್ ಜಾಮೂನ್‌ಗಿಂತ ಗಾಢವಾದ ಬಣ್ಣವನ್ನು ಹೊಂದಿದ್ದು, ಇದರ ಅದ್ಭುತ ರುಚಿ ನಿಮ್ಮ ಹೃದಯವನ್ನು ಗೆಲ್ಲುತ್ತದೆ. ಈ ಹಬ್ಬದ ಋತುವಿನಲ್ಲಿ ನಿಮ್ಮ ಅಡುಗೆ ಸಾಮರ್ಥ್ಯಕ್ಕೆ ನಿಮ್ಮ ಅತಿಥಿಗಳು ಖಂಡಿತಾ ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ. ಯಾವುದೇ ವಿಶೇಷ ಸಂದರ್ಭ ಅಥವಾ ಹಬ್ಬದ ಶುಭ ದಿನಗಳಲ್ಲಿ ಮನೆಯಲ್ಲಿ ಕಾಲಾ ಜಾಮೂನ್ ತಯಾರಿಸಲು (Kala Jamun) ಕಲಿಯಿರಿ. ಇದರ ತಯಾರಿಕೆಯ ಸರಳ ವಿಧಾನ ಇಲ್ಲಿದೆ.

ಕಾಲಾ ಜಾಮೂನ್‌ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಹಸಿ ಹಾಲು ಕೋವಾ - 200 ಗ್ರಾಂ
• ಪನೀರ್ (ತುರಿದ) - 100 ಗ್ರಾಂ
• ಮೈದಾ ಹಿಟ್ಟು - 3 ಸ್ಪೂನ್
• ಸಕ್ಕರೆ - 2 ಕಪ್
• ಏಲಕ್ಕಿ ಪುಡಿ - 1/4 ಸ್ಪೂನ್
• ಗುಲಾಬಿ ಎಸೆನ್ಸ್ - 1/2 ಸ್ಪೂನ್
• ಕೇಸರಿ - ಒಂದು ಚಿಟಿಕೆ
• ನಿಂಬೆಹಣ್ಣಿನ ರಸ - ಸ್ವಲ್ಪ
• ನೀರು - ಅಗತ್ಯಕ್ಕೆ ತಕ್ಕಷ್ಟು
• ತುಪ್ಪ ಅಥವಾ ಅಡುಗೆ ಎಣ್ಣೆ - ಹುರಿಯಲು

ಕಾಲಾ ಜಾಮೂನ್ ತಯಾರಿಸುವ ವಿಧಾನ

• ಮೊದಲಿಗೆ, ಒಲೆಯ ಮೇಲೆ ಒಂದು ಪಾತ್ರೆಯಲ್ಲಿ ನೀರನ್ನು ಕುದಿಸಿ. ಅದಕ್ಕೆ ಸಕ್ಕರೆ ಸೇರಿಸಿ. ಸಕ್ಕರೆ ಸಂಪೂರ್ಣವಾಗಿ ಕರಗಿದ ನಂತರ, ಮಿಶ್ರಣದ ಮೇಲ್ಭಾಗದಲ್ಲಿ ಸಂಗ್ರಹವಾದ ಕಶ್ಮಲವನ್ನು ತೆಗೆದುಹಾಕಿ.

• ಇದಾದ ನಂತರ ನಿಂಬೆ ರಸ, ಏಲಕ್ಕಿ ಪುಡಿ ಮತ್ತು ಕೇಸರಿ ಸೇರಿಸಿ ಚೆನ್ನಾಗಿ ಮಿಕ್ಸ್‌ ಣ ಮಾಡಿ. ಈ ಪಾಕವು ದಾರದ ಸ್ಥಿತಿಗೆ ಬರದೆ ನೀರಾಗಿಯೇ ಇರಬೇಕು.

• ಈಗ ಇನ್ನೊಂದು ಪಾತ್ರೆಯಲ್ಲಿ ಹಸಿ ಹಾಲು ಕೋವಾ ಮತ್ತು ತುರಿದ ಪನೀರ್ ಅನ್ನು ಹಾಕಿ ಚೆನ್ನಾಗಿ ಕಲಸಿ. ಇದಕ್ಕೆ ಮೈದಾ ಸೇರಿಸಿ ನಯವಾದ ಹಿಟ್ಟಾಗುವವರೆಗೆ ಕಲಸಿ.

• ಒಂದು ವೇಳೆ ಹಿಟ್ಟು ಗಟ್ಟಿಯಾಗಿದ್ದರೆ ಸ್ವಲ್ಪ ಹಾಲು ಸೇರಿಸಬಹುದು. ಈ ಹಿಟ್ಟಿನ ಮಿಶ್ರಣದಿಂದ ಸಣ್ಣ ಸಣ್ಣ ಉಂಡೆಗಳನ್ನು ಅಥವಾ ನಿಮಗೆ ಇಷ್ಟವಾದ ಆಕಾರದ ಜಾಮೂನ್‌ಗಳನ್ನು ತಯಾರಿಸಿಕೊಳ್ಳಿ.

• ಈಗ ಒಲೆ ಆನ್ ಮಾಡಿ ಕಡಾಯಿಯಲ್ಲಿ ಎಣ್ಣೆ ಬಿಸಿ ಮಾಡಿ. ಎಣ್ಣೆ ಬಿಸಿಯಾದ ನಂತರ, ಉರಿಯನ್ನು ಕಡಿಮೆ ಮಾಡಿ. ಈಗಾಗಲೇ ತಯಾರಿಸಿರುವ ಹಿಟ್ಟಿನ ಉಂಡೆಗಳನ್ನು ಒಂದೊಂದಾಗಿ ಹಾಕಿ. ಅವು ಕಪ್ಪು ಬಣ್ಣಕ್ಕೆ ತಿರುಗುವವರೆಗೆ ಹುರಿಯಿರಿ.

• ಹೆಚ್ಚು ಉರಿಯಲ್ಲಿ ಹುರಿದರೆ ಹೊರಭಾಗ ಮಾತ್ರ ಕಪ್ಪಾಗಿ ಒಳಗಡೆ ಸರಿಯಾಗಿ ಬೇಯುವುದಿಲ್ಲ. ಕಪ್ಪು ಬಣ್ಣಕ್ಕೆ ತಿರುಗಿದ ನಂತರ, ಅವುಗಳನ್ನು ಎಣ್ಣೆಯಿಂದ ತೆಗೆದು ಮೊದಲೇ ತಯಾರಿಸಿದ ಸಕ್ಕರೆ ಪಾಕದಲ್ಲಿ ಅದ್ದಿ.

• ರುಚಿ ಉತ್ತಮವಾಗಿರಲು ಸಕ್ಕರೆ ಪಾಕವು ಬೆಚ್ಚಗಿರುವಂತೆ ನೋಡಿಕೊಳ್ಳಿ. ಈ ಜಾಮೂನ್‌ಗಳನ್ನು ಸುಮಾರು ಎರಡು ಗಂಟೆಗಳ ಕಾಲ ಪಾಕದಲ್ಲಿ ನೆನೆಸಿದರೆ, ರುಚಿಕರವಾದ ಕಾಲಾ ಜಾಮೂನ್ ಸವಿಯಲು ಸಿದ್ಧವಾಗುತ್ತವೆ.

ಇಲ್ಲಿ ನೀಡಲಾದ ಸರಳ ವಿಧಾನವನ್ನು ಅನುಸರಿಸಿದರೆ, ಮನೆಯಲ್ಲೇ ರುಚಿಕರವಾದ ಕಾಲಾ ಜಾಮೂನ್ ತಯಾರಿಸಬಹುದು.